¡RICCHA RICCHALA CAYCÄNAPAJ!
Ucrania naciunpita maychica runacuna gueshpiypa aywacärin
2022 watami, 24 febrero quilla, Rusia nación guerrata galaycachish Ucraniata ushacächinanpaj. Chayraycurga maychicaj runacunami marcancunata jaguirir aywacärish.a
Ucraniapita Natalia, de Járkov, cayno nin: “Bombacuna pashtarmi galacaycamurgan, chay junajga alapami manchacurgä. Trencunapami runacuna aywacaycärergan, chaymi nogacunapis nipäcurgä ‘aywacushun’. Ichic maletäcunalatami apacärergä, necesitashgäcunalatami apanapaj cargan: documentucuna, jampicuna, yacu y imalatapis micunapaj. Bombacunaga pashtaycashgalami pero lapanta jaguirirmi aywacärergä”.
Nadia, de Járkov, cayno nin: “Yarpaylapis yarpargächu guerra galacuycunanpaj. Pero ilajpita wiyargä may chaycho bombacuna pashtashganta. Chauraga aywacunäpaj decidirgä. Tutaraj captinmi trenwan aywacurgä, Lviv nishgan marcaman, chaypitana Polonia naciunpa carruwan aywacurgä”.
Caycunapita yachacurishun:
¿Imaraycurtaj runacunaga lapanta jaguirir aywacärin?
Rusia naciunpa culpanraycur cay guerra caycaptinpis Bibliaga wilacunmi imacunaraycur guerracuna cashganta.
Cay Pachacho gobiernucunaga manami alchapäcushgachu runacunapa problemancunata. Runacunata yanapänapaj trucanga pitapis nacachipäcunmi (Eclesiastés 4:1; 8:9).
Diabluga, “Cay mundupa gobernantin” captin imayca mana alicunata rurachin runacunata, Bibliapis cayno nin: “Cay pachacho juchallancho caycajcunami ichanga dyablupa maquincho carcaycan” (Juan 14:30; 1 Juan 5:19, Tayta Diosninchi Isquirbichishan).
Unaypitana achca problemacuna cashga captinpis Bibliaga parlamunmi canan wichan imacuna más cananpa cajta. 2 Timoteo 3:1 niycan “ultimu tiempucho runakuna aläpa nakananpaq kashqanta” (Margos Yarowilca Lauricocha Biblia). Chaymi guerracunata, desgraciacunata, muchuycunata y gueshyacunatapis masraj ricaycanchi. Caycunaraycurga, wasincunata jaguirir achca runacuna gueshpiypa aywacurcaycan (Lucas 21:10, 11).
¿Ima ali wilacuytaj caycan gueshpiypa aywacojcunapaj?
Bibliaga wilacunmi Camacojninchi Jehováb alapa yarpachacun imaycancunata jaguirir gueshpiypa aywacojcunapaj (Deuteronomio 10:18). Payga aunicushgana Gobiernunwan alapa nacaj runacunapa problemancunata alchananpaj. Gobiernunga cieluchomi camacashga caycan. Runacunapa Gobiernunga cangapänachu (Daniel 2:44; Mateo 6:10). Gobiernunwanmi Jehovaga Diablutapis ushacächenga (Romanos 16:20). Jina Diospa Gobiernunlami entero Pachacho juntula cawachimäshun. Chay wichanga piwanpis juc yarpayla juc shongula caycäshun. Pipis wasinpita gueshpiypa aywacunganachu. Biblia cayno nin: “Chauraga mana manchacuypanami runacuna goyangapaj. Cada-ünunnami jamarpäcongapaj übas yöranpa, ïgus yöranpa llantuncunacho. Munayniyoj Tayta Diosmi nisha chayno cananpaj” (Miqueas 4:4).
Diosninchilami alchanga guerraraycur nacaycaj runacunapa problemancunata. Chay wichanga mananami pipis wasinta jaguirir gueshpicunganachu. Imano cananpaj juc ishcaylata ricärishun:
Guerracuna. “Mandaptinmi maytsaychöpis guërra mana” canganachu (Salmo 46:9). Guerracunata Diosninchi imano ushacächinanpaj maslata musyanayquipaj, cayta leiy: “¿Imataraj Dios ruranga cay Pachacho jaucalana cawanapaj?”.
Fiyu runacuna rurapäcushgan. “[Jehovaga] fiyu runacunapita salbangami” (Salmo 72:14). Pipis ali runaman imano ticrananpaj maslata musyayta munarga, cayta leiy: “Chiquinacuyta ushacächishun”.
Waccha caway. “[Jehovaga] waktsakuna manakuptin yanapanqami” (Salmo 72:12). Pipis manana waccha cananpaj maslata musyayta munarga, cayta leiy: “¿Imaylapis lapanchicunapaj micuy aypangachuraj?”.
Micanay captin. “Intëru jirkakunachöpis [micuy] kichkiyparaq kaykulätsun” (Salmo 72:16). Pipis ninganachu ‘micanaycä’, imano cananpaj musyayta munarga, cayta leiy: “¿Lapanchipaj micuy cangachuraj?”.
¿Bibliaga yanapanmanchuraj gueshpiypa aywacojcunata?
Aumi. Shamoj tiempucho ali caway cananpaj paycunata wilaparpis, canan wichan valurcharcarinanpäpis Bibliapa consejuncunaga caycanmi.
Mana gonganapaj texto: “Mana tantiyakuq runaqa pï nishqantapis juklami criyin. Tantiyakuq runami itsanqa lutalaqa pitapis mana criyintsu” (Proverbios 14:15).
Ima ninantaj: Naupalapitana yarpachacuy ima peligrucuna cananpaj y chaypita imano libracunayquipaj. Fiyu runacunapita cuidacuy. Marcancho jäpa runa captiquega suwapäshunquimanmi. Paycunaga manchacashgano caycashgayquita ricar atacarpis atacashunquimanmi.
Mana gonganapaj texto: “Tsayno kaptinqa mikunantsipaq y jatikunantsipaq kashqalanwan kushishqa kawakushun” (1 Timoteo 6:8).
Ima ninantaj: Charashgayquilawan contentacuy. Necesitashganchicunala captenga cushishgalami ricacushun.
Mana gonganapaj texto: “Alli ricashunayquita munashayquino gamcunapis runa-masiquita alli ricay” (Mateo 7:12).
Ima ninantaj: Cuyacoj cashpayqui pacienciacuy. Chayno captiquega, chayashgayqui marcacho runacunaga cushishga chasquishunqui.
Mana gonganapaj texto: “Chikipäkushuptikipis ama chikipäkuytsu” (Romanos 12:17).
Ima ninantaj: Pipis chiquishuptiquega, piñacushpayqui ama vengacuychu. Piñacuptiquega capazchi masraj chiquipäcushunquipis.
Mana gonganapaj texto: “Imano karpis [Dios] yanapamaptinmi ali kawaykä” (Filipenses 4:13).
Ima ninantaj: Diosta ruwacuycur waran waran caway. Payga calpalantami goyculashunqui aguantanayquipaj.
Mana gonganapaj texto: “Imapitapis ama llaquicunquinachu. Chaypa ruquenga Tayta Diosnillanchïta mañacuy yanapäshunayquipaj. Chaynöpis llapanpita payta agradësicuy. Chayno cawaptiquega Tayta Diosmi alli cawayta goshunquipaj. Chaymi mana yarpachacuypa allillana cawanquipaj. Chayno cawajta ricar runacunaga manami tantiyangachu” (Filipenses 4:6, 7).
Ima ninantaj: Imacunapa pasarpis Diosta mañacuy alapa mana yarpachacuy jaucala ricacunayquipaj. Cayta leiy: “Filipenses 4:6, 7 | ‘Imapitapis ama llaquicuychu’”.
a Guerra galacuycuptinlami Alto Comisionado de las Naciones Unidas para los Refugiados (ACNUR) nishgan wilacurgan Ucrania naciuncho pasashganga alapa laquicuypaj cashganta. 12 junajcunala pasargan y dos millones runacuna juc naciunpa gueshpir aywacärergan, y un millón runacunana jinancho juc marcapa aywacärergan.
b Jehová jutiyojmi Diosninchega (Salmo 83:18). Cayta leiy: “¿Pitaj Jehová?”.