Febrero

Junam rukʼ ri kubʼij ri texto re kimik, ¿jas loqʼoqʼebʼal xchʼaw ri Jesús chrij? Are ri loqʼoqʼebʼal che kubʼano che jun cristiano kraj kuya ri ukʼaslemal pa uwiʼ jun rachalal. Ri uTzij ri Dios kubʼij che rajawaxik kqakʼut loqʼoqʼebʼal. E kʼi utz kkil waʼ taq versículos riʼ: «Ri Dios areʼ loqʼoqʼebʼal kʼuxaj» (1 Juan 4:8); «Chaloqʼoqʼej ri awajil atzʼaqat je jas ri uloqʼoqʼexik awibʼ chbʼil awibʼ» (Mat. 22:39); «Rumal rech chi ri loqʼoqʼebʼal kʼuʼx kubʼano chi kesachtaj kʼi mak» (1 Ped. 4:8) y «ri loqʼoqʼebʼal kʼuxaj mawi ta jumul kasach uwach» (1 Cor. 13:8). Waʼ taq versículos y nikʼaj chik kukʼut chqawach che sibʼalaj rajawaxik kqakʼut loqʼoqʼebʼal. Xaq xiw ri Jehová kkunik kubʼano che ri e winaq re jalajoj taq tinamit kkiloqʼoqʼej kibʼ, rumal che are loqʼoqʼebʼal. Xaq xiw ri e winaq ri kkiqʼijilaj kekunik kkikʼut ri qastzij loqʼoqʼebʼal (1 Juan 4:7). Rumal laʼ, ri Jesús xubʼij che xaq xiw ri e qastzij utijoxelabʼ kkikʼut loqʼoqʼebʼal. Junam rukʼ ri xubʼij kan ri Jesús, e kʼi winaq ketaʼmam kiwach ri qastzij cristianos rumal ri loqʼoqʼebʼal che kkikʼutu. w23.03 27, 28 párrs. 5-8

¿Jas kqabʼano we kqilo che rajawaxik kqakuy más kimak ri e nikʼaj chik? Utz kqasikʼij y kojchoman chkij ri upatanelabʼ ri Jehová re ojer che xkikuy kimak ri e nikʼaj chik y chkij ri je ta xkibʼano. Chojchoman chrij ri Jesús che areʼ xukuy kimak ri e winaq (Luc. 7:47). Xaq xiw ta xril ri kesach wi, xaneʼ xril ri utz kibʼantajik. Are kʼu ri fariseos «kketzelaj kiwach ri nikʼaj chik» (Luc. 18:9). Are chiʼ qasikʼim chi chkij waʼ taq kʼutbʼal riʼ, chojchoman chrij wariʼ: «¿Jas kinbʼan che kilik ri e nikʼaj chik? ¿Jas ri utz kibʼantajik kwilo?». We kʼo jun qachalal che kʼax kqabʼan che ukuyik umak, utz che kqatzʼibʼaj ronojel ri utz taq ubʼantajik che kqil che y chojchoman chrij wariʼ: «¿Jas kubʼan ri Jesús che rilik wajun qachalal riʼ? ¿La kusach umak riʼ?». Ubʼanik wariʼ kojutoʼ rech kqakʼex ri qachomanik. Nabʼe, weneʼ kʼax kqabʼan che ukuyik umak jun qachalal che ubʼanom jun kʼax chqe. Are kʼu we kqakoj qachuqʼabʼ, kojkunik kqakʼex ri qabʼantajik. w22.04 23 párr. 6

Pa ri wuj re Apocalipsis kejunamax ri e ukʼulel ri Dios kukʼ e xibʼibʼalalaj taq chikop. Jun kʼutbʼal, kbʼixik che «jun xibʼibʼal awaj [...] xel uloq pa ri plo» y «kʼo lajuj rukʼaʼ xuqujeʼ wuqubʼ ujolom» (Apoc. 13:1). Tekʼuriʼ «jun xibʼibʼal awaj chik ri xpaqiʼ uloq xel uloq pa ri ulew». Kchʼaw junam rukʼ jun dragón «xubʼan kʼu ne chi xqaj uloq qʼaqʼ chikaj» (Apoc. 13:11-13). Xuqujeʼ kbʼixik che kʼo «jun kaq rij itzel awaj» che tʼuyul bʼi jun ajmakalaj ixoq chrij. Ri e oxibʼ awaj riʼ e ukʼulel ri Jehová y ri uQʼatbʼal tzij. Rumal laʼ nim ubʼanik che kqetaʼmaj jachin chkij kchʼaw wi (Apoc. 17:1, 3). Rajawaxik kqetaʼmaj jachin chkij kchʼaw wi ri taq etal. Ri Biblia kubʼij che kʼi chke ri taq etal bʼim chi kan pa nikʼaj chi wuj re ri Biblia. w22.05 8, 9 párrs. 3, 4

E jujun qachalal kebʼisonik rumal che kekun ta che ubʼanik ri kkaj kkibʼan che uqʼijilaxik ri Jehová rumal che nim chi kijunabʼ o e yawabʼ. We kʼo jujun mul kqanaʼo che kojbʼisonik rumal che kojkun taj kqabʼan ri kqaj, chqabʼanaʼ wajun pregunta riʼ: «¿Jas kraj ri Jehová che kinbʼano?». Ri areʼ kraj che kqaya che ri qas kojkun che ubʼanik, are kʼu kril ri kojriqitaj wi. Chatchoman chrij wajun kʼutbʼal. Jun qachalal che 80 ujunabʼ kbʼisonik rumal che kkun ta chik kubʼan ri jastaq junam rukʼ ri xubʼano chiʼ kʼo na 40 ujunabʼ. Kuchomaj che paneʼ tajin kuya ri qas kkun che ubʼanik, ri Jehová man kkikot ta rukʼ wariʼ. Are kʼu, ¿la qastzij ri kuchomaj? Chqilampeʼ. We ri qachalal riʼ xuya che ri Jehová ri qas xkun che ubʼanik are chiʼ 40 ujunabʼ y kʼa tajin kubʼan na ronojel ri kkun che kimik paneʼ 80 chi ujunabʼ, ¿la mat qastzij che wariʼ kukʼutu che amaqʼel uyaʼom ri más utz che ri Jehová? We kqaya ri qas kojkun che ubʼanik, ri areʼ kubʼij wariʼ chqe: «At utzalaj [...] pataninel» (chajunamisaj rukʼ Mateo 25:20-23). Ri kuya tobʼanik chqe rech amaqʼel kojkikotik are kojchoman chrij ri kojkun che ubʼanik y man xa ta kojchoman chrij ri kojkun ta che ubʼanik. w22.04 10 párr. 2; 11 párrs. 4-6

Pa ri capítulo 21 re Apocalipsis kujunamaj ri 144,000 rukʼ jun jeʼlalaj tinamit ubʼiʼ «ri kʼakʼalaj Jerusalén». Wajun tinamit riʼ «e kʼo kabʼlajuj utakʼalibʼal», y chilaʼ tzʼibʼatal wi «ri kabʼlajuj kibʼiʼ ri kabʼlajuj taqom ri e rech ri Alaj Chij» (Apoc. 21:10-14; Efes. 2:20). Ri tinamit riʼ che xril ri Juan, kjunamataj ta chi rukʼ jun tinamit. Rumal che ri bʼe bʼanom che qʼan pwaq, ri 12 uchiʼ taq ja bʼanom che 12 perlas, ri e utapya y ri e utakʼalibʼal kojom jeʼlalaj taq ketzʼebʼalil, y ri unimal ri raqan xaq junam rukʼ ri uwach (Apoc. 21:15-21). Are kʼu ri Juan xrilo che kʼo jun jastaq kʼo ta chupam. ¿Jas riʼ? Ri areʼ xubʼij: «Man xinwil ta kʼu ri qʼijilabʼal chupam. Are kʼu ri qʼijilabʼal re we tinamit riʼ are ri Ajawaxel, Dios ri kʼo ronojel ukunem xuqujeʼ ri Alaj Chij. Ri tinamit man kajwataj ta ri qʼij che rech kuyaʼ ri usaqil, mawi rajawaxik ri ikʼ che. Are kʼu ri ujuluwem ri Dios xjuluw puwiʼ, are kʼut ri uchaj are ri Alaj Chij» (Apoc. 21:22, 23). Ri e kʼo pa ri Kʼakʼ Jerusalén kekunik kkil uwach ri Jehová (Heb. 7:27; Apoc. 22:3, 4). w22.05 17, 18 párrs. 14, 15

Paneʼ qetaʼm che are ri Jehová xojbʼanowik, kojupixbʼej y kuqʼat tzij pa qawiʼ, are kʼu xuqujeʼ are jun utzalaj Tat che kojraj (Sal. 100:3; Is. 33:22). Rumal laʼ, are chiʼ kojmakun chuwach y rukʼ ronojel qanimaʼ kqataʼ sachbʼal mak che, ri areʼ qas kukuy ri qamak (Sal. 86:5). Ri Jehová xukoj ri qʼaxal tzij Isaías rech xubʼan wajun tzujunik riʼ chqe, xubʼij: «Puneʼ taneʼ sibʼalaj kaq roqroj ri imak, kinbʼan na che jachaʼ ri saq tew» (Is. 1:18). Rumal che qonojel oj ajmakibʼ, kqabʼan kʼax chke nikʼaj chik o weneʼ kqabʼij jun tzij che kubʼan kʼax chke (Sant. 3:2). Are kʼu, wariʼ kraj ta kubʼij che kojkun taj kekʼojiʼ utz taq qachiʼl. Rech kekʼojiʼ utz taq qachiʼl rajawaxik kqasach kimak (Prov. 17:9; 19:11; Mat. 18:21, 22). Ri Jehová kraj che kqasach qamak chbʼil taq qibʼ. Y wariʼ kuya utzilal chqe, rumal che ri areʼ xuqujeʼ kusach qamak (Is. 55:7). w22.06 8 párrs. 1, 2

Paneʼ utz taj kqajunamisaj qibʼ kukʼ ri e nikʼaj chik, are kʼu kʼo kqetaʼmaj chkij ri e qachalal. Kojkunik kqabʼan qe ri xubʼan ri Jesús, are jun utz kʼutbʼal chqawach. Paneʼ oj oj tzʼaqat taj junam rukʼ ri areʼ, kojkunik kqetaʼmaj chrij ri jeʼlikalaj taq ubʼantajik y ri xubʼano (1 Ped. 2:21). We kqakoj ronojel qachuqʼabʼ che uterenexik ri retal raqan o kqabʼan qe ri xubʼano, kojux utz taq upatanelabʼ ri Jehová. Pa ri Biblia kʼo kʼutbʼal kech achijabʼ ixoqibʼ che paneʼ e ajmakibʼ, kojkunik kqesaj uwach ri utz kikʼutbʼal. Jun chke ri e winaq riʼ are ri qʼatal tzij David. Ri Jehová xubʼij wariʼ chrij wajun achi: «Nuriqom [...] jun achi je ranimaʼ [...] jas ri kraj ri wanimaʼ» (Hech. 13:22). Are kʼu ri David kʼo jujun makaj xubʼano. Paneʼ jeriʼ ri ubʼanik, xuya kan jun utz kʼutbʼal chqawach. ¿Jasche? Rumal che xaq ta xutzukuj ri xubʼij. Xaneʼ xukʼam ri xbʼix che y xuya kan ubʼanik ri makaj, rumal laʼ xkuy umak rumal ri Jehová (Sal. 51:3, 4, 10-12). w22.04 13 párrs. 11, 12

Ri Biblia kubʼij che ri kamikal are jun qakʼulel (1 Cor. 15:25, 26). Are chiʼ kojchoman chrij ri kamikal weneʼ kqaxibʼij qibʼ y más na we oj o jun chke ri qafamilia yawabʼ. ¿Jasche kqanaʼ wariʼ? Rumal che ri Jehová xojubʼano rech amaqʼel kqaj kojkʼasiʼk (Ecl. 3:11). Are kʼu ri xibʼin ibʼ chuwach ri kamikal xuqujeʼ kojutoʼ rech kqachajij ri qakʼaslemal. Kubʼano che utz kqabʼan che uchaʼik ri kqatijo, kqabʼan ejercicio, kqaya ta ri qakʼaslemal pa kʼax, kojbʼe rukʼ jun ajkunanel are chiʼ oj yawabʼ y kqatij kunabʼal rech kojkunatajik. Ri Satanás retaʼm che nim kqil ri kʼaslemal. Rumal laʼ kuchomaj che kqabʼan apachike jastaq o kqaxutuj kan ri Jehová rech kojkam taj (Job 2:5). Rumal che ri areʼ «kʼo utaqanik puwiʼ ri kamikal» kubʼano che kqaxeʼj qibʼ y kqaya kan upatanixik ri Jehová. ¡Are kʼu kkun taj kubʼano! Heb. 2:14, 15. w22.06 18 párrs. 15, 16

Pa ri tinamit jawiʼ qʼatem wi uwach ri qachak che ri Dios, weneʼ rajawaxik e kʼi ta ri e qachalal kkimulij kibʼ che ubʼanik ri kiriqbʼal ibʼ. Rumal laʼ, sibʼalaj nim ubʼanik che kʼo jamaril chqaxoʼl kukʼ ri e qachalal. Chojchʼojin rukʼ ri Satanás, kukʼ ta ri e qachalal. We kʼo jun kʼax xkʼulmataj chixoʼl aninaq chisukʼumaj y chikuyulaʼ imak (Prov. 19:11). Oj nabʼe chqamajij kitoʼik ri e qachalal (Tito 3:14). Ri tobʼanik che kqaya che jun qachalal keʼutoʼ e nikʼaj chi qachalal. Knimar más ri qachilanik chqaxoʼl junam rukʼ jun familia (Sal. 133:1). Sibʼalaj e kʼi qachalal kiyaʼom ta kan upatanexik ri Jehová paneʼ ri e qʼatal taq tzij kiqʼatem uwach ri qachak. E jujun e kʼamom bʼi pa cárcel. Rumal laʼ, chqabʼanaʼ qachʼawem pa kiwiʼ, cheqatoʼ ri kachalaxik y ri e qachalal che kkiya tobʼanik chke (Col. 4:3, 18). Maqachomaj che kʼo ta upatan ri chʼawem che kqabʼan pa kiwiʼ (2 Tes. 3:1, 2; 1 Tim. 2:1, 2). w22.12 26, 27 párrs. 15, 16

Ri alaj taq akʼalabʼ kkesaj uwach ronojel ri kkibʼan ri kitat kinan. Qetaʼm che kʼo ta nijun che mat kʼo ksach wi (Rom. 3:23). Are kʼu ri e tat nan che kʼo kinojibʼal kkiya jun utz kʼutbʼal chke ri kalkʼwal. Jun tat, xubʼij: «Ri e areʼ kejunamataj rukʼ ri bʼot o esponja; che kkibʼan ke ri kkibʼan ri nikʼaj chik. We ri akʼalabʼ kkilo che junam ta ri kqabʼano rukʼ ri kqakʼutu, ri e areʼ kkibʼij chqe». Rumal laʼ, we kqaj che ri akʼalabʼ kkiloqʼoqʼej ri Jehová, rajawaxik che oj nabʼe kqaloqʼoqʼej ri Jehová y e areʼ kkil wariʼ. Ri e tat nan kekunik kkibʼan kʼi jastaq chkiwach ri kalkʼwal rech ri kalkʼwal kkiloqʼoqʼej ri Jehová. Jun ala che 17 ujunabʼ y ubʼanom chi uqasanjaʼ kubʼij: «Ri nutat nunan xkikʼut chnuwach che sibʼalaj nim ubʼanik ri chʼawem. Ronojel taq chaqʼabʼ, ri nutat kubʼan uchʼawem wukʼ paneʼ ya nubʼanom chi ri wech in. Amaqʼel kkibʼij chqe: ‹Kixkunik amaqʼel kibʼan ichʼawem che ri Jehová›. Rumal laʼ ri chʼawem sibʼalaj nim ubʼanik chnuwach. Kimik utz kinnaʼo kinchʼaw rukʼ ri Jehová, y kinnaʼ che are jun tat che kinuloqʼoqʼej». Tat nan, amaqʼel chnaʼtaj chiwe che ri iloqʼoqʼebʼal che ri Jehová sibʼalaj nim ubʼanik pa ri kikʼaslemal ri iwalkʼwal. w22.05 28 párrs. 7, 8

¿Jas rajawaxik kabʼano rech kabʼan aqasanjaʼ? rajawaxik kqakʼex ri qakʼaslemal (Hech. 2:37, 38). Ukʼexik kʼaslemal kraj kubʼij, uyaʼik kan ubʼanik ri makaj. ¿La ayaʼom kan ubʼanik jastaq che utz ta kril ri Jehová junam rukʼ ri ubʼanik tzʼil taq makaj, utijik sikʼ o ubʼixik itzel taq tzij? (1 Cor. 6:9, 10; 2 Cor. 7:1; Efes. 4:29). Chakojoʼ achuqʼabʼ che uyaʼik kanoq. We kajwataj tobʼanik chawe chatchʼaw rukʼ ri tajin kyaʼow etaʼmanik re ri Biblia chawe o kukʼ ri kʼamal taq bʼe. We kʼa at ala o at ali na y kʼa at kʼo na kukʼ ri atat anan chataʼ ri kitobʼanik. Xuqujeʼ nim ubʼanik che amaqʼel katbʼe pa ri e riqbʼal ibʼ y kaya acomentario (Heb. 10:24, 25). Y, are chiʼ katux publicador no bautizado, amaqʼel chatel che utzijoxik ri utzij ri Dios. w23.03 10, 11 párrs. 14-16

Pa Génesis 3:14, 15 kchʼaw chrij jun «kumatz» y «ri rijaʼlil» ri kumatz. Ri «kumatz» are ta jun qastzij chikop. Wet are jun qastzij kumatz xuchʼobʼ ta riʼ are chiʼ xqʼat tzij pa uwiʼ rumal ri Jehová pa ri jardín re Edén. Ri jun kumatz riʼ are jun uxlabʼal che kʼo unojibʼal. Ri Biblia kuqʼalajisaj jachinoq. Pa Apocalipsis 12:9 kubʼij che ri «ojer kumatz» are ri Itzel, Satanás. Are chiʼ ri Biblia kukoj ri tzij «ijaʼlil» tajin kchʼaw chrij jun etal, jachaʼ jun winaq che kresaj uwach ri unojibʼal y ri uchomanik ri utat. Rumal laʼ ri rijaʼlil ri kumatz are ri e uxlabʼal y ri e winaq che kkikʼulelaj ri Jehová y ri utinamit, junam rukʼ ri kubʼan ri Satanás. Chkixoʼl wariʼ e kʼo ri ángeles che xeqaj lo pa ri uwach Ulew pa taq ri uqʼij ri Noé y ri e winaq che kkibʼan itzelal junam rukʼ ri kitat, ri Itzel (Gén. 6:1, 2; Juan 8:44; 1 Juan 5:19; Jud. 6). w22.07 14, 15 párrs. 4, 5

Ri apóstol Pablo sibʼalaj xeraj ri cristianos. Rumal che ri areʼ xuqujeʼ xuriq jujun taq kʼax, xel ukʼuʼx y xuchʼobʼ ri keriqitaj wi ri xkiriq kʼax. Jumul, ri areʼ xkʼis ronojel ri urajil y rumal laʼ rajawaxik xchakunik rech xuriq ri xajwataj che xuqujeʼ ri ke ri e rachiʼl (Hech. 20:34). Ri uchak ri Pablo are ubʼanik ja re atzʼyaq. Are chiʼ xopan pa Corinto xchakun kukʼ ri Áquila y ri Priscila, rumal che junam ri kichak. Are kʼu ronojel taq sábados xutzijoj ri utzij ri Dios chke ri judíos y ri griegos. Y, are chiʼ xeʼopan ri Silas y ri Timoteo, «ri Pablo xujach ribʼ che utzijoxik» ri utzij ri Dios (Hech. 18:2-5). Rumal laʼ, ri más nim ubʼanik chuwach ri apóstol Pablo are ri upatanexik ri Jehová. Ri areʼ are jun ajchakalaj achi che xkunik xuya kichuqʼabʼ ri cristianos, xuya jujun taq pixabʼ chke rech kekunik kkichʼij ri kʼax y xubʼij chke che we are más ksach kikʼuʼx che uyaʼik ri kajwataj che ri kifamilia wariʼ kubʼano che are ta chi keʼok il che ri más nim ubʼanik, upatanexik ri Jehová. w22.08 20 párr. 3

Ri kraj ri Dios kimik are che ktzijox pa ronojel ri uwach Ulew ri utzalaj taq jastaq che kubʼan na ri uQʼatbʼal tzij (1 Tim. 2:3, 4). Rech ri Jehová wajun chak, y nim ubʼanik che ri areʼ are xuchaʼ ri uKʼojol rech kukʼam qabʼe. Rumal che pa uqʼabʼ ri Jesús kʼo wi ri kbʼan che utzijoxik ri utzij ri Dios, qas qetaʼm che are chiʼ kpe ri kʼisbʼal, sibʼalaj kkikot riʼ ri Jehová rukʼ ronojel ri chak bʼanom (Mat. 24:14). ¿Jasche qetaʼm? Are chiʼ xa jubʼiqʼ chi kraj kpaqiʼ pa ri kaj, xeʼumulij ri utijoxelabʼ pa jun juyubʼ re Galilea y xubʼij chke: «Ronojel taqanik pa ri kaj, ronojel taqanik cho ri uwach ulew yoʼm pa nuqʼabʼ». Y chojchoman chi chrij ri xubʼij kanoq: «Rumal kʼu riʼ, jix, chibʼanaʼ tijoxelabʼ chke ri winaq pa konojel ri tinamit cho ri uwach ulew» (Mat. 28:18, 19). Wariʼ kukʼutu che are ri Jesús tajin kkʼamow ubʼe ri kbʼan che utzijoxik ri utzij ri Dios. w22.07 8 párrs. 1, 3; 9 párr. 4

Ri e utz taq winaq, kraj kubʼij, ri xkibʼan utz taq jastaq are chiʼ majaʼ kekamik «kekʼastaj na rech kkʼojiʼ na kikʼaslemal», rumal che tzʼibʼam ri kibʼiʼ pa ri wuj re kʼaslemal. Wariʼ kraj kubʼij che «ri xkibʼan ri utz», che kyaʼ ubʼixik pa Juan 5:29, xaq junam kukʼ ri «e utz» che kyaʼ ubʼixik pa Hechos 24:15. Ri xqil chanim riʼ, kʼo ubʼanik rukʼ ri kubʼij Romanos 6:7: «Ri jun ri kaminaq chik, man kʼo ta chi utaqanik ri makaj puwiʼ». Are chiʼ kekam ri e utz taq winaq, ksach uwach ri kimak, are kʼu kʼa knaʼtaj na che ri Dios ri xkibʼan che upatanexik (Heb. 6:10). Are kʼu, are chiʼ kekʼastajisax ri e utz, rajawaxik kkiya ta kan ukʼutik ri kisukʼilal che ri Dios rech kchup ta ri kibʼiʼ pa ri wuj re kʼaslemal. w22.09 18 párrs. 13, 15

Ri qʼaxal tzij Daniel xuya kan jun utz kʼutbʼal chqawach. Are chiʼ xkʼam bʼi pa Babilonia, aninaq xkubʼsax kʼuxaj chrij. Y más na xkubʼsax kʼuʼx chrij are chiʼ rumal ri utobʼanik ri Jehová xkunik xubʼij ri kraj kubʼij ri rachikʼ ri qʼatal tzij Nabucodonosor (Dan. 2:12; 4:20-22, 25). Are chiʼ qʼaxinaq chi kʼi junabʼ ri Daniel xubʼan chi jun jastaq che xukʼutu che kkubʼsax kʼuʼx chrij, rumal che ri areʼ rukʼ tzʼaqatil xubʼij ri kraj kubʼij ri e tzij che xeqʼalajin chuwach jun tapya o pared pa ri palacio re Babilonia (Dan. 5:5, 25-29). Y are chiʼ qʼaxinaq chi ri tiempo ri Darío ri medo y ri e rachiʼl pa ri qʼatbʼal tzij xkilo che ri Daniel «man junam ta kukʼ ri nikʼaj» chik. Xuqujeʼ «man xkiriq ta kʼu jun tzujubʼal rech ri Daniel rumal rech chi ronojel ri kubʼano sibʼalaj tzʼaqat» (Dan. 6:3, 4). Utz we kojchoman chrij wariʼ: «¿La kkikubʼsaj kikʼuʼx ri e nikʼaj chik chwij y la qas kkilo che kinbʼan ri chak che kyaʼ chwe?». Are chiʼ kqakʼutu che kuyaʼ kkubʼsax kʼuʼx chqij, kqaya uqʼij ri Jehová. w22.09 8, 9 párrs. 2-4

Are chiʼ kqanimaj ri utaqanik ri Jehová chrij ri ubʼanik ri utz y ri utz taj, kqariq utzilal pa ri qakʼaslemal. Chqilampeʼ jasche. Jun kʼutbʼal, ¿jas kkʼulmataj riʼ we chkijujunal ri bancos kkichaʼ jas pwaq kkikojo? Qastzij riʼ che kriqitaj kʼax. Y, we pa jun hospital chkijujunal ri kunanelabʼ o enfermeras kekikunaj ri yawabʼibʼ junam rukʼ ri kkaj e areʼ, kʼo jujun riʼ kekamik. Rumal laʼ, unimaxik ri utaqanik ri Jehová kojuchajij rech kqariq ta kʼax. Ri Jehová keʼutewchij ri kkikoj kichuqʼabʼ che unimaxik ri utaqanik. Y kutzujuj chke che «ri e utzalaj taq winaq kkechbʼej na ri ulew kejeqiʼ kʼu na chuwach chbʼe qʼij saq» (Sal. 37:29). ¿Jas kkiriq riʼ ri winaq we konojel kkinimaj ri utaqanik ri Jehová? Kkʼojiʼ kikotemal riʼ chkixoʼl y jamaril. Ri Jehová kraj che at xuqujeʼ kariq ri e tewchibʼal riʼ. Rumal laʼ, kʼo kʼi rumal che nim kqil wi ri utaqanik. w22.08 27, 28 párrs. 6-8

Are chiʼ kʼo kʼax kqariqo, qas kqʼalajinik we amaqʼel oj sukʼ che ri Jehová y ri utinamit. ¿Jas kojtoʼwik? Are ri ukojik utz chomanik, kojkʼaskʼatik y ko kojkʼojiʼ pa ri qakojonik. ¿Jas kqabʼan che ukojik utz chomanik? Kkʼojiʼ qapaciencia, rukʼ saqil kojchomanik y kqakoj qachuqʼabʼ che rilik ri jastaq junam rukʼ ri kubʼan ri Jehová che rilik. We je kqabʼano, ri bʼis o ri kqanaʼo kusach ta ri qachomanik. ¿La kʼo jumul achomam che jun qachalal ubʼanom kʼax chawe, y che weneʼ kʼo nimaʼq taq reqeleʼn? Qastzij riʼ che ri qachalal kraj taj kubʼan kʼax chawe (Rom. 3:23; Sant. 3:2). Are kʼu, weneʼ sibʼalaj kʼax xanaʼ ri xubʼan chawe. Katchoman chrij ri xkʼulmatajik y weneʼ kabʼij wariʼ: «We jun winaq jewaʼ kubʼano, ¿la qastzij wi che are wariʼ ri utinamit ri Dios?». Are riʼ ri kraj ri Satanás kqachomaj (2 Cor. 2:11). We kqachajij ta qibʼ, ronojel ri e chomanik riʼ y ri kqanaʼo weneʼ kojunajtajisaj che ri Jehová y che ri utinamit. Rajawaxik kqachajij qibʼ rech kqakʼol ta oyowal pa qanimaʼ. w22.11 20 párrs. 1, 3; 21 párr. 4

Ri Jehová utzujum jun kʼaslemal che kʼo ta ukʼisik chqe. Jujun chke ri upataninelabʼ keyem che kebʼe pa ri kaj rech keʼux uxlabʼal y kʼo ta chi utaqanik ri kamikal pa kiwiʼ (1 Cor. 15:50, 53). Are kʼu, más e kʼi keyem jun jeʼlalaj kʼaslemal che kʼo ta ukʼisik cho ri uwach Ulew (Apoc. 21:3, 4). Qonojel nim kqil wi ri eyebʼal re ri kʼaslemal pa ri kaj o cho ri uwach Ulew. Qas qetaʼm che ronojel ri qeyem kebʼantaj na, rumal che are ri Jehová bʼinaq (Rom. 15:13). Qas qetaʼm jas ri jastaq utzujum chqe y qas kqachʼobʼo che amaqʼel kubʼan ri kubʼij (Núm. 23:19). Y ri Jehová kraj y kkunik kubʼan ronojel ri kubʼij. Ri loqʼalaj qaTat kʼo pa ri kaj kojraj y kraj che kqakubʼsaj qakʼuʼx chrij. We qas rukʼ ronojel qanimaʼ kqeyeʼj ri jastaq che kutzujuj ri Jehová, kojkunik kqachʼij ri kʼax y kʼo ukowil qakʼuʼx kimik y kojkikotik rech kqeyeʼj ri petinaq. w22.10 24 párrs. 1-3

Rumal che xeniman ta ri winaq, ri Isaías xuya ubʼixik che ri Jehová kuya bʼe che kpe nimaʼq taq kʼax pa kiwiʼ (Is. 30:5, 17; Jer. 25:8-11). Y je xkʼulmatajik, rumal che ri babilonios xekikʼam bʼi pa ri kitinamit. Are kʼu xuqujeʼ e kʼo jujun judíos che e utz chuwach ri Jehová, y ri qʼaxal tzij Isaías xuya ubʼixik che are chiʼ kqʼax ri tiempo ri Jehová keʼutoʼo y kuya utz taq jastaq chke (Is. 30:18, 19). Y ri xubʼij ri Isaías qas xetzʼaqatik. Ri Jehová xeresaj lo pa Babilonia, are kʼu aninaq taj. Ri e tzij «ri Ajawaxel kixreyej, che utoqʼobʼisaxik iwach» kuqʼalajisaj che ri e utz taq judíos rajawaxik kekʼojiʼ na jun tiempo pa Babilonia tekʼuriʼ keʼelesax lo rumal ri Jehová, y je xkʼulmatajik. Rumal che, xqʼax na 70 junabʼ are chiʼ ri Jehová xuya bʼe che e jujun taq judíos xetzalij bʼi pa Jerusalén (Is. 10:21; Jer. 29:10). Are chiʼ xetzalij bʼi pa Jerusalén, xkʼextaj ri koqʼej re bʼis pa oqʼej re kikotemal. w22.11 9 párr. 4

Kimik e kʼi qachalal tajin kkiriq kʼax junam rukʼ ri xkiriq ri apóstoles pa ri nabʼe siglo are chiʼ xechʼaw chrij ri Jesús. Kʼi mul, ri e qʼatal taq tzij kech ri judíos «xkibʼij chke chi man ketzijon ta chik pa ri ubʼiʼ ri Jesús» (Hech. 4:18-20; 5:27, 28, 40). Are kʼu ri e areʼ ketaʼm che más kʼo na taqanik pa uqʼabʼ ri e taqowinaq rech kkitzijoj ri utzij ri Dios y kechʼaw chrij ri Cristo (Hech. 10:42). Rumal laʼ, ri Pedro y ri Juan xechʼaw pa kibʼiʼ konojel ri apóstoles, rukʼ ukowil kikʼuʼx xkibʼij chke che are ta kekinimaj e areʼ, xaneʼ are ri Dios, y xkijikibʼaʼ kan ubʼixik che kkitanabʼaʼ ta utzijoxik ri jastaq che xukʼut kan ri Jesús (Hech. 5:29). Are chiʼ e chʼayayem chik rumal che xaq xiw kkinimaj ri kubʼij ri Dios, xeʼel lo chkiwach ri jupuq qʼatal taq tzij judíos «kekikotik rumal rech chi ri Dios xuya chke chi ketzelax kiwach rumal rech ri ubʼiʼ ri Jesús», y xkitaqej utzijoxik ri utzij ri Dios (Hech. 5:41, 42). w22.10 12, 13 párrs. 2-4

Are chiʼ jun kretaʼmaj chrij ri Jehová, kumajij retaʼmaxik ri nabʼe taq etaʼmanik, che ri apóstol Pablo xubʼij «nabʼe taq taqanik» che pa ri wuj re Hebreos. Kraj ta kubʼij che xa nim ta ubʼanik «ri nabʼe taq etaʼmanik»; xaneʼ xujunamaj rukʼ ri leche che kyaʼ che jun neʼ (Heb. 5:12; 6:1). Y xubʼij chke ri cristianos che kkinimarisaj más ri ketaʼmanik chrij ri uTzij ri Dios. ¿La kawaj at kawetaʼmaj más? ¿La tajin kakoj achuqʼabʼ rech kanimarisaj más ri awetaʼmanik chrij ri Jehová y ri kraj kubʼano? E kʼo jujun utz ta kkilo kkisikʼij o kkinikʼoj uwach wuj. ¿E kʼu ri at la utz kawilo? We utz taj, kachomaj taj che xaq xiw ri at utz ta kawilo. Kʼo ri Jehová che atoʼik rumal che are ri utzalaj ajtij che kʼolik. w23.03 9, 10 párrs. 8-10

We kojmachʼachʼik, kqaya bʼe che ri uTzij ri Dios kok pa qanimaʼ. Kqabʼan ta nim che qibʼ y are ta kojchoman chrij ri utz taj kkibʼan ri e nikʼaj chik are chiʼ kqasikʼij uwach ri Biblia. Jeriʼ kojkunik kqakʼut utz taq bʼantajik junam rukʼ ri toqʼobʼisal wachaj y ri loqʼoqʼebʼal. Ri kqabʼan che kilik ri e nikʼaj chik kukʼutu we qas kqabʼan ri kubʼij pa ri uTzij ri Dios. Rumal che ri fariseos xkibʼan ta ri xubʼij ri uTzij ri Dios, utz ta xkibʼan che uqʼatik tzij pa kiwiʼ ri e nikʼaj chik (Mat. 12:7). Rumal laʼ, qas chqilaʼ ri kqabʼan che kilik ri e nikʼaj chik. Jun kʼutbʼal, chojchomanampeʼ chrij ri preguntas riʼ rech kqilo we tajin kqaya bʼe che ri Biblia kojutijoj: ¿la are kwil ri utz taq kibʼantajik ri e nikʼaj chik o xaq xiw kwil ri kesach wi? ¿La kinkuy kimak ri e nikʼaj chik o xaq xiw kpe woyowal chkij y keʼinyoqʼo? (1 Tim. 4:12, 15; Heb. 4:12). w23.02 12 párrs. 13, 14

Chojchoman chrij ri José re Arimatea, jun achi che nim kil wi kumal ri judíos. Wajun achi kʼo chkixoʼl ri e kʼo pa ri jupuq qʼatal taq tzij judíos ri kbʼix Sanedrín che. Are kʼu are chiʼ ri Jesús xutzijoj ri utzij ri Dios, ri José xuxeʼj ribʼ chkiwach ri winaq. Rumal che ri Juan xubʼij wariʼ chrij: «Ri areʼ utijoxel ri Jesús, xa chi kʼuyal [o chawal] rumal rech chi kuxeʼj ribʼ chkiwach ri judíos» (Juan 19:38). Paneʼ utz xuta ri xtzijox chrij ri uQʼatbʼal tzij ri Dios, xuqʼalajisaj ta chkiwach ri winaq che kkojon chrij ri Jesús. ¿Jasche jeriʼ xubʼano? Weneʼ xa kuxeʼj ribʼ che nim ta chi kil kumal ri winaq. Apastaneʼ ri rumal, ri Biblia kubʼij che are chiʼ kaminaq chi ri Jesús, ri José xuxeʼj «ta ribʼ, xok bʼik chuwach ri Pilato, xutzʼonoj ri ucuerpo ri Jesús che» (Mar. 15:42, 43). Rukʼ wariʼ, ri José xukʼut chkiwach ri winaq che kkojon chrij ri Jesús. ¿La kaxeʼj awibʼ at chuwach ri kkichomaj ri winaq chawij junam rukʼ ri xukʼulmaj ri José re Arimatea? w23.01 30 párrs. 13, 14

Ri jamaril y ri utzilal che xkiriq ri israelitas pa ri utiempo ri Salomón xretaʼmaj ri reina re Saba. Rumal laʼ, ri areʼ xbʼe kʼa pa Jerusalén rech kerilaʼ rukʼ ubʼaqʼwach we qastzij ri xbʼix che (1 Rey. 10:1). Are chiʼ xerilaʼ ri tajin kubʼan ri qʼatal tzij Salomón, xubʼij ri e tzij re texto re ri kimik. Ri utzilal y ri jamaril che xriqitaj pa ri utiempo ri Salomón xukʼutunsaj ri kubʼan na ri Jehová are chiʼ kuqʼat tzij ri Jesús cho ri uwach Ulew. Ri Jesús más nim na ubʼanik chuwach ri Salomón. Ri Salomón xa ajmak winaq y rukʼ ri xubʼano xubʼan kʼax che ri utinamit ri Dios. Are kʼu ri Jesús are jun tzʼaqatalaj qʼatal tzij che kʼo ta ksach wi (Luc. 1:32; Heb. 4:14, 15). Xukʼut pa ri ukʼaslemal che kmakun taj y kubʼan ta jun jastaq che kubʼan kʼax chke ri winaq. ¡Sibʼalaj kojkikotik che are ri Jesús kqʼatow na tzij pa qawiʼ! w22.12 11 párrs. 9, 10

¿Jas kʼu kqabʼano we pa ri qatinamit kpe jun nimalaj yabʼil? Rajawaxik kqanimaj ri e pixabʼ che kkiya ri qʼatal taq tzij, junam rukʼ ri uchʼajik qʼabʼaj, naj qaxoʼl kukʼ ri winaq, kqakoj mascarillas y kojel ta bʼi pa qachoch we kqariq ri yabʼil. We kqabʼan ronojel wariʼ, kqakʼutu che nim kqil wi ri qakʼaslemal. Are chiʼ kkʼulmataj jun kʼax, kqakoj ta ronojel ri kkibʼij ri e qachiʼl, ri e qachalaxik o ri noticias. Rumal che jujun taq mul kkibʼij ta ri qastzij, xaneʼ are rajawaxik kqakoj ri kkibʼij ri e qʼatal taq tzij y ri e kunanelabʼ (Prov. 14:15). Xuqujeʼ are chqanimaj ri kubʼij ri jikalaj pataninel y ri sucursales chrij ri kqabʼan che ri e qariqbʼal ibʼ y ri kqabʼan che utzijoxik ri utzij ri Dios, rumal che ri e areʼ qas kkinikʼoj na rij ri kkichaʼ ubʼanik. Are chiʼ kqabʼan ri kkibʼij, xaq xiw ta kqachajij qibʼ oj, xaneʼ xuqujeʼ keqachajij ri e nikʼaj chik y weneʼ rukʼ wariʼ ri e winaq utz kechʼaw chqij ri testigos rech Jehová (1 Ped. 2:12). w23.02 23 párrs. 11, 12

Are chiʼ ri israelitas xeʼok pa ri Tzujum Ulew, xekʼojiʼ pa jalajoj taq lugar. Rumal laʼ, ri israelitas che naj keʼel wi xekun taj xkil kiwach kukʼ e nikʼaj chik, are kʼu ri Jehová xubʼij chke che kkimulij kibʼ rech kkitatabʼej ri uTzij y kketaʼmaj más chrij (Deut. 31:10-12; Neh. 8:2, 8, 18). Rumal laʼ, chichomajampeʼ ri kunaʼ jun israelita are chiʼ kopan pa Jerusalén y kuriqaʼ ribʼ kukʼ kʼi israelitas che kepe pa ronojel lugar. ¿La mat qastzij riʼ che sibʼalaj kkikotik? Je waʼ xubʼan ri Jehová che kitoʼik rech xekʼojiʼ pa junamam. Y jelaʼ xubʼan che kitoʼik ri cristianos re ri nabʼe siglo, rumal che pa ri congregación xekʼojiʼ winaq che jalajoj kibʼantajik, kichʼabʼal y kitinamit. Are kʼu pa junamam xkiqʼijilaj ri qastzij Dios. Y ri xeʼopan pa ri congregación xkichʼobʼ ri uTzij ri Dios rumal che xetoʼ che uchʼobʼik (Hech. 2:42; 8:30, 31). w23.02 3 párr. 7

Ri Jehová kraj che ri keniman che kkiriq «junalik kʼaslemal» (Rom. 6:23). Are chiʼ kojchoman chrij wajun jeʼlalaj jastaq che kutzujuj chqe knimar ri qaloqʼoqʼebʼal che. Chojchoman chrij wariʼ: ri qaTat kʼo pa ri kaj sibʼalaj kojuloqʼoqʼej y kraj kusipaj wariʼ chqe rech amaqʼel kojkʼojiʼ chunaqaj. Ri kʼaslemal kʼo ta ukʼisik che kutzujuj ri Dios chqe kojutoʼo rech kqachʼij ri kʼax. Paneʼ ri e qakʼulel kkaj kojkikamisaj, kqaya ta kan upatanexik ri Jehová. ¿Jasche? Jun rumal are che qetaʼm che we kqaya ta kan upatanexik kʼa pa ri kamikal, ri areʼ kojukʼastajisaj chi na y kuya ri kʼaslemal kʼo ta ukʼisik chqe (Juan 5:28, 29; 1 Cor. 15:55-58; Heb. 2:15). Qetaʼm che ri Jehová kkunik kuya jun kʼaslemal kʼo ta ukʼisik chqe rumal che rukʼ kpe wi ri kʼaslemal y kkam ta wi (Sal. 36:9). Ri Biblia che kukʼutu che ri Jehová amaqʼel kʼolinaq y amaqʼel kkʼojiʼ na (Sal. 90:2; 102:12, 24, 27). w22.12 2 párrs. 1-3

Ri oj upatanelabʼ ri Jehová qetaʼm che kojqʼax wi pa kʼax. Rumal che ri Biblia kubʼij wariʼ: «Ri okem chupam ri rajawbʼal ri Dios rajawaxik kiriqik kʼi kʼaxkʼolil» (Hech. 14:22). Y qetaʼm che jujun chke ri kʼax che kqariq kimik, kʼateʼ ksach kiwach are chiʼ bʼanom chi kotzʼiʼj che ri uwach Ulew jawiʼ «man kʼo ta chi [wi] kamikal. Man kʼo ta chi bʼis, man kʼo ta chi kuraq uchiʼ rumal kʼax, mawi kʼo chi qʼoxowem» (Apoc. 21:4). Ri Jehová kojresaj ta pa ri kʼaxkʼolil, are kʼu kuya qachuqʼabʼ che uchʼijik. Chojchoman chrij ri xubʼij ri Pablo chke ri cristianos re Roma are chiʼ xchʼaw chrij ri kʼax che tajin kkiriqo, xubʼij wariʼ chke: «Paneʼ kqariq konojel we jastaq riʼ, kojchʼakan na puwiʼ ronojel, rumal ri jun ri xojuloqʼoqʼej» (Rom. 8:36, 37). Wariʼ kukʼut chqawach che ri Jehová kojutoʼo rech utz kel ronojel ri jastaq chqawach paneʼ tajin kojqʼax pa jun kʼaxkʼolil. w23.01 14 párrs. 1, 2