¿Evolución nishganwancu imaycatapis Jehová camashga?

¿Ima nintaj Biblia?

Manami. Bibliaga ali clarumi yachachicun Diosninchiga “tucuy casta” a runacunata, plantacunata y uywacunata camashgantami (Génesis 1:12, 21, 25, 27; Apocalipsis 4:11). Jina ninmi lapan runacuna Adanlapita y Evalapita mirashganta (Génesis 3:20; 4:1). Y manami yachachicunchu evolución nishganwan imaycatapis Diosninchi camashganta. Chayno captinpis cienciaga tarishga juc castalapita tucuy niraj uywacuna, tucuy color runacuna y tucuy clase plantacuna yurejtami, pero jinalashi caycan juc castalapita. Y chaytaga Biblia manami contradecinchu.b

¿Imatataj yachachicun waquin runacuna?

Evolución teística nishganga achca cosascunapami parlan. Waquincunaga yachachicun Diosninchi imaycatapis evoluciunananpaj dirigishgantami.

Evolución teística nishganga caycunapis canmanmi:

Lapan cawajcunapis, unay tiempucho juc castalapitami shamun.
Juc uywa o imapis chipyaypami cambiarinman juc uywaman o imamanpis. Chaypami macroevolución nipäcun.
Diosninchimi cay lapan cambiucuna ruran.

¿Evolución yachachicushganwan tincuncu Biblia yachachicushgan?

Evolución teística yachachicushgan rasunpa captinga, Génesis libro yachachicushgan manachi rasunpachu canman. Pero Jesusga chay wilacuy rasunpa cashgantami nirgan (Génesis 1:26, 27; 2:18-24; Mateo 19:4-6). Bibliaga yachachicun Jesús cay Pachaman manaraj shamur, cielucho Taytan Dioswan cawashgantami imaycatapis camayta yanapar (Juan 1:3). Chaymi, evoluciunwan imaycatapis Diosninchi camashga nir yachachicushganga, manami tincunchu Biblia yachachicushganwan.

Uywacuna y plantacunapis ichic cambiariptinga, ¿nishwanchuraj evolución cashganta?

Bibliaga manami wilapämanchichu mayyaj juc uywa o plantacunapis cambiananpaj cajta, ni ayca cuti cambiananpaj cajtapis. Jina manami ninchu uywacuna ni plantacunapis mirar galaycushgan hora o tashgan sitiucho cambiayta mana puedishganta. Waquincunaga chaycunacho ichic cambiaptinmi nipäcun juc mushoj uywaman o juc mushoj plantaman ticraycashganta, pero rasun cajchoga manami.

a Génesis librucho “género” o quechuacho “casta” nir Biblia nishganga juc castalapita tucuy niraj uywacunapa, plantacunapa o runacunapämi parlaycan, pero “especie” nir cientificucuna utilizapäcushganga juc clasilapämi parlan. Y ichic cambiucunayoj juc uywa yuriptin cientificucuna evoluciunaycashganta nipäcushganga juc castalapita ichic cambiuyoj juc uywa yurejpami nipäcuycan.

b Chayno ichic cambiashgantami microevolución nir reguipäcun.