¿Mayashcanquichu?
¿Imanirtaj israelitacuna culcushta y palomata ofrendacärej?
LEYGA nergan Jehová chasquinanpaj culcushta y palomata ofrendacäriptin. Cay pishgucunataga, ishcancunata juntulami Bibliachoga wilacun. Chauraga israelitacuna maygantapis ofrendacärinmanmi (Lev. 1:14; 12:8; 14:30). Chayga alimi cargan, culcush pishgutaga cada quillacunachoga manami tariypächu cargan. ¿Imanir?
Culcush
Israel naciuncho culcushcunaga shanashgan quillacunalachomi caycaj. Cay pishgucunaga octubre quillacho alalar galaycuptin (otoño) shanaj particunaman aywacärej, ichanga Israel naciuncho yapay shanar galaycuptin (primavera) cutipäcoj (Cant. 2:11, 12; Jer. 8:7). Chaymi israelitacunaga alalay wichan culcushtaga ofrendacunanpaj taripäcojchu.
Paloma brava
Palomacunatami ichanga lapan watachomi taripäcoj, jina chay pishgucunata ashmapäcojmi (Juan 2:14, 16 textuwan tincuchiy). Juc libro wilacushganno “chay naciunchoga palomataga pï maymi ashmapäcoj. Runacunashi wasinpa tapiancho uchcuta rurapaj palomacuna cawananpaj” (Isaías 60:8 textuwan tincuchiy).
Uchcuncho caycaj paloma
¿Imatataj Jehovapita yachachimanchi? Cuyacoj y ali Dios cashganta. Aumi, Jehovaga chasquejmi israelitacuna lapan watacho maygan pishgucunatapis ofrendacäriptin.