Jehovapa testiguncuna jucnin jucninpis yanapänacun

Jehovapa testiguncunaga 200 naciuncunapita mascunacho Diospita yachachipäcun y runacunatapis yanapacun. Pero 35 naciuncunalachomi ima ruraynincunatapis quiquincunapa donaciunnincunawan camacächin. Y guellay mana cashgan marcacunachoga, ¿imanotaj ruran?

Jehovapa testiguncunata Pushajcuna musyapäcun lapan pachacho Testigucuna imata rurapäcuycan y imata necesitashgantapis. Chaymi camacächirgan waquin sucursalcuna achca donaciuncunata chasquiptinga, juc sucursalcunata yanapänanpaj. Unay tiempuchopis cristianucuna chayta rurapäcurgan, muchuycho caycaj hermanucunatami guellayninwan yanapargan, chaynopa manana pipis nacapäcunanpaj (2 Corintios 8:14).

¿Imataj hermanucuna nipäcun juc sucursalcunapita yanapacuyta chasquiptin? Tanzania naciunchoshi casi lapan runacuna pobre capäcun, chayno carpis Mafinga congregaciunga yanapacuyta chasquirgan Diosta aduranapaj wasita alchananpaj. Hermanucuna nipäcun: “Salunta alchamushganpitami más runacuna reuniunman shapäcamun. Jehovata y hermanucunatapis ‘graciaslä’ nipäcö shumaj yanapacuynincunapita. Cananga cuyaylapa wasichomi Jehovata alabapäcö”.

Sri Lanka marcacho COVID-19 gueshyaraycur sasami cargan hermanucuna micuyta tarinanpaj. Pero waquin sucursalcunapa donaciunnincunawan yanapacuytami chasquirgan. Jucmi cargan Imara Fernando y wamran Enosh, paycuna wilacamun: “Alapa agradecido carcaycä hermanucunata sasa tiempucho yanapäcamashganpita. Cushishgami carcaycä Jehovapa marcancho cashpä, y Taytanchi Diostami mañacurcaycä waquin hermanucunatapis yanapänanpaj cay ushanan junajcunacho”.

Hermanucuna juccunata yanaparcuptinga, alapami cushicun. Enosh wamraga juc alcancillata rurargan chaycho guellayninta churananpaj, waquincunata yanapänanpaj. Guadalupe Alvarezga, México naciunchomi tiyan y chaychoga walca guellaylawanmi cawapäcun. Chayno carpis, payga ali shongulanwan donaciunnintami apachicamun. Guadalupe nin: “Jehová cuyacoj y alapa ali cashgantami alapa agradecicö. Musyämi apachicushgä guellaynïga imalachopis yanapanga waquin hermanucunatapis”.

Alapa cushicuypämi sucursalcuna yanapänacuptin. Anthony Carvalho arun Brasil sucursalchomi. Payga nin: “Achca watacunapami waquin sucursalcunapita donaciuncunatami chasquishgäcuna, y cayga yanapargan Diospa munaynin ruracänanpaj. Canan ichanga waquin sucursalcunata yanapacuyta puedinchimi. Hermanucunaga cushi cushilami aycalawanpis yanaparcun, chaynopa musyachicun Jesuspa rasunpa discipuluncuna capäcushganta”.

¿Imanotaj yanapacunman Jehovapa testiguncuna cristiano masincunata? Lapancunami donaciuncunata apachicuyta puedinmi “Obra mundial” nishganpaj. Congregaciuncunachopis ichic cajacuna caycan aycalatapis churananpaj y donate.jw.org paginachopis apachicuyta puedinman. Donaciuncunaga alapami yanapacun.