Politicocunaga Armagedón caylachonami caycan nipäcun | ¿Imataj Bibliaga nin?

2022 wata, octubre quilla, lunes 10 tutapa, rusocuna achca bombacunata pashtachergan Ucrania naciuncho juc ishcay ciudänincunacho. Ishcay junajcuna pasarcuptinmi Crimeapita Rusiaman pasaj puente dañacargan bomba pashtaptin. Chaycuna manaraj pasacuptin, waquin politicuna nergan Armagedonga jananchichona caycan.

• “Kennedy [Estados Unidospa presidentin] cawashga wichan y Cuba naciuncho bombacunawan problema cashganpita, Armagedonga caylachonami caycan. [...] Imatapis ushacächicoj bombacuna pashtaptenga Armagedonchochi ushashwan” (Joe Biden, Estados Unidospa presidentin, 6 de octubre de 2022).

• “Acuerduchomi caycä, cayga Armagedón canganta; lapan pachata peligruman churan” (declaraciones de Volodímir Zelenski - Ucraniapa presidentin - tapupaptin nergan, bombacunata utilizarga pasaypa mana alicunami pasanman; BBC News, 8 de octubre de 2022).

¿Ushacächicoj bombacunata pashtaptenga Armagedonmanchuraj chayashwan? ¿Imataj Bibliaga nin?

¿Ushacächicoj bombacuna pashtaptenga Armagedón galaycamungachuraj?

Manami. Armagedón palabraga juc cutilami Bibliacho yurin, Apocalipsis 16:16 textucho. Cayga manami ninanchu naciunpura guerra peliacho ushacächishga cananpaj, sinoga “intëru pachachru reycunata Tayta Dioswan pelyananpag” nin (Apocalipsis 16:14, Ambo-Pasco). Diosga Armagedón guerrachomi lapan pachapa mandajcunata ushacächenga (Daniel 2:44).

Maslata musyanayquipaj Armagedón Pachata imata pasananpaj, cayta leiriy “¿Qué es el Armagedón?”.

¿Ushacächicoj bombacunawan cay Pachata y tiyajcunatapis ushacächingachuraj?

Manami. Shamoj tiempuchoga mandacoj runacunaga bombacunata pashtachinmanmi, ichanga Diosga permitingachu cay Pachata ushacächinanpaj. Bibliaga nin:

• “Kay patsaqa kashqalanmi kaykan” (Eclesiastés 1:4, MYL).

• “Alli runacunami ichanga alli pachacho tiyanga. Chayllachömi imaycamapis goyäconga” (Salmo 37:29, TDI).

Chayno captinpis, canan wichan ima pasacuycashganga Bibliapa profeciancuna nishganno cumplicuycan y último tiempupa ushananchona cawaycanchi (Mateo 24:3-7; 2 Timoteo 3:1-5). Shamoj tiempucho imano cawacunapaj musyanayquipaj gratisla Bibliami yanaparcushunqui.