Mayo

Pa ri nabʼe siglo xkiriq kʼax ri cristianos are chiʼ xpe jun nimalaj wiʼjal pa «ronojel ri uwach ulew». Ri e tat nan xkibʼisoj jas kkiya chke ri kifamilia. Y ri alabʼom alitomabʼ che kichomam upatanexik más ri Jehová weneʼ xkichomaj jas kkibʼano. Apastaneʼ ri xkʼulmatajik, ri cristianos xkiya ta kan upatanexik ri Jehová y xkijach ri jastaq kech chkiwach kukʼ ri e kʼo pa Judea (Hech. 11:29, 30). Xkilo che ri Jehová qas tajin keʼuchajij are chiʼ xuya ri xajwataj chke (Mat. 6:31-33). Qastzij riʼ che más xkaj kibʼ are chiʼ xkitolaʼ kibʼ. Y ri xkiya kikuchuj o xkiya chi jun tobʼanik chke ri kʼo kajwataj chke qas xekikot riʼ (Hech. 20:35). w23.04 16 párrs. 12, 13

Jujun mul ri Jehová keʼukoj ri e Testigos taj rech kekitoʼ ri upatanelabʼ. Jun kʼutbʼal, ojer kanoq xukoj ri qʼatal tzij Artajerjes rech xutaq bʼi ri Nehemías che usukʼumaxik ri tinamit Jerusalén (Neh. 2:3-6). Rumal laʼ, je kubʼan che kitoʼik ri upatanelabʼ kimik. Qastzij che ri Jehová kubʼan ta jun milagro che qatoʼik. Are kʼu kuya ri chuqʼabʼ che kajwataj chqe rech kqaya ta kan upatanexik. Rumal laʼ, rajawaxik kqil ri kubʼan ri Jehová che uyaʼik ri kqataʼ che (Sal. 66:19, 20). Xaq xiw ta rajawaxik qakojonik are chiʼ kojchʼaw rukʼ ri Jehová, xaneʼ xuqujeʼ rajawaxik are chiʼ kqakʼam ri kuya chqe, apastaneʼ ri kuyaʼo (Heb. 11:6). w23.05 11 párr. 13; 12 párrs. 15, 16

Are chiʼ xqajach ri qakʼaslemal che ri Jehová xqabʼij che che kqapatanij y che are kqabʼan ri urayibʼal. Y rajawaxik kqabʼan ri xqabʼij che, rumal che are ta jun eqaʼn. ¿Jasche? Rumal che ri Jehová xojubʼano rech kqabʼan ri urayibʼal (Apoc. 4:11). Xojubʼano rech kqetaʼmaj uwach y kqaqʼijilaj xuqujeʼ rech kqesaj uwach. Rumal laʼ kojkunik kojqebʼ rukʼ y kojkikot che ubʼanik ri urayibʼal. Are chiʼ kqabʼan ri urayibʼal ri Jehová y kqesaj uwach ri Jesús kqariq kikotemal (Mat. 11:28-30). Rumal laʼ, chaloqʼoqʼej más ri Jehová. We are katchoman chrij ri ubʼanom che atoʼik y ronojel ri tewchibʼal che uyaʼom chawe y ri kuya na chawe pa ri petinaq, más knimar riʼ ri aloqʼoqʼebʼal che. Are chiʼ kaloqʼoqʼej más ri Dios más kʼax ta kabʼan che upatanixik. Kawil na che ri utaqanik are ta jun eqaʼn (1 Juan 5:3). Ri Jesús xkunik xupatanij ri Dios rumal che amaqʼel kubʼan uchʼawem che, kutaʼ tobʼanik che y xchoman chrij ri tewchibʼal che kuriq na (Heb. 5:7; 12:2). Junam rukʼ ri Jesús, chataʼ ri utobʼanik ri Jehová y masach chawe che kariq na ri kʼaslemal che kʼo ta ukʼisik. w23.08 27, 28 párrs. 4, 5

Qonojel utz kqilo kojkʼojiʼ kukʼ winaq che kʼo kipaciencia. ¿Jasche? Rumal che aninaq taj kkʼistaj kikʼuʼx. Y nim kqil wi are chiʼ ri winaq aninaq taj kpe koyowal chqij are chiʼ kʼo kojsach wi. Xuqujeʼ, nim kqil wi che ri xyaʼow etaʼmanik re ri Biblia chqe xukʼut paciencia qukʼ are chiʼ kʼo kqachʼobʼ taj y are chiʼ kʼax kqabʼan che ubʼanik pa ri qakʼaslemal. Y más ¡kojmaltyoxin che ri Jehová che kʼo upaciencia qukʼ! Qonojel nim kqil wi che ri nikʼaj chik kkikʼut paciencia. Are kʼu, are chiʼ oj ri rajawaxik kqakʼut paciencia weneʼ kʼax kqabʼan che ubʼanik. Weneʼ aninaq kpe qoyowal are chiʼ oj bʼenaq pa ri qacarro y kojkun taj kojqʼaxik más na we aninaq qij. Weneʼ aninaq kpe qoyowal are chiʼ ko kojchʼabʼexik. Y weneʼ jujun taq mul kqachomaj che ri kʼakʼ uwach Ulew che utzujum ri Jehová aninaq ta kpetik. ¿La mat qastzij che rajawaxik che qonojel kkʼojiʼ qapaciencia? w23.08 20 párrs. 1, 2

Ri Jehová xubʼij che ri Gedeón che keʼutaq bʼi kʼi ajchʼojabʼ cho kachoch. Weneʼ xuchomaj wariʼ: «¿Jasche ri Jehová je xubʼij wariʼ? ¿La qas kojchʼakan riʼ?». Paneʼ je wariʼ xuchomaj ri Gedeón xunimaj ri xbʼix che. ¿Jas kkibʼan ri kʼamal taq bʼe che resaxik uwach? Kkinimaj ri utaqanik ri utinamit ri Jehová (Heb. 13:17). Ri Gedeón xunimaj ri Jehová paneʼ kʼax ri xtaʼ che y xuxibʼij ribʼ (Juec. 9:17). Are kʼu chiʼ xbʼix che che ktoʼ rumal ri Jehová, xukubʼsaj ukʼuʼx che qastzij ktoʼ che uchajixik ri utinamit ri Jehová. Ri e kʼamal bʼe che keʼel pa jun tinamit jawiʼ qʼatem wi ri qachak che ri Dios kejunamataj rukʼ ri Gedeón. Rumal che rukʼ kowil kʼuxaj kkilo jas kkibʼan che ri riqbʼal ibʼ y utzijoxik ri utzij ri Dios paneʼ kekʼam bʼi pa cárcel, kkʼot kichiʼ kumal ri policías, keʼesax lo pa ri kichak o itzel keʼilik. Are chiʼ kpe ri nimalaj kʼaxkʼolil rajawaxik riʼ che ri kʼamal taq bʼe rukʼ kowil kʼuxaj kkibʼan ri kubʼij ri utinamit ri Dios chke apastaneʼ ri kʼax kkikʼulmaj. Weneʼ rech kqaya ubʼixik ri qʼatoj tzij pa kiwiʼ ri winaq che ri Biblia kujunamaj rukʼ nimaʼq taq saqbʼach. w23.06 5, 6 párrs. 12, 13

Ri Jehová xuya bʼe che xtzʼibʼax kan pa ri uTzij ri utz taq jastaq che xubʼan ri kinimal kojol tabʼal toqʼobʼ, Jehoiadá, rech kʼo kqetaʼmaj oj chrij (Rom. 15:4). Y are chiʼ xkam ri Jehoiadá «xmuq kʼu chupam ri uTinamit ri David, kukʼ taq ri ajawinelabʼ, rumal rech chi sibʼalaj utz xubʼan rukʼ ri Israel, rukʼ ri Dios xuqujeʼ rukʼ ri rachoch» (2 Crón. 24:15, 16). Ri xukʼulmaj ri Jehoiadá kojutoʼo rech kqaxej qibʼ chuwach ri Dios. Ri e kʼamal taq bʼe utz che kkesaj uwach ri Jehoiadá are chiʼ kekʼaskʼat che kichajixik ri upatanelabʼ ri Jehová (Hech. 20:28). Ri e qachalal che nim chi kijunabʼ che kkixeʼj kibʼ che ri Jehová y amaqʼel kkikʼut ri kisukʼilal che sibʼalaj nim kibʼanik chuwach. Ri alabʼom alitomabʼ kʼo kekunik kketaʼmaj chrij ri xubʼan ri Jehová che rilik ri Jehoiadá, rumal che kunaʼtajisaj chke che rajawaxik nim kekil wi ri e qachalal che nim chi kijunabʼ (Prov. 16:31). Y chukʼisbʼal, qonojel kʼo kqetaʼmaj chkij ri e kʼamal taq bʼe y ri levitas, che rajawaxik kojniman chke ri kekʼamow qabʼe kimik y keqatoʼ che ri kkichaʼ ubʼanik (Heb. 13:17). w23.06 17 párrs. 14, 15

Pa ri riqbʼal ibʼ, chqachomaj jampaʼ mul kqayak ri qaqʼabʼ. Rumal che we xaq kqayak wi ri qaqʼabʼ kqaya ta bʼe chke ri e qachalal kkiya kicomentarios. Y weneʼ e jujun qachalal kkichomaj che rajawaxik taj kkiya kicomentarios (Ecl. 3:7). Are chiʼ e kʼi qachalal kkaj kkiya kicomentarios, weneʼ kojkun taj kqaya kʼi qech oj o nijun. Paneʼ kojbʼisonik, rajawaxik kpe ta qoyowal (Ecl. 7:9). Paneʼ katkun taj kaya kʼi acomentario, utz che keʼatatabʼej ri kicomentarios ri e nikʼaj chik y kabʼij utz taq tzij chke are chiʼ kkʼis ri riqbʼal ibʼ. Ri utz taq tzij che kabʼij chke kuya kichuqʼabʼ riʼ junam rukʼ ri comentarios che xatkun taj xayaʼo. w23.04 23, 24 párrs. 14-16

Chqanikʼoj ri uTzij ri Dios y chojchoman chrij. Rech jun cheʼ ko ktakʼik rajawaxik nim ri urabʼ (raʼ) kok bʼi pa ri ulew. Junam qukʼ oj, rech oj ko pa ri qakojonik rajawaxik che qas kopan pa qanimaʼ ri kubʼij ri uTzij ri Dios. Are chiʼ jun cheʼ kkʼiyik xuqujeʼ kkʼiy ri urabʼ y más ko ktakʼiʼ pa ri ulew. Junam qukʼ oj, are chiʼ kqanikʼoj ri uTzij ri Dios y kojchoman chrij, más kkowir ri qakojonik y más kqakubʼsaj qakʼuʼx chrij ri uTzij ri Dios (Col. 2:6, 7). Chojchoman chkij ri upatanelabʼ ri Dios re ojer che xkiriq utzilal rumal ri taqanik y ri pixabʼ che xuya ri Dios chke. Jun kʼutbʼal, xkowir ri ukojonik ri Ezequiel are chiʼ xril jun ángel xretaj ri templo. Y wajun visión kunaʼtaj chqe che rajawaxik nim kqil wi ri utaqanik ri Jehová (Ezeq. 40:1-4; 43:10-12). Are laʼ ri utzilal kqariqo are chiʼ kqanikʼoj y kojchoman chrij ri uTzij ri Dios. Ri oj xuqujeʼ rajawaxik ko kojtakʼiʼk y kqakubʼsaj qakʼuʼx chrij ri Jehová (Sal. 112:7). w23.07 18 párrs. 15, 16

Chatchoman chrij ri kikʼutbʼal ri e sukʼ taq achijabʼ che kubʼij ri Biblia y che xkiloqʼoqʼej ri Dios y jalajoj xkibʼan che uchajixik ri utinamit. Qastzij riʼ che pa ri afamilia y pa ri congregación e kʼo qachalal che kʼo jun ko kikojonik y che katkunik kawesaj kiwach (Heb. 13:7). Xuqujeʼ katkunik kawesaj uwach ri utz ukʼutbʼal ri Jesús (1 Ped. 2:21). Are chiʼ kawil konojel ri e kʼutbʼal riʼ, chatchoman chrij ri kawetaʼmaj chkij chkijujunal (Heb. 12:1, 2). Tekʼuriʼ, chawilaʼ ri kabʼano rech kawesaj kiwach. Ri achijabʼ che kʼo jun utz kichomanik qas kechoman chrij are chiʼ kkichaʼ ubʼanik jun jastaq pa ri kikʼaslemal. Rumal laʼ chakojoʼ achuqʼabʼ rech kkʼojiʼ wajun utzalaj chomanik awukʼ. Nabʼe, rajawaxik kawetaʼmaj ri kubʼij ri Biblia, tekʼuriʼ katchoman chrij jas katutoʼ wi pa ri akʼaslemal ri kubʼij ri Jehová chawe. Chatchoman chrij ronojel ri awetaʼmam pa ri Biblia rech are kachaʼ ubʼanik pa ri akʼaslemal ri utz kril ri Jehová (Sal. 119:9). Jun cristiano rajawaxik kukoj ri unojibʼal rech kukʼutu che tajin knimar ri ukojonik (Prov. 2:11, 12; Heb. 5:14). w23.12 24, 25 párrs. 4, 5

Ri e tat nan kekunik kkikʼut chkiwach ri kalkʼwal, rech rukʼ utz taq tzij ketzijon kukʼ ri winaq che kʼax kechʼaw chke chrij ri kikojonik (Sant. 3:13). Ri kkibʼan jujun tat nan, are che kkitijoj kibʼ are chiʼ kkibʼan ri kiqʼijilanik pa ri familia. Ri e tat nan kkitijoj kibʼ chrij jun kʼutunem kukʼ ri kalkʼwal che weneʼ kbʼan chke pa ri escuela y ri kkibʼan che ubʼixik che jun winaq. Xuqujeʼ kkikʼut chkiwach ri kalkʼwal che rajawaxik rukʼ utzilal ketzijonik y che kkibʼano che ri e winaq kkaj kketaʼmaj más. Utijoxik ibʼ pa ri qʼijilanik pa ri familia xaq xiw ta keʼutoʼ ri alabʼom alitomabʼ rech kkiriqo jas kkibʼij are chiʼ kbʼan preguntas chke, xaneʼ keʼutoʼo rech qas kkikojo che e kʼo pa ri qastzij kojonem. Pa ri sección «Jóvenes» re jw.org y ri sección «Ponlo por escrito», bʼanom chke ri alabʼom alitomabʼ rech kekunik kkitoʼ uwiʼ ri kikojonik. We keqanikʼoj ri kʼutunem riʼ y ri sección «Los jóvenes preguntan» pa ri qaqʼijilanik pa ri familia, kojkun riʼ kqatoʼ uwiʼ ri qakojonik rukʼ utz taq tzij. w23.09 17 párr. 10; 18 párrs. 15, 16

¿La kʼo jumul akojom jun ameta pa ri akojonik y kʼax xabʼan che ubʼanik? We jeʼ, xaq xiw ta at akʼulmam wariʼ. Jun kʼutbʼal, jun qachalal Philip ubʼiʼ kraj amaqʼel kubʼan uchʼawem che ri Jehová y kraj más utz kubʼan che, are kʼu kʼax kubʼan che ubʼanik wariʼ. Jun chi qachalal Erika ubʼiʼ, xukoj umeta rech atam o chanim kopan pa ri riqbʼal ibʼ che utzijoxik ri utzij ri Dios, are kʼu amaqʼel kbʼeytajik. Makʼistaj akʼuʼx we katkun ta che ubʼanik jun ameta. Chnaʼtaj chawe che paneʼ xa jun nitzʼ meta kakojo, are kʼu kajwataj wi chuqʼabʼ y tiempo che ubʼanik. Rumal che amaqʼel kakoj achuqʼabʼ che ubʼanik, kakʼutu che nim kawil wi ri awachilanik rukʼ ri Jehová y kawaj kaya ri más utz che. Ri Jehová are kril ri chuqʼabʼ che kakojo y kutaʼ ta jun jastaq chawe che katkun ta che ubʼanik (Sal. 103:14; Miq. 6:8). Rumal laʼ, rajawaxik katchoman chrij jun ameta che qas katkun che ubʼanik, we achomam chik ri kawaj kabʼano chakojoʼ achuqʼabʼ che ubʼanik. w23.05 26 párrs. 1, 2

Ri winaq che kkixiʼj ta kibʼ kkiya ta kan ubʼanik ri utzilal. Daniel are jun ala che xuxiʼj ta ribʼ. Amaqʼel xusikʼij ri xkitzʼibʼaj kan ri profetas, junam rukʼ ri xutzʼibʼaj kan ri Jeremías. Rukʼ wariʼ ri Daniel xretaʼmaj che ri judíos naj ta chi kraj keʼel bʼi pa Babilonia (Dan. 9:2). Weneʼ más xukubʼsaj ukʼuʼx chrij ri Jehová are chiʼ xrilo che ronojel ri profecías tajin ketzʼaqatik. Are chiʼ jun winaq kukubʼsaj ukʼuʼx chrij ri Jehová kuxiʼj ta ribʼ (chajunamaj wajun chomanik riʼ rukʼ Romanos 8:32, 37-39). Ri xtoʼw ri Daniel are che amaqʼel xubʼan uchʼawem che ri Jehová (Dan. 6:10). Kubʼij che ri kmakun wi, ri kunaʼo y kutaʼ ri utobʼanik (Dan. 9:4, 5, 19). Ri Daniel xalax ta rukʼ wajun bʼantajik riʼ, che kuxeʼj ta ribʼ. Ri xubʼano rech kkʼiy wajun bʼantajik riʼ are che xunikʼoj ri uTzij ri Dios, xubʼan uchʼawem y xukubʼsaj ukʼuʼx chrij ri Jehová. w23.08 3 párr. 4; 4 párr. 7

Are chiʼ kojniman chke ri qʼatal taq tzij kqariq utzilal xuqujeʼ ri e nikʼaj chik. Jun utzilal che kqariqo are che kqariq ta kʼax y kʼax ta kqabʼan che unimaxik ri taqanik che kkiya ri qʼatal taq tzij (Rom. 13:1, 4). Jun chi utzilal che kuya ri nimanik, are che ri qʼatal taq tzij utz kechʼaw chqij ri oj testigos rech Jehová. Are waʼ ri xkʼulmataj pa ri tinamit Nigeria ojer kanoq. E jun jupuq soldados xeʼok pa ri Ja rech Ajawbʼal are chiʼ tajin kbʼan ri riqbʼal ibʼ. Tajin kekitzukuj jujun winaq che kkaj taj kkitoj ri impuestos. Are kʼu ri kʼamal kibʼe ri soldados xubʼij chke che keʼel bʼi chilaʼ. Xubʼij: «Ri testigos rech Jehová amaqʼel kkitoj ri impuestos». Are chiʼ amaqʼel kojniman chke ri qʼatal taq tzij, ktobʼanik rech utz kechʼaw ri winaq chrij ri utinamit ri Jehová. Wajun nimanik riʼ ktobʼanik rech kkiriq ta kʼax ri qachalal. w23.10 9 párr. 13

E jujun upatanelabʼ ri Jehová kʼi junabʼ keyem ri kʼakʼ uwach Ulew. Y weneʼ kkichomaj jasche majaʼ kpetik. Are kʼu ri Jehová kuchʼobʼ ri kkinaʼo, rumal laʼ xubʼij wariʼ che ri qʼaxal tzij Habacuc: «Kʼa majaʼ kʼu neʼ kopan ri qʼijol ri chetzʼaqat we kʼutwachinik riʼ; ma ta kʼu neʼ ma ta chetzʼaqatoq. At chateyenoq, paneʼ kbʼeytajik, kopan kʼu na ri qʼijol ri rajawaxik» (Hab. 2:3). ¿La xaq xiw che ri Habacuc xbʼix wi waʼ taq tzij? Xaq xiw taj, rumal che ri Jehová xubʼij che ri apóstol Pablo che xuqujeʼ kutzʼibʼaj waʼ taq tzij chke ri cristianos che keyem ri kʼakʼ uwach Ulew (Heb. 10:37). Paneʼ kqanaʼo che kbʼeyetaj ri utzujum ri Jehová, are kʼu «kopan kʼu na ri qʼijol ri rajawaxik». w23.04 30 párrs. 16

Are kʼu, e kʼi chke ri israelitas xeniman taj y nim ta xkil wi che ri Jehová are chaʼowinaq ri Moisés (Núm. 14:10, 11). Rumal che xkikoj taj che are ri Jehová kojowinaq ri Moisés, xekun taj xeʼok chupam ri Tzujum Ulew (Núm. 14:30). Are kʼu, e kʼo jujun taq israelitas che xeniman che ri Jehová. Jun kʼutbʼal, ri Jehová xubʼij: «Ri pataninel wech Caleb [...] nimaninaq kʼu chwe rukʼ jikil» (Núm. 14:24). Ri Jehová xutewchij y xuya bʼe che are xchaʼowik jawiʼ kkʼojiʼ wi pa Canaán (Jos. 14:12-14). Junam rukʼ ri Caleb, xekʼojiʼ nikʼaj chi israelitas che xuqujeʼ xeniman che ri Jehová. Y konojel ri israelitas nim xkil wi ri Josué, che xchaʼ rumal ri Jehová che ukʼexwach ri Moisés che ukʼamik ubʼe ri utinamit (Jos. 4:14). Rumal laʼ, ri Jehová xeʼutewchij y xekunik xeʼok chupam ri Tzujum Ulew (Jos. 21:43, 44). w24.02 21 párrs. 6, 7

Junam rukʼ jun doctor che kretaʼmaj jas ubʼanom ri ranimaʼ jun winaq are chiʼ kunaʼ ri upulso, ri oj xuqujeʼ kojkunik kqilo jas ubʼanom ri qaloqʼoqʼenik che ri Jehová are chiʼ kqil ri loqʼoqʼebʼal che kqakʼut chke ri qachalal. We kqilo che ri qaloqʼoqʼebʼal chke ri qachalal qajinaq uchuqʼabʼ, xuqujeʼ je ubʼanom riʼ ri qaloqʼoqʼebʼal che ri Jehová. Are kʼu, we amaqʼel kqakʼut ri qaloqʼoqʼebʼal chke ri qachalal, wariʼ kukʼutu che sibʼalaj nim ri qaloqʼoqʼebʼal che ri Jehová. ¿Jasche rajawaxik kojchoman chrij we qajinaq uchuqʼabʼ ri qaloqʼoqʼebʼal chke ri qachalal? Rumal che wariʼ kukʼutu che ri qachilanik rukʼ ri Jehová kʼo pa kʼax. Wariʼ kukʼut chqawach ri tzij che xubʼij ri apóstol Juan: «Ri man kuloqʼoqʼej ta ri rachalal ri rilom, ¿jas ta kʼu lo kubʼano kkun ta che uloqʼoqʼexik ri Dios ri man rilom taj?» (1 Juan 4:20). ¿Jas kqetaʼmaj? Xaq xiw kojqaj chuwach ri Jehová we keqaloqʼoqʼej ri nikʼaj chik ( 1 Juan 4:7-9, 11). w23.11 8 párr. 3; 9 párrs. 5, 6

Are chiʼ ri Jehoás kʼa nitzʼ na xkam ri utat y are ri Jehoiadá ri kinimal ri kojol tabʼal toqʼobʼ xkʼiyisanik y xukʼut chuwach chrij ri Jehová. Ri Jehoás xunimaj ri xubʼij ri Jehoiadá che, rumal laʼ xupatanij ri Jehová y xutoʼ ri tinamit rech je xubʼano. Xuqujeʼ xtobʼanik rech xsukʼumax ri templo (2 Crón. 24:1, 2, 4, 13, 14). Sibʼalaj utz we ri atat anan o e nikʼaj chik tajin katkitoʼ che retaʼmaxik chrij ri Jehová, are jun sipanik che tajin kyaʼ chawe (Proverbios 2:1, 10-12). Jalajoj ri kkibʼan ri tat nan rech kekitoʼ ri kalkʼwal rech kketaʼmaj chrij ri Jehová. Are chiʼ kabʼan ri kubʼij ri Biblia, kekikot riʼ ri atat anan awukʼ. Y ri más utz na are che kkikot ri Jehová awumal y wariʼ kubʼano che kkʼojiʼ jun utz achilanik chixoʼl rukʼ (Prov. 22:6; 23:15, 24). ¿La mat qastzij che rukʼ wariʼ kawaj kawesaj uwach ri Jehoás are chiʼ kʼa ala na? w23.09 8, 9 párrs. 3-5

Ri Jehová kubʼij chqe che kutatabʼej ri qachʼawem. Ri Dios kojuloqʼoqʼej y kʼo ta nijun mul che mat kuta ri qachʼawem (Sal. 10:17; 37:28). Are kʼu wariʼ kraj ta kubʼij che kuya ronojel ri kqataʼ che. Weneʼ kqeyeʼj na pa ri kʼakʼ uwach Ulew rech ri Jehová kutzʼaqatisaj ronojel ri kqataʼ che. Ri Jehová kchoman chrij ri urayibʼal are chiʼ kutzalij uwach ri qachʼawem (Is. 55:8, 9). Jun chke ri urayibʼal are che ri winaq che kekʼojiʼ cho ri uwach Ulew kkitoʼ uwiʼ ri uQʼatbʼal tzij, kkipatanij rukʼ kikotemal y pa junamil. Are kʼu ri Satanás kubʼij che más kojkikot riʼ we oj kojchow ri kqaj kqabʼano (Gén. 3:1-5). Rech ri Jehová kukʼutu che ri Satanás are jun bʼanal tzij, uyaʼom chke ri winaq che e areʼ kechaʼow ri kkaj kkibʼano y wariʼ uyaʼom kʼi kʼax chke (Ecl. 8:9). Qetaʼm che ri Jehová kresaj ta ronojel ri kʼax che tajin kqariqo. w23.11 21 párrs. 4, 5

Ri Jehová xubʼij che ri Abrahán che rumal ri areʼ ketewchix na «nimaʼq taq tinimit». Are chiʼ ri Abrahán 100 ri ujunabʼ y ri Sara 90 kʼo ta kalkʼwal. Weneʼ kqachomaj che rumal che e riʼj chik kekun ta chik kkʼojiʼ kalkʼwal. Wariʼ xukoj ri ukojonik ri Abrahán pa kʼax, ri areʼ «xkojonik xkʼojiʼ kʼu reyebʼal ukʼuʼx, je kʼu riʼ xux kimam taq ri nimaʼq taq tinimit» (Rom. 4:18, 19). Are chiʼ xqʼax ri tiempo wajun eyebʼal riʼ qas xtzʼaqat na: ri Abrahán xkʼojiʼ na ri ralkʼwal che qas reyem che kkʼojiʼk (Rom. 4:20-22). Junam rukʼ ri xubʼan ri Abrahán, ri oj xuqujeʼ kojkunik kqabʼano che ri Jehová kubʼij sukʼ chqe y kojux rachiʼl. Rumal laʼ, ri Pablo xubʼij wariʼ chrij ri Abrahán: «Are taq xtzʼibʼaxik chi ‹xqʼalajisax ri Abrahán chi sukʼ›, man xuwi ta rumal rech ri areʼ xtzʼibʼaxik. Xaneʼ xtzʼibʼax xuqujeʼ rumal qech uj. Rumal ri qakojonik, ri Dios kojuqʼalajisaj chi uj sukʼ chuwach, ri kujkojon» chrij ri Jesús ri xukʼastajisaj chkixoʼl ri kaminaqibʼ (Rom. 4:23, 24). Rajawaxik che xuqujeʼ kqabʼan we oxibʼ jastaq riʼ junam rukʼ ri Abrahán: kkʼojiʼ qakojonik, kqakʼutu che qas kʼo qakojonik y kkʼojiʼ qeyebʼal. w23.12 7 párrs. 16, 17

We at tajin kakʼulmaj jun kʼax y kaxiʼj awibʼ, chnaʼtaj chawe che ri Jehová xaq ta kril ri kakʼulmaj, xaneʼ retaʼm ri tajin kanaʼo. Jun kʼutbʼal, are chiʼ ri israelitas xekʼojiʼ pa Egipto, ri Jehová qas xril ri kʼax che xbʼan chke (Éx. 3:7). We tajin kojqʼax pa jun kʼax che kuya xibʼin ibʼ chqe, weneʼ kʼax kqabʼan che uchʼobʼik che ri Jehová tajin kojutoʼo. ¿Jas kojkunik kqabʼano? Chqataʼ che che kojutoʼ che rilik ri tajin kubʼan che qatoʼik (2 Rey. 6:15-17). Tekʼuriʼ chqachomaj wariʼ: ¿La uyaʼom qachuqʼabʼ jun chʼabʼal o jun comentario che xyaʼ pa jun riqbʼal ibʼ? ¿La uyaʼom qachuqʼabʼ jun chke ri e qawuj, jun video o jun bʼixonem? ¿La kʼo jun qachalal che ukʼutum jun texto chqawach rech kuya qachuqʼabʼ? Jujun taq mul ksach pa qajolom che ri loqʼoqʼenik che kkikʼut ri qachalal y ronojel ri yaʼom chqe pa ri qakojonik are jun sipanik che kuya ri Jehová chqe (Is. 65:13; Mar. 10:29, 30). Ri e sipanik riʼ kukʼut chqawach che ri Jehová kraj kojutoʼo y kraj che kqakubʼa qakʼuʼx chrij (Is. 49:14-16). w24.01 4, 5 párrs. 9, 10

Are chiʼ xa jubʼiqʼ chi kraj kbʼe ri Jesús pa ri kaj xubʼij kan chke ri utijoxelabʼ che rajawaxik kkitzijoj ri utzij ri Dios «pa Jerusalén pa ronojel ri ulew re Judea xuqujeʼ pa Samaria, xuqujeʼ kʼu pa taq ri tinamit ri sibʼalaj naj e kʼo wi cho ronojel ri uwach ulew» (Hech. 1:8; Luc. 24:46-48). Are chiʼ qʼaxinaq chi jubʼiqʼ tiempo, ri kʼamal taq bʼe judíos xekichap bʼi ri Pedro y ri Juan, y xekikʼam bʼi chuwach ri Sanedrín. Chilaʼ xkibʼij chke che kkitzijoj ta chi ri utzij ri Dios y we kkiya ta kan ubʼanik kkibʼan na kʼax chke (Hech. 4:18, 21). Ri Pedro y ri Juan xkibʼij wariʼ chke ri kʼamal taq bʼe: «Chomaj alaq we sukʼ chi are nabʼe kojniman chech alaq chuwach ri unimaxik ri Dios. Man kojkun ta kʼut chi ma ta kqatzijoj ri qilom ri qatom» (Hech. 4:19, 20). Are chiʼ ri Pedro y ri Juan xetzoqopix bʼik, xkimulij kibʼ kukʼ ri nikʼaj chi tijoxelabʼ che ubʼanik kichʼawem rech kkiya ta kan utzijoxik ri utzij ri Dios. Y ri Jehová qas xutatabʼej ri kichʼawem (Hech. 4: 31). w23.05 5 párrs. 11, 12

Ri Jehová xuqujeʼ ri ukʼojol naj tiempo xkachilaj kibʼ. Rumal laʼ pa junamam e kʼolik y sibʼalaj kkiloqʼoqʼej kibʼ. Ri achilanik che kʼo chkixoʼl are ri nabʼe che kʼolinaq. Ri texto re kamik, kuya ubʼixik che ri Jehová xubʼij che kuloqʼoqʼej ri Jesús. Xaq xiw ta xubʼij che kqaj ri ukʼojol chuwach, xaneʼ kraj che kqil ri nimalaj loqʼoqʼenik che kunaʼ che y che kkikot rukʼ y rukʼ ri kubʼan na pa ri petinaq, xubʼij: «Are loqʼalaj nukʼojol waʼ» (Efes. 1:7). Ri Jesús qas retaʼm che ri Jehová qas kuloqʼoqʼej. Rumal che qas xukojo che qas kloqʼoqʼex rumal ri Jehová kʼi taq mul xubʼij wariʼ (Juan 3:35; 10:17; 17:24). w24.01 28 párr. 8

Chatchoman chrij che kʼo jun awachiʼl che nim kawil wi y xubʼij molom taq tzij chawij. At awetaʼm che ri xubʼij qastzij taj, are kʼu jujun kkikoj ri xbʼix chawij y kkitzijoj chi chke nikʼaj chik. ¿Jas kanaʼ riʼ? Qastzij riʼ che kʼax kanaʼo che ri winaq kʼax kechʼaw chawij. Wajun kʼutbʼal riʼ kojutoʼ che uchʼobʼik ri xunaʼ ri Jehová are chiʼ jun chke ri ralkʼwal che kʼo pa ri kaj xubʼij molom tzij chrij y xutzʼilobʼisaj ri ubʼiʼ. Ri Eva xukoj ri molom tzij che xbʼix che y rumal wariʼ ri Adán y Eva xeniman ta chi che ri Jehová. Ri molom tzij che xubʼij ri Satanás pa ri kotzʼiʼj Edén ubʼanom che kʼo kʼi kʼax y kamikal pa ronojel ri uwach Ulew (Gén. 3:1-6; Rom. 5:12). Ri molom tzij riʼ che xbʼantaj pa ri kotzʼiʼj Edén ukʼamom lo ri kamikal cho ronojel ri uwach Ulew, ri chʼoj y ronojel ri kʼax. Qastzij riʼ che ri Jehová sibʼalaj kbʼisonik che kqakʼulmaj ronojel ri e kʼax rumal ri molom tzij. Are kʼu wariʼ ubʼanom taj che ri Jehová mat kkikot chik. Xaneʼ, ri Biblia kubʼij che uyaʼom ta kan ri ukikotemal (1 Tim. 1:11). w24.02 8 párrs. 1, 2

¿Jas kqabʼan che resaxik uwach ri José rech kqakʼut sukʼilal? Kqesaj uwach are chiʼ kojchoman apan chrij ri kqabʼan chuwach jun makaj. Rajawaxik aninaq kqaxutuj ronojel ri itzel kril ri Jehová, kojkanaj ta na che uchomaxik ri makaj (Sal. 97:10; 119:165). Wariʼ kojutoʼo rech kojqaj ta pa jun nimalaj makaj. Are chiʼ kqakʼulmaj wariʼ, qas qetaʼm chik jas kqabʼano. Weneʼ awetaʼm chik che are waʼ ri qastzij y kawaj kapatanij ri Jehová rukʼ ronojel awanimaʼ. Are kʼu ¿la kʼo tajin katqʼaten che ujachik ri akʼaslemal che ri Jehová y kabʼan aqasanjaʼ? Katkunik kabʼan awe junam rukʼ ri xubʼan ri qʼatal tzij David y kataʼ tobʼanik che ri Jehová: «NuDios, chinnikʼoj la chetaʼmaj la uwach ri wanimaʼ; chinkʼambʼejej la, chetaʼmaj la kiwach ri e nuchomanik; chila la we in bʼenaq chupam ri bʼe re etzelal, kʼamaʼ kʼu la nubʼe chupam ri junalik bʼe» (Sal. 139:23, 24). Are chiʼ kakoj achuqʼabʼ rech katkunik kajach ri akʼaslemal che ri Jehová y kabʼan aqasanjaʼ, tajin kakʼutu che qas kawaj kapatanij. Y ri Biblia kubʼij che ri areʼ keʼutewchiʼj na ri kkibʼan wariʼ (Heb. 11:6). w24.03 6 párrs. 13-15

Ri kinimal ri kojol tabʼal toqʼobʼ are ri kchʼaw pa kiwiʼ ri winaq chuwach ri Dios. Are chiʼ xkʼis ubʼanik ri tabernáculo ri Jehová xuchaʼ ri Aarón rech kux ri nabʼe kinimal ri kojol tabʼal toqʼobʼ pa Israel. Are kʼu ri apóstol Pablo xubʼij: «Sibʼalaj e kʼi e okinaq kan che kojol tabʼal toqʼobʼ, xaq xeʼokʼowik, rumal rech chi chkijujunal xekamik, man xekʼojiʼ ta kʼi junabʼ» (Heb. 7:23-26). Rumal che ri kinimal kojol tabʼal toqʼobʼ xa e ajmakibʼ, rajawaxik kkiya tabʼal toqʼobʼ chuwach ri Dios che ri kimak. Ri e kojol tabʼal toqʼobʼ re Israel kejunamataj ta rukʼ ri Jesucristo, ri Kinimal kojol tabʼal toqʼobʼ. Ri Jesucristo are ri «kojol tabʼal toqʼobʼ ri kpatanin pa ri qas qʼijilabʼal ri xbʼan rumal ri Ajawaxel, man rumal ta winaq» (Heb. 8:1, 2). Ri Pablo xubʼij che ri Jesús «kkʼojiʼ amaqʼel chbʼe qʼij saq, okinaq che kojol tabʼal toqʼobʼ, ri man qʼaxal taj». Xuqujeʼ xubʼij che ri Jesús «chʼajchʼoj, utasom ribʼ chkij ri e ajmakibʼ» y che junam ta kukʼ ri kojol tabʼal toqʼobʼ che xekʼojiʼ pa Israel, «man rajawaxik ta che chi ronojel qʼij kukamisaj ta jun awaj che tabʼal toqʼobʼ cho ri Dios nabʼe pa kiwiʼ ri umak ri areʼ». w23.10 26 párrs. 8, 9

«Ri nabʼe kaj» kchʼaw chkij ri qʼatal taq tzij che e kʼo pa uqʼabʼ ri Satanás y ri demonios (Mat. 4:8, 9; 1 Juan 5:19). Pa ri Biblia ri tzij «ulew» jujun taq mul kchʼaw chkij ri winaq (Gén. 11:1; Sal. 96:1). Rumal laʼ, ri «nabʼe ulew» kchʼaw chkij ri itzel taq winaq che e kʼo kimik. Wariʼ kraj kubʼij che ri Jehová xaq xiw ta kusukʼumaj ri «kaj» y ri «ulew», xaneʼ kusachisaj na kiwach y keʼukʼex na rukʼ «jun kʼakʼalaj kaj xuqujeʼ jun kʼakʼalaj ulew», kraj kubʼij jun kʼakʼ Qʼatbʼal tzij y e utz taq winaq. Ri Jehová kusukʼumaj na ri uwach Ulew y ri e winaq rech kux tzʼaqat ri kikʼaslemal. Junam rukʼ ri xubʼij kan ri Isaías, ronojel ri uwach Ulew kux na kotzʼiʼj y sibʼalaj jeʼlik junam rukʼ ri kotzʼiʼjalaj Edén. Ri oj xuqujeʼ kojux na tzʼaqatalaj taq winaq. Ri Jehová keʼukunaj na ri winaq che kebʼin taj, kkita taj, kekaʼy taj y keʼukʼasuj na ri kaminaqibʼ (Is. 25:8; 35:1-7). w23.11 4 párrs. 9, 10

Xaq kʼateʼ kumaj ri «nimalaj kʼaxkʼolil» (Mat. 24:21). Are chiʼ xaq kʼateʼ kpe jun nimalaj kabʼraqan, kaqiqʼ jabʼ o jun chi kʼax sibʼalaj ksach kikʼuʼx ri winaq, are kʼu konojel taj kkimayo are chiʼ kpe ri nimalaj kʼaxkʼolil. ¿Jasche? Rumal che, 2,000 junabʼ kanoq ri Jesús xubʼij chke ri utijoxelabʼ che rajawaxik kekʼaskʼat che reyexik wajun qʼij riʼ. We kqanimaj ri xubʼij kan ri Jesús kojkun riʼ kqachʼij ri nimalaj kʼaxkʼolil y kojkunik keqatoʼ nikʼaj chik (Luc. 21:36). Chilaʼ kʼu laʼ rajawaxik kqakʼut kochʼonik rech kqanimaj ri Jehová y kqakubʼsaj qakʼuʼx chrij che qas kojutoʼ na. ¿Jas kqabʼano we ri e qachalal kʼo ta chi jastaq kech? (Hab. 3:17, 18). Rajawaxik kqatoqʼobʼisaj kiwach y keqatoʼ rukʼ ri kajwataj chke. ¿Jas kqabʼano are chiʼ kbʼan kʼax chqe kumal ri jupuq qʼatal taq tzij y kojyaʼ kukʼ ri qachalal pa jun nitzʼalaj lugar? (Ezeq. 38:10-12). Rajawaxik kqakʼut loqʼoqʼebʼal. w23.07 2 párrs. 2, 3

Ri e kʼulanik kʼo kketaʼmaj chkij ri Áquila y ri Priscila, jun kʼulaj che xekʼojiʼ pa ri nabʼe siglo (Rom. 16:3, 4). Che amaqʼel junam xkitzijoj ri utzij ri Dios y xekitoʼ e nikʼaj chik (Hech. 18:2, 3, 24-26). Are chiʼ ri Biblia kchʼaw chkij amaqʼel kachilam kibʼ. ¿Jas kkibʼan ri kʼulaj che resaxik kiwach? Chixchoman chrij ri tajin kibʼan kimik chijujunal. We itukel tajin kibʼan jun jastaq utz we kitoʼlaʼ iwibʼ che ubʼanik, junam kukʼ ri Áquila y ri Priscila che amaqʼel xkachilaj kibʼ che utzijoxik ri utzij ri Dios. Y we junam ta ri ichak, utz che kitoʼlaʼ iwibʼ che ujosqʼixik ri upaja junam kukʼ ri Áquila y ri Priscila che junam xechakunik (Ecl. 4:9). We kibʼan wariʼ, kixutoʼ rech kixtzijonik. w23.05 22, 23 párrs. 10-12

Qonojel jujun taq mul kqanaʼ xibʼin ibʼ. Jun kʼutbʼal, are chiʼ ri qʼatal tzij Saúl xraj xukamisaj ri David, ri areʼ xanimaj bʼi pa ri tinamit Gat. Are chiʼ xkibʼij che ri qʼatal tzij Akís re Gat, che ri David are jun ajchʼoj che nim uchuqʼabʼ y che e ukamisam «lajuj mil» filisteos, ri David «xuxeʼj kʼu ribʼ» (1 Sam. 21:10-12). Xuxiʼj ribʼ rumal ri kʼax che weneʼ kbʼan che rumal ri qʼatal tzij Akís. ¿Jas xubʼan ri David rech xuxiʼj ta chi ribʼ? Pa Salmo 56, ri David xuya ubʼixik ri xunaʼo are chiʼ xkʼojiʼ pa ri tinamit Gat. Pa wajun salmo xubʼij ri rumal che xuxiʼj ribʼ y jas xtoʼw chuwach ri xibʼin ibʼ (Sal. 56:1-3, 11). Nim xtobʼan wi che che xukubʼsaj ukʼuʼx chrij ri Jehová. Rukʼ ri utobʼanik ri Jehová, weneʼ kqamay ri xuchaʼ ubʼanik ri David: xujaluj che xkonarik o xpayarik. ¡Y nim xtobʼan wi che! Ri qʼatal tzij Akís xuchomaj ta chi ukamisaxik ri David are chiʼ xuto che xkonarik. Rumal laʼ ri David xkunik xanimaj bʼik (1 Sam. 21:13-22:1). w24.01 2 párrs. 1-3

¿E jachin riʼ ri kubʼij ri texto re kimik? Are tajin kchʼaw chkij konojel ri e chaʼom che kebʼe pa ri kaj, ri nabʼe kkibʼano are che kechʼojin kukʼ ri ukʼulel ri Dios. Are chiʼ e kʼo chi pa ri kaj ketobʼan na rukʼ ri Cristo y kechʼojin na kukʼ ri ukʼulel ri Dios. Chojchoman chrij wariʼ: kʼi chke ri e chaʼom che kebʼe pa ri kaj che e kʼo na cho ri uwach Ulew e rijabʼ chik y kʼo ta chi kichuqʼabʼ. Are kʼu, are chiʼ e kʼo chi pa ri kaj, kkʼojiʼ na nim kichuqʼabʼ, kekam ta chik y ketobʼan na rukʼ ri Jesucristo pa ri chʼoj. Qastzij che rukʼ wariʼ más kekunik kekitoʼ ri upatanelabʼ ri Dios che e kʼo kan cho ri uwach Ulew. w24.02 6, 7 párrs. 15, 16

Jujun winaq kekun chik kkijach ri kikʼaslemal che ri Jehová y kkibʼan kiqasanjaʼ, are kʼu kkaj taj kkibʼano. Weneʼ kkixiʼj kibʼ che kkibʼan jun makaj y kesax bʼi pa ri congregación. Are kʼu ri Biblia kubʼij che ri Jehová kuya na ri kajwataj chke ri upatanelabʼ rech kkibʼan ronojel ri kqaj chuwach (Col. 1:10). Rumal laʼ, qas chakubʼaʼ akʼuʼx che ri Jehová kuya ri chuqʼabʼ che kajwataj chawe rech kabʼan ri kqaj chuwach. Ri areʼ e kʼi e utoʼom (1 Cor. 10:13). Rumal laʼ xa e kebʼ oxibʼ ri keʼel bʼi pa ri congregación. Rukʼ ri utobʼanik ri Jehová kojkunik kqapatanij rukʼ sukʼilal. Rumal che oj ajmakibʼ taq winaq, qonojel jujun taq mul kqabʼan jun jastaq che utz taj (Sant. 1:14). Are kʼu, we kawilo che kʼo jun jastaq kubʼano che katqaj pa mak, at katchomanik we kaxutuj o kaxutuj taj; at katilow ri kawaj kabʼano y ri kawaj taj. Paneʼ jujun taq winaq kkibʼij che kojkun taj kqaxutuj ri itzel taq rayinik, are kʼu qastzij ta wariʼ. Kojkunik kqachajij ri kqanaʼo y ri kqabʼano. w24.03 5 párrs. 11, 12