Diciembre

¿La kkun chi ri achi re Etiopía kubʼan uqasanjaʼ? Chqilaʼ: Wajun achi xbʼe «che qʼijilanik pa Jerusalén» (Hech. 8:27). Wariʼ kukʼutu che are jun kojonel judío. Retaʼm ri kubʼij ri Escrituras Hebreas rumal laʼ xretaʼmaj chrij ri Jehová. Are kʼu kraj kretaʼmaj más. ¿La knaʼtaj chawe jas tajin kubʼano are chiʼ xriqitaj rumal ri Felipe pa ri bʼe? Tajin kusikʼij ri wuj re Isaías (Hech. 8:28). Y xraj xtoʼ che uchʼobʼik rech kretaʼmaj más. Rumal laʼ xbʼe pa Jerusalén che uqʼijilaxik ri Jehová. Ri Felipe xukʼut jastaq chuwach ri achi re Etiopía che retaʼm taj, xukʼut chuwach che ri Jesús are ri Mesías (Hech. 8:34, 35). Rumal ri uloqʼoqʼebʼal che ri Jehová y ri Jesús, xubʼan uqasanjaʼ y xux utijoxel ri Jesús. Ri Felipe xrilo che kkun chik kubʼan uqasanjaʼ, rumal laʼ xubʼano. w23.03 8, 9 párrs. 3-6

We kqabʼij ta ri qastzij, kkikot ta ri Jehová (Prov. 6:16, 17). Paneʼ ri e winaq kʼamanaq chi chke kkibʼan molom tzij, are kʼu ri oj kqaj kqabʼan ri utz kril ri Jehová (Sal. 15:1, 2). Nijun chqe kqaj kqabʼij jun molom tzij, are kʼu xuqujeʼ kqaj taj kqowaj o kqakʼuʼ jun jastaq rech ri e nikʼaj chik kkichomaj jun chi jastaq. Xuqujeʼ kqabʼan ta ajaltzijol o kojchʼaw ta chkij nikʼaj chik (Prov. 25:23; 2 Tes. 3:11). We kawilo che xa tajin kiyoqʼ jun chi winaq, chakʼexaʼ ri tajin kitzijoj y chatchʼaw chrij jun jastaq che kuya ichuqʼabʼ. Oj kʼo chkixoʼl e winaq che utz ta kechʼawik. Rumal laʼ rajawaxik kqakoj qachuqʼabʼ rech utz kojchʼawik. Ri Jehová kojutewchij we utz kqabʼan che ukojik ri e qatzij are chiʼ kqatzijoj ri utzij, are chiʼ oj kʼo pa ri e riqbʼal ibʼ y are chiʼ kojtzijon kukʼ e nikʼaj chik. Are chiʼ e kʼo ta chi winaq che kkibʼij itzel taq tzij, kʼax ta chi kqariq riʼ che uyaʼik uqʼij ri Jehová rukʼ ri kqabʼij (Jud. 15). w22.04 9 párrs. 18-20

Are chiʼ kojchoman chrij ri nimalaj kiloqʼoqʼebʼal ri Jehová y ri Jesús chqe, kojutoʼo rech oj xuqujeʼ kqakoj qachuqʼabʼ che kiloqʼoqʼexik (1 Juan 4:10). Y más na keqaloqʼoqʼej are chiʼ kqachʼobʼo che xkam ri Jesús pa qawiʼ chqajujunal. Ri apóstol Pablo sibʼalaj xumaltyoxij wajun sipanik riʼ. Rumal laʼ, xutzʼibʼaj bʼi waʼ taq tzij chke ri cristianos re ri tinamit Galacia: «Ri uKʼojol ri Dios [...] xinuloqʼoqʼej xuqujeʼ xuya ri ukʼaslemal rumal wech» (Gál. 2:20). Rumal ri ukamikal ri Jesús, katkunik katux rachiʼl ri Jehová (Juan 6:44). ¿La mat qastzij che nim kawilo che ri Jehová xril ri kʼo pa awanimaʼ y xraj xuya ri uKʼojol pa kamikal rech katok rachiʼl? ¿La mat qastzij che katutoʼ wariʼ rech keʼaloqʼoqʼej ri Jehová y Jesús? Rumal riʼ, qonojel rajawaxik kojchoman chrij wariʼ: «¿Jas kinbʼan che kilik ri e nikʼaj chik we keʼenloqʼoqʼej ri Jehová y ri Jesús?». Ri qaloqʼoqʼebʼal che ri Dios y ri Cristo kojutoʼo rech keqaloqʼoqʼej ri e nikʼaj chik (2 Cor. 5:14, 15; 6:1, 2). w23.01 28 párrs. 6, 7

Kimik, ri Jehová kukoj ri Biblia che kitijoxik ri upatanelabʼ y rech kʼo utz achilanik chkixoʼl. We kqilo, ri Jehová kukoj ri Biblia rech kbʼantaj ri xubʼij kan pa Sofonías 3:9 «Konojel xa junam kiwach che [...]uqʼijilaxik». Kʼo kʼi tzʼibʼatal pa ri Biblia che xaq xiw ri e machʼalikalaj taq winaq kekunik kkichʼobʼo (Luc. 10:21). Ri Biblia are ri wuj che más ksikʼix uwach pa ronojel ri uwach Ulew (2 Cor. 3:15, 16). Chqilaʼ chi jun kʼutbʼal re ri unojibʼal ri Jehová che kʼo pa ri Biblia. Ri areʼ kukoj ri Biblia che qatijoxik pa qajujunal. Are chiʼ kqasikʼij ri uTzij, kqilo che ri areʼ qas kok il chqe chqajujunal (Is. 30:21). Are chiʼ xqariq jun kʼax, ¿la xqariq jun texto pa ri Biblia che qas are ri kajwataj chqe? Qastzij riʼ che xqariqo. We ojer chik tzʼibʼam ri Biblia, ¿jasche kʼo na upatan kimik? Y we xtzʼibʼax chke konojel winaq, ¿jasche kchʼaw chrij ri kajwataj chqe pa qajujunal? Rumal che ri ajchaqʼe kʼo nimalaj unojibʼal (2 Tim. 3:16, 17). w23.02 4, 5 párrs. 8-10

Ri oj qastzij cristianos sibʼalaj kqaloqʼoqʼej ri Jehová rumal laʼ kqaj che utz kqabʼan che upatanixik. Are kʼu rech kojkunik kqabʼan wariʼ rajawaxik kqakoj qametas pa ri qakojonik, junam rukʼ ri ukʼutik utz taq bʼantajik, kojnaw che ubʼanik taq ri chak y kqatzukuj ri kqabʼan che kitoʼik ri e nikʼaj chik. ¿Jasche rajawaxik kqakoj qametas pa ri qakojonik y kqakoj qachuqʼabʼ che utzʼaqatisaxik? Rumal che kqaj kqakikotemaj ri loqʼalaj qaTat, Jehová. Ri areʼ sibʼalaj kkikotik are chiʼ krilo che kqakoj ri kojkun che ubʼanik y ri kojnaw che ubʼanik rech kqapatanij. Xuqujeʼ kqaj che kojux más utzalaj taq upatanelabʼ ri Dios rech keqatoʼ ri qachalal (1 Tes. 4:9, 10). Apastaneʼ ri tiempo oj kʼo chi pa ri utinamit ri Jehová, qonojel rajawaxik kqaya ta kan qakʼiyik pa ri qakojonik. w22.04 22 párrs. 1, 2

Ri e qʼatal taq tzij cho ri uwach Ulew xa jubʼiqʼ chi kraj che kkisachisaj uwach ri Nimalaj Babilonia, kraj kubʼij ronojel ri e kojonem che qastzij taj. Y rukʼ wariʼ kumajij ri nimalaj kʼaxkʼolil. ¿La kraj kubʼij wariʼ che e kʼi winaq keqebʼ más rukʼ ri Jehová? Je taj, xaneʼ are kkitzukuj tobʼanik kukʼ ri e qʼatal taq tzij y ri e ajkʼayibʼ. Pa ri capítulo 6 re Apocalipsis, kubʼij che ri e qʼatbʼal taq tzij y ri e ajkʼayibʼ kejunamataj rukʼ juyubʼ. Y rumal che are ta kkitoʼ uwiʼ ri uQʼatbʼal tzij ri Dios, keʼux ukʼulel ri Jehová (Luc. 11:23; Apoc. 6:15-17). Pa wajun nimalaj kʼaxkʼolil riʼ e kʼi winaq kekaʼy chke ri upatanelabʼ ri Jehová. Rumal che xaq xiw e areʼ kkiya ta kan uqʼijilaxik ri Jehová y kkitoʼ ta uwiʼ ri «xibʼibʼal awaj» (Apoc. 13:14-17). w22.05 16, 17 párrs. 8, 9

Ri upatanelabʼ ri Dios xaq xiw ta kkitzijoj ri utz taq jastaq re ri uQʼatbʼal tzij ri Dios (Mat. 24:14). Xaneʼ xuqujeʼ kekitoʼ ri ángeles che kbʼix pa ri capítulos 8 kopan 10 re Apocalipsis. Waʼ taq ángeles kkiya ubʼixik jalajoj taq kʼaxkʼolil che kkiriq ri e winaq che keniman ta che ri Dios. Rumal laʼ, ri testigos rech Jehová tajin kqaya ubʼixik e tzij che kejunamataj rukʼ «saqbʼach xuqujeʼ qʼaqʼ», wariʼ kraj kubʼij che tajin kqaqʼalajisaj che ksachisax na kiwach ri e winaq y ri jalajoj taq jastaq che tajin kukoj ri Satanás che kisubʼik (Apoc. 8:7, 13). Ri e winaq rajawaxik kketaʼmaj che ri kʼisbʼal naqaj chi kʼo wi. Rumal laʼ rajawaxik kkikʼex ri kikʼaslemal rech ksachisax ta kiwach pa ri qʼij are chiʼ kpe royowal ri Jehová (Sof. 2:2, 3). Ri kqaya na ubʼixik utz ta kkita ri e winaq, rumal laʼ kajwatajik che kʼo ukowil qakʼuʼx. Pa ri nimalaj kʼaxkʼolil ri winaq xuqujeʼ sibʼalaj itzel kkita ri kqabʼij na chke (Apoc. 16:21). w22.05 7 párrs. 18, 19

Chatchoman chrij jun kʼulaj che ya kkʼojiʼ jun kalkʼwal. Paneʼ ri kʼulaj kʼi taq mul kitom ri pixabʼ che rajawaxik kkibʼan ri tat nan. Are kʼu, chiʼ kkʼojiʼ kalkʼwal kkʼextaj ronojel. Junam ta chi kkibʼan che rilik ronojel waʼ taq pixabʼ riʼ. ¡Ketaʼm che kʼo más eqeleʼn chkiwach! Rumal laʼ ri cristianos rajawaxik kkisikʼij uwach ri Biblia xuqujeʼ kechoman chrij «ronojel qʼij», junam rukʼ ri xkibʼan ri e qʼatal taq tzij re Israel (Deut. 17:19). Tat nan, are chiʼ kekʼojiʼ iwalkʼwal xuqujeʼ kkʼojiʼ jun utzalaj sipanik iwukʼ, rumal che kixkunik keʼitoʼ rech kketaʼmaj uwach ri Jehová. w22.05 26 párrs. 2, 3

Xaq xiw ta kqanaʼ kʼax pa qanimaʼ rumal ri mak che xqabʼano. Xaneʼ rajawaxik kqakʼex ri qakʼaslemal. Ri Jehová kukuy umak ri winaq we qas kraj kuya kan ubʼanik y kumaj ubʼanik ri kqaj chuwach ri Jehová (Is. 55:7). Xuqujeʼ rajawaxik che ri winaq kukʼex ri uchomanik rech junam kchoman rukʼ ri Jehová (Rom. 12:2; Efes. 4:23). Rajawaxik qas kraj kuya kan ri itzel taq chomanik y ri itzel taq jastaq (Col. 3:7-9). Are kʼu ksach ta chqe che rech ri Jehová kukuy ri qamak rajawaxik kojkojon chrij ri tojbʼal mak che xuya ri Jesús. Are chiʼ ri Jehová krilo che qas kqakoj qachuqʼabʼ che ukʼexik ri qakʼaslemal, kukuy ri qamak (1 Juan 1:7). w22.06 6 párrs. 16, 17

Pa kʼi taq junabʼ, ri winaq kibʼanom kʼax chbʼil kibʼ (Ecl. 8:9). Jun kʼutbʼal, e kʼi kkibʼan kʼax rumal che kʼo taqanik pa kiqʼabʼ, e kʼo kkibʼan kamisanik, itzelal y kkibʼan kʼax chke ri e kachiʼl pa ri tijobʼal o kkibʼan kʼax chke ri kifamilia. Rumal laʼ, ri winaq kkixibʼij kibʼ chkiwach e nikʼaj chi winaq. Y ri Satanás kukoj waʼ we xibʼin ibʼ riʼ rech kubʼan kʼax chqe. Ri Satanás jeʼl krilo are chiʼ kqaxeʼj qibʼ cho jun chi winaq rech kqatzijoj ta ri utzij ri Dios o kqanimaj ta jun taqanik re ri Jehová. Rumal laʼ kubʼano che e jujun qʼatal taq tzij kkiqʼatej ri qachak y kkibʼan kʼax chqe (Luc. 21:12; Apoc. 2:10). Pa wajun uwach Ulew che kʼo pa uqʼabʼ ri Satanás, e kʼi winaq kkibʼij molom taq tzij chqij ri oj testigos rech Jehová. Wariʼ kubʼano che ri kkikoj ri molom taq tzij, ketzeʼn chqij o kkibʼan kʼax chqe (Mat. 10:36). Y qetaʼm che ri Satanás je kubʼan wariʼ rumal che je xubʼan pa ri nabʼe siglo (Hech. 5:27, 28, 40). w22.06 16 párrs. 10, 11

¿E jachin ri e kʼo chkixoʼl ri e «kʼi» che kekʼam bʼi «pa ri kolomalaj bʼe»? Are ri kekʼastaj loq, ri kekʼasiʼ kan pa ri Armagedón y ri akʼalabʼ che keʼalax na pa ri kʼakʼ uwach Ulew. Chukʼisbʼalil ri 1,000 junabʼ, konojel ri winaq keʼux tzʼaqat. Chnaʼtaj chqe che ri winaq tzʼaqat kraj ta kubʼij che xas kuriq wi ri kʼaslemal che kʼo ta ukʼisik. Chenaʼtaj ri Adán y Eva chqe. Ri e areʼ e tzʼaqat, are kʼu rajawaxik xkikʼutu we qastzij kkaj kkinimaj ri Jehová rech kkiriq ri kʼaslemal kʼo ta ukʼisik. Are kʼu sibʼalaj bʼisobʼal rumal che xeniman ta che (Rom. 5:12). Konojel ri winaq e tzʼaqat chik are chiʼ kkʼis ri 1,000 junabʼ. ¿La konojel ri e tzʼaqatalaj taq winaq riʼ amaqʼel kkitoʼ uwiʼ ri uQʼatbʼal tzij ri Jehová? ¿O e kʼo jujun che kejunamataj kukʼ ri Adán y ri Eva, che paneʼ e tzʼaqat, xeʼux ta sukʼ? Ktzalix na kiwach we preguntas riʼ. w22.09 22, 23 párrs. 12-14

¿La sibʼalaj kuya bʼis chawe rilik ri kʼax kʼo pa ri uwach Ulew? Pa kʼi taq familias kʼo ta chi loqʼoqʼebʼal. Ri winaq sibʼalaj e kʼaʼn, kechʼojinik xuqujeʼ kkikubʼsaj ta chi kikʼuʼx chkij ri winaq che kʼo kitaqanik pa kiwiʼ. Are kʼu wariʼ kuya kubʼsal kʼuʼx chqe, rumal che tajin chi ktzʼaqat ri profecías che kʼo pa 2 Timoteo 3:1-5 chrij ri kkʼulmataj «pa ri kʼisbʼal taq qʼijol». Y ri winaq che kʼo jun utz kanimaʼ ketaʼm che qas tajin ketzʼaqatisax ri profecías che bʼim kanoq. Rumal che kukʼutu che ri Jesús tajin chi kuqʼat tzij pa ri uQʼatbʼal tzij ri Dios. Y kʼo chi na nikʼaj che majaʼ ketzʼaqatik. Ri profecías riʼ nojim kkinukʼ kibʼ junam rukʼ jun rompecabezas y wariʼ kojutoʼ rech kqilo jas tiempo oj kʼo wi. w22.07 2 párrs. 1, 2

Pa ri nimalaj yabʼil COVID-19, xyaʼ jujun taq pixabʼ chqe rech kqetaʼmaj jas kqabʼan che ri e riqbʼal ibʼ y ri utzijoxik ri utzij ri Dios. Qas aninaq xqamaj umulixik qibʼ pa ri e riqbʼal ibʼ y pa ri e nimaʼq taq riqbʼal ibʼ pa videoconferencia, y xqamaj utzijoxik ri utzij ri Dios pa taq cartas y pa teléfono. Ri Jehová utewchim ri chuqʼabʼ che tajin kqakojo. E kʼi sucursales kibʼim che más tajin kekʼiyar ri publicadores pa ri kiterritorio. Xuqujeʼ pa ri tiempo riʼ, e kʼi qachalal kikʼulmam utz taq jastaq pa ri kikʼaslemal. Weneʼ jujun qachalal kichomam che ri utinamit ri Jehová más kuya uwiʼ ronojel ri jastaq che kubʼan chuwach ri nimalaj yabʼil. Are kʼu qas qilom che ronojel ri pixabʼ che yaʼom chqe oj utoʼm. We kojchoman chrij ri ubʼanom ri Jesús che ukʼamik qabʼe, qas kqakubʼsaj qakʼuʼx che apastaneʼ ri kqariq na pa ri petinaq, ri Jehová y ri loqʼalaj uKʼojol amaqʼel kekʼojiʼ qukʼ (Heb. 13:5, 6). w22.07 13 párrs. 15, 16

Xuqujeʼ rajawaxik kqamaltyoxij che ri Jehová ronojel ri jeʼlalaj taq jastaq che kuya chqe, junam rukʼ ri jeʼlalaj taq ucolor ri kotzʼiʼj, ri jalajoj taq uwach jastaq che ktijowik y ri e utzalaj taq qachiʼl. Konojel ri e jastaq riʼ y e nikʼaj chik kuya ri loqʼalaj qaTat chqe rumal che kraj kojkikotik (Sal. 104:12-15, 24). Y más na kqamaltyoxij che, rumal che uyaʼom kʼi wuj chqe rech kubʼan ko che ri qakojonik y utzujum utzalaj taq jastaq chqe che kubʼan na pa ri petinaq. Weneʼ jujun taq mul ksach chqe kqamaltyoxij che ri Jehová ronojel ri ubʼanom. Are kʼu, ¿jas kojkunik kqabʼano rech kqakʼulmaj ta wariʼ? Kojkunik kqatzʼibʼaj ri e jastaq che qatom chi che y amaqʼel kqil ri xqatzʼibʼaj rech kqilo jas ubʼanom ri Jehová che uyaʼik ri qatom chi che. Tekʼuriʼ kqamaltyoxij ri utobʼanik che uyaʼom chi chqe (Col. 3:15). w22.07 22 párrs. 8, 9

Xaq xiw ta kqasikʼij ri Biblia xaneʼ rajawaxik kqabʼan más. Rech kqakʼutu che nim kqil wi, qas rajawaxik kqakʼaslemaj ri qastzij, kraj kubʼij, kqabʼan pa qakʼaslemal ri kqetaʼmaj. Y je wariʼ kubʼan chqe che sibʼalaj kojkikotik (Sant. 1:25). ¿Jas rajawaxik kqabʼano rech qas kqakʼaslemaj ri qastzij? Jun qachalal xubʼij che rajawaxik kqanikʼoj ri qakʼaslemal rech kqilo jas ri tajin kqabʼano y jas rajawaxik kqasukʼumaj. Ri apóstol Pablo xubʼij wariʼ: «Rajawaxik kʼut kajunamataj ri qakʼaslemal rukʼ ri qariqom chik» (Filip. 3:16). Chojchoman chrij ri utzilal kqariqo are chiʼ kqakoj qachuqʼabʼ rech oj «jeqel pa ri qastzij». Man xaq xiw ta kqariq utzilal pa ri qakʼaslemal, xaneʼ xuqujeʼ kqakikotemaj ri Jehová y ri e qachalal (Prov. 27:11; 3 Juan 4). ¡Sibʼalaj nim kqil ri qastzij y kqaj kqabʼan pa ri qakʼaslemal! w22.08 18, 19 párrs. 16-18

Ri e kʼamal taq bʼe kekunik kkikʼutu che sibʼalaj kekiloqʼoqʼej ri Jehová y ri Jesús are chiʼ rukʼ loqʼoqʼebʼal kekichajij ri e qachalal, che kejunamataj kukʼ chij (1 Ped. 5:1, 2). Are waʼ ri xubʼij kan ri Jesús che ri apóstol Pedro. Are chiʼ ri Pedro oxmul xubʼij che retaʼm ta uwach ri Jesús, sibʼalaj xbʼisonik rumal laʼ xraj xukʼut chi jumul che qas kuloqʼoqʼej ri Jesús. Are chiʼ ri Jesús kʼateʼ xkʼastajisax pa ri kamikal, xutaʼ wariʼ che ri Pedro: «Simón, ukʼojol ri Jonás, ¿la sibʼalaj kinaloqʼoqʼej?». Xraj ta riʼ ri Pedro xubʼan apachike uwach jastaq rech kukʼut chuwach che kuloqʼoqʼej. Rumal laʼ ri Jesús xubʼij wariʼ che: «Cheʼayuqʼuj ri alaj taq nuchij» (Juan 21:15-17). Xmajtaj lo pa riʼ ri tiempo, ri Pedro xumaj kilixik ri winaq che xeya kan pa uqʼabʼ rumal ri Jesús, jeriʼ xukʼutu che qas kuloqʼoqʼej. ¿Jas kekunik kkibʼan ri e kʼamal bʼe rech kkikʼutu che qas kkaj kkibʼan ri xubʼij kan ri Jesús che ri Pedro? Kkikʼutu are chiʼ kekisolij ri e qachalal y kekitoʼ ri kiyaʼom kan upatanixik ri Jehová (Ezeq. 34:11, 12). w23.01 29 párrs. 10, 11

Maqachomaj che xaq xiw ri oj kʼo itzel taq qarayinik, rumal che wariʼ kubʼano che kqachomaj che kojkun ta wi kqakʼex ri qakʼaslemal y che xaq xiw oj ri más oj ajmakibʼ. Are kʼu ri Biblia kubʼij wariʼ: «Xaneʼ xaq xuwi ri kixkun che uqʼatixik uwach, kuya kʼu xuqujeʼ junam rukʼ ri kʼambʼejebʼal ri elebʼal». Paneʼ sibʼalaj kʼo uchuqʼabʼ ri qarayinik, are kʼu kojkunik kqabʼan ri kqaj chuwach ri Jehová y kojkunik kojchʼakan pa uwiʼ ri itzel qarayinik. Chnaʼtaj chqe che kʼo itzel qarayinik rumal che xa oj ajmakibʼ. Y are chiʼ kpe jun itzel qarayinik chqabʼanaʼ qe junam rukʼ ri xubʼan ri José are chiʼ xanimaj bʼi chuwach ri rixoqil ri Potifar (Gén. 39:12). Kqaya ta bʼe che ktaqan ri itzel qarayinik pa qawiʼ. w23.01 12, 13 párrs. 16, 17

Ri sukʼilal are jun chke ri ubʼantajik ri Jehová (Deut. 32:4). Xuqujeʼ kʼo ubʼanik rukʼ ri kubʼan che kilik konojel ri winaq, rumal laʼ junam keril wi konojel (Hech. 10:34, 35). Ri Jehová xubʼij che ri qʼaxal tzij Daniel che pa ri kʼisbʼal taq qʼij e kʼi winaq kkichʼobʼ na ri kubʼij ri Biblia (Dan. 12:4). Rumal laʼ, kimik ri Biblia y ri e qawuj e bʼanom pa kʼi chʼabʼal y jachom chke e kʼi winaq. Ri testigos rech Jehová kibʼanom ri Biblia pa más che 240 chʼabʼal y ri winaq che kraj jun re, kuloqʼ taj. ¿Jas utzilal uyaʼom wariʼ chke ri winaq? Are che e kʼi winaq tajin kketaʼmaj ri «utzalaj taq tzij re ri rajawbʼal ri Dios» are chiʼ majaʼ kpe ri kʼisbʼal (Mat. 24:14). Ri Jehová are jun sukʼalaj Dios, rumal laʼ kraj che ri winaq kketaʼmaj uwach are chiʼ kkisikʼij ri uTzij. ¿Jasche kubʼan wariʼ? Rumal che sibʼalaj kojraj. w23.02 5 párrs. 11, 12

¿La nim kawil wi at ri utaqanik ri Dios? Qastzij riʼ che jeʼ. Are kʼu qonojel xa oj ajmakibʼ y, we kqachajij ta qibʼ weneʼ kqachomaj ri kkichomaj ri winaq che makaj ta ri tajin kkibʼano (Is. 5:20). Are chiʼ ri Jesús xkʼojiʼ cho ri uwach Ulew, ri e kʼamal taq bʼe re ri kojonem kkibʼan che kibʼ che sibʼalaj e sukʼ y kʼo ta kesach wi. Are kʼu ri Jesús xubʼij chke che utz ta ri kkibʼano rumal che nim ta kekil wi ri e nikʼaj chik y xa are kebʼin chke ri e winaq jas ri utz kkibʼano y jas ri utz taj (Ecl. 7:16; Luc. 16:15). Kimik, e kʼi winaq kejunamataj kukʼ e areʼ. Kkichomaj che ronojel utz ri kkibʼano. Kkinimarisaj kibʼ chkiwach ri e nikʼaj chik y kʼax kechʼaw chkij. Ri Jehová utz ta kril ri bʼantajik riʼ rumal che tajin ta knimax ri utaqanik. Ri sukʼilal are jun utzalaj bʼantajik. Pa kebʼ oxibʼ tzij, kraj kubʼij kqabʼan ri utz chuwach ri Dios. Pa ri Biblia, ri tzij «sukʼilal» kraj kubʼij che kqanimaj ri e taqanik che más nim kibʼanik: ri e utaqanik ri Jehová. w22.08 27 párrs. 3-5

Ri Jesús xukubʼsaj ukʼuʼx chkij ri utijoxelabʼ paneʼ kʼi mul xesachik (Juan 15:15, 16). Are chiʼ ri Santiago y ri Juan xkibʼij che ri Jesús che kkaj kekʼojiʼ pa uxukut are chiʼ kuqʼat tzij, ri Jesús xuchomaj taj che utz ta tajin kkibʼan che upatanexik ri Jehová y xubʼij ta chke che kraj ta chik keʼux rapóstoles (Mar. 10:35-40). Y, pa ri chaqʼabʼ che xchap kumal ri ukʼulel, konojel ri rajtijoxelabʼ xkiya kan utukel (Mat. 26:56). Are kʼu ri Jesús xuya ta kan ukubʼsaxik ukʼuʼx chkij. Paneʼ kʼi xesach wi, «xeʼuloqʼoqʼej kʼa pa ri kʼistajik» (Juan 13:1). Y, are chiʼ xkʼastajisax rumal ri Dios, xubʼij chke ri 11 rapóstoles che kkitzijoj ri utzij ri Dios y che kekichajij ri utijoxelabʼ (Mat. 28:19, 20; Juan 21:15-17). Y utz xubʼano che xukubʼsaj ukʼuʼx chkij ri achijabʼ riʼ paneʼ kʼi xesach wi. Konojel xkinimaj ri Dios pa ronojel ri kikʼaslemal pa ri uwach Ulew. Junam rukʼ ri xqilo, ri Jesús xukubʼsaj ukʼuʼx chkij ri winaq che e ajmakibʼ. Ri kikʼutbʼal kojutoʼo rech ri oj xuqujeʼ kqakubʼsaj qakʼuʼx chkij ri nikʼaj chik. w22.09 6 párr. 12

Ri Satanás kkun taj kubʼano che kqaxeʼj qibʼ we qas kqakojo che ri Jehová kojuloqʼoqʼej y che kʼo qukʼ. Jun kʼutbʼal, ri xtzʼibʼan ri Salmo 118 xukʼulmaj jalajoj taq jastaq che xubʼan kʼax che. Xekʼojiʼ e kʼi ukʼulel, jujun chke ri xetaqchinik, nimaʼq kiqʼij (versículos 9 y 10). Xuqujeʼ jujun taq mul ktaqchix che ubʼanik jastaq che utz taj (versículo 13). Y xkʼajisax uwach rumal ri Jehová (versículo 18). Are kʼu paneʼ je waʼ xukʼulmaj, xubʼij pa jun bʼixonem: «Man kinxeʼj ta wibʼ». ¿Jasche je waʼ xubʼij? Rumal che paneʼ ri Jehová xukʼajisaj uwach, kloqʼoqʼex rumal. Ri salmista qas retaʼm che ri Jehová amaqʼel kraj kutoʼo (Sal. 118:29). Ri oj cristianos rajawaxik qas kqakojo che ri Jehová kojuloqʼoqʼej chqajujunal. We je waʼ kqachomaj, kojutoʼ chuwach oxibʼ jastaq che kuya xibʼin ibʼ chqe: 1) ri xibʼin ibʼ rumal che kqachomaj che kojkun taj kqaya che ri qafamilia ri kajwataj chke, 2) ri xibʼin ibʼ chkiwach e nikʼaj chik 3) ri xibʼin ibʼ chuwach ri kamikal. w22.06 15 párrs. 3, 4

Rajawaxik qas kqilo che ri uqʼijilaxik ri Jehová are ri kʼo pa nabʼe lugar pa ri qakʼaslemal. Rumal che are ri Jehová ri Bʼanol qe, taqal che kqaqʼijilaj (Apoc. 4:11; 14:6, 7). Rumal laʼ, ri más nim ubʼanik pa ri qakʼaslemal are che kqaqʼijilaj junam rukʼ ri kraj areʼ, «pa uxlabʼal xuqujeʼ pa qastzij» (Juan 4:23, 24). Kqaj che kojutoʼ ri ruxlabʼixel ri Dios pa ri qaqʼijilanik rech kqabʼan ri e jastaq che e kʼo pa ri Biblia. Rajawaxik che ri más nim ubʼanik pa ri qakʼaslemal are ri uqʼijilaxik areʼ, paneʼ qʼatem uwach ri qaqʼijilanik pa ri tinamit oj kʼo wi. Kimik, más che e 100 qachalal achijabʼ ixoqibʼ e tzʼapim pa cárcel xa rumal che e testigos rech Jehová. Paneʼ jeriʼ kiriqom, kekikotik rumal che kkikoj kichuqʼabʼ che ubʼanik kichʼawem, kkinikʼoj uwach ri Biblia y kechʼaw chrij ri Dios y ri uQʼatbʼal tzij. Paneʼ ktzeʼx qawach o kbʼan kʼax chqe, sibʼalaj kojkikotik rumal che qetaʼm che ri Jehová kʼo qukʼ y kojutewchij na (1 Ped. 4:14). w22.10 9 párr. 13

Pa ri wuj re Proverbios, ri Jehová kuya pixabʼ chqe che kʼo upatan pa ronojel tiempo y kuya utzilal chqe we kqabʼan pa ri qakʼaslemal. Chqilampeʼ kebʼ chke ri utz taq pixabʼ riʼ. Nabʼe, chojkikot rukʼ ri kʼo qukʼ. Proverbios 23:4, 5 kuya wajun pixabʼ chqe: «Makoj achuqʼabʼ rech katux qʼinom […]. Rukʼ aninaqil kerapanik kebʼek, e jachaʼ ri kot, jetaneʼ ri xa kekʼiy kixikʼ». Ri qʼinomal aninaq ksach uwach. Are kʼu kimik, ri e qʼinomabʼ y ri e mebʼayibʼ sachinaq kikʼuʼx che utzukuxik más pwaq. Kʼi mul, rumal che are más bʼenaq kikʼuʼx che utzukuxik más jastaq kuriq kʼax ri kibʼantajik, ri kachilanik kukʼ ri e nikʼaj chik y keyawajik (Prov. 28:20; 1 Tim. 6:9, 10). Chqachomaj na ri kqabʼij. We kqachomaj ta ri kqabʼij kqabʼan kʼax riʼ che jun chi winaq. Proverbios 12:18 kubʼij: «E kʼo jachin taq kesokon kumal ri kitzij, kechʼaw kʼu ri kʼo kinoʼj kkiya kʼu utzil». We kqabʼan ta ajaltzijol o tzijtal kkʼojiʼ utz achilanik chqaxoʼl kukʼ e nikʼaj chik (Prov. 20:19). w22.10 21 párr. 14; 22 párrs. 16, 17

Ri Ezequiel rajawaxik kuchʼobʼ ronojel ri kuya ubʼixik. Rajawaxik che kopan pa ranimaʼ rech kʼo ubʼanik rukʼ ri ubʼantajik y rukʼ ri kunaʼo. Tekʼuriʼ xkʼulmataj jun jastaq che reyeʼm taj. Xunaʼ che ri bʼotobʼik wuj «sibʼalaj kiʼ jachaʼ ri juyubʼal rax kabʼ» (Ezeq. 3:3). ¿Jasche sibʼalaj kiʼ? Rumal che chuwach areʼ are jun nimalaj tewchibʼal che rukʼam bʼi ri utzij ri Jehová (Sal. 19:8-11). Sibʼalaj kmaltyoxinik rumal che xchaʼ che qʼaxal tzij rumal ri Jehová. Are chiʼ qʼaxinaq chi ri tiempo, ri Jehová xubʼij wariʼ che ri Ezequiel: «Qas chatok il che utatabʼexik ri kenbʼij na chawe, chakojoʼ kʼu pa ajolom» (Ezeq. 3:10). ¿Jas kraj kubʼij wariʼ? Che ri Jehová kraj che ri Ezequiel knaʼtaj che ri e tzij tzʼibʼam pa ri bʼotobʼik wuj y che kchoman chrij. Wariʼ xukowirisaj ri ukojonik ri Ezequiel y qas xuchʼobʼ ri rajawaxik kuya ubʼixik chke ri winaq (Ezeq. 3:11). Rumal che ri utzij ri Dios kʼo chi pa ri uchiʼ y pa ri ranimaʼ, ri qʼaxal tzij kkun chik kumajij uqʼalajisaxik. w22.11 6 párrs. 12-14

¿Jas kabʼan at we kʼax kariq che ubʼanik jun jastaq che xkʼextaj pa ri utinamit ri Jehová? Rukʼ ronojel awanimaʼ chayaʼ atobʼanik che ri kkʼextaj pa ri utinamit ri Jehová. Are chiʼ ri israelitas xebʼin pa ri chaqiʼj ulew, jujun chke ri cohatitas kkitelej bʼi ri Arca del pacto chuwach ri tinamit (Núm. 3:29, 31; 10:33; Jos. 3:2-4). ¡Nim ubʼanik ri eqeleʼn xyaʼ chke! Are kʼu, are chiʼ ri israelitas xeʼopan chuwach ri Tzujum Ulew, xekʼextaj ri jastaq. Rajawaxik ta chik che kkʼam bʼi ri Arca jewaʼ jeriʼ. Xkʼextaj ri kichak ri cohatitas (1 Crón. 6:31-33; 26:1, 24). Ri Biblia kubʼij taj che ri cohatitas xechʼachʼatik o che xkitaʼ kichak más nim ubʼanik rumal che ojer kanoq xyaʼ nimaʼq taq eqeleʼn chke. ¿Jas kqetaʼmaj chrij wariʼ? Rukʼ ronojel awanimaʼ chayaʼ ri atobʼanik che ri kkʼextaj pa ri utinamit ri Jehová, paneʼ kukʼex ri tajin kabʼan nabʼe kanoq. Chatkikot rukʼ ri chak yaʼom chawe. Chnaʼtaj chawe che are ta ri aweqeleʼn kbʼanow chawe che nim abʼanik chuwach ri Jehová, xaneʼ are ri animanik pa apachike eqeleʼn. w22.11 23 párrs. 10, 11

Onesíforo xxuliʼk xpaqiʼ che utzukuxik ri Pablo y are chiʼ xuriqo xuya ri tobʼanik che xajwataj che. ¡Xuya ri ukʼaslemal pa kʼax rumal rech ri Pablo! ¿Jas kqetaʼmaj chrij wariʼ? Mayaʼ bʼe che ri xibʼin ibʼ katuqʼatej rech keʼatoʼ ri e qachalal che tajin kbʼan kʼax chke, y chayaʼ ri kajwataj chke (Prov. 17:17). Qas kajwataj ri qaloqʼoqʼebʼal y ri qatobʼanik chke. Chatchoman chrij ri kkibʼan ri e qachalal achijabʼ ixoqibʼ pa Rusia are chiʼ ketzʼapix jujun chke ri e qachalal pa cárcel. Are chiʼ e jujun chke kqʼat tzij pa kiwiʼ, e kʼi chke ri qachalal keʼopan pa ri qʼatbʼal tzij rech kekitoʼo. ¿Jas kqetaʼmaj chrij wariʼ? We kmol tzij chkij, kechap bʼik, kbʼan kʼax chke ri e qachalal che kkikʼam qabʼe pa ri utinamit ri Jehová, maxeʼj awibʼ. Chabʼanaʼ achʼawem pa kiwiʼ, cheʼachajij ri kachalaxik y chatzukuj ri kabʼan che kitoʼik (Hech. 12:5; 2 Cor. 1:10, 11). w22.11 17 párrs. 11, 12

Are ri e kʼamal bʼe rajawaxik keʼilow ri kajwataj chke ri e qachalal pa ri kikojonik y rech kkiya kichuqʼabʼ (1 Ped. 5:2). Are chiʼ kriqitaj jun nimalaj kʼax, ri nabʼe che kkibʼan ri e kʼamal taq bʼe are che kkilo we ri e qachalal kʼo ta kʼax xkiriqo, we kʼo kiwa, katzʼyaq y we kʼo kekʼojiʼ wi. Y weneʼ rajawaxik kkubʼsax kikʼuʼx ri e qachalal pa kʼi ikʼ (Juan 21:15). Ri qachalal Harold, che kʼo pa jun Comité re Sucursal y che tzijonaq kukʼ qachalal che kiriqom kʼax, kubʼij: «Kukʼam bʼi nim tiempo rech ksach ri bʼis chke. Weneʼ kilitajik che e utz chik, are kʼu weneʼ xaq kʼateʼ kpe jun nimalaj bʼis chke, rumal che knaʼtaj jun kachalal chke che xkamik, jun jastaq kech xkiya kanoq o jun chi kʼax. Xaq kʼateʼ kuya bʼis chke rumal ri xkikʼulmaj. Are kʼu xa ta rumal che kʼo ta kikojonik, xaneʼ jelaʼ kqanaʼ qonojel rumal che xa oj winaq». Sibʼalaj nim ubʼanik che ri kʼamal taq bʼe kkinimaj wajun chomanik re ri Biblia: «Chixoqʼ kukʼ ri keʼoqʼik» (Rom. 12:15). w22.12 22 párr. 1; 24, 25 párrs. 10, 11

Ri Jehová sibʼalaj utz qukʼ rumal che kuya ri ruxlabʼixel chqe rech kojchʼakan pa kiwiʼ ri itzel taq qarayinik. Kuya chqe are chiʼ kqanikʼoj ri Biblia y kojbʼe pa taq ri riqbʼal ibʼ. Chilaʼ kojkunik kojtzijon kukʼ ri e qachalal y kqetaʼmaj che ri e areʼ xuqujeʼ tajin kkikoj kichuqʼabʼ chuwach ri kirayinik y kkaj kkibʼan ri utzilal, rumal laʼ sibʼalaj kuya qachuqʼabʼ oj (Heb. 10:24, 25; 13:7). Y, are chiʼ kqataʼ tobʼanik che ri Jehová che kojutoʼ che uyaʼik kan jun itzel qarayinik, ri areʼ kuya ri ruxlabʼixel chqe rech kqakoj qachuqʼabʼ chuwach. Qastzij che ronojel wariʼ kubʼan taj che ksach uwach ri itzel qarayinik, are kʼu kuya qachuqʼabʼ rech ketaqan ta pa qawiʼ. We utz oj bʼenaq chi pa ri qakojonik, rajawaxik kqachajij qibʼ rech kqabʼan ta jun itzel qarayinik. w23.01 11 párrs. 13, 14

Ri Biblia are ta jun wuj che kubʼij chqe jas kunabʼal kqatijo y jas rikil utz kqatijo, xaneʼ kubʼij chqe jas ri kuchomaj ri Jehová chrij wariʼ. Jun kʼutbʼal, kuya wajun pixabʼ chqe: «Xaq mayaʼ ri abʼaqil pa ri kʼax» (Ecl. 11:10, TW). Ri Biblia kubʼij che utz taj kqatijijej kʼi taq jastaq o kojqʼabʼarik rumal che kubʼan kʼax chqe o kojukamisaj (Prov. 23:20). Rumal laʼ, ri Jehová kraj che kqachajij qibʼ chuwach ri kqatijo (1 Cor. 9:25). We kqaj kqakʼutu che nim kqil wi ri qakʼaslemal, rajawaxik kqakoj ri qachomanik are chiʼ kqachaʼ jun jastaq (Sal. 119:99, 100; Prov. 2:11). Jun kʼutbʼal, rajawaxik kojchoman chrij ri kqatijo. We kubʼan kʼax jun jastaq chqe, kqatij taj. Rajawaxik kojwarik, kqabʼan ejercicio, kqajosqʼij qibʼ y kqajosqʼij ri qachoch. w23.02 21 párrs. 6, 7

¿Jas kqabʼan che uriqik jeʼlalaj taq pixabʼ pa ri Biblia? Chqilampeʼ ri kajibʼ jastaq che kriqitaj pa 2 Timoteo 3:16, 17. Chilaʼ kubʼij wi che «ronojel ri Tzʼibʼatalik [Biblia] petinaq rukʼ ri Dios: utz che tijonik, che pixbʼenik, che jikʼonik, che naqʼatisanik che ri sukʼilal». Chqanikʼoj ri kqasikʼij uwach rech kqilo jas kukʼut chqawach chrij ri Jehová, chrij ri kraj kubʼano o ri pixabʼ che kuya chqe. Y ¿jas rajawaxik kqabʼano rech ri Biblia kojupixbʼej? Chqatzukuj jun kʼutbʼal pa ri Biblia che kojutoʼ che ukʼexik ri qabʼantajik y che kojutoʼ rech kqaya ta kan upatanexik ri Jehová. Chojchoman chrij jun kʼutunem che kojutoʼ che jikʼonik o che usukʼumaxik jun chomanik, weneʼ jun jastaq che kkibʼij ri winaq chqe are chiʼ kqatzijoj ri utzij ri Dios. ¿Y jas kqabʼano rech jun kʼutunem re ri Biblia utz che naqʼatisanik che ri sukʼilal? Kqatzukuj pixabʼ che kojutoʼ rech junam kojchoman rukʼ ri Jehová. We kqasikʼij ri Biblia kojkunik kqariq jeʼlalaj taq pixabʼ. w23.02 11 párr. 11

Jun profecía rech ri wuj Daniel xubʼij che ri Jesús kumaj uqʼatik tzij are chiʼ kkʼis ri siete tiempos. Chqilaʼ jampaʼ xkʼulmataj ri utzalaj jastaq riʼ (Dan. 4:10-17). Ri siete tiempos kraj kubʼij 2,520 junabʼ. Xmajtaj pa ri junabʼ 607 nabʼe chuwach ri qaqʼij, are chiʼ ri e babilonios xkesaj ri kʼisbʼal qʼatal tzij che ukojom ri Jehová pa Jerusalén. Y xkʼis pa ri junabʼ 1914, are chiʼ ri Jehová xukoj ri Jesús che Qʼatal tzij, che «pa uqʼabʼ kʼo wi ri ubʼanik sukʼilal» (Ezeq. 21:25-27). ¿Jas tobʼanik kuya wajun profecía riʼ chqe? Wajun profecía re ri siete tiempos kojutoʼ che uchʼobʼik che ri Jehová amaqʼel kubʼan ri kubʼij y che kubʼan pa ri tiempo che kajwatajik. Areʼ ubʼim kanoq che kukoj ri uQʼatbʼal tzij y are chiʼ xopan ri tiempo qas je xubʼano. Junam rukʼ wariʼ, ri Jehová qas kutzʼaqatisaj na ronojel ri profecías che ubʼim are chiʼ kopan ri tiempo. Rumal laʼ ri uqʼij ri Jehová «kopan kʼu na [pa] ri qʼijol ri rajawaxik» (Hab. 2:3). w22.07 3 párrs. 3-5