Marzo

Majaʼ ktzʼaqat ri utzujum ri Jehová, are kʼu chojchoman chrij ri e jastaq che kojkunik kqilo, ri e chʼumil, ri e cheʼ, ri e awaj y ri e winaq. Paneʼ ri e jastaq riʼ kʼateʼ xebʼanik, are kʼu kʼo ta jun winaq kubʼij che mat e kʼolik rumal che are ri Jehová xebʼanowik y e kʼo chi kimik (Gén. 1:1, 26, 27). Ri Jehová utzujum jun kʼakʼ uwach Ulew chqe, y qas kubʼan wi na. Kqariq jun kʼaslemal che kʼo ta ukʼisik y kojyawaj ta chik. Are chiʼ oj kʼo chi pa ri kʼakʼ uwach Ulew qas kqil riʼ che xubʼan ri xutzujuj ri Jehová (Is. 65:17; Apoc. 21:3, 4). Rech kqeyej ri kʼakʼ uwach Ulew, maqayaʼ kan ukowirisaxik ri qakojonik. Chojchoman chrij ri xubʼan ri Jesús pa qawiʼ, ri uchuqʼabʼ ri Jehová y chojok il che upatanixik ri Jehová. We kqabʼan ronojel wariʼ oj jun riʼ chkixoʼl «ri winaq ri kʼo kikojonik, kkichʼij kʼu ri kʼax, kkechbʼej kʼu ri ubʼim ri Dios chi kuyaʼ na chke» (Heb. 6:11, 12). w23.04 31 párrs. 18, 19

Ri Jesús xkaʼy chikaj y xubʼan uchʼawem chkiwach konojel ri winaq, rech are kkiya uqʼij ri Jehová. Xubʼij: «Lázaro, chatel uloq» (Juan 11:43). Xel lo ri Lázaro pa ri muqbʼal. Rukʼ wariʼ ri winaq xkilo che ri Jesús kkunik kubʼan ronojel rukʼ ri uchuqʼabʼ ri Dios. Wariʼ sibʼalaj kojutoʼo rech kojkojon chrij ri kʼastajibʼal. Chnaʼtaj chqe che ri Jesús xubʼij che ri Marta: «Kkʼastaj na ri axibʼal» (Juan 11:23). Junam rukʼ ri uTat, ri areʼ kurayij kikʼasuxik ri kaminaqibʼ y kkunik kubʼano. Are chiʼ xoqʼik xukʼutu che kraj kusachisaj uwach ri kamikal. Are chiʼ xukʼasuj ri Lázaro, xukʼut chqawach che kkunik keʼuwalajisaj ri kaminaqibʼ. Xuqujeʼ chnaʼtaj chqe ri xubʼij che ri Marta che kʼo pa ri texto re kimik. Kʼo kʼi rumal che kojkojon oj chrij ri kʼastajibʼal. w23.04 11, 12 párrs. 15, 16

Weneʼ jujun taq mul rajawaxik kqakʼex ri kqataʼ che ri Jehová are chiʼ kqachʼobʼ ri kraj kqabʼano. Rumal laʼ, chnaʼtaj chqe che ri Jehová uchomam usachisaxik uwach ri kʼaxkʼolil, junam rukʼ ri kabʼraqan, kaqiqʼ jabʼ y nikʼaj chik, xuqujeʼ ri yabʼilal y ri kamikal. Kukoj na ri uQʼatbʼal tzij rech kubʼan ri utzujum (Dan. 2:44; Apoc. 21:3, 4). Are kʼu kimik uyaʼom na bʼe che ri Satanás kuqʼat tzij (Juan 12:31; Apoc. 12:9). Wet ri Jehová kresaj ri kʼaxkʼolil weneʼ kqʼalajinik che ri Satanás utz tajin kubʼan che uqʼatik tzij. Paneʼ kqeyeʼj na naj tiempo rech ri Jehová kubʼan ri utzujum, are kʼu kraj ta kubʼij che mat kojutoʼ chuwach ri kʼaxkʼolil. w23.05 8 párr. 4; 9, 10 párrs. 7, 8

¿Jas kqabʼan che kitoʼik ri nikʼaj chik rech kkiriq utzilal rumal ri Unaʼtabʼalil ri ukamikal ri Jesús? Nabʼe, rajawaxik keqabʼan invitar. Xaq xiw ta kqajach ri sikʼinik chke ri winaq, xaneʼ utz we kqatzʼibʼaj ri kibʼiʼ jachin taq ri kqaj keqabʼan invitar, weneʼ qafamiliares, qachiʼl pa ri chak, pa ri escuela o winaq che kqachʼobʼ kiwach. We kʼo ta chi ri wuj re sikʼinik qukʼ, kojkunik kqataq bʼi jun enlace chke. Qetaʼm taj jachin taq ri kkaj keʼopanik (Ecl. 11:6). Chnaʼtaj chqe che are chiʼ kqabʼan invitar jun winaq pa ri Unaʼtabʼalil ri ukamikal ri Jesús weneʼ kubʼan jujun preguntas chqe, más na we kʼo ta nijun mul bʼenaq. Rumal laʼ utz che kojchoman apan chrij ri preguntas che weneʼ kubʼan chqe y chojchoman chrij ri kqabʼan che utzalixik uwach. Weneʼ ri winaq kubʼan chi más preguntas are chiʼ xbʼe pa ri Unaʼtabʼalil ri ukamikal ri Jesús. Kqaj kqakoj qachuqʼabʼ che kitoʼik ri winaq che kʼo jun utz kanimaʼ rech kkiriq utzil rumal, are chiʼ majaʼ kopan ri qʼij re ri Unaʼtabʼalil ri ukamikal ri Jesús, are chiʼ tajin kbʼanik y are chiʼ qʼaxinaq chik (Hech. 13:48). w24.01 12 párrs. 13, 15; 13 párr. 16

Ri Biblia kchʼaw chkij e ocho winaq che xekʼastajisax pa ri kamikal, chkixoʼl ri winaq riʼ e kʼo achijabʼ, ixoqibʼ y akʼalabʼ. Utz we keqanikʼoj ri e kʼastajibʼal riʼ. Y chojchoman chrij jas kubʼan che ukʼutik che ri Dios kraj y kkunik keʼukʼastajisaj ri kaminaqibʼ. Más na chojchoman chrij ri ukʼastajibʼal ri Jesús. Chnaʼtaj chqe che e kʼi winaq xeʼilow ri Jesús are chiʼ xkʼastajisaxik, rumal laʼ wariʼ kojutoʼ rech más kojkojon chrij ri kʼastajibʼal (1 Cor. 15:3-6, 20-22). Sibʼalaj kqatyoxij che ri Jehová che keʼukʼastajisaj na ri kaminaqibʼ. Qas qetaʼm che kutzʼaqatisaj ri kutzujuj, rumal che kurayij ubʼanik y qas kkun che. Jetaneʼ ri areʼ kubʼij chqe chqajujunal: «Kekʼastaj na ri awachalaxik». Rumal laʼ, chqakowirisaj ri qakojonik chrij ri kʼastajibʼal. We kqabʼano, kojqebʼ más rukʼ ri Jehová. (Juan 11:23). w23.04 8 párr. 2; 12 párr. 17; 13 párr. 20

Ri winaq che kuchʼobʼo che kʼo kkun ta che ubʼanik are jun winaq kmachʼachʼik. Rumal che ri winaq kmachʼachʼik nim keril ri nikʼaj chik y kuchʼobʼo che ronojel taj kkunik kubʼano (Filip. 2:3). Ri Gedeón xuchʼobʼ ri kkun ta che ubʼanik y sibʼalaj xmachʼachʼik. Rumal che, are chiʼ jun ángel xubʼij che che xchaʼ rumal ri Jehová rech keresaj ri israelitas pa kiqʼabʼ ri madianitas, ri Gedeón xubʼij wariʼ: «Ri e wachalaxik e are ri sibʼalaj e mebʼaʼ na chkiwach konojel ri e ramaqʼ ri aj Manasés, in kʼut ri in chʼiʼp na chkixoʼl konojel ri wachalal» (Juec. 6:15). Ri areʼ xuchomaj che kkun taj kubʼan wajun chak riʼ. Are kʼu ri Jehová xubʼij che che kkunik, y qas je xkʼulmatajik. Ri kʼamal taq bʼe kkikoj kichuqʼabʼ che uchʼobʼik ri kekun ta che ubʼanik y kemachʼachʼik (Hech. 20:18, 19). Kkibʼan ta nim che kibʼ rumal ri kenaʼw che ubʼanik, y kkichomaj taj che kʼo ta kipatan are chiʼ kʼo kesach wi. w23.06 3 párrs. 4, 5

Kraj na más che 1,000 junabʼ rech ktzʼaqat ri kʼisbʼal profecía che kchʼaw chrij are chiʼ ktakʼalex ri ujolom ri Satanás (Apoc. 20:7-10). Chojchoman chrij ri xibʼibʼalalaj taq jastaq che kubʼij ri profecías che kʼo pa ri Biblia. Nabʼe, ri winaq kkibʼij na «utz uj kʼolik, man kʼo ta kqakʼulmaj» (1 Tes. 5:2, 3). Tekʼuriʼ xaq kʼateʼ kmajtaj na ri nimalaj kʼaxkʼolil y ri e tinamit kkibʼan na kʼax chke ri e qastzij taj kojonem (Apoc. 17:16). Xuqujeʼ ri Jesús kuqʼat na tzij pa kiwiʼ ri winaq y keʼutas ri chij y ri kʼisikʼ (Mat. 25:31-33, 46). Y ri Satanás xaq ta kril wariʼ. Rumal che sibʼalaj itzel, keʼumulij na ri winaq kech ri tinamit che kbʼix Gog de Magog che, rech kkibʼan kʼax che ri utinamit ri Dios (Ezeq. 38:2, 10, 11). Tekʼuriʼ kemulix na ri kebʼe pa ri kaj. Keʼopan rukʼ ri Jesús y kukʼ ri ángeles rech kechʼojin pa ri chʼoj Armagedón y rukʼ wariʼ kkʼis ri nimalaj kʼaxkʼolil (Mat. 24:31; Apoc. 16:14, 16). Tekʼuriʼ ri Jesús kumajij uqʼatik tzij puwiʼ ri uwach Ulew pa Mil junabʼ (Apoc. 20:6). w23.10 20, 21 párrs. 9, 10

Kimik sibʼalaj e kʼi qachalal che e kʼo pa e tinamit jawiʼ qʼatem wi uwach ri qachak che ri Dios keniman chke ri e qʼatal taq tzij. Are kʼu junam rukʼ ri xubʼan ri Abdías are más nim kkil wi ri uqʼijilaxik ri Dios (Mat. 22:21). Kkikʼutu che kkixeʼj kibʼ chuwach ri Dios are chiʼ are nabʼe kkinimaj ri Jehová chkiwach ri winaq (Hech. 5:29). Rumal laʼ, chkʼuyal kkitzijoj ri utzij ri Dios y kkibʼan ri kiriqbʼal ibʼ (Mat. 10:16, 28). Xuqujeʼ kkiya ri kajwataj chke ri kachalal pa ri kikojonik. Chqilampeʼ ri ukʼutbʼal jun qachalal Henri ubʼiʼ, che kel pa África jawiʼ xqʼatex wi na uwach ri qachak che ri Dios. Pa riʼ ri tiempo ri a Henri xtobʼan che ujachik wuj chke ri e qachalal. Xubʼij: «Sibʼalaj kinxeʼj wibʼ, are kʼu [...] ri Jehová xinutoʼo rech xinxeʼj ta wibʼ». Ri at xuqujeʼ katkunik kakʼut kowil kʼuxaj we kaxeʼj awibʼ chuwach ri Dios. w23.06 16 párrs. 9, 11

Are chiʼ xemakun ri Adán y Eva, ¿la xkun ri Satanás che uqʼatexik ri Jehová rech kutzʼaqatisaj ta ri urayibʼal? Weneʼ xuchomaj che ri Jehová kusachisaj kiwach ri Adán y Eva y kubʼan jun chi kʼulaj che e tzʼaqat rech kutzʼaqatisaj ri urayibʼal chke ri winaq. Wet xubʼan wariʼ ri Jehová, ri Satanás kubʼij riʼ che ri Jehová are jun bʼanal tzij. ¿Jasche? Rumal che pa Génesis 1:28, ri Jehová xubʼij chke ri Adán y Eva che ri e kalkʼwal kkinojisaj ri uwach Ulew. Weneʼ ri Satanás xuchomaj che ri Jehová kuya bʼe chke ri Adán y Eva kkʼojiʼ kalkʼwal, are kʼu keʼux ta tzʼaqat taq winaq (Ecl. 7:20; Rom. 3:23). Wet qastzij che ri e kalkʼwal ri Adán y Eva keʼux ta tzʼaqat taq winaq, ri Satanás weneʼ xubʼij ta riʼ che ri Jehová xa kkun ta che utzʼaqatisaxik ri urayibʼal cho ri uwach Ulew, che kunojisaj chke tzʼaqat taq winaq. w23.11 6 párrs. 15, 16

Qas qʼalaj ri utaqanik ri Jehová che uyaʼom pa ri uTzij y pa ri utinamit. Rajawaxik taj kqaya uwiʼ ri taqanik (Prov. 3:5-7). Rumal laʼ, kqaya ta uwiʼ ri tzʼibʼatal pa ri Biblia y kqaya ta taqanik chke nikʼaj chik che xaq qachomanik oj. Ri Satanás kukoj «ri xaq e kinoʼjibʼal taq winaq» y «ri ketaqan puwiʼ we uwach ulew riʼ» rech keʼusubʼ ri winaq y rech kʼo jachoj ibʼ chkixoʼl (Col. 2:8). Chqachomaj ri xkʼulmataj pa ri nabʼe siglo, ri Satanás xukoj ri kichomanik winaq, ri xkikʼut ri judíos che kʼo ta pa ri Biblia y ri chomanik che ri cristianos rajawaxik kkinimaj ri Taqanik che xyaʼ che ri Moisés. Utz ta ri chomanik riʼ rumal che keʼuqʼatej ri winaq che utatabʼexik ri utaqanik ri Jehová. Kimik, ri Satanás xuqujeʼ kukoj ri radio, televisión y ri redes sociales che ujabʼuxik ri molom taq tzij che kkibʼij ri qʼatal taq tzij. w23.07 16 párrs. 11, 12

Ri xubʼan ri Jehová che usukʼumaxik ri kʼax che xkibʼan ri Adán y Eva weneʼ xubʼano che ri Satanás xuriq ta chik jas xubʼij. Are chiʼ xuya bʼe chke ri Adán y Eva xkʼojiʼ kalkʼwal, ri Jehová xukʼutu che ri Satanás xa jun bʼanal tzij y che ri Jehová amaqʼel kutzʼaqatisaj ri kutzujuj. Xuqujeʼ xukʼutu che qas kkun che ubʼanik ri kubʼij. ¿Jas xubʼan che ubʼanik? Xubʼano che xkʼojiʼ jun ijaʼlil che keʼutoʼ na ri rijaʼlil ri Adán y Eva che kenimanik, je wariʼ ri urayibʼal tajin ktzʼaqatik (Gén. 3:15; 22:18). Ri Satanás xuchomaj ta riʼ che ri Jehová kukoj na ri ukʼaslemal ri Jesús che utojik ri kimak ri winaq. ¿Jasche? Rumal che are jun kʼutbʼal re ri uloqʼoqʼebʼal chke ri winaq (Mat. 20:28; Juan 3:16). Are kʼu ri Satanás kʼo ta wajun loqʼoqʼebʼal rukʼ. Rumal laʼ, ¿jas kqariq na rukʼ ri ukamikal ri Jesús? Are chiʼ kkʼis ri 1,000 junabʼ ri e rijaʼlil ri Adán y Eva che kenimanik kekʼojiʼ na chuwach ri kotzʼiʼjalaj uwach Ulew junam rukʼ ri xraj ri Jehová nabʼe kanoq. w23.11 6 párr. 17

Nim kqil wi ri kʼaslemal y ri kikʼ. ¿Jasche? Rumal che ri Jehová sibʼalaj nim kril wi ri kʼaslemal, y rumal ri kikʼ oj kʼaslik (Lev. 17:14). Are chiʼ ri Jehová xuya bʼe chke ri winaq kekitij ri chikop, xubʼij chke che kkitij ta ri kikikʼel (Gén. 9:4). Are chiʼ xyaʼ ri Taqanik che ri Moisés, ri Jehová xukamulij chi ubʼixik chke ri israelitas (Lev. 17:10). Xuqujeʼ ri jupuq aj kʼamal bʼe cho ronojel uwach Ulew, re ri nabʼe siglo, xubʼij chke ri cristianos che makitij kikʼ (Hech. 15:28, 29). Rumal laʼ, ri oj kqakoj ta kikʼ we ri kunanel kubʼij chqe che rajawaxik kqakojo. Xuqujeʼ nim kqil wi ri utaqanik ri Jehová chrij ri inmoralidad sexual. Ri apóstol Pablo xuya wajun pixabʼ riʼ chqe: «Chibʼanaʼ bʼaʼ chi kkam ronojel ri kech ri e utzʼaqatil ri e itzel taq e irayinik». Wariʼ kojutoʼo rech rukʼ kowil keqaxutuj ri itzel taq rayinik. Rumal laʼ, kqaxutuj rilik o ubʼanik apachike jastaq che kojukʼam bʼi che ubʼanik ri inmoralidad sexual (Col. 3:5; Job 31:1). w23.07 15 párrs. 5, 6

¿Jasche ri Sansón xril taj che xa tajin ksubʼ rumal ri Dalila? Weneʼ rumal che bʼenaq ranimaʼ rukʼ. Ri Dalila kʼi mul xutaʼ che ri Sansón che kubʼij che jawchiʼ kpe wi ri uchuqʼabʼ y ri Sansón xubʼij che. Rumal wariʼ xesax ri uchuqʼabʼ rumal ri Jehová y xtoʼ ta chi rumal (Juec. 16:16-20). Ri Sansón are más xukubʼsaj ukʼuʼx chrij ri Dalila y chrij ta ri Jehová, rumal laʼ xuriq kʼi kʼax. Xchap kumal ri filisteos y xekesaj ri ubʼaqʼwach. Tekʼuriʼ xkikʼam bʼi pa cárcel pa Gaza, y chilaʼ xkoj che esclavo. Tekʼuriʼ ri filisteos xkibʼan jun nimaqʼij che ri kidios Dagón, rumal che xkichomaj che are xjachow ri Sansón pa kiqʼabʼ. Tekʼuriʼ xkesaj lo ri «Sansón chkiwach rech kketzʼabʼej uwach» (Juec. 16:21-25). w23.09 5, 6 párrs. 13, 14

Weneʼ jun qachiʼl pa ri chak o pa ri escuela kchʼojin qukʼ chrij jujun taq jastaq che kqabʼan taj. Paneʼ kqaj kqatoʼ uwiʼ ri qakojonik, are kʼu rajawaxik che rukʼ utzilal kqabʼij chke ri winaq (1 Ped. 3:15). Ri kojtoʼwik are che kojchoman chrij ri pregunta che kubʼan ri winaq, je wariʼ kqetaʼmaj ri kubʼisoj. Are más utz che kojchoman chrij wariʼ y kqachomaj taj che ri winaq xa kraj kchʼojin qukʼ. Apastaneʼ ri rumal che xubʼan ri pregunta ri winaq chqe rajawaxik kojtzijon rukʼ utzilal y rukʼ ta chʼoj. Ri kqabʼan che utzelexik uwach ri pregunta che kkibʼan ri winaq chqe, wariʼ weneʼ kubʼano che kkʼextaj ri kichomanik. Chqachomajampeʼ che jun qachiʼl pa ri chak kutaʼ chqe jasche kqabʼan ta ri cumpleaños. ¿Jas chrij rajawaxik kojchoman wi are chiʼ majaʼ kqatzalij uwach ri upregunta? ¿La xa kuchomaj che xa kqaj taj kojkʼojiʼ junam rech kojkikotik? Kojkunik kqabʼij che che kqamaltyoxij che nim keril wi ri rachiʼl y che utz kqil ri utzilal che kʼo chqaxoʼl. We kqabʼij wariʼ che, weneʼ kukʼex ri uchomanik y kojkun riʼ kqabʼij che ri kubʼij ri Biblia chrij ri cumpleaños. w23.09 17 párrs. 10, 11

Sibʼalaj kojkikotik rumal che kqatzijoj ri utzij ri Dios chke ri winaq re ronojel tinamit. Ri apóstol Pedro kubʼij wariʼ chqe: «Chiwanej iwibʼ che ri upetik ri uqʼij ri Dios» (2 Ped. 3:11, 12). ¿Jas rajawaxik kqabʼano? Utz che ronojel taq qʼij kojchoman chrij ri jeʼlalaj kʼaslemal che kuya na ri Dios chqe pa ri petinaq. Chojchoman chrij ri kaqiqʼ che kʼo ta chi contaminación chupam y che ri kqatijo kubʼan ta chi kʼax chqe. Chojchoman chrij are chiʼ kekʼastaj lo ri qafamilias y che kqaya na ubʼixik chke che xetzʼaqat konojel ri profecías re ri Biblia che xbʼix kan ojer. Are chiʼ kojchoman chrij wariʼ kojutoʼo rech kojkʼaskʼat pa ri qakojonik y knaʼtaj chqe che oj kʼo chi pa ri kʼisbʼal taq qʼij. Rumal che qetaʼm ri kkʼulmataj na pa ri petinaq, maqakoj ri kkikʼut ri winaq rumal che wariʼ kojresaj kan chrij ri Jehová. w23.09 27 párrs. 5, 6

Ri alabʼom alitomabʼ e kʼo kachiʼl che keniman ta chke ri kitat kinan (2 Tim. 3:1, 2). ¿Jasche e kʼi keniman taj? E jujun kkilo che ri kitat kinan kkitaʼ jastaq chke che ni ri areʼ kkibʼano. E nikʼaj chi alabʼom alitomabʼ kkichomaj che ri taqanik che kkiya ri kitat kinan chke kʼo ta chi upatan, kʼax ubʼanik o kʼo ta ktobʼan wi chke. Ala ali, ¿la kʼo jumul je achomam wariʼ? E kʼi weneʼ kʼax kkibʼan che unimaxik wajun taqanik che kʼo pa ri texto re kimik. ¿Jas kattowik rech katnimanik? Jun utz kʼutbʼal re nimanik are ri Jesús (1 Ped. 2:21-24). Ri areʼ tzʼaqat ri ukʼaslemal are kʼu ri utat unan e ajmakibʼ. Ri Jesús xniman chke, paneʼ jujun taq mul xesachik o xkichʼobʼ ta ri tajin kubʼano o kuchomaj (Éx. 20:12). w23.10 7 párrs. 4, 5

Ri apóstol Pablo xubʼij chke ri cristianos hebreos che ri tabʼal toqʼobʼ che kubʼij ri Taqanik che xyaʼ che ri Moisés kkun taj kusach ronojel ri kimak ri winaq. Rumal laʼ, ri Taqanik kʼo ta chi upatan. Tekʼuriʼ ri apóstol Pablo xukʼut jujun kʼutunem chkiwach che kʼax uchʼobʼik. Xunaʼtaj chke che rukʼ ri ukamikal ri Jesús kekunik kkiriq jun kubʼsal «kʼuʼx ri sibʼalaj utz na» che keʼutoʼo rech keqebʼ rukʼ ri Dios (Heb. 7:19). Ri Pablo xuqʼalajisaj chkiwach ri cristianos hebreos che ri tajin kkibʼan che uqʼijilaxik ri Dios más utz na chuwach ri xbʼan nabʼe kanoq. Xubʼij che ri kkibʼan ri judíos che uqʼijilaxik ri Dios are «xa umuʼjal ri kpe na». Y xubʼij: «Are kʼu ri qastzij kriqtaj pa ri Cristo» (Col. 2:17). Rech kqachʼobʼ jun jastaq jujun taq mul rajawaxik kqajunamaj rukʼ jun chi jastaq. Xa junam rukʼ, ri xkibʼan ri judíos che uqʼijilaxik ri Dios xa jun kʼutbʼal re ri kabʼan na che uqʼijilaxik ri Dios pa ri petinaq. Rajawaxik kqetaʼmaj ri kbʼan che uqʼijilaxik ri Jehová pa ri templo espiritual. ¿Jasche? Rumal che ktobʼanik rech kkuyutaj qamak y je wariʼ kojkunik kqaqʼijilaj ri Dios junam rukʼ ri kraj ri areʼ. w23.10 25 párrs. 4, 5

Ri capítulo 11 re Daniel kchʼaw chkij ri kebʼ qʼatal taq tzij che kechʼojin chbʼil kibʼ, rumal che kkaj ketaqan puwiʼ ri uwach Ulew. Wajun profecía riʼ y nikʼaj chik, kukʼutu che ri qʼatal tzij re ri norte are Rusia y ri ketobʼan rukʼ, y che ri qʼatal tzij re ri sur are Estados Unidos y Reino Unido. Ri qʼatal tzij re ri norte tajin kubʼan kʼax chke ri upatanelabʼ ri Jehová che e kʼo pa ri tinamit che ktaqan pa kiwiʼ. E jujun Testigos e chʼayom y e kʼamom bʼi pa cárcel rumal ri kikojonik. Are kʼu ri e qachalal kkixiʼj ta kibʼ che ri kubʼan ri qʼatal tzij re ri norte chke. Xaneʼ más kkowir ri kikojonik. ¿Jasche? Rumal che ketaʼm che ri kʼax che tajin kbʼan chke tzʼibʼatal kan pa ri wuj re Daniel (Dan. 11:41). Retaʼmaxik wajun profecía riʼ kojutoʼo rech kojux sukʼ che ri Jehová Dios y amaqʼel kqakubʼsaj qakʼuʼx chrij. w23.08 11 párrs. 15, 16

Ri Jehová kojujunamaj rukʼ ri bʼaqʼwach. Ri bʼaqʼwach nim ubʼanik y kuriq kʼax we man kchajixik. Rumal laʼ jetaneʼ kubʼij chqe: «Are chiʼ kbʼan kʼax chiwe jetaneʼ kbʼan kʼax che jun jastaq che nim ubʼanik chnuwach». Rumal che ri Jehová kojuloqʼoqʼej kʼax kunaʼo are chiʼ kqariq kʼax y kraj kojuchajij. Are chiʼ kqariq kʼax xuqujeʼ ri areʼ kunaʼ ri kʼax. Rumal laʼ kojkunik kqabʼij che ri Jehová «chinatoʼo junam rukʼ ri abʼaqʼwach» (Sal. 17:8). Ri Jehová kraj che qas kawetaʼmaj che katuloqʼoqʼej. Y ri areʼ retaʼm che rumal ri kʼax che tajin kakʼulmaj kimik kubʼan chawe che kachomaj che katraj taj. Rumal laʼ are utz che qas kakojo che ri areʼ qas katraj. ¿Jas kattoʼwik? Are retaʼmaxik ri kubʼan ri Jehová che uloqʼoqʼexik ri Jesús, ri kebʼe pa ri kaj xuqujeʼ ri oj. Are laʼ ri kqanikʼoj na chanim riʼ. w24.01 27 párrs. 6, 7

Ri Esdras xrilo are chiʼ ri Jehová xeʼutoʼ ri upatanelabʼ are chiʼ xkiriq kʼax. Pa ri junabʼ 484, are chiʼ ri qʼatal tzij Asuero xubʼij che ksachisax kiwach ri judíos che e kʼo pa ri tinamit Persia, weneʼ ri Esdras kʼo pa Babilonia (Est. 3:7, 13-15). Kʼo pa kʼax ri ukʼaslemal. Are chiʼ xuta wariʼ, ri judíos re «konojel ri utzʼaqatil ri ajawibʼal» sibʼalaj xebʼisonik xuqujeʼ xkibʼan ayuno y weneʼ xkitaʼ che ri Jehová che ketoʼ rumal (Est. 4:3). Chojchoman chrij ri xunaʼ ri Esdras y ri judíos are chiʼ xketaʼmaj che are ri kikʼulel ri ksachisax kiwach (Est. 9:1, 2). Ronojel ri xukʼulmaj ri Esdras wariʼ xtobʼan che rech kretaʼmaj jas kubʼan chuwach ri kʼax che kuriq chi na, y qastzij riʼ che xukubʼsaj ukʼuʼx che ri Jehová kutoʼ ri utinamit are chiʼ kbʼan kʼax che. w23.11 17 párrs. 12, 13

Ri apóstol Pablo are tajin kchʼaw chrij ri taqanik che xuya ri Dios chke ri israelitas (Rom. 3:21, 28). E jujun cristianos utz ta xkilo che tajin ta knimax ri taqanik che xuya ri Jehová che ri Moisés ojer kanoq. Rumal laʼ, xukoj ri Abrahán che kʼutbʼal rech kukʼutu che jun winaq rajawaxik taj kniman che jun taqanik rech kqaj chuwach ri Dios xaneʼ kojkojon chrij. Ri xubʼij ri apóstol Pablo xuqujeʼ kukubʼsaj qakʼuʼx, rumal che kukʼutu che kojkunik kojqaj chuwach ri Dios we kojkojon chrij y chrij ri Jesús. Are kʼu ri chak che xubʼij ri Santiago pa ri capítulo 2 are ta ri xubʼij ri Pablo, ri taqanik che xuya ri Dios che ri Moisés. Ri Santiago are xchʼaw chrij ri chak che kubʼan jun cristiano ronojel taq qʼij (Sant. 2:24). Ri chak riʼ kukʼutu we qas kʼo ukojonik chrij ri Dios. w23.12 3 párr. 8; 4, 5 párrs. 10, 11

Qachalal ixoq we kawaj katkʼulik qas chawilaʼ na jachin rukʼ. Rumal che wariʼ nim ubʼanik pa ri akʼaslemal. Y chnaʼtaj chawe che ri achi che katkʼuliʼ rukʼ rajawaxik kanimaj (Rom. 7:2; Efes. 5:33). Rumal laʼ chatchoman chrij wariʼ: «¿La qas ko pa ri ukojonik? ¿La qas kukʼutu che are más nim ubʼanik ri Jehová pa ri ukʼaslemal? ¿La utz ri kuchaʼ ubʼanik? ¿La kutaʼ sachbʼal umak are chiʼ ksachik? ¿La nim keril wi ri ixoqibʼ? ¿La qas kinutoʼ riʼ pa ri nukojonik y la qas kuya ri kajwataj chwe pa ri nukʼaslemal?». Y we kawaj kariq jun utz awachajil, at xuqujeʼ rajawaxik kakoj achuqʼabʼ rech katux jun utz ixoqil. Jun utz ixoqil are jun «toʼl rech ri» rachajil (Gén. 2:18). Are kʼu, rumal che qas kuloqʼoqʼej ri Jehová, utz kchʼaw chrij ri rachajil chke nikʼaj chik (Prov. 31:11, 12; 1 Tim. 3:11). We tajin kachomaj che katkʼulik, chanimarisaj más ri aloqʼoqʼenik che ri Jehová y chakojoʼ achuqʼabʼ rech at jun utz «toʼl» re ri awachajil pa ri awachoch y pa ri congregación. w23.12 22, 23 párrs. 18, 19

Ri Jehová ubʼim chqe che kuya qanojibʼal rech utz ri kqachaʼ ubʼanik. Más na are chiʼ kqachaʼ ubʼanik jujun jastaq che kukʼex ri qakʼaslemal. Ri Jehová kuya qachuqʼabʼ che uchʼijik ri kʼax. Junam rukʼ ri xubʼan che utoʼik ri apóstol Pablo je kubʼan che qatoʼik oj rech kqachʼij ri kʼax (Filip. 4:13). Keʼukoj ri e qachalal. Ri kʼisbʼal chaqʼabʼ che kʼasal na ri Jesús, xubʼan uchʼawem che ri Jehová. Xutaʼ che che kutoʼ che uchʼijik ri molom tzij che xbʼix chrij. Rumal laʼ, ri Jehová xutaq lo jun ángel che ukubʼsaxik ukʼuʼx (Luc. 22:42, 43). Je kubʼan ri Jehová che qatoʼik kimik, weneʼ kukoj jun qachalal che kojuchʼabʼej loq o kpe che qachʼabʼexik. Qonojel kojkunik kqabʼij «tzij re loqʼoqʼebʼal kʼuxaj» chke ri e qachalal (Prov. 12:25). w23.05 10, 11 párrs. 9-11

Weneʼ ri qachalal che kiyaʼom kan upatanixik ri Jehová, kkikoj kichuqʼabʼ che kebʼe pa ri Unaʼtabʼalil ri ukamikal ri Jesús y xechoman chrij ri kbʼan che kikʼulaxik. Rumal laʼ keqataqchiʼj taj rech kkibʼij jastaq chqe y kqabʼij ta jastaq chke che utz ta kkito o kubʼan kʼax chke. Ri e areʼ e qachalal y sibʼalaj kojkikotik are chiʼ ketzalij loq rech junam kqaqʼijilaj ri Jehová (Sal. 119:176; Hech. 20:35). Rukʼ ronojel ri qetaʼmam chik kqachʼobʼo jasche ri Jesús xubʼij kanoq che rajawaxik kqanaʼtajisaj ri ukamikal ronojel taq junabʼ. Are chiʼ kqabʼano kuya utzilal chqe xuqujeʼ chke ri winaq (Is. 48:17, 18). Kojutoʼo rech más kqaloqʼoqʼej ri Jehová y ri Jesús. Xuqujeʼ kojutoʼ che ukʼutik che kqamaltyoxij ronojel ri kibʼanom ri Jehová y ri Jesús pa qawiʼ. Kubʼano che más keqaloqʼoqʼej ri qachalal y keqatoʼ ri winaq rech kketaʼmaj ri rajawaxik kkibʼano rech kkiriq ri tewchibʼal che kuya ri ukamikal ri Jesús. Rumal laʼ chqakojoʼ qachuqʼabʼ rech kojkʼojiʼ pa wajun riqbʼal ibʼ riʼ che nim ubʼanik. w24.01 14 párrs. 18, 19

¿Jas kubʼan ri Jehová che ukʼamik qabʼe? Nabʼe, are ukojom ri uTzij ri Biblia. Xuqujeʼ e ukojom winaq rech kkikʼam qabʼe. Jun kʼutbʼal, ukojom ri «jikalaj pataninel utz uchomanik» rech kuya ri kajwataj chqe pa ri qakojonik rech utz ri kqachaʼ ubʼanik pa ri qakʼaslemal (Mat. 24:45). Xaq xiw ta waʼ ukojom ri Jehová che ukʼamik qabʼe. Ri e solinel re circuito y ri kʼamal taq bʼe pa ri congregaciones kkiya qachuqʼabʼ y kkibʼij chqe ri kqabʼan chuwach jujun taq kʼax. Sibʼalaj kqamaltyoxij che ri Jehová che e uyaʼom ri tobʼanik riʼ chqe, rumal che oj kʼo pa kʼaxalaj taq qʼij. Je wariʼ amaqʼel kojux rachiʼl y kqaya ta kan ukojik qachuqʼabʼ rech kqariq ri kʼaslemal che kʼo ta ukʼisik. Paneʼ je wariʼ, are kʼu jujun taq mul kʼax kqabʼan che ubʼanik ri kubʼij ri Jehová, más na are chiʼ xaq winaq che e ajmakibʼ ri kebʼin chqe. Are chiʼ kqakʼulmaj wariʼ rajawaxik che más kqakubʼsaj qakʼuʼx chrij ri Jehová che are kkʼamow ubʼe ri utinamit y ri rajawaxik kqabʼano are ukʼutik nimanik. w24.02 20 párrs. 2, 3

Rech knimar ri qaloqʼoqʼebʼal che ri Dios rajawaxik kqanikʼoj ri uTzij. Are chiʼ kqasikʼij uwach, chqilaʼ jas kukʼut chqawach chrij ri Jehová. Chojchoman chrij wariʼ: «¿Jas kubʼan ri versículos riʼ che ukʼutik chnuwach che ri Jehová qas kinraj? ¿Y jasche kinloqʼoqʼej ri Jehová?». Jun chi kojtoʼwik rech knimar ri qaloqʼoqʼebʼal che ri Jehová, are ujaqik ri qanimaʼ chuwach (Sal. 25:4, 5). Ri Jehová kutzalij uwach ri qachʼawem (1 Juan 3:21, 22). Chqakojoʼ qachuqʼabʼ rech knimar ri qaloqʼoqʼenik chke ri qajil qatzʼaqat. Are chiʼ ri Pablo cristiano chik xretaʼmaj uwach jun ala Timoteo ubʼiʼ. Rumal che ri Timoteo kuloqʼoqʼej ri Jehová y ri e winaq. Ri Pablo xubʼij che kʼo ta jun ri kjunamataj rukʼ ri Timoteo, ri qas xok il chke ri cristianos (Filip. 2:20). Ri Pablo xchʼaw chrij ri kubʼan che kilik ri qachalal. Qastzij riʼ che ri congregaciones xaq keyem chik che kopan ri Timoteo kukʼ (1 Cor. 4:17). w23.07 9 párrs. 7-10

Ri Moisés xkamik are chiʼ ri israelitas majaʼ keʼok pa ri Tzujum Ulew. ¿Jas xkʼulmataj rukʼ ri utinamit ri Dios nabʼe kanoq, la xekanaj kan kitukel? Xekanaj taj. Rumal che ri Jehová amaqʼel xkʼojiʼ kukʼ are chiʼ xepatanin che rukʼ sukʼilal. Jun kʼutbʼal, ri Jehová xubʼij che are chiʼ kkam ri Moisés are kkanaj kan ri Josué che ukʼamik ubʼe ri utinamit, che kʼi junabʼ xtijox rumal ri Moisés (Éx. 33:11; Deut. 34:9). Xuqujeʼ, e kʼo nikʼaj chi achijabʼ che kʼo nim ketaʼmabʼal che kkikʼam ubʼe ri tinamit: jun kʼamal bʼe re 1,000, re 100, re 50 xuqujeʼ ri re 10 (Deut. 1:15). Ri Dios qas xuchajij ri utinamit. Xuqujeʼ kʼo chi jun kʼutbʼal, ri Elías. Pa kʼi taq junabʼ ri Elías xutoʼ ri tinamit rech kuqʼijilaj ri Dios. Are kʼu, are chiʼ xqʼax ri tiempo ri Jehová xutaq bʼi ri Elías pa Judá (2 Rey. 2:1; 2 Crón. 21:12). ¿La xekanaj kan ri diez tribus re Israel kitukel? Xekanaj taj. Rumal che ri Elías pa kʼi taq junabʼ tajin kutijoj ri Eliseo. Ri Jehová ubʼanom ri urayibʼal y uyaʼom ta kan kitoʼik ri sukʼalaj taq upatanelabʼ. w24.02 5 párr. 12

Ri cristianos re Éfeso xkimajij ubʼanik pa ri kikʼaslemal ri xketaʼmaj pa ri uTzij ri Jehová, kjunamataj rukʼ jun saqil che xukʼam kibʼe (Sal. 119:105). Xkiya kan ubʼanik ri kkibʼan ri qastzij taj kojonem y xkiya kan ubʼanik ri inmoralidad sexual. Xkesaj uwach ri Dios xuqujeʼ xkikoj kichuqʼabʼ che uqʼijilaxik y che ubʼanik ri kqaj chuwach (Efes. 5:1). Junam rukʼ wariʼ, are chiʼ majaʼ kqetaʼmaj ri qastzij, qonojel xojkʼojiʼ pa qʼequmalil re ri qastzij taj kojonem y pa qʼequmalil rumal ri tzʼil taq mak. Jujun chqe weneʼ xojbʼe pa taq nimaqʼij re ri qastzij taj kojonem y weneʼ jujun chqe xqabʼan ri tzʼil taq makaj. Are kʼu, are chiʼ xqetaʼmaj uwach ri Jehová, xqakʼex ronojel ri qakʼaslemal, xqamajij ubʼanik ri utz krilo y xqaxutuj ri itzel krilo. Wariʼ uyaʼom kʼi utzilal chqe (Is. 48:17). Are kʼu, jujun taq mul kʼax kqabʼan che uxutuxik ri qʼequmalil y kqabʼan qech «ri kkibʼan ri e aj saqilal». w24.03 21 párrs. 6, 7

Weneʼ kachomaj che katkun taj kajach ri akʼaslemal che ri Jehová y kabʼan ri aqasanjaʼ. Weneʼ rajawaxik kʼo kakʼex na pa ri akʼaslemal rech kanimaj ri Jehová, o kajwataj más tiempo chawe rech kakowirisaj ri akojonik (Col. 2:6, 7). Chnaʼtaj chawe che qonojel taj junam kojkʼiy pa ri qakojonik. Y konojel ta ri alabʼom alitomabʼ junam kijunabʼ kkʼiy ri kikojonik. Rumal laʼ, chatchoman chrij ronojel ri katkun che ubʼanik y kajunamisaj ta awibʼ kukʼ ri nikʼaj chik (Gál. 6:4, 5). We kawilo che katkun ta na kajach ri akʼaslemal che ri Jehová, chakojoʼ achuqʼabʼ rech katkun che ubʼanik. Chataʼ che ri Jehová che katutoʼ che ukʼexik ri rajawaxik kakʼex pa ri akʼaslemal (Filip. 2:13). Qas chakojoʼ che kutatabʼej ri achʼawem y kutzalij uwach (1 Juan 5:14). w24.03 5 párrs. 9, 10

Ri Abrahán nim xril wi ri Sara, rumal che xutatabʼej ri xubʼij y ri xunaʼo. Jumul ri Sara xresaj royowal chrij ri Abrahán rumal jun jastaq che xkʼulmatajik. Are kʼu ri Abrahán xpe ta royowal chrij ri Sara, rumal che retaʼm che nim kil wi rumal y kutoʼ che ri kuchaʼ ubʼanik. Rumal laʼ, xutatabʼej y xutoʼ che usukʼumaxik ri kʼax (Gén. 16:5, 6). Ri at achajil kʼo kawetaʼmaj chrij wariʼ, ¿jas riʼ? Chnaʼtaj chawe che at kʼamal bʼe pa ri familia (1 Cor. 11:3). Are kʼu, ri utz che katkunik kabʼano are che katatabʼej ri kubʼij ri awixoqil, más na we ri kachaʼ ubʼanik kʼo kril rukʼ ri awixoqil (1 Cor. 13:4, 5). Jumul xaq kʼateʼ xeʼopan jujun kulaʼ, rumal laʼ ri Abrahán xubʼilaʼ che ri Sara che kubʼan jujun kaxlanwa paneʼ latzʼ uwach (Gén. 18:6). Ri Sara aninaq xubʼanalaʼ ri xbʼix che. Ixoqilaxelabʼ, kixkunik kibʼan iwe junam rukʼ ri Sara che xutoʼ ri rachajil che ri xuchaʼ ubʼanik. We kibʼan iwe qas kixkikot riʼ pa ri ikʼulanem (1 Ped. 3:5, 6). w23.05 24, 25 párrs. 16, 17

Are chiʼ ri Jehová xuchaʼ ri Gedeón che qʼatal tzij, xqʼalajinik we knimanik y we kʼo ukowil ukʼuʼx. Xbʼix che che kusachisaj uwach ri altar che xubʼan ri utat che ri Baal (Juec. 6:25, 26). Are chiʼ jumul xeʼumulij e kʼi rajchʼojabʼ, ri Jehová xubʼij che che keresaj bʼi nikʼaj rumal che más e kʼi kʼo rukʼ (Juec. 7:2-7). Xuqujeʼ xnimanik are chiʼ ri Jehová xubʼij che che pa nikʼaj aqʼabʼ kbʼe chkij ri ukʼulel (Juec. 7:9-11). Ri kʼamal taq bʼe rajawaxik kenimanik. Are chiʼ jun kʼamal bʼe knimanik kuya bʼe riʼ che kkʼam ubʼe rumal ri utinamit ri Jehová y rumal ri Biblia, je wariʼ kuya jun utz kʼutbʼal chke ri qachalal. Are kʼu weneʼ jujun taq mul kʼax kubʼan che unimaxik ri taqanik che kyaʼik. Weneʼ kutaʼ chbʼil ribʼ we utz kunimaj ri taqanik che kyaʼ che. O weneʼ kbʼix che che kubʼan jun jastaq pa ri ukojonik che weneʼ kubʼano che kkʼam bʼi pa cárcel. We je kkʼulmataj wariʼ, ¿jas kkibʼan ri kʼamal taq bʼe che resaxik uwach ri Gedeón? Qas chitatabʼej ri pixabʼ kyaʼ chiwe y chinimaj. w23.06 4, 5 párrs. 9-11