Marzo

Pa ri nabʼe carta che xutzʼibʼaj ri apóstol Pedro xubʼij chke ri cristianos che rajawaxik kkikoj ri kekun che ubʼanik che kitoʼik ri e nikʼaj chik. Xutzʼibʼaj: «Chiyalaʼ iwe chijujunal jas ri yoʼm chiwe rumal ri Dios, je jas utzalaj taq e chajil re ronojel uwach utoqʼobʼ ri Dios» (1 Ped. 4:10). Utz taj che mat kqakoj ri kojnaw che ubʼanik xa rumal che kqachomaj che itzel kojkil nikʼaj chik o kkinaʼo che kʼo ta kekun che ubʼanik. Are kʼu rajawaxik che kqanimarisaj ta qibʼ (1 Cor. 4:6). Chnaʼtaj chqe che apachike uwach jastaq che kojkun che ubʼanik are rumal che are ri Dios kojtowik. Rumal laʼ, chqakojoʼ rech kqaya kichuqʼabʼ ri e qachalal y xa ta kqabʼan nim che qibʼ chkiwach (Filip. 2:3). Are chiʼ kqakoj ri qachuqʼabʼ y ri kojkun che ubʼanik rech kqabʼan ri kraj ri Dios, kʼo kʼi rumal che kojkikotik. ¿Jasche? Rumal che tajin kqakoj ronojel ri kʼo qukʼ rech kqaya uqʼij ri Jehová. w22.04 11, 12 párrs. 7-9

Ri Jesús sibʼalaj nim xril wi ri uTzij ri Dios. Rumal che pa Salmo 40:8 kubʼij wariʼ chrij: «Ri in kqaj chnuwach ri ubʼanik ri rayibʼal la; ¡e nukʼolom ri tijonik la pa ri wanimaʼ!». Rumal che sibʼalaj nim xril wi, xtobʼan che rech xuya ta kan upatanexik ri Jehová y rech xkikotik. Je kkʼulmataj qukʼ oj we kqaya ta kan ukojik qachuqʼabʼ che usikʼixik uwach ri uTzij ri Dios y nim kqil wi (Sal. 1:1-3). Ri xukʼut kan ri Jesús y ri xubʼij kojutoʼ rech amaqʼel kqanikʼoj ri uTzij ri Dios y utz kqabʼan che uchʼobʼik. Rech kqachʼobʼ ri kqasikʼij uwach rajawaxik kqabʼan qachʼawem che ri Jehová, aninaq taj kqasikʼij, kqabʼan preguntas rech kojchoman chrij y kqabʼan notas. Rech más kqachʼobʼ rij, utz chqabʼanaʼ che unikʼoxik ri tajin kqasikʼij y chqatzukuj más información pa ri e qawuj. We kqabʼan ronojel wariʼ kojutoʼ rech qas kqabʼan pa qakʼaslemal ri kqasikʼij uwach y kojqebʼ más rukʼ ri Jehová (Sal. 119:17, 18; Sant. 4:8). w23.02 13 párrs. 15, 16

Chojchoman chrij jun meta che kqaj kojchakun chrij y chqakojoʼ qachuqʼabʼ rech kqabʼan ri xqachomaj. ¿Jas kqabʼan che ubʼanik? Chqachomajampeʼ che kqaj kojux más utz taq ajtijabʼ. Utz kqanikʼoj más ri folleto Chojux utz taq sikʼil uwach wuj xuqujeʼ ajtijabʼ. Y, are chiʼ majaʼ kqaya jun asignación pa ri e riqbʼal ibʼ che kbʼan chuxoʼl semana, utz che kqataʼ che jun chi qachalal che kojutatabʼej y kubʼij chqe jas rajawaxik kqasukʼumaj. We kqatijoj qibʼ che ri asignación are chiʼ kraj na jun o kebʼ semanas che kqayaʼo, kojux más jun utz ajtij riʼ y ri e nikʼaj chik kkilo che qas oj ajchakibʼ y kkikubʼsaj kikʼuʼx chqij (2 Cor. 8:22). ¿E kʼu we kʼo jun jastaq kojkun ta che ubʼanik? ¡Kkʼistaj ta qakʼuʼx! ¿La xux ri Timoteo jun utzalaj yaʼol chʼabʼal y jun utzalaj ajtij? Ri Biblia kuya ta ubʼixik, are kʼu qetaʼm che qas xubʼan ri pixabʼ che xbʼix che rumal ri Pablo. Qastzij riʼ che nojimal chi nojimal xux jun utzalaj ajtij y utz xubʼan che ubʼanik ri chak che xyaʼ che (2 Tim. 3:10). w22.04 24, 25 párrs. 8-11

¿Jachin chrij kchʼaw wi ri etal re ri xibʼibʼal awaj che kʼo siete ujolom? Apocalipsis kubʼij che ri xibʼibʼal awaj kjunamataj rukʼ jun leopardo, are kʼu re jun oso ri e raqan y ri uchiʼ re jun koj y kʼo 10 rukʼaʼ. Paneʼ ri capítulo 7 re Daniel kchʼaw chkij kajibʼ xibʼibʼalalaj taq awaj: jun leopardo, jun oso, jun koj y jun awaj che kʼo 10 rukʼaʼ. Are kʼu pa Apocalipsis, ri kyaʼ ubʼixik are che xa jun xibʼibʼal awaj kel lo pa ri mar che je kpe leopardo, ri raqan junam rukʼ re jun oso, ri uchiʼ junam rukʼ re jun koj y kʼo 10 rukʼaʼ. Rumal laʼ, wajun xibʼibʼal awaj tajin ta kchʼaw chrij xa jun qʼatbʼal tzij pa ri uwach Ulew. ¿Jasche? Rumal che Apocalipsis kubʼij che «xyaʼ kʼu taqanik pa uqʼabʼ pa kiwiʼ konojel amaqʼ, xuqujeʼ winaq, xuqujeʼ chʼabʼal, xuqujeʼ nimaʼq taq tinamit». Wariʼ kukʼutu che más nim na uchuqʼabʼ chuwach jun qʼatbʼal tzij re jun tinamit (Apoc. 13:7). Rumal laʼ, kqabʼij che ri xibʼibʼal awaj are konojel ri e qʼatbʼal taq tzij che e taqanaq pa kiwiʼ ri e winaq pa ronojel uwach Ulew (Ecl. 8:9). Jun chi rumal are wariʼ, are chiʼ ri Biblia kchʼaw chrij ri número 10, kraj kubʼij che jun jastaq tzʼaqat. w22.05 9 párr. 6

¿E jachin taq kkiriq na ri tewchibʼal? Nabʼe, ri e kʼiʼalaj winaq che kekʼasiʼ kan pa ri Armagedón y ri akʼalabʼ che keʼalax pa ri kʼakʼ uwach Ulew. Are kʼu xaq xiw ta ri e areʼ. Rumal che pa ri capítulo 20 re Apocalipsis kuya ubʼixik che kekʼastaj na lo ri e kaminaqibʼ (Apoc. 20:11-13). ¿E jachin ri kekʼastaj loq? Ri «e sukʼ», kraj kubʼij, ri sukʼalaj taq upatanelabʼ ri Jehová che xekam ojer, xuqujeʼ ri «e lawalo» o ri xkibʼan ta ri utz, kraj kubʼij ri winaq che xketaʼmaj ta uwach ri Jehová (Hech. 24:15; Juan 5:28, 29). ¿La kraj kubʼij wariʼ che konojel ri e kaminaq kekʼastaj lo pa ri Mil Junabʼ? Je taj. Rumal che ri winaq che xkaj taj xkipatanij ri Jehová are chiʼ majaʼ kekamik kekʼastaj ta chi loq. Rumal che xyaʼ bʼe chke, are kʼu ri areʼ xkaj taj xkibʼano y rukʼ wariʼ xkikʼutu che kkaj taj kekʼasiʼ pa ri kotzʼiʼjalaj uwach Ulew (Mat. 25:46; 2 Tes. 1:9; Apoc. 17:8; 20:15). w22.05 18 párrs. 16, 17

Rumal «ri jikalaj pataninel, utz uchomanik», ri Jesús uyaʼom chke ri utijoxelabʼ ri kajwataj chke rech utz kkibʼan che uqʼijilaxik ri Dios cho ri uwach Ulew (Mat. 24:45). ¿Jas kachomaj at chrij ri utinamit ri Dios? Weneʼ kabʼij awe junam rukʼ ri xubʼij ri Pedro pa ri texto re kimik. ¿Jas ta qakʼulmam riʼ wet mat xqachʼobʼ uwach ri utinamit ri Jehová? Rumal ri utinamit ri Jehová, ri Jesús rilom ri qas kajwataj chqe pa ri qakojonik y kojutijoj rech kojux utzalaj taq ajtijabʼ. Xuqujeʼ, kojutoʼ rech kqakoj «ri kʼakʼ kʼaslemal» rech kkikot ri Jehová qukʼ (Efes. 4:24). Are chiʼ kqariq kʼax, ri Jesús rukʼ nojibʼal kukʼam qabʼe. Qas xilitaj wariʼ are chiʼ xumaj ri nimalaj yabʼil COVID-19. E kʼi winaq cho ronojel ri uwach Ulew ketaʼm taj jas kkibʼano are chiʼ xumajij wajun yabʼil, are kʼu ri Jesús qas xrilo che ri upatanelabʼ kkichajij kibʼ chuwach wajun yabʼil. w22.07 12 párrs. 13, 14

Jehová xubʼij chke ri tat nan israelitas che ketzijon kukʼ ri kalkʼwal chrij ri areʼ ronojel taq qʼij (Deut. 6:6, 7). Are chiʼ xkibʼan ri kichak xetzijon kukʼ ri kalkʼwal y xkikʼut chkiwach jas kkibʼan che uloqʼoqʼexik ri Jehová. Jun kʼutbʼal, ri tat kkunik ktzijon chrij ri Jehová kukʼ ri alaj taq alabʼom chiʼ ketobʼan che utikik y uyakik uwach ri kitikoʼn. Y ri nan kkunik ktzijon kukʼ ri alaj taq alitomabʼ chiʼ kemesonik, kkibʼan chʼajoʼn, ketʼisomanik o chiʼ kekemenik. Wariʼ kubʼano che kechoman chrij ri uloqʼoqʼebʼal ri Jehová xuqujeʼ ri kubʼan che uchajixik ri familia. Pa kʼi taq tinamit, ri e tat nan y ri alkʼwalaxelabʼ junam ta chi kekʼojiʼ, rumal che weneʼ e kʼo pa ri chak o pa ri tijobʼal. Rumal laʼ, ri e tat nan rajawaxik kkitas tiempo rech kekʼojiʼ kukʼ ri kalkʼwal y ketzijon kukʼ (Efes. 5:15, 16). w22.05 28 párrs. 10, 11

Ri nimaʼq taq makaj are jun itzelal che kbʼan chuwach ri Dios. We kʼo jun kubʼan jun makaj junam rukʼ wariʼ, kukʼutu che tajin ta kunimaj ri utaqanik ri Dios. Rajawaxik kutaʼ che ri Jehová che kusach umak xuqujeʼ rajawaxik kubʼij chke ri kʼamal taq bʼe (Sal. 32:5; Sant. 5:14). ¿Jas rajawaxik kkibʼan ri kʼamal taq bʼe? Xaq xiw ri Jehová kkunik kukuy umak ri ajmak y kubʼan wariʼ rumal ri ukamikal ri Jesús. Are kʼu ri Jehová uyaʼom pa kiqʼabʼ ri kʼamal taq bʼe rech kkilo we rajawaxik kesax bʼi ri ajmak pa ri congregación o kkanaj kanoq (1 Cor. 5:12). Rumal laʼ, rech kketaʼmaj jas rajawaxik kkibʼano, rajawaxik kechoman chrij waʼ taq preguntas riʼ: ¿La xuchomaj ubʼanik ri makaj?, ¿la xukʼuʼ ri umak?, ¿la kʼi tiempo xubʼan wajun makaj riʼ? Y ri más nim ubʼanik: ¿la kukʼut rukʼ ri kubʼano che qas kraj kuya kan ubʼanik ri makaj?, ¿la kʼo kkʼutuwik che xkuy umak rumal ri Jehová? (Hech. 3:19). w22.06 9 párr. 4

Xuqujeʼ ri Jesús xubʼij che rajawaxik nim kqil wi ri utaqanik ri Jehová (Mat. 5:6). Wariʼ kraj kubʼij che rajawaxik kqakoj qachuqʼabʼ che ubʼanik ri kqaj chuwach. ¿La nim kawil wi ri qastzij y ri e utaqanik ri Dios? Qastzij riʼ che nim kawilo, rumal che utz ta kawil ri molom tzij y ri itzelal. Ri kkimol tzij are tajin kkibʼan ri kraj ri Satanás, ri qʼatal tzij re wajun uwach Ulew (Juan 8:44; 12:31). Xuqujeʼ wajun Itzel xumajij lo ubʼanik tzij chrij ri Jehová pa ri kotzʼiʼjalaj Edén, are chiʼ xubʼij che are jun itzelalaj qʼatal tzij che xaq xiw kchoman chrij y kraj taj che ri winaq kkiriq utzilal (Gén. 3:1, 4, 5). Rumal ri molom taq tzij riʼ e kʼi winaq utz ta kechʼaw chrij ri Jehová. Are chiʼ ri winaq kkixutuj ri qastzij, ri Satanás keʼukojo rech kkibʼan ri itzelal (Rom. 1:25-31). w23.03 2 párr. 3

Weneʼ tajin kakoj achuqʼabʼ chuwach jun makaj, are kʼu weneʼ xaq kʼateʼ katqaj chi jumul chupam. O weneʼ kachomaj che katkun taj kabʼan aqasanjaʼ. ¿Jas kattoʼwik rech kubʼan ta kebʼ akʼuʼx? Are ri aloqʼoqʼebʼal che ri Jehová. Ri aloqʼoqʼenik che ri Jehová are ri más nim ubʼanik che rajawaxik kanaʼo (Prov 3:3-6). Rumal che we kaloqʼoqʼej rukʼ ronojel awanimaʼ katkunik kachʼij ri kʼax che kariq pa ri akʼaslemal. Pa ri Biblia kʼi mul kubʼij che ri Jehová kukʼut nimalaj loqʼoqʼebʼal chke ri upatanelabʼ. Wariʼ kraj kubʼij che ri areʼ kʼo ta jumul kojuwonobʼaʼ kanoq, o kuya kan qaloqʼoqʼexik. Rumal che ri at junam ri abʼantajik rukʼ ri Jehová (Gén. 1:26). ¿Jas kabʼan che ukʼutik loqʼoqʼebʼal? Rajawaxik katmaltyoxinik (1 Tes. 5:18). Chatchoman chrij wariʼ ronojel taq qʼij: «¿Jas xubʼan ri Jehová che ukʼutik chnuwach kimik che kinraj?». Are chiʼ kabʼan achʼawem che, chamaltyoxij ronojel ri xuya chawe. Chachomaj che xuya wariʼ chawe rumal che katuloqʼoqʼej. w23.03 12 párrs. 17-19

Ri Jesús xukʼut loqʼoqʼebʼal chke konojel ri 12 rapóstoles. ¿Jas kqetaʼmaj chrij wariʼ? Are ta kqil ri kesach wi ri qachalal, xaneʼ chojchoman chrij jasche ri qachalal xubʼan jun kʼax chqe. Chojchoman na chrij wariʼ: «¿Jasche utz ta xwil ri xubʼano? ¿Jas bʼantajik rajawaxik kinkʼexo? ¿La xa kʼo tajin kukʼulmaj ri qachalal? ¿La mat are utz che kinkuy umak paneʼ utz ta ri xubʼano?». We kqatzalij ta ukʼaxel ri kʼax che kbʼan chqe y kqakuy kimak ri e qachalal kqakʼutu che oj qastzij cristianos. Ri xubʼan ri Jesús kukʼut chqawach che rajawaxik kqachʼobʼ ri keriqitaj wi ri e qachalal (Prov. 20:5). Ri Jesús kkunik kril ri kʼo pa kanimaʼ ri winaq, are kʼu ri oj kojkun taj. Are kʼu kojkunik kkʼojiʼ qapaciencia kukʼ ri e qachalal are chiʼ kʼo kesach wi (Efes. 4:1, 2; 1 Ped. 3:8). Jun chke ri kojtoʼwik are che kqetaʼmaj más kiwach. w23.03 30 párrs. 14-16

Weneʼ ri Satanás kukoj wajun yabʼil rech kqaya kan upatanexik ri Jehová o kqabʼan jastaq che utz ta kril ri Jehová. Weneʼ ri qafamilia che e Testigos taj o ri ajkun kkaj che kqakoj kikʼ, y wariʼ utz ta kril ri Dios. O jun winaq kubʼij chqe che kqabʼan jastaq che utz ta kril ri Dios rech kojkunatajik. Kʼo ta nijun chqe kqaj kojkamik, are kʼu qetaʼm che we kojkamik ri Jehová kojuloqʼoqʼej wi na (Rom. 8:37-39). Ksach ta che ri Jehová ri e rachiʼl che kekamik (Luc. 20:37). Y kraj che kuya chi jumul ri kikʼaslemal (Job 14:15). Ri Jehová nim xutojo rech oj kojkunik kqariq ri kʼaslemal che kʼo ta ukʼisik (Juan 3:16). Qetaʼm che areʼ sibʼalaj kojuloqʼoqʼej y kraj che kojuchajij. Rumal laʼ kqaya ta kan unimaxik are chiʼ kojyawajik o kbʼix chqe che kojkamisaxik, xaneʼ kojqebʼ rukʼ ri areʼ rech kuya kubʼsal kʼuʼx chqe, qanojibʼal y qachuqʼabʼ (Sal. 41:3). w22.06 18 párrs. 16, 17

Ri Biblia kubʼij: «Ri noʼj kchapletajik rumal ri uyaʼik uqʼij ri Ajawaxel» (Prov. 9:10). Rumal laʼ, are chiʼ kqachaʼ ubʼanik jun jastaq che nim ubʼanik rajawaxik kqakoj ri retaʼmanik «ri sibʼalaj tastalik», kraj kubʼij, ri kuchomaj ri Jehová. Kojkun che ukojik are chiʼ kqanikʼoj uwach ri Biblia y ri e qawuj. We kqabʼan wariʼ, kqakʼutu che qas kʼo qanojibʼal (Prov. 2:5-7). Xaq xiw rukʼ ri Jehová kpe wi ri qastzij nojibʼal (Rom. 16:27). ¿Jasche jewaʼ kqabʼij? Nabʼe, rumal che are ri Bʼanol qe y retaʼm chrij ronojel ri jastaq ubʼanom (Sal. 104:24). Ukabʼ, rumal che kukʼut ri unojibʼal rukʼ ri kubʼano (Rom. 11:33). Y urox, rumal che ri utz taq upixabʼ amaqʼel kuya utzilal chke ri kkibʼan pa ri kikʼaslemal (Prov. 2:10-12). We kqaj che kkʼojiʼ qanojibʼal, rajawaxik kqabʼan ri oxibʼ jastaq riʼ y kqaya bʼe che kkikʼam qabʼe pa ri qakʼaslemal. w22.10 19 párrs. 3, 4

Ri Satanás xchʼakan ta pa ri chʼoj che kubʼij pa Apocalipsis capítulo 12, rumal laʼ ri areʼ y ri itzel taq uxlabʼal xekʼaq lo pa ri uwach Ulew. Y wariʼ xubʼano che ri Itzel sibʼalaj xpe royowal chkij ri e winaq. Rumal laʼ ri Biblia kubʼij: «¡Kʼax iwe ri ix ri ix kʼo cho ri uwach ulew xuqujeʼ ri e kʼo pa ri plo!» (Apoc. 12:9-12). ¿Jas tobʼanik kuya ri profecías riʼ chqe? Ri jastaq che tajin kkʼulmataj pa ri uwach Ulew y ri kibʼantajik ri e winaq kukʼutu che ri Jesús tajin chi kuqʼat tzij. Rumal laʼ kqaxibʼij ta qibʼ we kqilo che ri e winaq sibʼalaj itzel kekil ri e nikʼaj chik y che xaq xiw chkij areʼ kechoman wi. Rumal che rukʼ ri kkibʼano tajin ktzʼaqat ri profecía re ri Biblia. ¡Rumal laʼ, qas qetaʼm che tajin chi kuqʼat tzij ri uQʼatbʼal tzij ri Dios! (Sal. 37:1). Xuqujeʼ qetaʼm che are chiʼ knaqajin ri Armagedón más knimataj na ri itzelal cho ri uwach Ulew (Mar. 13:8; 2 Tim. 3:13). Ri qaTat Jehová sibʼalaj kojraj rumal laʼ kojutoʼ che uchʼobʼik jasche tajin kqariq kʼax pa waʼ taq qʼij riʼ. Rumal laʼ sibʼalaj kojmaltyoxin che. w22.07 3, 4 párrs. 7, 8

Kojkunik kqataʼ che ri Jehová che kuya kichuqʼabʼ ri e qachalal chuwach ri kʼax rumal jun kaqiqʼ jabʼ, jun yabʼil, jun kabʼraqan, chʼoj o chiʼ kbʼan kʼax chke kumal ri winaq. Xuqujeʼ kojkunik kqabʼan qachʼawem pa kiwiʼ ri e qachalal che kkiya kitobʼanik pa taq ri labores re socorro. Weneʼ awetaʼm uwach jun qachalal che tajin kqʼax chupam wariʼ, utz riʼ we kabʼij ri ubʼiʼ pa ri achʼawem. Are chiʼ kqataʼ che ri Jehová che keʼutoʼ ri qachalal rech kkichʼij apachike kʼax, tajin kqakʼutu che qas keqaj. Are chiʼ kqabʼan qachʼawem pa kiwiʼ ri e qachalal che kkikʼam bʼe pa ri congregación ri e areʼ sibʼalaj kkimaltyoxij, rumal che keʼutoʼ. Je wariʼ xunaʼ ri apóstol Pablo. Rumal laʼ xutzʼibʼaj wariʼ: «Xuqujeʼ chibʼanaʼ chʼawem pa nuwiʼ in, rech are taq kinchʼawik, ri Dios kuyaʼ ri tzij chwe, rech man kinxeʼj ta wibʼ are taq kintzijoj ri tzij re kolobʼal ibʼ ri man etaʼmatal ta kan nabʼe» (Efes. 6:19). Kimik xuqujeʼ e kʼo qachalal che sibʼalaj kechakunik rech kkikʼam qabʼe. Are chiʼ kqataʼ che ri Jehová che kutewchij ronojel ri kkibʼano kqakʼutu che keqaj. w22.07 23, 24 párrs. 14-16

Jun ajchʼoj kukoj bʼi jun toʼbʼal jolomaj are chiʼ kbʼe pa chʼoj. Pa ri chʼoj re ri qakojonik, rajawaxik kqachajij ri qachomanik chuwach ri jastaq che kukoj ri Satanás. Ri areʼ kʼi kukoj chqawach rech kojqaj pa mak y rech kubʼan kʼax che ri qachomanik. Ri toʼbʼal jolomaj che kukoj ri ajchʼoj kuchajij ri ujolom chuwach ri kʼax, junam rukʼ, ri qeyebʼal kuchajij ri qachomanik rech kqaya ta kan upatanexik ri Jehová. Chojchoman chrij ri xkikʼulmaj jujun cristianos pa ri ojer tinamit re Corinto. Xqaj uchuqʼabʼ ri kikojonik chrij jun jastaq che utzujum ri Dios chke, ri kʼastajibʼal (1 Cor. 15:12). Ri Pablo xubʼij che ri kekojon ta chrij ri kʼastajibʼal xaq xiw kechoman chrij ri tajin kkibʼano (1 Cor. 15:32). Kimik, e kʼi winaq kekojon ta chrij ri utzujum ri Dios, rumal laʼ xaq xiw kkilij ri kkaj kkibʼan pa ri kikʼaslemal y xaq xiw kechoman chrij ri kirayibʼal. Are kʼu, ri oj kqakubʼsaj qakʼuʼx chrij ri jastaq che kubʼan na ri Dios pa ri petinaq. w22.10 25, 26 párrs. 8, 9

Ri Jehová kubʼij chqe che kqabʼij che ronojel ri kqanaʼo. Ri areʼ kril ri kqanaʼo y kubʼij chqe che kojkunik kqabʼan qachʼawem pa apachike hora. Ri areʼ qas kutatabʼej ri kichʼawem ri upatanelabʼ (Prov. 15:8). ¿Jas kqabʼij che ri Jehová are chiʼ kqanaʼo che xaq qatukel oj kʼolik? Kojkunik kqajaq ri qanimaʼ chuwach (Sal. 62:8). Chqabʼij che ri kqabʼisoj, ri kqanaʼo, chqataʼ che che kojutoʼo rech kqachʼobʼo jas ri rajawaxik kqabʼano y kojkunik kqataʼ más qachuqʼabʼ che ri Jehová. Xuqujeʼ qanojibʼal rech rukʼ utz taq tzij kojchʼaw kukʼ ri winaq (Luc. 21:14, 15). ¿Y jas kabʼano we amaqʼel kpe chomanik pa ajolom che kuqasaj achuqʼabʼ? Chataʼ atobʼanik che ri Jehová rech kattzijon rukʼ jun qachalal che ko pa ri ukojonik y chabʼij che ri qachalal ri qas kanaʼo rech kkunik katutoʼ. Rech kqanaʼ ta chik che xaq qatukel oj kʼolik, chqilaʼ ri kubʼan ri Jehová che uyaʼik ri kqataʼ che pa ri qachʼawem y chqakʼamaʼ ri tobʼanik che kkiya ri nikʼaj chik chqe. w22.08 10 párr. 6

Ri kʼakʼ congregación re Tesalónica, xmajix ubʼanik kʼax che. Jun jupuq winaq «xekicharchatej bʼi [jujun cristianos] chkiwach ri e qʼatal taq tzij re ri tinamit» (Hech. 17:6). ¡Qastzij riʼ che ri cristianos xkixeʼj kibʼ! Weneʼ wariʼ kubʼano che kekikot ta chi che upatanexik ri Jehová. Are kʼu ri apóstol Pablo xraj taj che kkʼulmataj wariʼ. Ri areʼ xutzukuj xubʼano rech xuya kichuqʼabʼ ri cristianos che e kʼo pa Tesalónica. Are chiʼ xqʼax ri tiempo, ri Pablo xubʼij ri e tzij riʼ chke ri tesalonicenses: «Xqataq bʼi [ri Timoteo] iwukʼ che ipixbʼexik xuqujeʼ che uyaʼik ichuqʼabʼ pa ri ikojonik, rech kʼo jun mubʼan kebʼ ukʼuʼx rumal we kʼaxkʼolil riʼ» (1 Tes. 3:2, 3). Ri Timoteo xril ri xubʼan ri Pablo che kitoʼik ri cristianos re Listra y ri xubʼan ri Jehová che uyaʼik kichuqʼabʼ. Rumal laʼ, qas retaʼm chik jas kubʼij chke ri cristianos rech kkixeʼj ta kibʼ (Hech. 14:8, 19-22; Heb. 12:2). w22.08 21 párr. 4

Pa taq ri junabʼ setenta re ri siglo diecinueve, jun jupuq tijoxelabʼ re ri Biblia y ri kʼamal kibʼe Charles Russell, xkimaj unikʼoxik ri uTzij ri Dios rech qas kkichʼobʼ ri kukʼutu. Xkaj xketaʼmaj jasche xkam ri Jesús y jas kkibʼan che unaʼtajisaxik ri ukamikal. ¿Jas utzilal kuya chqe ri xkibʼan ri tijoxelabʼ re ri Biblia ojer kanoq? Are che kimik kqachʼobʼo jasche xkam ri Jesús y jas utzilal kuya ri ukamikal chqe (1 Juan 2:1, 2). Xqetaʼmaj che ri Dios keʼutewchij ri winaq che kenimanik: e jujun kebʼe pa ri kaj y kekam ta chi wi y e nikʼaj chik kyaʼ jun kikʼaslemal kʼo ta ukʼisik chke cho ri uwach Ulew. Y kojqebʼ rukʼ ri Jehová are chiʼ kqachomaj che sibʼalaj kojraj y che ri ukamikal ri Jesús kojutoʼ chqajujunal (1 Ped. 3:18). Rumal laʼ, junam kukʼ ri nabʼe taq cristianos, kqanaʼtajisaj ri ukamikal ri Jesús junam rukʼ ri xukʼut kanoq y keqasikʼij nikʼaj chi winaq rech kekʼojiʼ qukʼ. w23.01 21 párrs. 6, 7

Ri Jesús xukʼut chkiwach ri e winaq ri kubʼan na ri uQʼatbʼal tzij ri Dios. Kojmaltyoxin rumal ri ukamikal ri Jesús rumal che kojutoʼo rech kojux rachiʼl areʼ y ri Jehová. Qonojel ri kojkojon chrij ri Jesús qeyeʼm ri kʼaslemal kʼo ta ukʼisik y ri qʼij che kekʼastajisax lo ri kaminaqibʼ (Juan 5:28, 29; Rom. 6:23). Taqal ta chqe che kyaʼ waʼ taq tewchibʼal chqe, rumal che kʼo ta qabʼanom y kojkun taj kqatoj ronojel ri kibʼanom ri Dios y ri Cristo pa qawiʼ (Rom. 5:8, 20, 21). Are kʼu, ¿jas kojkunik kqabʼano rech kojmaltyoxin chke? Are chqaya ri qatobʼanik che ri utinamit ri Jehová. Jun kʼutbʼal, kojkunik kqaya ri qatobʼanik che uyakik y rilixik ri e Ja rech Ajawbʼal y ri e Ja re nim riqbʼal ibʼ, rumal che kʼo ubʼanik rukʼ ri qaqʼijilanik che. w23.01 26 párr. 3; 28 párr. 5

Ri kkiqʼat tzij pa ri uQʼatbʼal tzij ri Dios kekichajij na konojel ri winaq cho ri uwach Ulew. Junam rukʼ ri Jesús, ri e 144,000 keʼux na qʼatal taq tzij y e kojol tabʼal toqʼobʼ (Apoc. 5:10). Are chiʼ ri israelitas xkinimaj ri taqanik che xyaʼ che ri Moisés, xetoʼ kumal ri e kojol tabʼal toqʼobʼ rech e chʼajchʼoj pa ri kibʼaqil y pa ri kikojonik. Rumal che ri taqanik xa «kimuʼjal ri utzalaj taq jastaq ri kepe na» kukʼutu che ri kkiqʼat na tzij rukʼ ri Jesús kkibʼan na wajun chak nim ubʼanik: kekitoʼ na ri e winaq rech e chʼajchʼoj na pa ri kibʼaqil y pa ri kikojonik (Heb. 10:1). Qetaʼm taj jas kkibʼan lo ri e qʼatal taq tzij y e kojol tabʼal toqʼobʼ rech kkiya lo ubʼixik ri rajawaxik kkibʼan ri winaq cho ri uwach Ulew. Are kʼu qas qetaʼm che kʼo kkʼamow kibʼe ri winaq pa ri kotzʼiʼjalaj uwach Ulew (Apoc. 21:3, 4). w22.12 11 párrs. 11-13

¿Jasche keqasikʼij ri winaq qukʼ? Rumal che kqaj che kketaʼmaj jas kibʼanom ri Jehová y ri Jesús pa qawiʼ (Juan 3:16). Kqaj che ri kkita ri e winaq pa ri Unaʼtabʼalil ri ukamikal ri Jesús keʼutoʼo rech kketaʼmaj más uwach ri Jehová y kkipatanij. Xuqujeʼ keqasikʼij ri winaq che kiyaʼom kan upatanexik ri Jehová rech kketaʼmaj che keloqʼoqʼex na rumal. Sibʼalaj kojkikotik are chiʼ kqilo che kekʼojiʼ qukʼ. Wajun riqbʼal ibʼ riʼ kunaʼtajisaj chke che ojer kanoq xekikot che upatanexik ri Jehová. (Sal. 103:1-4). Paneʼ ri winaq kkaj taj kekʼojik, are kʼu ri más nim ubʼanik chuwach ri Jehová are ri winaq are ta ri ajilabʼal (Luc. 15:7; 1 Tim. 2:3, 4). w23.01 20 párr. 1; 22, 23 párrs. 9-11

Pa ri ukʼisbʼal chaqʼabʼ che kʼa kʼas na ri Jesús, ri areʼ xutaʼ jun jastaq che ri uTat che sibʼalaj nim ubʼanik: che keʼuchajij ri upatanelabʼ (Juan 17:15, 20). Ri Jehová, qas e uchajim ri upatanelabʼ. Are kʼu ri Jesús retaʼm che ri Satanás kubʼan na más kʼax chke y rumal laʼ kajwataj ri utobʼanik ri Jehová chke. Rumal che ri uwach Ulew kʼo pa uqʼabʼ ri Satanás, sibʼalaj kʼi taq kʼax kkiriq ri qastzij cristianos. Ri e kʼax riʼ kubʼano che kʼo ta chi qachuqʼabʼ y kubʼano che kqanimaj ta ri Jehová. Are kʼu kqaxeʼj ta qibʼ chuwach ri kʼax che kqariqo. Ri Jehová amaqʼel kok il chqe, kraj kubʼij, che ri areʼ kril ronojel ri kqariqo y amaqʼel kʼo che qatoʼik. Ri Jehová «amaqʼel keʼuchajij ri nim kil wi kumal» (Sal. 33:18-20). w22.08 8 párrs. 1, 2

Are chiʼ xa jubʼiqʼ chi kraj kuriq ri qʼij re ri Unaʼtabʼalil ri ukamikal ri Jesús, kqakʼutu che nim kqil wi are chiʼ kqatas qatiempo che ubʼanik qachʼawem, kojchoman chrij ri tobʼanik xuya ri ukamikal chqe. Xuqujeʼ kqakoj qatiempo che kisikʼixik más winaq rech kekʼojiʼ qukʼ che unaʼtajisaxik ri ukamikal. Y kqaj taj che kʼo jun jastaq kojqʼatenik rech kojkʼojiʼ pa wajun riqbʼal ibʼ. Are chiʼ kqanaʼtajisaj ri ukamikal ri Jesús, kyaʼ jun chʼabʼal y ktzalix uwach jujun taq preguntas. Ri preguntas are wariʼ: ¿jasche nim kojutoʼ wi ri ukamikal ri Jesús? ¿Jasche kkuyutaj kimak e kʼi winaq rumal ri ukamikal jun winaq? Y knaʼtajisax chqe jachin taq ketijow ri kaxlanwa y ri vino, xuqujeʼ jas kkikʼutunisaj chkijujunal wariʼ (Luc. 22:19, 20). Are chiʼ tajin kyaʼ ri chʼabʼal, kojchoman chrij ri tewchibʼal che kkiriq na ri winaq che kekʼojiʼ kan cho ri uwach Ulew (Is. 35:5, 6; 65:17, 21-23). Sibʼalaj nim ubʼanik ri kyaʼ ubʼixik chrij waʼ taq jastaq riʼ, rumal laʼ nim ubʼanik kojopan pa ri riqbʼal ibʼ. w23.01 20 párr. 2; 21 párr. 4

Are chiʼ ri Dios xuya ri uKʼojol che utojik ri qamak, xuya bʼe chqe rech kqariq ri kʼaslemal kʼo ta ukʼisik (Mat. 20:28). Ri apóstol Pablo xubʼij ri e tzij riʼ: «Rumal kʼu jun winaq, xpe ri kamikal. Xuqujeʼ rumal jun winaq, kekʼastaj na ri kaminaqibʼ. Jekʼuriʼ jachaʼ konojel kekam na rukʼ ri Adán, jekʼuriʼ xuqujeʼ konojel kkiriq na ri kʼaslemal rukʼ ri Cristo» (1 Cor. 15:21, 22). Ri Jesús xukʼut chkiwach ri utijoxelabʼ che kkitaʼ ri uQʼatbʼal tzij ri Dios pa kichʼawem y che kubʼan ri xuchomaj ubʼanik pa ri uwach Ulew (Mat. 6:9, 10). Y areʼ kraj che kekam ta chi ri e winaq. Rumal laʼ, ri Jehová xuchaʼ ri Jesús y ri 144,000 winaq rech kbʼantaj ri kraj cho ri uwach Ulew (Apoc. 5:9, 10). w22.12 5 párrs. 11, 12

Sibʼalaj kojbʼisonik are chiʼ kkam jun winaq che sibʼalaj kqaj. Are kʼu are chiʼ kqʼax ri tiempo kojkikot chi jumul rumal che kenaʼtaj jastaq chqe che xubʼano o xukʼut kan chqawach. Je kkʼulmataj qukʼ are chiʼ kojchoman chrij ri kʼax xuriq ri Jesús are chiʼ xkamik (1 Cor. 11:24, 25). Are kʼu kuya kikotemal chqe are chiʼ kojchoman chrij ri e jastaq che xubʼano y xubʼij are chiʼ xkʼojiʼ cho ri uwach Ulew. Xuqujeʼ kuya qachuqʼabʼ are chiʼ kojchoman chrij ri tajin kubʼan kimik y ri kubʼan na pa ri petinaq. w23.01 26 párrs. 1, 2

Ri utijoxelabʼ ri Jesús sibʼalaj xebʼisonik are chiʼ xkamik. Rumal che xaq xiw ta xkam jun loqʼalaj kachiʼl xaneʼ xuqujeʼ xkinaʼo che kʼo ta chi jachin ketoʼwik (Luc. 24:17-21). Are kʼu are chiʼ xqʼax ri tiempo, ri Jesús xukʼut ribʼ chkiwach y xubʼij chke che xkamik rumal che are laʼ ri bʼim kan chrij pa ri Biblia. Xuqujeʼ xubʼij chke che rajawaxik kkibʼan jun chak nim ubʼanik (Luc. 24:26, 27, 45-48). Ri Jesús xbʼe pa ri kaj y ri utijoxelabʼ sibʼalaj xekikot chik rumal che kʼaslik y keʼutoʼ che ubʼanik ri chak ri xeʼutaq wi kanoq. Ri kikotemal xkinaʼo xtobʼanik rech xkiya ta kan uqʼijilaxik ri Jehová (Luc. 24:52, 53; Hech. 5:42). Rech kqesaj kiwach ri utijoxelabʼ ri Jesús rajawaxik kqilij ri chak che kʼo ubʼanik rukʼ ri uQʼatbʼal tzij ri Dios. Qastzij che kajwataj chuqʼabʼ rech kqapatanij ri Jehová, are kʼu we kqabʼano, ri areʼ kojutewchij (Prov. 10:22). w23.01 30, 31 párrs. 15, 16

¿La mat qastzij che kqaj taj kqabʼan qe ri xkibʼan ri Adán y ri Eva? Rech kqabʼan ta qe junam kukʼ e areʼ, rajawaxik kqetaʼmaj más uwach ri Jehová, nim kqil wi ri utz taq ubʼantajik y kqakoj qachuqʼabʼ che uchʼobʼik jasche kuchaʼ ubʼanik jujun taq jastaq. We kqanimaj, más kqaloqʼoqʼej riʼ. Chojchoman chrij ri xubʼan ri Abrahán, che sibʼalaj xuloqʼoqʼej ri Dios. Paneʼ kʼax xubʼan che uchʼobʼik jujun jastaq che xuchaʼ ubʼanik ri Jehová, are kʼu xnimanik. Xukoj uchuqʼabʼ che uchʼobʼik uwach ri Jehová. Jun kʼutbʼal, ¿jas xubʼano are chiʼ xretaʼmaj che ri Jehová ubʼim chik che kusachisaj uwach ri Sodoma y Gomorra? Nabʼe xuxibʼij ribʼ che ri «nimalaj qʼatal tzij» che keʼukamisaj ri e utz taq winaq kukʼ ri e utz taj. Ri areʼ xuchʼobʼ taj jasche ri Dios jewaʼ kubʼano, rumal laʼ xubʼan preguntas che. Ri Jehová xkʼojiʼ upaciencia rukʼ. Xubʼij che jasche xuchaʼ ubʼanik wariʼ, y chukʼisbʼal ri Abrahán xuchʼobʼo che ri Jehová kril ri kʼo pa kanimaʼ konojel ri e winaq y che kukʼajisaj ta kiwach ri e utz kukʼ ri e utz taj (Gén. 18:20-32). w22.08 28 párrs. 9, 10

Pa ri junabʼ 455 nabʼe chuwach ri qaqʼij, are chiʼ bʼanom chi ri tapya re Jerusalén, ri taqanel Nehemías xeʼuchaʼ e jujun achijabʼ che kkubʼsax kʼuxaj chkij rech kkikʼam ubʼe ri tinamit. Jun chke ri achijabʼ riʼ are ri Hananías, ri taqanel pa ri tinamit. Ri Biblia kubʼij che ri Hananías are «jun achi waʼ ri yaʼtal che chi kkubʼsax kʼuxaj chrij, ri areʼ nim kʼu na kril wi ri Dios» (Neh. 7:2). Rumal che ri Hananías sibʼalaj kuloqʼoqʼej ri Jehová y kraj taj kuya bʼis che xutoʼo rech nim xril wi ri eqeleʼn che xyaʼ kan pa uqʼabʼ. Ri e bʼantajik riʼ xuqujeʼ kojutoʼo rech kkubʼsax kʼuxaj chqij. Chqilaʼ chi ri ukʼutbʼal ri Tíquico, jun utzalaj rachiʼl ri Pablo che xkubʼsax kʼuʼx chrij. Ri Pablo xubʼij che ri areʼ are jun «jikalaj pataninel pa ri uchak ri Ajawaxel» (Efes. 6:21, 22). Xaq xiw ta xukubʼsaj ukʼuʼx ri Pablo chrij ri Tíquico che kukʼam bʼi ri cartas chke ri cristianos re Éfeso y Colosas, xaneʼ xuqujeʼ xukubʼsaj ukʼuʼx chrij che kukubʼsaj kikʼuʼx y kuya kichuqʼabʼ. Ri Tíquico kjunamataj kukʼ ri achijabʼ che kkubʼsax kʼuxaj chkij che kkilij ri kikojonik ri e qachalal (Col. 4:7-9). w22.09 9, 10 párrs. 5, 6

Ri José xuriq kʼi kʼax weneʼ pa 13 junabʼ. Xkun ta riʼ xuchomaj che xa kloqʼoqʼex ta chi rumal ri Jehová y che xa xwonobʼax kanoq. Are kʼu je ta xuchomaj, y xukʼol ta oyowal pa ranimaʼ rumal ri tajin kukʼulmaj. Xaneʼ xukoj utz chomanik y xkʼojiʼ upaciencia. Y, are chiʼ xkʼojiʼ pa uqʼabʼ rech kutzalij ukʼaxel chke ri e rachalal ri kʼax che xkibʼan che, xutzalij ta ukʼaxel, xaneʼ xeʼuloqʼoqʼej y xukuy kimak (Gén. 45:4, 5). ¿Jasche jeriʼ xubʼano? Rumal che xchoman rukʼ saqil. Xaq xiw ta xchoman chrij ri kʼax tajin kuriqo, xaneʼ xchoman chrij jasche xekʼulmatajik y chrij ri kuchomaj ri Jehová (Gén. 50:19-21). ¿Jas kqetaʼmaj chrij wariʼ? We kʼo jun qachalal kubʼan kʼax chawe, kakʼol ta oyowal pa awanimaʼ y kachomaj taj che xuqujeʼ ri Jehová ajmak che ri tajin kakʼulmaj, xuqujeʼ machomaj che xa xatsach kan che. Xaneʼ chatchoman chrij ri tajin kubʼan che atoʼik chuwach ri kʼaxkʼolil. Xaq uwiʼ chik, chakuyuʼ kimak ri e qachalal y chnaʼtaj chawe che «ri loqʼoqʼebʼal kʼuʼx kubʼano chi kesachtaj kʼi mak». w22.11 21 párr. 4

Ri qʼaxal tzij Daniel xril jujun visiones che qas xuqʼalajisaj chuwach che ri Jehová kʼo pa kiwiʼ ri nikʼaj chik qʼatal taq tzij. Nabʼe xeril kajibʼ xibʼibʼal taq awaj che keʼukʼut ri nimaʼq taq qʼatbʼal tzij re ojer y re kimik: Babilonia, Medopersia, Grecia y Roma, y ri nimalaj qʼatbʼal tzij re ri Reino Unido y Estados Unidos, che tajin kuqʼat tzij kimik (Dan. 7:9, 10). Ri Daniel xrilo che ri Dios xresaj ri taqanik pa kiqʼabʼ ri e qʼatal taq tzij cho ri uwach Ulew y xuya chke ri más taqal chke y ri más kʼo kichuqʼabʼ ¿E jachin kʼu riʼ? Che «ri jetaneʼ kpe jun rijaʼl winaq», ri Jesucristo, y che «ri utinimit [ri e tastalik re] ri Dios ri sibʼalaj aj chikaj», ri 144,000, che kkiqʼat na tzij «chbʼe qʼij saq» (Dan. 7:13, 14, 18). Qas qʼalaj che ri Jehová are ri aj chikaj. Ri xril ri Daniel pa riʼ ri visión qas kuqʼalajisaj ri ubʼim chi kan nabʼe. Ri qʼaxal tzij xubʼij che «ri Dios ri kʼo pa ri kaj [...] keresaj xuqujeʼ keʼukoj taq ajawinelabʼ» (Dan. 2:19-21). w22.10 14, 15 párrs. 9-11