Espiritucunaga manami cay Pachacho cawanchu ni wanunchu

Espiritucunataga manami ricanchichu, waquincuna alita ruran y waquincunana mana alita ruran. ¿Paycunaga runacuna wanuptin espirituncunachuraj caycan?

Pipis wanuptin manami paypita espiritun yargur maypapis puriycanchu. Chaypaj parlar Bibliapis rasunpa cajtami wilacun, Tayta Jehovami runacunata camashga, chaymi musyan imataj pasan pipis wanuptin (Salmo 83:18; 2 Timoteo 3:16).

Bibliaga wilacun “alpapita” Adán runata Jehová Dios camashganta (Génesis 2:7). Nircurmi cuyaylapaj Edén jardincho tiyananpaj nergan. Adancush Diosta cäsucunman cargan mana wanuypa canancama cawaycanman cargan. Musyaycarna jatun juchata rurargan chaymi Jehová Adanta nergan: “Alpapita kamashqami kaykanki. Tsaymi wanushpayki alpaman kutinkipaq” (Génesis 3:19).

¿Imataj chaypita yachacunchi? ¿Maychotaj Adán caycargan cay Pachacho manaraj cawar? Payga ni cielucho ni Pachacho ni maychopis caycarganchu. Chaymi Jehová “alpaman kutinkipaq” niptenga wanunanpaj parlaycargan. Chauraga pipis wanuptin ¿alman puriycanmi nishwanchuraj? Manami.

Y ¿ima nishwantaj canancama wanoj runacunapita? ¿Paycunapis ushacashgachuraj? Biblia cayno wilacun:

• “Wanurqa lapantsipis [runacunapis y uywacunapis] ushakäshunmi. Lapantsitapis alpalapitami ruramashqantsi. Wanurqa lapantsipis alpamanmi tikrashun” (Eclesiastés 3:20).

• “Wanukurnaqa manami imatapis musyashunnatsu ni imatapis munashunnatsu” (Eclesiastés 9:5).

• “Kuyakuq kashqantsipis, chiki kashqantsipis y imata munashqantsipis” ushacanmi (Eclesiastés 9:6).

• “Wanurnaqa manami imatapis rurankinatsu, yachankinatsu ni musyankinatsu” (Eclesiastés 9:10).

• “Paycunaga wañushpan cashgan allpamanmi ticran. Ima-aycata rurananpaj yarpashancunapis chay junajllami ushacanga” (Salmo 146:4, TDI).

¿Gampaj sasarächu cay textucuna nishganman creinayquipaj? Mä maslata yachacushun. Achca familiacunacho runa caj aruptinraj micunapäpis caycan. Pero pay wanucuptin ichanga familiancunaga nacar galaycärin ¿au? Öraga micuyta tarinalanpäpis sasanami ticracurin, y hasta waquin chiquicoj runacunapis nacachinmanchi. Chauraga ‘wanushgacunapa alman puriycaptin’, ¿imanirtaj cay familiacho wanushgan runa jinala yanapacuycanchu warmintapis wamrancunatapis? Naga leishganchi textucuna nishganno, chay runa wanushga captinmi imatapis rurayta puedinchu (Salmo 115:17).

Chauraga ¿wanushgacuna mananachuraj cawarimunga? Wanushgacuna cawarimunanpaj cajpitaga nircurna parlarishun. Ichanga wanushgacunaga manami musyanchu ima rurashganchicunata. Paycunaga ricashunquichu, wiyashunquichu ni parlapäshunquichu, pitapis yanapanchu ni nacachinchu, chaymi paycunataga manchacushwanchu (Eclesiastés 9:4; Isaías 26:14).