Enero

¿Jasche ri Jehová xukoj ri Timoteo rech kpatanin más che? Rumal ri utzalaj taq ubʼantajik (Filip. 2:19-22). Rukʼ ri xubʼij ri apóstol Pablo, kukʼutu che ri Timoteo sibʼalaj kmachʼachʼik, sukʼ, sibʼalaj ajchak y kuyaʼ kkubʼsax kʼuʼxaj chrij. Nim keril ri e qachalal, rumal laʼ ri Pablo loqʼ kril ri Timoteo y xubʼan ta kebʼ ukʼuʼx che uyaʼik nimaʼq taq eqeleʼn pa uqʼabʼ. We ri oj kqakʼut utz taq bʼantajik, más oj loqʼ kojril ri Jehová, y kojukoj más rech kqapatanij pa ri congregación (Sal. 25:9; 138:6). Chqataʼ che ri Jehová che kojutoʼ che rilik jas qabʼantajik rajawaxik kqasukʼumaj. Chojchoman chrij jun bʼantajik y chojchakun chrij wariʼ. Weneʼ kajwataj más che kqanaʼ ri kkinaʼ ri nikʼaj chik. Weneʼ kqabʼan jastaq che kuyak chʼoj o weneʼ kʼax kqabʼan che kikuyik kimak ri e nikʼaj chik. We qetaʼm taj jas rajawaxik kqakʼexo, chqataʼ che jun qachiʼl che kqakubʼsaj qakʼuʼx chrij che kubʼij chqe jas bʼantajik krilo che rajawaxik kqasukʼumaj (Prov. 27:6). w22.04 23 párrs. 4, 5

Ri Jehová kraj che amaqʼel kojkikotik. Qas qetaʼm che wariʼ qastzij rumal che ri kikotemal are jun chke ri ubʼantajik ri Jehová (Gál. 5:22). Y rumal che kqanaʼ más kikotemal are chiʼ kojsipan chke nikʼaj chik, qas utz kqanaʼo are chiʼ kqatzijoj ri utzij ri Dios y are chiʼ keqatoʼ ri e qachalal (Hech. 20:35). Junam che kubʼij pa ri texto re kimik, ri apóstol Pablo xubʼij kebʼ jastaq che kojutoʼ che uriqik ri kikotemal. Nabʼe, kqaya che ri Jehová ri kojkun che uyaʼik. We kqaya ri kojkun che ubʼanik qas kuya kikotemal chqe (Mat. 22:36-38). Ukabʼ, kqajunamaj ta qibʼ kukʼ e nikʼaj chik. We utz qawach, we kʼutum chqawach jas kqabʼan che jun jastaq o kojnaw che ubʼanik, chqamaltyoxij che ri Jehová. Are kʼu, we kʼo chi e nikʼaj qachalal che kekun más che ubʼanik jun jastaq are chiʼ kkitzijoj ri utzij ri Dios, chojkikot kukʼ rumal che tajin kkikoj ri kekun che ubʼanik che uyaʼik uqʼij ri Jehová. w22.04 10 párrs. 1, 2

Xaq kʼateʼ ksachisax kiwach ri e kojonem che qastzij taj rumal laʼ ri winaq sibʼalaj kkimayo (Apoc. 18:8-10). Ri e winaq kkixibʼij kibʼ are chiʼ ksachisax uwach ri Nimalaj Babilonia y rumal laʼ weneʼ kkʼulmataj taq kʼax. Are kʼu ri oj, ri kqapatanij ri Jehová kojkikot rumal kebʼ jastaq. Nabʼe, rumal che ri ukʼulel ri Jehová ksachisax na uwach chbʼe qʼij saq. Y, ukabʼ, ri qakolotajem sibʼalaj naqaj chik kʼo wi. Ri Daniel xubʼij che pa ri kʼisbʼal taq qʼij knimar ri qastzij etaʼmanik. Y je wariʼ tajin kʼulmatajinaq. Rumal che kqachʼobʼ chi ri profecías chrij ri tajin kkʼulmatajik (Dan. 12:4, 9, 10). Waʼ taq profecías riʼ che qas e tzʼaqat kubʼano che nim kqil ri Jehová y ri uTzij, ri Biblia (Is. 46:10; 55:11). Rumal laʼ, amaqʼel chqakowirisaj ri qakojonik. Y, ¿jas kqabʼan che ubʼanik? Are chiʼ amaqʼel kqasikʼij ri Biblia y keqatoʼ e nikʼaj chi winaq rech keʼux rachiʼl ri Jehová. Ri Jehová keʼuchajij konojel ri kkitzukuj ri utobʼanik y amaqʼel kuya «jamaril» chke (Is. 26:3). w22.07 6, 7 párrs. 16, 17

Ri wuj re Apocalipsis kubʼij che ri uQʼatbʼal tzij ri Dios tajin kuqʼat chi tzij pa ri kaj y che xesax lo ri Itzel pa ri kaj y xkʼaq lo cho ri uwach Ulew (Apoc. 12:1-9). Rumal laʼ sibʼalaj kʼo kikotemal pa ri kaj, are kʼu pa ri uwach Ulew sibʼalaj kʼo kʼi kʼaxkʼolil. ¿Jasche? Rumal che ri Satanás petinaq royowal chkij ri upatanelabʼ ri Dios che e kʼo cho ri uwach Ulew (Apoc. 12:12, 15, 17). ¿Jas kqabʼano rech ko kojtakʼiʼ pa ri qakojonik chuwach ri Satanás? (Apoc. 13:10). Ri kojtoʼwik are retaʼmaxik ri kkʼulmataj pa ri petinaq. Jun kʼutbʼal, pa Apocalipsis ri apóstol Juan kchʼaw chrij jujun taq tewchibʼal che kqariq na pa kebʼ oxibʼ qʼij. Jun chke, are ri kbʼan na che usachisaxik kiwach ri e ukʼulel ri Dios. Pa ri nabʼe versículo re ri wuj re Apocalipsis kubʼij che pa wajun wuj «[ke]qʼalajisaxik» o kekoj etal che kikʼutik ri e ukʼulel ri Dios (Apoc. 1:1). w22.05 8 párrs. 1-3

Ri upatanelabʼ ri Dios kkiya ta kan uqʼijilaxik y kkiya ta kitobʼanik chke ri qʼatal taq tzij. Rumal wariʼ ri e ukʼulel ri Jehová kkibʼan na kʼax chke ri upatanelabʼ pa ronojel ri uwach Ulew. Y ri jupuq winaq riʼ che kebʼanow kʼax chke, kbʼix Gog re Magog chke (Ezeq. 38:14, 15). ¿Jas kubʼan ri Jehová chiʼ krilo che kbʼan kʼax chke ri upatanelabʼ? Ri areʼ kubʼij: «Ktzijtzobʼ na ri woyowal» (Ezeq. 38:18, 21-23). Pa ri capítulo 19 re Apocalipsis kuya ubʼixik che ri Jehová kutaq lo ri uKʼojol che kitoʼik ri upatanelabʼ y che usachisaxik kiwach ri e ukʼulel. Are kʼu ri Jesús xaq ta utukel kpetik, xaneʼ e rachiʼl «ri ajchʼojabʼ ri e kʼo pa ri kaj» kraj kubʼij, ri ángeles y ri e 144,000 (Apoc. 17:14; 19:11-15). ¿Y jas kukʼisbʼej wajun chʼoj riʼ? Are che ri e winaq che kkitoʼ ta uwiʼ ri uQʼatbʼal tzij ri Jehová y kkibʼan kikʼulel che ksachisax kiwach (Apoc. 19:19-21). w22.05 17 párrs. 9, 10

Are chiʼ Adán y Eva xemakunik, ri Jehová aninaq xuya jun profecía rech kʼo keyebʼal ri e kalkʼwal. Kqariq wajun profecía pa Génesis 3:15: «Kinbʼan na chi ri at xuqujeʼ ri ixoq, kikʼulelaj na iwibʼ, junam xuqujeʼ ri awijaʼlil rukʼ ri rijaʼlil. Ri rijaʼlil kuwachʼ na ri ajolom, are kʼu ri at kakatz na ri uxeʼ raqan». Wajun profecía kriqitaj pa ri nabʼe wuj re ri Biblia. Y, ronojel ri nikʼaj chi wuj che kʼo pa ri Biblia kʼo ubʼanik rukʼ wajun profecía riʼ. Junam rukʼ ri rij jun libro che are kchapow ri uxaq rech ktukin taj, ri profecía re Génesis 3:15 are ri ktobʼanik rech ri nikʼaj chi wuj re ri Biblia xa junam ri kuya ubʼixik. ¿Jas riʼ ri kuya ubʼixik? Che ri Dios kutaq lo jun kolonel rech kusachisaj uwach ri Itzel y ri ketobʼan rukʼ. ¡Wariʼ sibʼalaj kuya kikotemal chke ri keniman che ri Jehová! Ri Biblia kojutoʼ che rilik ri tajin kbʼan che utzʼaqatisaxik ri profecía y jas utzilal kuya chqe. w22.07 14 párrs. 1-3

Rech kitoʼ ri iwalkʼwal che uloqʼoqʼexik ri Jehová, rajawaxik nojibʼal chiwe. Rumal laʼ rajawaxik kitaʼ che ri Jehová che kixutoʼ (Sant. 1:5). Ri Jehová kkunik kuya utz taq pixabʼ chke ri e tat nan. Rumal che ri areʼ pa kʼi junabʼ e ukʼiyisam ri ralkʼwal, rumal laʼ kʼo más retaʼmabʼal (Sal. 36:9). Jun chi rumal are che ri upixabʼ amaqʼel kuya utzilal chqe (Is. 48:17). Rech kixkunik kitoʼ ri e iwalkʼwal che uloqʼoqʼexik ri Jehová, ri areʼ uyaʼom kʼi tobʼanik chiwe rech kiya uchuqʼabʼ ri kikojonik rukʼ ri uTzij xuqujeʼ rukʼ ri wuj che ubʼanom ri utinamit (Mat. 24:45). Jun kʼutbʼal, kiriq kʼi pixabʼ pa ri sección «Ayuda para las familias», che kʼi junabʼ elinaq lo pa ri revista ¡Despertad! y kimik kʼo pa jw.org. Pa ri qakʼolbʼal re internet xuqujeʼ kiriq videos, entrevistas y escenificaciones che kixutoʼ rech kinimaj ri pixabʼ che kuya ri Jehová che kikʼiyisaxik ri iwalkʼwal (Prov. 2:4, 5). w22.05 27 párrs. 4, 5

Kʼo ta jun winaq kjunamataj rukʼ ri kubʼan Jehová che ukuyik makaj. Nabʼe, are che ri areʼ amaqʼel kraj kukuy ri makaj. Ukabʼ, ri areʼ retaʼm ronojel ri qabʼantajik y retaʼm we qas rukʼ ronojel qanimaʼ kqaj kqakʼex ri qakʼaslemal. Y, urox, are chiʼ ri Jehová kukuy ri qamak kukʼaq ta chi chqapalaj. Rumal laʼ kojkunik kkʼojiʼ jun chʼajchʼojalaj retaʼmabʼal qakʼuʼx y kojqaj chuwach ri Jehová. Rumal che oj ajmakibʼ, amaqʼel kqabʼan jastaq che utz taj. Rumal laʼ ri kubʼij pa ri wuj Perspicacia para comprender las Escrituras, volumen 1, uxaq 209 kukubʼsaj qakʼuʼx, kubʼij: «Rajawaxik taj che ri winaq sibʼalaj kbʼisonik y amaqʼel kchoman chrij ri utz taj xubʼano, rumal che ri Jehová retaʼm che ri winaq xa ajmak rumal laʼ kutoqʼobʼisaj uwach (Sl 103:8-14; 130:3). We kukoj uchuqʼabʼ che unimaxik ri Dios, chkikot rumal wariʼ (Flp 4:4-6; 1Jn 3:19-22)». w22.06 7 párrs. 18, 19

Xaq xiw ta ri xibʼin ibʼ chuwach ri kʼax kkibʼan ri qʼatal tzij kukoj ri Satanás. Ri areʼ xuqujeʼ kukoj ri xibʼin ibʼ che kkinaʼ e jujun chuwach ri kkibʼij ri kifamilia we keʼux Testigos. E kʼo jujun más kkixibʼij kibʼ chuwach ri kkibʼij ri kifamilia chuwach we kechʼayik. Kkiloqʼoqʼej ri kifamilia y kkaj che xuqujeʼ e areʼ kkiloqʼoqʼej ri Jehová. Rumal laʼ kʼax kbʼe chke are chiʼ kkita ri itzel taq tzij kbʼix chrij ri Dios y ri e upatanelabʼ. Are kʼu, chnaʼtaj chqe che e jujun familiares che itzel kkil ri Testigos kkʼextaj ri kichomanik y kkimaj uloqʼoqʼexik ri Jehová. Are kʼu, ¿jas kqabʼano we jun chke ri qafamilia kraj ta chik kril qawach? ¡Sibʼalaj kuya qachuqʼabʼ ri tzij che kubʼij pa Salmo 27:10! We qas kqakojo che ri Jehová kojuloqʼoqʼej, kqanaʼo che kojutoʼo paneʼ ri nikʼaj chik kkibʼan kʼax chqe y qas qetaʼm che kojutewchij na rumal ri qakochʼonik. Ri Jehová kuya na ronojel ri kajwataj chqe pa ri qakʼaslemal rech kojkikotik y kojutoʼ na pa ri qakojonik, nijun kkunik kojutoʼ junam rukʼ ri kubʼan areʼ. w22.06 16, 17 párrs. 11-13

Are chiʼ ri Jesús xkʼojiʼ cho ri uwach Ulew, xbʼix che che «are jun ajwiʼj xuqujeʼ ukʼiʼanel», che rajchak ri Itzel, che nim ta kril wi ri sábado y che kuyoqʼ ri Dios (Mat. 11:19; 26:65; Luc. 11:15; Juan 9:16). Are kʼu ri Jesús, kʼo ta jumul xyajanik. We kʼo jumul kojyajik, rajawaxik kqesaj uwach ri Jesús y kqatzalij ta uwach ri kʼax che kbʼan chqe (1 Ped. 2:22, 23). Qastzij che qonojel kqakoj qachuqʼabʼ rech aninaq taj kpe qoyowal (Sant. 3:2). ¿Jas kojtowik rech amaqʼel kqakoj utz taq tzij? We kʼo jun winaq kojuyajo are chiʼ kqatzijoj ri utzij ri Dios, xaq xiw ta kojchoman chrij ri xubʼij. Jun qachalal Sam ubʼiʼ, kubʼij: «Amaqʼel kinchomaj che ri winaq rajawaxik kretaʼmaj chrij ri Dios y jeriʼ kkunik kukʼex ri ukʼaslemal». Y weneʼ ri winaq petinaq royowal rumal che kʼo jun jastaq tajin kukʼulmaj pa ri ukʼaslemal. Are chiʼ kqariq jun winaq che kojuyajo, chqabʼanaʼ qachʼawem che ri Jehová rech aninaq ta kpe qoyowal y kqabʼij ta jun tzij che kubʼan kʼax che ri winaq o che kukʼutu che nim ta kqilo. w22.04 6 párrs. 8, 9

Rech ri akʼalabʼ keqebʼ rukʼ ri Jehová utz che ri e tat nan junam kkinikʼoj ri Biblia kukʼ (2 Tim. 3:14-17). Xuqujeʼ ri Biblia kuya jun kʼutbʼal che kitoʼik ri alabʼom alitomabʼ. Pa ri wuj re Proverbios, kchʼaw chrij jun tat che ktzijon rukʼ ri ukʼojol chrij ri ubʼanom ri Jehová y xubʼij che che kchoman chrij ri kretaʼmaj chrij (Prov. 3:19-21). Tat nan, ¿la mat qastzij che kixkikotik are chiʼ kixbʼe kukʼ ri e iwalkʼwal pa waʼkatem? Rumal laʼ, are chiʼ kixbʼe pa waʼkatem chibʼij chke ri e iwalkʼwal che kojkunik kqetaʼmaj uwach ri Jehová pa ri jastaq che «ubʼanom» (Rom. 1:20). Chqilampeʼ ri xubʼan ri Jesús che ukojik ri jastaq xubʼan ri Jehová rech kʼo xukʼut chkiwach ri utijoxelabʼ. Jumul xubʼij chke che kechoman chkij ri joj y ri lirios (Lucas 12:24, 27-30). Rukʼ wariʼ ri Jesús xukʼut chkiwach che ri Jehová sibʼalaj utz, sibʼalaj ksipanik y che kuya ri rajawaxik chke ri sukʼ taq upatanelabʼ junam ri kubʼan kukʼ ri joj y ri e kotzʼiʼj. w23.03 20, 21 párrs. 1-4

Kqamaltyoxij che ri Jehová rumal che kojkunik kqabʼan qachʼawem pa ubʼiʼ ri uKʼojol. Ri Jehová kukoj ri Jesús rech kuya chqe ri kqataʼ che. We kqabʼan qachʼawem pa ubʼiʼ ri uKʼojol, ri areʼ kojutatabʼej, kuya ri kqataʼ che y kukuy qamak rumal ri ukamikal ri Jesús (Rom. 5:1). Ri Biblia kubʼij che ri Jesús are ri «kinimal ri kojol tabʼal toqʼobʼ» y che tʼuyul «chikaj pa ri uwikiqʼabʼ ri utem ri Dios re ajawibʼal» (Heb. 8:1). Xuqujeʼ kubʼij che «kʼo jun chʼawenel pa qawiʼ chuwach ri Tataxel. Are ri Jesucristo» (1 Juan 2:1). Sibʼalaj kqamaltyoxij che ri Jehová che xuya ri Kinimal ri Kojol tabʼal toqʼobʼ che kutoqʼobʼisaj qawach, kuchʼobʼo che kʼo kojkun ta che ubʼanik y «kubʼochiʼj ri Dios pa qawiʼ» (Rom. 8:34; Heb. 4:15). Wet mat xkam ri Jesús, ri oj kojkun ta riʼ kqabʼan qachʼawem che ri Jehová. Sibʼalaj kqamaltyoxij che ri Jehová rumal che xuya ri uKʼojol pa kamikal rumal qech. w22.07 23 párrs. 10-12

Jun winaq che kkubʼsax kʼuʼx chrij amaqʼel kubʼij ri qastzij y kubʼan ri kubʼij (Sal. 15:4). Y ri e nikʼaj chik kkikubʼsaj kikʼuʼx chrij. Ri oj xuqujeʼ kqaj che ri e qachalal je kkichomaj waʼ chqij. Rech kkubʼsax kʼuʼx chqij rajawaxik kqakʼut rukʼ ri kqabʼano. Kjunamataj rukʼ ri pwaq: kʼax uchʼakik are kʼu kʼax ta usachik. Kojkunik kqakubʼsaj qakʼuʼx chrij ri Jehová, rumal che «ri e uchak kkikʼut ri ujikomal» (Sal. 33:4). Y ri areʼ kraj che je kqabʼan oj (Efes. 5:1). Sibʼalaj kqamaltyoxij che ri Jehová che oj kʼo kukʼ winaq che kkiloqʼoqʼej kibʼ y kuyaʼ kkubʼsax kʼuʼx chkij. Kajwataj chuqʼabʼ rech ri e qachalal kkikubʼsaj kikʼuʼx chqij. We pa qajujunal kqakoj qachuqʼabʼ rech kojloqʼoqʼenik, kojmachʼachʼik, utz kojchomanik, kqabʼij ri qastzij y kqajikʼ qibʼ kojtobʼan riʼ rech kʼo utzilal pa ri congregación. Rumal laʼ, chqesaj uwach ri qaDios, Jehová, y chqakojoʼ qachuqʼabʼ rech ri e qachalal kkikubʼsaj kikʼuʼx chqij. w22.09 8 párrs. 1, 2; 13 párr. 17

Paneʼ oj kʼo pa jun nimalaj familia, weneʼ jujun taq mul kqanaʼo che xaq qatukel oj kʼolik o kpe chomanik pa qajolom che kuqasaj qachuqʼabʼ y kubʼan chqe che kqachomaj che kʼo ta jun kok il chqe. Are kʼu ri Jehová kraj taj che kqanaʼ wariʼ. Chqilampeʼ jas xubʼan che ri qʼaxal tzij Elías, xubʼij utz taq tzij che rech kubʼij ronojel ri kunaʼo. Y kamul xutaʼ che: «¿Jas kabʼan waral Elías?» (1 Rey. 19:9, 13). Ri kebʼ mul che ri Elías xubʼij ronojel ri kunaʼo, ri Jehová qas xutatabʼej. Xuqujeʼ xubʼij che pa Israel kʼa e kʼo na winaq che kiyaʼom ta kan ri qastzij qʼijilanik (1 Rey. 19:11, 12, 18). Qastzij riʼ che ri Elías xunaʼ jun nimalaj jororibʼal are chiʼ xubʼij che ri Jehová ronojel ri kunaʼo y are chiʼ xuta ri xbʼix che. Xuqujeʼ xyaʼ kʼi taq chak che che sibʼalaj nim ubʼanik: kuchaʼ ri Hazael rech kuqʼat tzij puwiʼ Siria, ri Jehú rech kux qʼatal tzij re Israel y ri Eliseo rech kux qʼaxal tzij (1 Rey. 19:15, 16). Are chiʼ xyaʼ ri chak riʼ che, ri Jehová xutoʼo rech kchoman chrij utz taq jastaq y xuya jun utzalaj rachiʼl, ri Eliseo. w22.08 8 párr. 3; 9 párr. 5

¿La bʼanom jun Ja rech Ajawbʼal pa ri acongregación o sukʼumam? We bʼanom, qastzij riʼ che knaʼtaj chawe ri nabʼe riqbʼal ibʼ che xixkʼojiʼ pa ri kʼakʼ Ja rech Ajawbʼal. Sibʼalaj xatmaltyoxin riʼ che ri Jehová rumal ri jeʼlalaj sipanik che xuyaʼo. Y weneʼ rumal che sibʼalaj katkikotik qas ta xatkunik xabʼixoj ri nabʼe bʼixonem. Sibʼalaj nim ubʼanik wajun chak riʼ, are kʼu kʼo jun chik che más nim na ubʼanik. ¿Jas riʼ? Are uyaʼik kichuqʼabʼ ri e winaq che keʼopan pa ri Ja rech Ajawbʼal. Are chiʼ ri apóstol Pablo xutzʼibʼaj ri kubʼij ri texto rech kimik xubʼij che konojel ri cristianos rajawaxik ketobʼan pa wajun chak che kjunamataj rukʼ uyakik jun ja rumal che ri tzij griega «uyaʼik chuqʼabʼ» xuqujeʼ kraj kubʼij «uyakik». Rech kojkunik kqaya kichuqʼabʼ ri qachalal, chqesaj uwach ri utzalaj ukʼutbʼal ri apóstol Pablo. Ri areʼ qas xuchʼobʼ ri tajin kkikʼulmaj ri e nikʼaj chik (1 Cor. 11:1). w22.08 20 párrs. 1, 2

Ri winaq che nim kril ri usukʼilal ri Jehová itzel krilo are chiʼ kbʼan kʼax chke e nikʼaj chik. Y rech kqaj chuwach ri Dios pa ronojel, rajawaxik amaqʼel knaʼtaj ri utaqanik ri Dios che are chiʼ kuchaʼ ubʼanik jun jastaq. Pa ri Biblia kubʼij che ri Jehová «are rachoch ri sukʼil». Kraj kubʼij che ri sukʼilal kpe rukʼ ri areʼ (Jer. 50:7, Ri Tyoxlaj Wuj). Rumal che are ri Bʼanol qe, xaq xiw ri areʼ kkunik kubʼij chqe jachike ri utz y jachike ri utz taj. Ri e taqanik che kuyaʼo más e sukʼ na chuwach ri qech oj (Prov. 14:12; Is. 55:8, 9). Are kʼu, ¿la kojkunik kqanimaj ri utaqanik? Kojkunik, rumal che xojbʼanik junam rukʼ «ri ukaʼyebʼal ri Dios» (Gén. 1:27). Sibʼalaj kojkikot che unimaxik. Rumal ri loqʼoqʼenik che kqanaʼ che ri loqʼalaj qaTat kubʼano che kqaj kqesaj uwach (Efes. 5:1). w22.08 27 párrs. 5, 6

Are chiʼ kʼo kqachomaj o kojbʼisonik, weneʼ kojchoman chrij jun jastaq che kojutoʼo rech ksach pa qajolom ri bʼis, y utz ri kqabʼano. Are kʼu rajawaxik kqachajij qibʼ rech kqabʼan ta jun jastaq che itzel kril ri Jehová (Efes. 5:10-12, 15, 16). Pa ri carta che xutaq bʼi ri apóstol Pablo chke ri cristianos re Filipos, xubʼij bʼi chke che amaqʼel kechoman chrij jastaq e sukʼ, e chʼajchʼoj, ri yaʼtal kiloqʼoqʼexik y ri e utz kitzijol (Filip. 4:8). Paneʼ chrij ta etzʼanem xchʼaw wi, rajawaxik riʼ che ri utzij kukʼam qabʼe are chiʼ kqachaʼ ubʼanik jun etzʼanem. Utz riʼ we kqabʼan wariʼ: pa ri tzij «jastaq» che kriqitaj pa ri versículo, chqakojoʼ bʼi ri e tzij «e bʼix», «películas», «e wuj» o «videojuegos». Wariʼ kojutoʼ rech kqetaʼmaj jas ri utz y ri utz ta kril ri Dios. Rumal che kqaj kqanimaj ronojel ri utaqanik ri Jehová (Sal. 119:1-3). w22.10 9 párrs. 11, 12

Are chiʼ majaʼ kekamik ri «e lawalo» xkibʼan itzel taq jastaq, o xibʼibʼalalaj taq jastaq. Rumal laʼ, rajawaxik kketaʼmaj na ri kubʼij ri utaqanik ri Jehová. Rech ketoʼ ri e winaq riʼ, ri Dios kukoj na ri uQʼatbʼal tzij rech ketijox ri e winaq cho ronojel ri uwach Ulew. ¿E jachin taq ketobʼanik rech ketijox ri e lawalo? Ri e kʼiʼalaj winaq che kekʼasiʼ kan pa ri Armagedón y ri e utz taq winaq che kewalajisaxik. ¿Jas rajawaxik kkibʼan ri e lawalo we kkaj ktzʼibʼax ri kibʼiʼ pa ri wuj re kʼaslemal? Rajawaxik keʼux rachiʼl ri Jehová y kkijach ri kikʼaslemal che. Ri Jesús y ri e chaʼom che kebʼe pa ri kaj kkilo we ri e lawalo kkikʼex ri kikʼaslemal (Apoc. 20:4). We kʼo jun chke ri lawalo taq winaq riʼ kraj taj kunimaj ri Jehová, ksachisax uwach, paneʼ 100 ujunabʼ chik (Is. 65:20). Ri Jehová y ri Jesús kkil ri kʼo pa kanimaʼ ri winaq, rumal laʼ kkiya ta bʼe che jun winaq kubʼan kʼax pa ri kʼakʼ uwach Ulew (Is. 11:9; 60:18; 65:25). w22.09 17 párrs. 11, 12

Pa wajun versículo, ri e tzij «qʼatal taq tzij» kchʼaw chkij ri winaq che kʼo taqanik pa kiqʼabʼ pa kiwiʼ nikʼaj chi winaq. Ri cristianos rajawaxik kqaya qibʼ pa taqik pa kiqʼabʼ ri e qʼatal taq tzij riʼ. E areʼ kkilo che ronojel utz pa taq ri e tinamit, kkiya taqanik chqe qonojel y jujun taq mul kkitoʼ uwiʼ ri utinamit ri Jehová (Apoc. 12:16). Rumal laʼ, kbʼix chqe che rajawaxik kqatoj ri alkabʼal (impuestos) che kkitaʼ chqe, nim keqil wi y kojniman chke (Rom. 13:7). Are kʼu, ri e qʼatal taq tzij riʼ kʼo kitaqanik xa rumal che are ri Jehová yaʼowinaq bʼe chke. Ri Jesús qas xuqʼalajisaj wajun jastaq riʼ are chiʼ xtzijon rukʼ ri qʼatal tzij romano Poncio Pilato. Are chiʼ ri Pilato xubʼij che ri Jesús che kkunik ktaqanik rech kkamisaxik o kkamisax taj, Jesús xubʼij wariʼ: «Ma ta kʼo taqanik la riʼ pa nuwiʼ, we ta ma ta kyaʼtaj che la rumal ri Dios» (Juan 19:11). Junam rukʼ ri Pilato, konojel ri e qʼatal taq tzij re ri qaqʼij kʼo ta ronojel taqanik pa kiqʼabʼ. w22.10 14 párr. 6

Rukʼ ri utobʼanik ri Jehová ri qʼatal tzij David xutzʼibʼaj kanoq jas ubʼanik ri kʼaslemal are chiʼ kuqʼat tzij jun qʼatal tzij che sibʼalaj kʼo unojibʼal y sukʼ (Sal. 37:10, 11, 29). Are chiʼ kojtzijon kukʼ ri winaq chrij ri kotzʼiʼjalaj uwach Ulew, kʼi mul are kqakoj ri Salmo 37:11. Y utz che kqakojo rumal che ri Jesús xuqujeʼ xukoj wajun texto pa ri Sermón del Monte. Je wariʼ xukʼutu che ri kubʼij pa salmo kbʼantaj na pa ri petinaq (Mat. 5:5). Are kʼu ri xutzʼibʼaj kan ri David xuqujeʼ xukʼut ri kʼaslemal che xriqitajik are chiʼ xuqʼat tzij ri Salomón. Pa riʼ ri tiempo, xkʼojiʼ jamaril pa ri tinamit Israel y xyaʼ jun ulew chke jawiʼ kʼo wi «leche xuqujeʼ juyubʼal rax kabʼ». Ri Dios xubʼij chke: «We kitaqej ri e nupixabʼ [...], kinya na utzil cho ri uwach ulew, kixwar kʼu na pa utzil, man kʼo ta jas kixxibʼin na» (Lev. 20:24; 26:3, 6). Ri e tzujunik riʼ qas xeriqitaj pa ri tiempo che xuqʼat tzij ri Salomón (1 Crón. 22:9; 29:26-28). Rumal laʼ, qetaʼm che ri kubʼij Salmo 37:10, 11, 29 xbʼantaj ojer kanoq, are kʼu xuqujeʼ kbʼantaj na pa ri petinaq. w22.12 10 párr. 8

Chqanimaj ri kubʼij ri utinamit ri Dios. Ri Biblia kuya wajun pixabʼ chqe: «Ri chʼoj utz uchomaxik kbʼanik are kʼu ri chʼakanik kumal ri e kʼi yaʼl taq noʼj» (Prov. 24:6). We kojchoman chrij ri kqabʼan che ukojik wajun pixabʼ kojutoʼ rech utz kqabʼan che utzijoxik ri utzij ri Dios y kitijoxik ri winaq y are ta kqabʼan ri kqachomaj oj. Kyaʼ utz taq pixabʼ chqe pa ri e riqbʼal ibʼ are chiʼ keya chʼabʼal y are chiʼ keqil ri kʼutbʼal re tzijonem che kkibʼan ri qachalal. Xuqujeʼ, ri utinamit ri Jehová uyaʼom e wuj y videos chqe rech keqatoʼ ri winaq che uchʼobʼik ri kubʼij ri Biblia. ¡Sibʼalaj kojkikotik che kqariq utz taq pixabʼ pa ri uTzij ri Dios! Chqataqej ubʼanik ri kubʼij ri unojibʼal (Prov. 3:13-17). w22.10 23 párrs. 18, 19

Are chiʼ utz jastaq kqatijo kʼo uchuqʼabʼ ri qacuerpo. Junam rukʼ, ri qakojonik kkowirik are chiʼ kqanikʼoj ri uTzij ri Dios y kojchoman chrij. Are waʼ ri kraj kukʼut ri visión re ri bʼotobʼik wuj. Ri Jehová kraj che kqabʼan ri xubʼij che ri Ezequiel: «We tzʼibʼatalik riʼ [...] chanojisaj ri apam che». Kojkun che ubʼanik wariʼ are chiʼ kqabʼan qachʼawem, kqasikʼij ri Biblia y kojchoman chrij. Nabʼe, kqabʼan qachʼawem rech kok pa qanimaʼ ri uchomanik ri Dios. Tekʼuriʼ, kqasikʼij jun uchʼaqapil ri Biblia y kojchoman chrij ri xqasikʼij. ¿Jas utzilal kuyaʼo? Are chiʼ más kojchoman chrij ri kqasikʼij uwach, más kok pa qanimaʼ ri chomanik che kʼo pa ri uTzij ri Dios. ¿Jasche nim ubʼanik kqasikʼij ri uTzij ri Dios y kojchoman chrij? Rumal che kuya qachuqʼabʼ che utzijoxik ri utzij ri Dios kimik y ri e tzij re qʼatoj tzij che weneʼ kqaya na ubʼixik pa ri petinaq. Xuqujeʼ, are chiʼ kojchoman más chrij ri utz taq ubʼantajik ri Jehová, kubʼan más ko ri qachilanik rukʼ. w22.11 6, 7 párrs. 16, 17

Ri Jesús xubʼij taj che «rumal kʼu waʼ ix kiwetaʼmaj na chi ix nutijoxelabʼ», xaneʼ xubʼij: «Rumal kʼu waʼ konojel kketaʼmaj na chi ix nutijoxelabʼ, we kiloqʼoqʼelaʼ iwibʼ». We xqilo ri Jesús xubʼij che ketaʼmax kiwach ri e qastzij utijoxelabʼ rumal ri loqʼoqʼebʼal che kkikʼutu. Y Sibʼalaj nim ubʼanik ri loqʼoqʼebʼal che kkikʼut ri e qachalal pa ri congregación. Are kʼu qonojel xa oj ajmakibʼ. Rumal laʼ, are chiʼ más kqetaʼmaj kiwach ri e qachalal, weneʼ kqil jujun taq kibʼantajik che utz taj (1 Juan 1:8; Rom. 3:23). Are kʼu, sibʼalaj bʼisobʼal rumal che e jujun qachalal kiyaʼom kan upatanixik ri Jehová rumal jun kʼax che xbʼan chke rumal jun qachalal. «¿Jasche are ri loqʼoqʼebʼal kkʼutuwik e jachin riʼ ri qastzij cristianos? ¿Jas xubʼan ri Jesús che ukʼutik loqʼoqʼebʼal chke ri rapóstoles? ¿Y jas kbʼan che resaxik uwach ri Jesús?». Ri qabʼanom chi qaqasanjaʼ xuqujeʼ rajawaxik kojchoman chkij ri preguntas riʼ, rech keqaloqʼoqʼej ri e qachalal are chiʼ kkibʼan jun kʼax chqe (Efes. 5:2). w23.03 26, 27 párrs. 2-4

Rumal che xa tajin kojnaqajin che ri ukʼisbʼalil ri itzelal re wajun uwach Ulew, kqamay taj che pa ri congregación kekʼulmataj jastaq che kukoj pa kʼax ri qanimanik y ri qasukʼilal che ri Jehová. Rumal laʼ rajawaxik kqakoj utz chomanik. We kqachomaj che jun qachalal ubʼanom kʼax chqe, maqakʼol oyowal pa qanimaʼ. We kojpixbʼexik, chqachʼobʼoʼ che xa kuya utzilal chqe, chqakʼamaʼ ri kbʼix chqe y chqakʼexaʼ pa qakʼaslemal ri rajawaxik kqakʼexo. Y, are chiʼ kʼo kkʼextaj pa ri utinamit ri Jehová, rukʼ ronojel qanimaʼ chqayaʼ ri qatobʼanik che y chqayaʼ qibʼ kkʼam qabʼe. Paneʼ kok pa kʼax ri animanik y ri asukʼilal che ri Jehová, katkunik kakubʼsaj akʼuʼx chrij y katel ta kan pa ri utinamit. Chkʼol apaciencia, chatchoman rukʼ saqil y chawilaʼ ri jastaq junam rukʼ ri kubʼan ri Jehová che rilik. Chataʼ ri utobʼanik ri Jehová y matas awibʼ chkij ri qachalal. Jeriʼ, apastaneʼ ri kkʼulmatajik, ri Satanás kkun ta wi che awesaxik chrij ri Jehová y pa ri utinamit (Sant. 4:7). w22.11 24, 25 párrs. 14-16

Kʼamal taq bʼe, cheʼitoʼo ri e qachalal rech kkil apanoq jas kkibʼano are chiʼ xaq kʼateʼ kkʼulmataj jun kʼax. Y rech kketaʼmaj jas kkibʼan che ichʼabʼexik. Are kʼu ¿jas rajawaxik kabʼan at? We chunaqaj ri awachoch kkʼulmataj jun nimalaj kʼax chataʼ chke ri kʼamal taq bʼe jas kabʼano rech katkunik kattobʼanik. Weneʼ katkunik kaya ri awachoch rech kekanaj kan ri qachalal awukʼ che xkiriq kʼax o ri e opanaq che uyaʼik tobʼanik. Weneʼ katkunik kattobʼan che ujachik ri kajwataj chke ri e qachalal. Y, we ri kʼax xkʼulmataj pa jun tinamit che sibʼalaj naj kʼo wi, katkunik kattobʼanik. ¿Jas kabʼan che uyaʼik tobʼanik? Kabʼan achʼawem pa kiwiʼ ri e qachalal che xkiriq kʼax y kaya ri akuchuj pa ri obra mundial che kkoj che kitoʼik ri e qachalal (2 Cor. 1:8-11; 8:2-5). We katkunik katbʼe che kitoʼik, chataʼ chke ri e kʼamal bʼe jas rajawaxik kabʼano. Y we katsikʼixik kattijox na rech qas katkunik kaya tobʼanik pa ri lugar che kattaq wi bʼik. w22.12 24 párr. 8; 25 párrs. 11, 12

Jun chi Biblia je waʼ kubʼan che ubʼixik ri texto re kimik: «Ix junam kʼambʼejenik kiriq kukʼ konojel ri winaq». Are waʼ ri xubʼij ri Pablo chke ri cristianos re Corinto. Rumal che ojer kanoq xemakun kukʼ achijabʼ ixoqibʼ, achijabʼ xeqʼoyiʼ kukʼ achijabʼ, ixoq xeqʼoyiʼ kukʼ ixoqibʼ y kʼo sibʼalaj xeqʼabʼarik (1 Cor. 6:9-11). Qastzij riʼ che are chiʼ xbʼantaj kiqasanjaʼ xkikoj na kichuqʼabʼ chuwach ri itzel kirayinik. Paneʼ e chaʼom kebʼe pa ri kaj, are kʼu e ajmakibʼ na, rumal laʼ xkikoj kichuqʼabʼ chuwach ri kirayinik. Wariʼ kukubʼsaj qakʼuʼx rumal che e kʼo winaq e chʼakanaq puwiʼ ri itzel taq kirayinik. Rumal laʼ, ri oj xuqujeʼ kojkunik kojchʼakan pa kiwiʼ ri itzel taq qarayinik y kukubʼsaj qakʼuʼx ri kubʼij 1 Pedro 5:9: «Ko chixtakʼal pa ri kojonik. Iwetaʼm kʼut chi xa junam ri kʼaxkʼolil kepe pa kiwiʼ ri iwachalal pa ronojel ri uwach ulew». w23.01 12 párr. 15

Ri Jesús xubʼij che ri Jehová pa chʼawem che keʼuchajij ri utijoxelabʼ (Juan 17:11). ¿Jasche kuya qachuqʼabʼ wariʼ? Rumal che ri Jehová más nim na ri uchuqʼabʼ chuwach apachike uwach qakʼulel (1 Juan 4:4). Ri areʼ kril ronojel ri tajin kkʼulmatajik. Y qas qetaʼm che we kqakubʼsaj qakʼuʼx chrij, kʼo ta jumul kqaxeʼj qibʼ chuwach ri kʼaxkʼolil o ri e qakʼulel. ¿La kʼo jujun mul katkʼixik kabʼij che at testigo rech Jehová? ¿La at publicador taj o abʼanom ta aqasanjaʼ rumal che kaxeʼj awibʼ? Kaya ta bʼe che ri kkibʼij ri e nikʼaj chik katuqʼatej rech kabʼan ri kqaj chuwach ri Jehová. Chabʼij che ri Jehová che katutoʼo rech kaxeʼj ta awibʼ che ubʼanik ri kraj. Are chiʼ kawilo che kutzalij uwach ri achʼawem, kaxeʼj ta chi awibʼ chkiwach ri winaq (Is. 41:10, 13). w23.01 29 párr. 12; 30 párr. 14

Ri Jesús xubʼij wariʼ chke: «¿La ma ta isikʼim[?]» pa ri pixabʼ (Mat. 12:1-7). Xbʼix wariʼ chke ri fariseos are chiʼ xkibʼij chke ri tijoxelabʼ jasche nim ta kkil wi ri sábado. Ri Jesús xukoj kebʼ kʼutbʼal chkiwach y xukoj jun versículo re Oseas kukʼ. Jeriʼ xukʼut chkiwach che qas ta kkichʼobʼ ri kraj kubʼij ri taqanik y che xkikʼut ta toqʼobʼisal wachaj. Paneʼ ri winaq riʼ kisikʼim uwach ri uTzij ri Dios, are kʼu tajin ta kkiya bʼe che ketoʼ pa ri kikʼaslemal rumal. ¿Jasche? Rumal che xkibʼan nim che kibʼ y are chiʼ xkisikʼij xaq xiw xechoman chkij e nikʼaj chik tekʼuriʼ xeyoqʼonik. Rumal ri itzel kibʼantajik xekun taj xkichʼobʼ ri xkisikʼij uwach (Mat. 23:23; Juan 5:39, 40). Pa Mateo 19:4-6 kqariq chi jun kʼutbʼal are chiʼ ri Jesús xutaʼ chke ri fariseos: «¿La ma ta isikʼim[?]». Paneʼ e areʼ ketaʼm che are ri Dios xbʼanow ri kʼulanem are kʼu nim ta xkil wi. Ri xubʼij ri Jesús kukʼut chqawach che rajawaxik kojmachʼachʼik y kqaya bʼe che ri Jehová kojutijoj. w23.02 12 párrs. 12, 13

Ri Jehová xuya taqanik chke ri israelitas rech kkiriq ta jun accidente pa ri kachoch o pa ri kichak (Éx. 21:28, 29; Deut. 22:8). Kkʼajisax uwach jun israelita we kukamisaj jun winaq paneʼ xa ta chubʼanik xubʼano (Deut. 19:4, 5). Xuqujeʼ ri Taqanik kubʼij che we jun winaq xubʼan kʼax che jun ixoq che yawabʼ y xkam ri ral, rajawaxik kkʼajisax uwach ri xbʼanow kʼax, paneʼ xa ta chubʼanik xubʼano (Éx. 21:22, 23). We kqilo, ri Biblia kubʼij chqe che rajawaxik kqachajij qibʼ rech kqariq ta jun accidente. Are chiʼ kqasukʼumaj jun jastaq pa ri qachoch o pa ri qachak che kubʼan kʼax chqe, kqakʼutu che nim kqil wi ri qakʼaslemal. We kʼo jastaq qe che ksokonik, kunabʼal o químico, rajawaxik kqakʼol chkiwach ri akʼalabʼ. Y we kqakʼaq bʼik, rajawaxik qas kqilo jawiʼ kqaya wi rech kekiriqaʼ ta chi nikʼaj. Xuqujeʼ rajawaxik kqachajij qibʼ chuwach ri qʼaqʼ, ri kʼatan y ri e jastaq re luz (herramientas eléctricas). Xuqujeʼ, kqabʼinisaj ta ri qachʼichʼ are chiʼ qatijom jun kunabʼal che usachom ri qachomanik, qatijom jubʼiqʼ tzam, qas ta oj warinaq y kqil ta ri qacelular. w23.02 21, 22 párrs. 7-9

Ri Jehová kʼo upaciencia, kpe ta royowal chanim y kuchʼobʼ ri keriqitaj wi ri utijoxelabʼ, xuqujeʼ are kril ri utz taq kibʼantajik (Sal. 130:3). Ri areʼ kutaʼ ta jastaq chqe che kojkun ta che ubʼanik. Y chnaʼtaj chqe che are xbʼanow ri qatzantzaqʼor, rumal laʼ kojkunik kqetaʼmaj kʼi jastaq y kojkikot rukʼ (Sal. 139:14). Junam rukʼ jun alaj neʼ sibʼalaj kraj utuʼ je chqabʼanaʼ che retaʼmaxik ri qastzij kʼo pa ri Biblia (1 Ped. 2:2). ¿Jas kattoʼw che ubʼanik? Chakojoʼ ametas che qas katkun che ubʼanik, y chasikʼij ri uTzij ri Dios y chanikʼoj upam (Jos. 1:8). Rukʼ ri utobʼanik ri Jehová, nojimal utz kawilo kasikʼij ri uTzij y kawetaʼmaj chrij. Ri kqaj kqabʼano are chiʼ kqanikʼoj ri Biblia are che kqetaʼmaj uwach ri Jehová, kqaloqʼoqʼej más y knimar ri qakojonik chrij, xaq xiw ta kqaj kkʼojiʼ nim qetaʼmanik (1 Cor. 8:1-3). Chawetaʼmaj más chrij ri Jehová, y amaqʼel chataʼ che che knimar más ri akojonik (Luc. 17:5). Ri areʼ qas katutoʼ wi. w23.03 10 párrs. 11, 13

¿La xaq xetʼuyiʼ ri utijoxelabʼ ri Jesús che reyexik jampaʼ ksachisax uwach ri tinamit Jerusalén? Je taj, rumal che ri Jesús xubʼij chke che kkitzijoj ri utzalaj tzij «pa Jerusalén pa ronojel ri ulew re Judea xuqujeʼ pa Samaria, xuqujeʼ kʼu pa taq ri tinamit ri sibʼalaj naj e kʼo wi cho ronojel ri uwach Ulew» (Hech. 1:6-8). ¡Sibʼalaj nim chak xyaʼ chke ri tijoxelabʼ! Are kʼu we kkibʼano, utz riʼ kkibʼan che ukojik ri kitiempo. Rajawaxik kqilo jawiʼ kqakoj wi ri qatiempo. Rumal che junam rukʼ ri kubʼij pa Eclesiastés 9:11, qonojel «xaq kʼateʼtal [kqa]taqlebʼej» jun kʼax o kojkamik. Ri más utz kqabʼan che ukojik ri qatiempo are ubʼanik ri kraj ri Jehová y ukowirisaxik ri qachilanik rukʼ (Juan 14:21). Xuqujeʼ utz che kqabʼan pa qakʼaslemal wajun pixabʼ riʼ: «Qas ko chixtakʼaloq, man kʼo ta kixslabʼsanik. Amaqʼel chixok il che ri uchak ri Ajawaxel» (1 Cor. 15:58). We je kqabʼano, kojbʼison ta riʼ are chiʼ kpe ri kʼisbʼal re ri itzelal o are chiʼ kojkamik rumal che xqakoj ronojel ri qatiempo che upatanexik ri Jehová (Mat. 24:13; Rom. 14:8). w23.02 18 párrs. 12-14