Abril

Xekʼojiʼ upatanelabʼ ri Jehová ojer che xaq kʼateʼ xkiriq kʼax. Chojchomanampeʼ chrij ri Jacob. Ri utat xubʼij che che kkʼuliʼ rukʼ jun umiʼal ri Labán, jun rachalaxik che xuqujeʼ kupatanij ri Jehová. Y xubʼij che we knimanik ktewchiʼx rumal ri Jehová (Gén. 28:1-4). Rumal laʼ ri Jacob xbʼe rukʼ ri Labán che e kʼo kebʼ umiʼal, jun Lea ubʼiʼ y ri jun chik Raquel. Ri Jacob are más utz xril ri Raquel, ri kʼa majaʼ na. Are kʼu xchakun na siete junabʼ rukʼ ri Labán rech kkʼuliʼ rukʼ ri umiʼal (Gén. 29:18). Are kʼu je ta xel ri xraj, rumal che ri Labán are xuya ri Lea che rixoqil, ri nabʼeʼal. Are chiʼ qʼaxinaq chi jun semana ri Labán xuya ri Raquel che rixoqil ri Jacob, xaq xiw che kchakun chi na siete junabʼ rukʼ (Gén. 29:26, 27). Xaq xiw ta laʼ ri kʼax xubʼan ri Labán che ri Jacob, xaneʼ xubʼan chi nikʼaj kʼax che pa ri 20 junabʼ che xchakun rukʼ (Gén. 31:41, 42). w23.04 15 párr. 5

¿Jachin kojtoʼw che ukʼamik qabʼe y ukubʼsaxik qakʼuʼx? Are ri Jehová. Ri areʼ kraj che amaqʼel kojchʼaw rukʼ, rumal laʼ kubʼij wariʼ chqe: «Mitanabʼaʼ ri ichʼawem rukʼ Dios» (1 Tes. 5:17). Rumal laʼ, chqabʼij ronojel che y chqataʼ ri utobʼanik rech kukʼam qabʼe (Prov. 3:5, 6). Xuqujeʼ paneʼ kʼi mul kqabʼan qachʼawem che ri Jehová ri areʼ kkʼistaj ta ukʼuʼx che qatatabʼexik. Ri Jesús retaʼm che ri Jehová nim kril wi ri chʼawem. Rumal che xrilo che ri Jehová xuya chke ri upatanelabʼ ri xkitaʼ che junam rukʼ ri Ana, ri David, ri Elías y e nikʼaj chik (1 Sam. 1:10, 11, 20; 1 Rey. 19:4-6; Sal. 32:5). Rumal laʼ, ri Jesús xubʼij chke ri utijoxelabʼ che amaqʼel chkibʼanaʼ kichʼawem y kkitaʼ ri kajwataj chke (Mat. 7:7-11). w23.05 2 párrs. 1, 3

Ri kinimal kojol tabʼal toqʼobʼ Jehoiadá xuxibʼij ribʼ chuwach ri Jehová. Are chiʼ ri Atalía jun itzelalaj ixoq, ral ri Jezabel, xeʼukamisaj ri uwiʼ taq umam rech are kkanaj kan che qʼatal tzij pa Judá, ri Jehoiadá xukʼutu che kuxeʼj ribʼ chuwach ri Dios (2 Crón. 22:10, 11). Rumal che are chiʼ ri rixoqil ubʼiʼ, Jehosabeat, xrowaj kan jun chke ri uwiʼ umam ri Atalía, Jehoás ubʼiʼ, ri Jehoiadá xutoʼo. Rumal laʼ, xsach ta kiwach ri e qʼatal taq tzij che xepe pa ri ufamila ri David. Pa riʼ ri tiempo weneʼ más che 100 ujunabʼ chik ri Jehoiadá. Are kʼu xuxeʼj ta ribʼ che ri Atalía, rumal che más nim xril wi ri Jehová. Are chiʼ ri Jehoás siete ujunabʼ, ri Jehoiadá xukʼut chi jumul ri usukʼilal che ri Jehová rumal che xuchomaj ubʼanik jun jastaq. We ronojel utz kel chuwach ri xuchomaj ubʼanik, ri Jehoás jun chke ri rachalaxik ri David kux qʼatal tzij. Are kʼu we utz ta kel ri xuchomaj ubʼanik ri Jehoiadá weneʼ kkamisax. Rukʼ ri utobʼanik ri Jehová, utz xel ri xchomax ubʼanik. w23.06 17 párrs. 12, 13

Ri Nabucodonosor weneʼ xutaq ta ukamisaxik riʼ ri Daniel we ta xuchomaj che xa kbʼan kʼax che rumal. Are kʼu ri Daniel xubʼij che ri Nabucodonosor ri kraj kubʼij ri rachikʼ. ¿Jas xtoʼw ri Daniel rech xuxiʼj ta ribʼ che ri xukʼulmaj pa ronojel ri ukʼaslemal? Weneʼ ri xtoʼwik are ri utz kikʼutbʼal ri utat unan (Deut. 6:6-9). Ri Daniel xaq xiw ta retaʼm ri Diez Mandamientos che xyaʼ chke ri israelitas, xaneʼ xuqujeʼ retaʼm chrij ri jastaq che utz taj kkitijo (Lev. 11:4-8; Dan. 1:8, 11-13). Y retaʼm ri kkikʼulmaj ri keniman ta che ri Dios (Dan. 9:10, 11). Ronojel ri xukʼulmaj pa ri ukʼaslemal, xubʼano che más xukubʼsaj ukʼuʼx chrij ri Jehová y chkij ri ángeles (Dan. 2:19-24; 10:12, 18, 19). w23.08 3 párrs. 5, 6

Chojchʼaw chrij ri Rebeca. Are jun ixoq che kʼo nim unojibʼal, retaʼm jampaʼ kubʼan jujun jastaq y jampaʼ kkun taj (Gén. 24:58; 27:5-17). Are kʼu xuqujeʼ nim keril wi ri nikʼaj chik y knimanik (Gén. 24:17, 18, 65). We kabʼan awe junam rukʼ ri Rebeca, kamachʼ awibʼ y katniman chke ri yaʼom taqanik pa kiqʼabʼ rumal ri Jehová, at jun utz kʼutbʼal riʼ chke ri afamilia y che ri congregación. Rajawaxik che qonojel kqabʼan ta nimal. Ri Ester xux sukʼ chuwach ri Dios y xubʼan ta nimal. Jun kʼutbʼal, are chiʼ xux reina, xunimarisaj ta ribʼ. Y amaqʼel xniman che ri pixabʼ che xyaʼ che rumal ri Mardoqueo ri uprimo (Est. 2:10, 20, 22). At xuqujeʼ katkunik kawesaj uwach are chiʼ kabʼan ri pixabʼ che kyaʼ chawe (Tito 2:3-5). Chqilaʼ jun chi kʼutbʼal are chiʼ ri Ester xubʼan ta nim che ribʼ. Ri areʼ «sibʼalaj jeʼlik xuqujeʼ sibʼalaj jeʼl ubʼantajik», are kʼu xraj taj che nim xil wi (Est. 2:7, 15). w23.12 19, 20 párrs. 6-8

Are chiʼ kqabʼan jun makaj kojbʼison rumal, are kʼu we xaq are kojchoman chrij ri xqabʼano kux jun nimalaj eqaʼn chqe. We qabʼim chi che ri Jehová ri makaj che xqabʼano y xqaya kan ubʼanik, qas chqakojoʼ che ri Jehová ukuyum chi qamak (Hech. 3:19). Are chiʼ qabʼanom chi wariʼ, ri Jehová kraj taj che kojchoman na chrij rumal che xa kubʼan kʼax chqe (Sal. 31:10). We kqayaʼo che ri bʼis kresaj qachuqʼabʼ weneʼ nojimal kqaya kan utijik anim pa ri bʼe che kojukʼam bʼi pa ri kʼaslemal che kʼo ta ukʼisik (2 Cor. 2:7). We kanaʼo che kuyum ta ri amak chatchoman chrij ri «kuyubʼal makaj» che kuya ri Dios (Sal. 130:4). Are chiʼ jun winaq kuya kan ubʼanik ri makaj, ri Jehová kutzujuj wariʼ: «Kenaʼtaj ta chi kʼut chwe ri kimak ri kibʼanom» (Jer. 31:34). Wariʼ kraj kubʼij che, are chiʼ ri Dios kukuy umak jun winaq knaʼtaj ta chi che. Y we kyaʼ ta chi nijun eqeleʼn chawe pa ri congregación, katbʼison taj. Ri Jehová knaʼtaj ta chi che ri makaj che xabʼano..., ¿utz we je kabʼan at? w23.08 30, 31 párrs. 14, 15

Are chiʼ xmajtaj ri pandemia re ri COVID-19 kʼi molom taq tzij xbʼixik. Are kʼu ri testigos rech Jehová che xkinimaj ri xubʼij ri utinamit ri Jehová y xsach ta kikʼuʼx rumal che xkitatabʼej ta ri molom taq tzij che kkibʼij ri winaq (Mat. 24:45). Ksach ta chqe «jas ri qas utz na ubʼanik» (Filip. 1:9, 10). E kʼo kʼi jastaq kresaj qatiempo we kqachajij ta qibʼ. Junam rukʼ ri kqatij ronojel qʼij, ri qachak y ri etzʼanem (Luc. 21:34, 35). Xuqujeʼ kresaj qatiempo utatabʼexik o rilik ri chʼoj che kkibʼan ri winaq pa ri tinamit o ri política. Rumal laʼ, rajawaxik kqachajij qibʼ chuwach ri jastaq riʼ. We man kqachajij qibʼ, weneʼ kqanaʼ taj tajin kqatoʼ kiwiʼ pa qanimaʼ. Are waʼ ri kukoj ri Satanás rech ko ta kojtakʼiʼ pa ri qakojonik. w23.07 16, 17 párrs. 12, 13

Sibʼalaj nim ubʼanik chkiwach ri upatanelabʼ ri Jehová ri Unaʼtabʼalil ri ukamikal ri Jesús. Are waʼ ri xubʼij ri Jesús che knatajisaxik (Luc. 22:19, 20). Kunaʼtajisaj chqe ri kojkunik kqabʼano rech kqamaltyoxij che ri Jesús che xuya ri ukʼaslemal rumal qech (2 Cor. 5:14, 15). Xuqujeʼ kojutoʼo rech kojkʼojiʼ kukʼ ri qachalal y kqaya qachuqʼabʼ chbʼil taq qibʼ (Rom. 1:12). Y jujun taq winaq sibʼalaj kkimay ri kkilo y kkito rumal laʼ kkaj kkimajij jun etaʼmanik chrij ri Biblia. Xuqujeʼ ri Unaʼtabʼalil ri ukamikal ri Jesús kojuto rech kkʼojiʼ junamil chqaxoʼl. Qastzij che wariʼ kubʼano che nim ubʼanik chqawach. w24.01 8 párrs. 1-3

Are chiʼ kojchoman chrij ri xubʼan ri Jehová xuqujeʼ ri ukʼojol pa qawiʼ, wariʼ kukʼut chqawach che sibʼalaj kojkiloqʼoqʼej (Gál. 2:20). Ri Jehová xa ta xtaqchiʼx che uyaʼik ri ukʼojol, xaneʼ xubʼan wariʼ rumal che kunaʼ loqʼoqʼenik chqe. Xukʼut ri uloqʼoqʼebʼal are chiʼ xuya bʼe che xkamisax ri ukʼojol rumal ri qamak. Ri Jehová xaq xiw ta kunaʼ loqʼoqʼebʼal chqe, xaneʼ kuya ubʼixik chqe (Jer. 31:3). Uyaʼom bʼe che oj kʼo pa ri utinamit rumal che kojuloqʼoqʼej (chajunamisaj rukʼ Deuteronomio 7:7, 8). Man kʼo ta jun jastaq kubʼano che ri Jehová man kunaʼ ta chi loqʼoqʼebʼal chqe (Rom. 8:38, 39). ¿Jas kanaʼo are chiʼ katchoman chrij wariʼ? w24.01 28 párrs. 10, 11

Ri cristianos che kebʼe pa ri kaj sibʼalaj kekikot rukʼ ri keyebʼal. Are waʼ ri xunaʼ ri qachalal Frederick Franz pa ri junabʼ 1991 che rukʼ ronojel ranimaʼ xubʼij wariʼ: «Ri qeyebʼal qastzij kbʼan taj na, qonojel ri oj 144,000 y kojkun ta che uchomaxik are chiʼ qas ktzʼaqatik». ¿Jas xunaʼ ri qachalal Franz che rukʼ sukʼilal xupatanij ri Dios pa kʼi taq junabʼ? Ri areʼ xubʼij wariʼ: «Amaqʼel kqachomaj che wajun eyebʼal riʼ nim ubʼanik nim kqil wi paneʼ kqeyej na pa kʼi taq junabʼ». Qonojel kʼo jun qeyebʼal weneʼ pa ri kaj o cho ri uwach Ulew. Y ri qeyebʼal che kʼolik knimar más ronojel taq qʼij. w23.12 9 párr. 6; 10 párr. 8

Chuwach ri tabernáculo kʼo jun altar che bʼanom che cobre ri keporox wi ri awaj che tabʼal toqʼobʼ che ri Jehová (Éx. 27:1, 2; 40:29). Are kʼu ri tabʼal toqʼobʼ riʼ kkun ta che usachik ronojel ri kimak ri winaq (Heb. 10:1-3). Ri awaj che keya che tabʼal toqʼobʼ pa ri tabernáculo ojer, kukʼutunisaj ri tabʼal toqʼobʼ che kyaʼ na rech kusachisaj ri kimak ri winaq re ronojel ri uwach Ulew. Ri Jesús retaʼm che xtaq lo rumal ri Jehová cho ri uwach Ulew rech kuya ri ukʼaslemal pa kiwiʼ ri winaq (Mat. 20:28). Rumal laʼ, are chiʼ ri Jesús xubʼan uqasanjaʼ xukʼutu che kraj kubʼan ri urayibʼal ri Jehová (Juan 6:38; Gál. 1:4). Ri Jesús xuya ri ukʼaslemal «xa jumul chbʼe qʼij saq» rech kkuyutaj ri kimak ri winaq che kekojon chrij (Heb. 10:5-7, 10). w23.10 26, 27 párrs. 10, 11

Kojkun taj xaq qatukel kojel chuxeʼ ri kamikal y ri makaj (Sal. 49:7, 8). Rumal laʼ ri Jehová xuya ri ukʼaslemal ri Jesús rumal qech, ri e kebʼ nim xkitojbʼej wi. Are chiʼ más kojchoman chrij ri xkibʼan ri Jehová y ri Jesús pa qawiʼ, más nim kqil wi ri tojbʼal mak. Ri nabʼe achi Adán, tzʼaqat are chiʼ xbʼanik. Are kʼu, are chiʼ xmakunik wariʼ xubʼano che xkamik y xuqʼaxej kan ri kamikal chke ri ralkʼwal. Rech kriqitaj chi jumul ri xsachik, ri Jesús rajawaxik xuya ri tzʼaqatalaj ukʼaslemal. Are chiʼ ri Jesús xkʼojiʼ cho ri uwach Ulew, «man kʼo ta mak xubʼano, mawi ne xriq taj subʼunik pa uchiʼ» (1 Ped. 2:22). Tzʼaqat ri ukʼaslemal are chiʼ xkamik, rumal laʼ kjunamataj rukʼ ri kʼaslemal che xutzaq ri Adán (1 Cor. 15:45; 1 Tim. 2:6). w24.01 10 párrs. 5, 6

Are chiʼ xkʼastajisax ri Jesús, xok pa ri Santísimo re ri templo espiritual. Qastzij che más nim ubʼanik ronojel ri ubʼanom ri Jehová rech kqʼijilaxik junam rukʼ ri kraj ri areʼ, che kʼo ubʼanik rukʼ ri ukamikal ri Jesús y ri chak che kubʼano re jun kinimal kojol tabʼal toqʼobʼ. Ri kinimal kojol tabʼal toqʼobʼ kok bʼi pa ri Santísimo che bʼanom kumal winaq y rukʼam bʼi ri kikikʼel ri awaj. Are kʼu ri Jesús xok bʼi pa ri lugar che más santo: «pa ri kaj», chuwach ri Jehová. Chilaʼ xujach wi che ri Jehová ri tzʼaqatalaj ukʼaslemal che xuya che tojbʼal mak chke konojel ri winaq «che usachik ri makaj» (Heb. 9:24-26). Qonojel kojkunik kqaqʼijilaj ri Jehová pa ri templo espiritual, paneʼ pa ri kaj o cho ri uwach Ulew kojkʼasiʼ wi. w23.10 28 párrs. 13, 14

Chojchoman chrij ri nimalaj chak che kubʼan ri Jesús are chiʼ Qʼatal tzij y Kinimal kojol tabʼal toqʼobʼ chik. Rumal ri Jesús kojkunik kqabʼan qachʼawem rech kojqebʼ «chuwach ri tem re ajawbʼal rech ri utoqʼobʼ ri Dios» rech kutoqʼobʼisaj qawach y kojutoʼ «pa ri qʼij ri rajawaxik na chqe» (Heb. 4:14, 15). Amaqʼel chojchoman chrij ri kibʼanom ri Jehová y ri Jesús pa qawiʼ y ri tajin kkibʼan kimik. Ri loqʼoqʼebʼal che kkinaʼ chqe kubʼano che kqapatanij más ri Jehová rukʼ ronojel qanimaʼ (2 Cor. 5:14, 15). Jun chik che kqabʼano rech kqakʼut maltyoxinik are che kqakoj qachuqʼabʼ che kitoʼik ri winaq rech keʼux testigos rech Jehová y rech keʼux utijoxelabʼ ri Jesús (Mat. 28:19, 20). Are laʼ ri xubʼan ri apóstol Pablo. Ri areʼ retaʼm che ri urayibʼal ri Jehová are «chi kekolotaj ri winaq chi nimalaj konojel, xuqujeʼ chi kketaʼmaj ri qastzij» (1 Tim. 2: 3, 4). w23.10 22, 23 párrs. 13, 14

Kʼi taq mul kqakoj waʼ taq versículos riʼ are chiʼ kqatzijoj ri utzij ri Dios chke ri winaq y kqabʼij chke jas ubʼanik ri kʼaslemal pa ri kʼakʼ uwach Ulew. Rumal laʼ, ¿jas kqabʼan che kitoʼik ri winaq rech qas kkikojo che ktzʼaqat na ri kubʼij Apocalipsis 21:3, 4? ¿Y jas más kqabʼan oj che ukubʼsaxik qakʼuʼx chrij ri utzujum ri Jehová? Ri Jehová qas xuya ubʼixik chrij wajun jeʼlikalaj tzujunik riʼ y xubʼano che qas kqakubʼsaj qakʼuʼx chrij ri utzujum. Pa ri versículos che kqil na kukʼut chqawach che kojkunik kqakubʼsaj qakʼuʼx che qas kbʼantaj na ri tajin kutzujuj ri Jehová pa ri kotzʼiʼjalaj uwach Ulew. Chilaʼ kqasikʼij: «Chawilampeʼ, kinbʼan kʼakʼ chke konojel ri jastaq». Tekʼuriʼ xubʼij chwe: «Chatzʼibʼaj rumal rech chi e jik xuqujeʼ qastzij we tzij riʼ». Tekʼuriʼ xubʼij chwe: «Xbʼantajik. In riʼ ri nabʼe xuqujeʼ ri kʼisbʼal, ri tikitajik xuqujeʼ ri kʼistajik» (Apoc. 21:5, 6a). w23.11 3 párrs. 3-5

Jun qachalal ala kukʼutu che retaʼm ri kuchomaj ri Jehová, rukʼ ri kubʼan che uxiyik ri uwiʼ o ratzʼyaqixik ribʼ. Ri winaq che kebʼanow ri atzʼyaq che kʼo kimik nim ta kkil ri Jehová y kʼo jun itzel kichomanik. Ri atzʼyaq che kkibʼano sibʼalaj latzʼ chke ri achijabʼ y kilitajik che e jetaneʼ ixoqibʼ. Jun qachalal ala che tajin kukoj uchuqʼabʼ rech kux ko pa ri ukojonik, nabʼe kchoman riʼ chrij ri kubʼij ri Biblia y chkij ri qachalal che nim kikojonik che e kʼo pa ri congregación are chiʼ kusukʼumaj ribʼ. Chatchoman chrij wajun pregunta riʼ: «¿La kinkʼutu che kʼo nunojibʼal rukʼ ri kinchaʼ ubʼanik y che nim kewil wi ri nikʼaj chik? ¿La kinkʼut rukʼ ri watzʼyaq che in testigo rech Jehová?» (1 Cor. 10:31-33). Ri qachalal alabʼom che kkikoj ri kinojibʼal nim keʼil wi kumal ri qachalal y ri Jehová. w23.12 26 párr. 7

Ojer kanoq, ri qʼatal tzij re ri sur xuqujeʼ xubʼan kʼax chke ri upatanelabʼ ri Jehová (Dan. 11:40). Pa unikʼajil ri siglo veinte e kʼi qachalal xetzʼapix pa cárcel y e kʼi akʼalabʼ xeʼesax lo pa ri escuelas rumal che xaq xiw xkitoʼ uwiʼ ri uQʼatbʼal tzij ri Jehová. Are kʼu pa ri kʼisbʼal taq junabʼ, rumal che ri testigos rech Jehová kkitoʼ uwiʼ ri uQʼatbʼal tzij ri Dios kiriqom nikʼaj chi kʼax. Chojchoman chrij are chiʼ ri winaq kkichaʼ jun qʼatal tzij. Paneʼ ri cristiano kbʼe ta pa votaciones, are kʼu weneʼ pa ranimaʼ kraj che kchʼakan jun chke. Rech xaq xiw kqatoʼ uwiʼ ri uQʼatbʼal tzij ri Dios, rajawaxik kojchoman chrij ri kqanaʼo, ri kqabʼano y ri kqachomaj rech kqatoʼ ta kiwiʼ ri qʼatal taq tzij re wajun uwach Ulew riʼ (Juan 15:18, 19). w23.08 12 párr. 17

Rech kqariq ri kʼaslemal che kʼo ta ukʼisik, utz che kojchoman chrij wariʼ: «Chikojoʼ ichuqʼabʼ rech kiriq na ri tojbʼal» (1 Cor. 9:24). Ri Jesús xubʼij: «Miwalobʼisaj ri iwanimaʼ chupam ri munil, mixqʼabʼarik, mixok il che ri jastaq re we kʼaslemal riʼ» (Luc. 21:34). Wajun texto riʼ y nikʼaj chik kojutoʼo rech kqetaʼmaj jas rajawaxik kqabʼano rech kqaya ta kan utijik anim y kqariq ri kʼaslemal che kʼo ta ukʼisik. Qas qetaʼm che kqariq ri kʼaslemal che kʼo ta ukʼisik, rumal che ri Jehová kojutoʼ che uriqik (Is. 40:29-31). Rumal laʼ mubʼan kebʼ akʼuʼx. Chabʼanaʼ awe junam rukʼ ri Pablo, che xukoj uchuqʼabʼ y xtewchix rumal ri Dios (Filip. 3:13, 14). Kʼo ta nijun winaq kattoʼwik rech kariq ri kʼaslemal che kʼo ta ukʼisik, are kʼu rukʼ ri utobʼanik ri Jehová katkunik kariqo. Ri Jehová katutoʼ che rukʼaxik ri aweqaʼn y katutoʼ che uyaʼik kan ri kuya ta tobʼanik chawe pa ri akojonik. Rukʼ ri utobʼanik ri Jehová, katkunik kaya ta kan utijik anim pa ri bʼe che katukʼam bʼi pa ri kʼaslemal che kʼo ta ukʼisik. w23.08 31 párrs. 16, 17

Chqilampeʼ ri xukʼulmaj ri Jesús are chiʼ kʼateʼ kʼo 12 ujunabʼ, xbʼe kukʼ ri ufamilia pa Jerusalén che ubʼanik ri nimaqʼij (Luc.2:46-52). Are chiʼ ri José y María xetzalij lo cho kachoch xkil taj che ri Jesús xkanaj kanoq. Rajawaxik riʼ kkilo we konojel ri e kalkʼwal e teren chkij. Are chiʼ xekiriqa, ¡ri María xubʼij che utz ta ri xubʼano che xutas kan ribʼ! Ri Jesús xkun riʼ wet xubʼij che che qastzij ta ri tajin kubʼij ri María che, are kʼu xubʼij ta wariʼ. Xaneʼ rukʼ utzilal xubʼij chke ri rumal che xkanaj kanoq. Are kʼu ri José y María «man xkichʼobʼ ta ri tzij ri xubʼij chke». Paneʼ je wariʼ ri Jesús xuya «ribʼ pa taqik chke». Ala ali are chiʼ ri atat anan utz ta ri kkibʼano o kkichʼobʼ ta ri kabʼano, ¿la kʼax kabʼan che kinimaxik? ¿Jas kattowik? Chatchoman chrij ri kunaʼ ri Jehová. Ri Biblia kubʼij che we ri akʼalabʼ keniman chke ri kitat kinan, «kqaj chuwach ri Ajawaxel» (Col. 3:20). Are chiʼ ri atat anan kkichʼobʼ ta ri kanaʼo o kkiya taqanik chawe che kʼax ubʼanik, chnaʼtaj chawe che ri Jehová kuchʼobʼ ri kanaʼo. Are kʼu, paneʼ ri atat anan kkichʼobʼ ta ri kanaʼo o kʼi taq mul kesachik, we katniman chke ri Jehová sibʼalaj kkikot awukʼ. w23.10 7 párrs. 5, 6

Weneʼ jun qachiʼl pa ri escuela kubʼij chqe che ri testigos rech Jehová rajawaxik che kʼax ta kojchʼaw chkij ri homosexuales. Utz che kqabʼij che che nim keqil wi konojel ri winaq y che are kechaʼow ri kkaj kkibʼano (1 Ped. 2:17). Weneʼ wariʼ kuya bʼe che kqaqʼalajisaj chuwach, jasche are kqabʼan ri kubʼij ri Biblia. We kʼo jun winaq che utz ta kril ri qakojonik y rukʼ oyowal kubʼij chqe ri kuchomaj, utz taj che kqabʼilaʼ tzij che y kqachomaj che qetaʼm ri kuchomaj. Chachomajampeʼ che jun awachiʼl pa ri escuela, kubʼij chawe che xa katchoman taj rumal che katkojon chrij ri Dios. ¿La aninaq kachomaj che kkojon chrij ri evolución y che kʼo kʼi retaʼmabʼal chrij? Weneʼ ri winaq are ta tajin kchoman chrij ri evolución. Weneʼ katkunik kataq bʼi jun enlace che re jun kʼutunem o video re jw.org che kchʼaw chrij ronojel ri ubʼanom ri Dios. Weneʼ je wariʼ kraj ktzijon awukʼ chrij ri xretaʼmaj. We kattzijon rukʼ y kakoj utz taq tzij weneʼ kubʼano che kukʼex ri uchomanik. w23.09 17 párrs. 12, 13

Paneʼ xqabʼan jun makaj, are kʼu wariʼ kraj ta kubʼij che kʼo ta chi qapatan chuwach ri Jehová, xaneʼ kojutewchij na are chiʼ kqaya kan ri qamak y amaqʼel kqatzukuj ri utobʼanik (Prov. 28:13). Ri Sansón jujun taq mul utz ta ri xuchaʼ ubʼanik, junam rukʼ are chiʼ xubʼij che ri Dalila jawchiʼ kpe wi ri uchuqʼabʼ y che rumal wariʼ xuriq kʼax, are kʼu xubʼan ta kebʼ ukʼuʼx. Ri Jehová xuya ta kanoq xaneʼ xukojo rech xtzʼaqat ri uchomam ubʼanik. Ri Jehová xrilo che ri Sansón kʼo nim ukojonik, rumal laʼ xuyaʼo che xtzʼibʼax ri ubʼiʼ chkixoʼl ri sukʼalaj taq upatanelabʼ che kʼo pa ri capítulo 11 re Hebreos. Kukubʼsaj qakʼuʼx retaʼmaxik che ri Jehová kojraj y che kraj kuyaʼ qachuqʼabʼ are chiʼ kqariq kʼax pa ri qakʼaslemal. Rumal laʼ chqesaj uwach ri Sansón y chqabʼij che ri Jehová: «Kintzʼonoj toqʼobʼ che la Ajawaxel, chi chinnaʼtaj che la xuwi ta chi ne jumul, chyaʼ kʼu la nuchuqʼabʼ» (Juec. 16:28). w23.09 7 párrs. 18, 19

Rumal che naqaj chi kʼo wi ri uqʼij ri Jehová. Kqaj kqakʼut chkiwach ri winaq chrij ri uQʼatbʼal tzij ri Dios. Are kʼu weneʼ jujun taq mul kqaxiʼj qibʼ kojtzijonik. ¿Jasche? Rumal che kqaxiʼj qibʼ chkiwach ri winaq. Are waʼ ri xukʼulmaj ri Pedro pa ri chaqʼabʼ che xqʼat tzij puwiʼ ri Jesús. Xubʼij taj che are jun chke ri utijoxelabʼ are chiʼ xtaʼ che y xa ta jumul xubʼij che kuchʼobʼ ta uwach ri Jesús (Mat. 26:69-75). Are chiʼ xqʼax ri tiempo xuxiʼj ta chi ribʼ y xubʼij wariʼ: «Mixeʼj kʼu iwibʼ chkiwach ri xibʼibʼal taq jastaq ri kkibʼano, maqʼoxow ri iwanimaʼ» (1 Ped. 3:14). Ri xubʼij ri Pedro kojutoʼo rech kqaxiʼj ta qibʼ chkiwach ri winaq. ¿Jas kojtoʼwik rech kqaxiʼj ta qibʼ chkiwach ri winaq? Ri Pedro kubʼij wariʼ: «Are kʼu chikojoʼ ri Cristo che taqanel xuqujeʼ che Ajawaxel chupam ri iwanimaʼ» (1 Ped. 3:15). Rech kojkunik kqabʼan wariʼ rajawaxik kojchoman chrij ri chuqʼabʼ che kʼo pa uqʼabʼ ri Jesús, ri Qʼatal tzij. w23.09 27, 28 párrs. 6-8

Oj xuqujeʼ rajawaxik kqachajij qibʼ rech kqabʼan ta «ri jastaq ri man kʼo ta kechbʼex chke; ri kkibʼan ri winaq ri e kʼo pa ri qʼequʼm» (Efes. 5:11). Qastzij che are chiʼ jun winaq kuya ta kan rilik o utaʼik itzel taq jastaq o inmoralidad sexual, o kchʼaw ne chrij, weneʼ wariʼ kubʼano che kqaj pa jun makaj (Gén. 3:6; Sant. 1:14, 15). Jun chke ri kubʼan ri Satanás are che kusach ri kichomanik ri winaq rech kkil taj jas riʼ ri utz y ri utz taj (Is. 5:20; 2 Cor. 4:4). Rumal laʼ, kqamay taj che ri winaq pa wajun uwach Ulew riʼ kkaj kkikʼex ri qachomanik y kkaj kqachomaj che ri tzʼil taq jastaq y ri inmoralidad sexual kʼo ta kubʼano (2 Ped. 2:19). Rumal laʼ e kʼo películas, programas re televisión y sitios pa internet che kʼo jastaq chupam che utz ta kril ri Jehová. Ri Satanás kraj che kqachomaj che ronojel ri jastaq che kkibʼan ri winaq pa ri uwach Ulew kʼo ta kubʼano (Efes. 5:6). w24.03 22 párrs. 8-10

Ri tabernáculo, che xuqujeʼ kbʼix «likʼom Rachoch Dios re riqoj ibʼ» che, are ri kʼolbʼal che xkikoj ri israelitas che uyaʼik uqʼij ri Dios y ri kkiya wi tabʼal toqʼobʼ (Éx. 29:43-46). Amaqʼel kkikʼam bʼik are chiʼ kebʼe pa jun chi lugar (Éx. 25:8, 9; Núm. 9:22). Más che 500 junabʼ xkikoj che uqʼijilaxik ri Jehová kʼa xbʼan na ri templo pa Jerusalén. Ri tabernáculo xuqujeʼ xukʼutunisaj jun qʼijilanik che más nim na ubʼanik che kkibʼan ri cristianos. Ri tabernáculo «xa e uwachbʼal xuqujeʼ e umuʼjal ri kʼo chikaj» y xukʼutunisaj ri templo espiritual re ri Jehová. Ri apóstol Pablo xubʼij che ri tabernáculo are xa jun kʼutbʼal che ri kpe na (Heb. 9:9). Rumal laʼ, are chiʼ xutzʼibʼaj wariʼ chke ri cristianos hebreos, ri templo espiritual ya kʼo chi pa ri tiempo riʼ. Wariʼ xmajtaj pa ri junabʼ 29 are chiʼ ri Jesús xubʼan uqasanjaʼ y xchaʼ rumal ri uxlabʼixel rech kux ri «nimalaj kinimal ri kojol tabʼal toqʼobʼ» pa ri templo espiritual (Heb. 4:14; Hech. 10:37, 38). w23.10 25, 26 párrs. 6, 7

Rech kojkʼiy pa ri qakojonik jetaneʼ rajawaxik kqaqʼoch qibʼ, kraj kubʼij che rajawaxik kkʼojiʼ jun utz qachomanik chuwach apachike jastaq che kkʼextaj pa ri qakʼaslemal. Nim kqil ri kkichomaj ri nikʼaj chik y ri kichaʼ ubʼanik. Qonojel ri kqapatanij ri Jehová rajawaxik utz kojchomanik, kojmachʼachʼik y kqatoqʼobʼisaj wachaj. Ri Biblia kubʼij che ri Jehová «are toʼl qech» rumal che ko y kʼo ta jun ksalabʼanik (Deut. 32:4). Are kʼu xuqujeʼ utz kchomanik. Rumal che ukʼexom jujun jastaq rech kbʼantaj ri uchomam lo ubʼanik. Rumal che ri Jehová xojubʼan junam rukʼ ri areʼ ri oj xuqujeʼ nojimal kkʼaman chqe ri kkʼextaj pa ri qakʼaslemal. Ri Jehová uyaʼom pixabʼ re ri Biblia rech utz ri kqachaʼ ubʼanik chuwach apachike kʼax che kqariqo. Rumal ri kubʼan chuwach jujun jastaq y ri pixabʼ che uyaʼom kukʼutu che are jun Dios che ko ktakʼik y utz kchomanik. w23.07 20 párrs. 1-3

Ri Biblia kujunamaj ri Jehová rukʼ jun nan che kuloqʼoqʼej ri alaj ral (Is. 66:12, 13). Chatchoman chrij jun nan che rukʼ loqʼoqʼebʼal kuchajij ri alaj ral y kuya ronojel ri kajwataj che. Kjunamataj rukʼ wariʼ, are chiʼ kqanaʼ bʼis ri Jehová aninaq kojutoʼo. Ri areʼ kuya ta kan qaloqʼoqʼexik paneʼ kʼi kojsach wi (Sal. 103:8). Kʼi mul ri israelitas xeniman ta che ri Jehová; are kʼu, are chiʼ xkikʼex ri kibʼantajik, ri Jehová xukʼut chkiwach che uyaʼom ta kan kiloqʼoqʼexik. Jumul xubʼij wariʼ che ri tinamit: «Loqʼ katinwil wi, nim awajil, in katinwaj» (Is. 43:4, 5). Ri Jehová ukʼexom ta ri ubʼantajik. Paneʼ kqabʼan jun makaj, ri areʼ man kojuya ta kanoq we kqaya kan ubʼanik ri makaj ri areʼ kuya ta kan qaloqʼoqʼexik. Areʼ kubʼij chqe che oj reyem che ukuyik qamak (Is. 55:7). Ri Biblia kubʼij chqe, che are chiʼ ri Jehová kukuy qamak, kubʼano che «keʼutaq uloq taq qʼijol re jamaril» (Hech. 3:19). w24.01 27 párrs. 4, 5

Ri Jehová kkunik kojutoʼo are chiʼ kqariq kʼax. Jun kʼutbʼal, weneʼ kqataʼ che ri qapatrón che kuya bʼe chqe rech kojbʼe pa ri nim riqbʼal ibʼ o che kuya chqe che kqakʼex ri hora re ri qachak rech kojkunik kojbʼe pa ri qariqbʼal ibʼ. Ri Jehová kojutoʼo are chiʼ kqakʼulmaj wariʼ, weneʼ kqamay ri kubʼan che qatoʼik y wariʼ kubʼano che más kqakubʼsaj qakʼuʼx chrij. Ri Esdras xux jun machʼalik achi y xutaʼ ri utobʼanik ri Jehová. Are chiʼ kunaʼo che kkun ta che ubʼanik ri eqeleʼn che yaʼom che, amaqʼel kutaʼ che ri Jehová pa chʼawem rech ktoʼ rumal (Esd. 8:21-23; 9:3-5). Jujun are chiʼ xkilo che ri Esdras amaqʼel xukubʼsaj ukʼuʼx chrij ri Dios, xkitoʼo y xkibʼan ke junam rukʼ ri xubʼano (Esd. 10:1-4). Are chiʼ kojbʼison chrij ri kajwataj chqe o ri kʼax che kkiriq ri qafamilia y weneʼ kok ta chi qawaram rumal, rajawaxik kqabʼan qachʼawem che ri Jehová rech kojutoʼo. w23.11 18 párrs. 15-17

Are chiʼ ri Jehová kubʼij che kqesaj uwach ri Abrahán rech kojux sukʼ chuwach ri Dios, kraj taj kubʼij che kqabʼan ronojel jas ri xubʼan ri areʼ. Kʼo kʼi kqabʼan che ukʼutik che kʼo qakojonik. Utz kikʼulaxik ri qachalal kqabʼano che kʼateʼ keʼopan pa ri congregación, keqatoʼ ri qachalal che kʼo kirajawaxik y keqatoʼ ri qafamilia. Ronojel wariʼ sibʼalaj utz kril ri Jehová (Rom. 15:7; 1 Tim. 5:4, 8; 1 Juan 3:18). Jun che kojkunik kqabʼano rech kqakʼutu che kʼo qakojonik are utzijoxik ri utzij ri Dios chke ri winaq (1 Tim. 4:16). Qonojel kojkunik kqakʼut rukʼ ri kqabʼano che qas kqakubʼsaj qakʼuʼx che ri Dios kubʼan na ri kubʼij y che ronojel ri kubʼano sibʼalaj utz. We kqabʼan wariʼ ri Dios kubʼij na riʼ che oj sukʼ y kojux rachiʼl. w23.12 2 párr. 3; 6 párr. 15

Ri qʼatal tzij David xubʼij ri e tzij che kʼateʼ xqasikʼij che ri Salomón are chiʼ xa jubʼiqʼ chi kraj kkamik (1 Rey. 2:1, 3). Utz che konojel ri alabʼom che kkipatanij ri Jehová kkibʼan wajun pixabʼ riʼ. Rech kekikot che upatanixik ri Jehová rajawaxik keniman che ri utaqanik y kkibʼan pa ronojel ri kikʼaslemal (Luc. 2:52). ¿Jasche nim ubʼanik che ri alabʼom rajawaxik kkʼojiʼ jun ko kikojonik? Rumal che ri alabʼom kʼo kʼi kekunik kkibʼan pa ri kifamilia y pa ri congregación. We at ala qastzij riʼ che kawaj kyaʼ jun eqeleʼn chawe pa ri petinaq. Weneʼ kawaj katux precursor, aj tobʼanel y pa ri petinaq katux kʼamal bʼe. Xuqujeʼ weneʼ kawaj katkʼulik y kekʼojiʼ awalkʼwal (Efes. 6:4; 1 Tim. 3:1). Rech katkunik kabʼan wariʼ y katkikotik, rajawaxik kʼo jun ko akojonik. w23.12 24 párrs. 1, 2

Ri Jehová uyaʼom chke ri kʼamal taq bʼe re ri congregación che kekichajij ri qachalal. Rumal laʼ, ri e areʼ nim kkil wi wajun eqeleʼn riʼ y kkikoj kichuqʼabʼ che kichajixik ri e qachalal (Jer. 23:4; 1 Ped. 5:2). ¡Sibʼalaj kojkikotik che e kʼo kʼamal taq bʼe pa ri congregaciones! Ri kʼamal taq bʼe kʼo kʼi kketaʼmaj chrij ri qʼatal tzij Gedeón (Heb. 6:12). Ri Gedeón xuchajij y xukʼam ubʼe ri utinamit ri Dios (Juec. 2:16; 1 Crón. 17:6). Xuqujeʼ yaʼom ri eqeleʼn chke ri kʼamal taq bʼe kimik che kkichajij ri upatanelabʼ ri Dios pa we kʼaxalaj taq qʼij che oj kʼo wi (Hech. 20:28; 2 Tim. 3:1). Kʼo kʼi kqetaʼmaj chrij ri Gedeón, rumal che ri areʼ xuchʼobʼo jas ri kkun ta che ubʼanik, xmachʼachʼik, xnimanik y xkʼojiʼ ukowil ukʼuʼx. Xuqujeʼ, ri ukʼutbʼal keʼutoʼ ri congregaciones rech nim kkil ri chak che kkibʼan ri kʼamal taq bʼe y kkiya ri kitobʼanik chke rukʼ ronojel kanimaʼ (Heb. 13:17). w23.06 2 párr. 1; 3 párr. 3