Febrero

Are chiʼ ri qʼatal tzij Ezequías xyawajik, xutaʼ che ri Jehová pa chʼawem rech kkunatajik y ri Jehová xukunaj (2 Rey. 20:1-6). Are kʼu je ta xubʼan rukʼ ri apóstol Pablo are chiʼ xutaʼ che che kresaj «jun kʼix pa ri [...] ucuerpo» ri Jehová xresaj taj (2 Cor. 12:7-9). Ri qʼatal tzij Herodes kraj keʼukamisaj ri apóstoles Santiago y ri Pedro. Xkamisax ri Santiago are kʼu ri Pedro xkamisax taj, rumal che xtoʼ rumal ri Jehová (Hech. 12:1-11). Weneʼ kqachomaj jasche ri Jehová xa jun xutoʼo. Paneʼ ri Biblia kubʼij taj, are kʼu kojkunik kqakubʼsaj qakʼuʼx che ri Jehová «sukʼ» y che xuloqʼoqʼej ri Pedro y ri Santiago (Deut. 32:4). Weneʼ ri Jehová are ta kuya ri kqataʼ che. Are kʼu rumal che are jun Dios che kloqʼoqʼenik y sukʼ kqachomaj taj che utz ta xubʼan che utzalixik ri qachʼawem (Job 33:13). w23.11 21 párr. 6

Ri xtzʼibʼan ri wuj Santiago xubʼij che ri winaq che kʼo kinojibʼal «e nimanelabʼ». ¿Jas kraj kubʼij wariʼ? Che rajawaxik kojniman chke ri yaʼom taqanik pa kiqʼabʼ rumal ri Jehová y che xa ta kojtaqchiʼx che kinimaxik. Are kʼu ri Jehová kubʼij ta chqe che kojniman chke ri winaq che xa kojkitaq che ubʼanik itzel taq jastaq (Hech. 4:18-20). Weneʼ kqanaʼo che are kʼax ta kqabʼan che unimaxik ri Jehová chkiwach ri winaq, rumal che ri taqanik che kuya ri areʼ konojel e tzʼaqat, are kʼu ri taqanik che kkiya ri winaq kʼi taq mul kʼax unimaxik (Sal. 19:7). Paneʼ je wariʼ, ri Jehová uyaʼom taqanik pa kiqʼabʼ ri tat nan, ri qʼatal taq tzij y ri e kʼamal bʼe pa ri congregación (Prov. 6:20; 1 Tes. 5:12; 1 Ped. 2:13, 14). Are chiʼ keqanimaj ri winaq riʼ are tajin kqanimaj ri Jehová. w23.10 6 párrs. 2, 3

Jun chi jastaq che kojtoʼwik rech kkowir ri qakojonik are uchomaxik ri uchuqʼabʼ ri Jehová. Ri areʼ kkun che ubʼanik ronojel ri utzujum. Rumal che ri Jehová sibʼalaj nim ri uchuqʼabʼ (Job 42:2; Mar. 10:27; Efes. 3:20). Jun kʼutbʼal, xubʼij chke ri Abrahán y ri Sara che kkʼojiʼ jun kalkʼwal paneʼ e rijabʼ chik (Gén. 17:15-17). Xuqujeʼ xubʼij che ri Abrahán che kuya na ri ulew re Canaán chke ri e ralkʼwal. Are kʼu are chiʼ ri israelitas, ri e rachalaxik ri Abrahán, kʼi tiempo xekʼojiʼ pa Egipto weneʼ xkichomaj che ri xutzujuj ri Jehová chke kbʼantaj taj. Are kʼu, qas xbʼantaj ri xutzujuj ri Jehová. Xuqujeʼ xubʼij che ri María che kkʼojiʼ jun ral paneʼ kʼulan taj. Rukʼ wariʼ ktzʼaqat ri tzujunik che xubʼan kan ri Jehová pa ri kotzʼiʼjalaj Edén (Gén. 3:15). Kqil ri nimalaj uchuqʼabʼ ri Jehová are chiʼ kojchoman chrij ronojel ri utzujunik y ri xubʼan che utzʼaqatisaxik. Rumal laʼ kqakojo che kubʼan na kotzʼiʼj che ri uwach Ulew (Jos. 23:14; Is. 55:10, 11). w23.04 28 párrs. 10-12

Ri Jehová xutatabʼej ri uchʼawem ri David y xutoʼo (1 Sam. 19:10, 18-20; 2 Sam. 17-25). Rumal laʼ, ri David rukʼ ronojel ranimaʼ xubʼij wariʼ «Ri Ajawaxel, naqaj kʼo wi chke ri kkinaʼtaj ri ubʼiʼ». ¿La mat qastzij che ri oj xuqujeʼ je kqachomaj wariʼ? (Sal. 145:18). Weneʼ jujun taq mul ri Jehová are ta kuya chqe ri kqataʼ che. Are laʼ ri xril ri apóstol Pablo. Ri areʼ xuriq jun kʼax, «jun kʼix pa ri nucuerpo» xchaʼ che, y oxmul xutaʼ che ri Dios che kresaj wajun kʼax che. ¿La xtatabʼex ri uchʼawem? Xtatabʼexik, xaq xiw che are ta xyaʼ che ri xraj. Xesax ta ri kʼax che xuriqo, xaneʼ ri Jehová xuya uchuqʼabʼ rech kuya ta kan upatanexik (2 Cor. 12:7-10). Weneʼ xuqujeʼ oj qilom che ri qatom che ri Jehová are ta xuya chqe. Are kʼu ri qas kubʼan ri Jehová are kuya ri kajwataj chqe. Rumal che «sibʼalaj nim na ri kkun che ubʼanik chuwach ri kqataʼ che, nim na chuwach ri kqachomaj chi kubʼano» (Efes. 3:20). Rumal laʼ, jujun taq mul ri Jehová are ta kuya ri kqataʼ che. w23.05 8, 9 párrs. 4-6

Utz che amaqʼel kojchoman chrij ri kʼastajibʼal. ¿Jasche? Rumal che qetaʼm taj jas kqariq chweʼq kabʼij. Weneʼ xaq kʼateʼ kojyawajik o kkam ne jun qachalal (Ecl. 9:11; Sant. 4:13, 14). Rumal laʼ ri kʼastajibʼal kojutoʼ che uchʼijik ri e kʼax riʼ (1 Tes. 4:13). Ri uTzij ri Dios kubʼij che ri qaTat che kʼo pa ri kaj retaʼm qawach y sibʼalaj kojraj (Luc. 12:7). Rumal laʼ, are chiʼ kojukʼastajisaj kojubʼan chi na jumul y kutzalij chi na jumul ri qabʼantajik. Y kuya jun qakʼaslemal che kʼo ta ukʼisik. ¿Jasche kqakubʼsaj qakʼuʼx chrij ri kʼastajibʼal? Rumal che qas qetaʼm che ri kbʼanow ri tzujunik riʼ xaq xiw ta kraj keʼukʼasuj ri winaq, xaneʼ xuqujeʼ kʼo uchuqʼabʼ che ubʼanik. w23.04 8, 9 párrs. 2-4

Ri José y ri María xuqujeʼ junam xechakunik rech xqaj ta uchuqʼabʼ ri kachilanik rukʼ ri Jehová. Rumal che ri e areʼ ketaʼm che rajawaxik junam kkiqʼijilaj ri Jehová pa ri kifamilia (Luc. 2:22-24; 4:16). ¡Qas are jun utzalaj kʼutbʼal chke ri e kʼulanik! We e kʼo iwalkʼwal weneʼ rajawaxik kikoj ichuqʼabʼ rech kixbʼe pa ri riqbʼal ibʼ y kibʼan ri iqʼijilanik pa ri familia. Xuqujeʼ weneʼ kʼo ta chi itiempo kibʼan ichʼawem y kisikʼij ri Biblia junam. Are kʼu we kikoj ichuqʼabʼ che ubʼanik, más knimar ri iwachilanik rukʼ ri Jehová y más kiloqʼoqʼej iwibʼ. Rumal laʼ, más nim chiwilaʼ wi uqʼijilaxik ri Jehová. ¿Jas kibʼano we kʼo chʼoj pa ri ikʼulanem? Weneʼ kiwaj taj kibʼan ri iqʼijilanik pa ri familia. We jelaʼ tajin kikʼulmaj, chikojoʼ ichuqʼabʼ rech kinikʼoj jun alaj kʼutunem re ri Biblia che utz kiwilo. Rumal che wariʼ kixutoʼ rech más kiwaj iwibʼ y utz kiwilo junam kiqʼijilaj ri Jehová. w23.05 22 párrs. 7, 8

¿Jas xtobʼan wi ri xibʼin ibʼ che xunaʼ ri Abdías che ri Dios? Xutoʼo rech xkubʼsax kʼuʼx chrij. Rumal laʼ, ri qʼatal tzij xukoj che rilixik ri kajwataj pa ri rachoch (chajunamisaj rukʼ Nehemías 7:2). Xuqujeʼ xutoʼo rech xkʼojiʼ ukowil ukʼuʼx che sibʼalaj xajwataj che. ¿Jasche? Rumal che xkʼojiʼ pa ri utiempo ri itzelalaj qʼatal tzij Acab (1 Rey. 16:30). Che xuqujeʼ kʼulan rukʼ jun ixoq Jezabel ubʼiʼ, che xuqʼijilaj ri Baal y itzel xril ri Jehová. Rumal laʼ, xraj xusachisaj uwach ri qastzij qʼijilanik pa Israel, ri qʼatal tzij re ri norte. Xuqujeʼ xeʼukamisaj e kʼi qʼaxal taq tzij (1 Rey. 18:4). Are chiʼ ri Jezabel xumajij kikamisaxik ri e qʼaxal taq utzij ri Jehová ri Abdías xerowaj e 100 chke «pa taq qʼat re kawinaq taq lajuj (50, 50)» y «xeʼentzuq kʼu chilaʼ» (1 Rey. 18:13, 14). Wet xretaʼmaj ri Jezabel ri xubʼan ri Abdías xukamisaj ta riʼ. Ri Abdías kraj taj kkamisaxik. Are kʼu rumal che kuloqʼoqʼej ri Jehová y ri upatanelabʼ, xuya ri ukʼaslemal pa kʼax. w23.06 16 párrs. 9, 10

Kimik, ri Jehová xuqujeʼ tajin kukʼam ubʼe ri utinamit. ¿La xuqujeʼ keʼukoj e winaq che ukʼamik qabʼe? Keʼukojo. Chojchoman chrij ri xkʼulmataj pa ri siglo diecinueve. Charles Russell y nikʼaj chi achijabʼ xketaʼmaj che ri junabʼ 1914 are ri junabʼ che kʼo ubʼanik rukʼ ri uQʼatbʼal tzij ri Dios (Dan. 4:25, 26). ¿Jasche xketaʼmaj wariʼ? Xkinikʼoj ri profecías re ri Biblia. Y ri Jehová qas xeʼutoʼ che retaʼmaxik wariʼ. Ri xkʼulmataj pa ri uwach Ulew pa ri 1914 xuqʼalajisaj che ri uQʼatbʼal tzij ri Dios xumajij uqʼatik tzij: xmajtaj ri Primera Guerra Mundial y xkʼojiʼ nimaʼq taq yabʼil, kabʼraqan y wiʼjal (Luc. 21:10, 11). Qastzij riʼ che xqʼalajinik che are ri Jehová xekojow ri achijabʼ riʼ rech kutoʼ ri utinamit. w24.02 22 párr. 11

Ri oj upatanelabʼ ri Jehová qetaʼm che ri areʼ kojraj y kraj ri utzilal chqe (Rom. 8:35-39). Xuqujeʼ qetaʼm che we kqanimaj ri kubʼij kuya utzilal chqe (Is. 48:17, 18). Are kʼu ¿jas kqabʼano we xaq kʼateʼ kqariq jun kʼax? Jun kʼutbʼal, weneʼ jun qachalaxik kubʼan jun kʼax chqe o kubʼij jun tzij chqe che kʼax kqanaʼo. Weneʼ kqariq jun kʼax che kuya ta chi bʼe chqe kqapatanij ri Jehová. O kqariq kʼax rumal jun kabʼraqan, kaqiqʼ jabʼ o nikʼaj chik. Xuqujeʼ weneʼ kbʼan kʼax chqe rumal ri qakojonik. Are chiʼ kqariq waʼ taq kʼax weneʼ kqachomaj: «¿Jasche tajin kinkʼulmaj wariʼ? ¿La xa kʼo utz ta xinbʼano? ¿La xa tajin ta kinutewchiʼj ri Jehová?». ¿La kʼo jumul anaʼom wariʼ? We kʼolik, matbʼisonik. E kʼi upatanelabʼ ri Jehová je kikʼulmam (Sal. 22:1, 2; Hab. 1:2, 3). w23.04 14 párrs. 1, 2

Chqaxutuj chomanik o bʼantajik che kubʼan kʼax che ri qachilanik rukʼ ri Dios. Ri Jehová kraj che kojniman rukʼ ronojel qanimaʼ (Rom. 6:17). Ri utaqanik ri Jehová kuya utzilal chqe (Is. 48:17, 18; 1 Cor. 6:9, 10). Ri Satanás kubʼan kʼax chqe rech ko ta kojtakʼiʼ pa ri qakojonik y kukoj chomanik pa qajolom che kuqasaj qachuqʼabʼ, rech kuriq kʼax ri qachilanik rukʼ ri Jehová (1 Ped. 5:8). Ri cristianos re ri nabʼe siglo, xbʼan kʼax chke, xechʼayik y xekamisaxik rumal che xkinimaj ri utaqanik ri Dios (Hech. 5:27, 28, 40; 7:54-60). Are waʼ ri tajin kubʼan ri Satanás che ri utinamit ri Jehová kimik. Junam rukʼ ri kʼax che tajin kbʼan chke ri qachalal pa Rusia y pa nikʼaj chi tinamit che qʼatem wi uwach ri qachak che ri Dios. Y e kʼi qachalal kkiriq nikʼaj chi kʼax. Ri Satanás kojusubʼ rukʼ ri itzel taq unoʼj (Efes. 6:11). w23.07 15, 16 párrs. 6-9

Are chiʼ más kawetaʼmaj chrij ri Biblia, más kaloqʼoqʼej riʼ ri Dios, y kabʼan pa ri akʼaslemal ri xawetaʼmaj. Kamajij uchaʼik ri utz pa ri akʼaslemal rumal ri pixabʼ re ri Biblia. Xuqujeʼ kakʼex ri achomanik y ri abʼantajik, rumal che kawaj katqaj chuwach ri Dios. Junam rukʼ ri jun alaj akʼal che kresaj uwach ri utat je chabʼanaʼ che resaxik uwach ri Jehová (Efes. 5:1, 2). Chatchoman chrij wariʼ: «¿La más kinloqʼoqʼej chi ri Jehová kimik chuwach nabʼe kanoq? Are chiʼ xinbʼan ri nuqasanjaʼ ¿la más kenloqʼoqʼej chi ri qachalal junam rukʼ ri Jehová?». Kojbʼison taj we tajin kqaj uchuqʼabʼ ri qaloqʼoqʼebʼal. Rumal che are je xkikʼulmaj ri cristianos re ri nabʼe siglo. Ri Jesús xuchomaj taj che kbʼan ta chi kitoʼik, rumal laʼ kqachʼobʼo che je kuchomaj chqij oj (Apoc. 2:4, 7). Retaʼm che kojkunik kqanimarisaj chi jumul ri qaloqʼoqʼebʼal che xqanaʼ are chiʼ xqamajij retaʼmaxik chrij ri Biblia. w23.07 8 párrs. 2, 3

Kʼi xsach wi ri apóstol Pedro. Nabʼe, xubʼij che ni jumul kuwonobʼa kan ri Jesús paneʼ ri nikʼaj chik kkibʼano (Mar. 14:27-29). Tekʼuriʼ xkʼaskʼat taj (Mar. 14:32, 37-41). Y are chiʼ xchap bʼi ri Jesús, xanimaj bʼik y xuwonobʼa kanoq (Mar. 14:50). Kʼisbʼal re, ri Pedro oxmul xubʼij che kuchʼobʼ ta uwach ri Jesús y xubʼan jurar wariʼ (Mar. 14:66-71). ¿Jas xunaʼ ri Pedro are chiʼ xrilo che xmakunik? Sibʼalaj xbʼisonik y xutzoqopij oqʼej (Mar. 14:72). Y ri Jesús xubʼij ta che ri Pedro ri utz taj che xubʼano, xaneʼ xubʼij che kyaʼ na kʼi eqeleʼn che (Juan 21:15-17). Ri Pedro retaʼm che xmakunik are kʼu xubʼan ta kebʼ ukʼuʼx. ¿Jasche? Rumal che retaʼm che xutux ta rumal ri Jesús. ¿Jas kqetaʼmaj chrij wariʼ? Ri Jehová kraj qas kqakojo che kojuloqʼoqʼej y kukuy qamak (Rom. 8:38, 39). w24.03 18, 19 párrs. 13-15

Ri kkibʼan ri inmoralidad sexual kkiriq kʼi kʼax, rumal che weneʼ kkinaʼ kʼixbʼal, kkinaʼo che kʼo ta chi kipatan, e tzʼil, kkibʼan kʼax chke ri kifamilia y kkʼojiʼ kalkʼwal paneʼ kkaj taj. Rumal laʼ, rajawaxik kqaxutuj ri sikʼinik re ri ixoq «ri man kʼo ta unoʼj». E kʼi chke ri kkibʼan ri inmoralidad sexual kekam pa ri kikojonik rumal che ksach uwach ri kachilanik rukʼ ri Jehová y weneʼ kkiriq yabʼil che keʼukʼam bʼi pa kamikal (Prov. 7:23). Pa ri versículo 18 re ri capítulo 9 kukʼisbʼej rukʼ ri e tzij riʼ: ri e rulaʼ e kʼo «chupam ri rajawbʼal ri kamikal». ¿Jas kʼu che e kʼi kkikʼam ri sikʼinik che kuya ri ixoq «ri man kʼo ta unoʼj» we xa kkiriq kʼax? (Prov. 9:13-18). Rajawaxik kqachajij qibʼ chuwach ri pornografía rumal che kʼo pa apachike lugar. E jujun kkibʼij che kʼo ta kubʼano we kqilo, are kʼu xa molom tzij. Ri pornografía kubʼan kʼax che ri winaq, rumal che nim ta chi kril ribʼ, nim ta chi keril ri e nikʼaj chik y kkun ta chik kuya kan rilik. Chnaʼtaj chqe che kʼax chi resaxik pa qajolom ri tzʼil taq wachbʼal y kukʼasuj más ri itzel taq qarayinik (Col. 3:5; Sant. 1:14, 15). Rumal laʼ, ri e winaq che kkil pornografía keqaj pa ri inmoralidad sexual. w23.06 23 párrs. 10, 11

Paneʼ kekʼojiʼ na jujun taq tinamit che kkaj ketaqan puwiʼ ri potencia che nim uchuqʼabʼ che are Estados Unidos y Reino Unido, are kʼu kekun taj. Kqabʼij wariʼ rumal che «ri abʼaj» —kraj kubʼij, ri uQʼatbʼal tzij ri Dios— kusachisaj na kiwach ri raqan ri nimalaj wachbʼal (Dan. 2:34, 35, 44, 45). ¿La qas kakoj at che qastzij ri xubʼij ri Daniel chkij ri raqan ri wachbʼal? We qas kakojo, kqʼalajin riʼ rukʼ ri kachaʼ ubʼanik pa ri akʼaslemal. Kakʼut riʼ are chiʼ katzukuj ta ri qʼinomal che kʼo pa wajun uwach Ulew riʼ, che xa jubʼiqʼ chi kraj che ksachisax uwach (Luc. 12:16-21; 1 Juan 2:15-17). Xuqujeʼ, are chiʼ kqetaʼmaj ri kraj kubʼij wajun profecía riʼ más kqakoj qachuqʼabʼ riʼ che utzijoxik ri utzij ri Dios (Mat. 6:33; 28:18-20). Rumal che qetaʼm chi ri kraj kubʼij wajun profecía riʼ, utz che kqachomaj: «¿La kukʼut ri kinchaʼ ubʼanik pa ri nukʼaslemal che qas kinkojo che ri uQʼatbʼal tzij ri Dios kusachisaj na kiwach ri qʼatbʼal taq tzij re wajun uwach Ulew riʼ?». w23.08 11 párrs. 13, 14

We at jun machʼalik winaq awetaʼm riʼ ri katkun ta che ubʼanik, weneʼ rumal ri ajunabʼ, at yawabʼ o jun chi kʼax che kubʼano che katkun ta che upatanixik más ri Jehová. Chawesaj uwach ri Barzilái y kakʼam ta eqaʼn che katkun ta che rukʼaxik, weneʼ rumal jun yabʼil o jun chik (2 Sam. 19:35, 36). O are chawesaj uwach ri Moisés y chataʼ tobʼanik are chiʼ kajwataj chawe (Éx. 18:21, 22). We at jun machʼalik winaq kabʼan ta jastaq riʼ che katutoʼ ta pa ri akojonik y kojbʼison ta riʼ rumal ri kkichaʼ ubʼanik ri nikʼaj chik. Kojkun taj kqabʼij chke ri nikʼaj chik ri rajawaxik kkibʼano y kojkun taj kqaqʼatej ri kʼax che kkikʼulmaj. Weneʼ jun alkʼwalaxel kuya kan upatanixik ri Jehová, wariʼ sibʼalaj kuya bʼis chke ri utat unan. Ri e tat nan che kkichomaj che kimak are chiʼ ri kalkʼwal kuya kan upatanexik ri Jehová, wariʼ kux jun alalaj eqaʼn chke y ri Jehová kraj taj che je kkikʼulmaj waʼ. w23.08 29 párrs. 11, 12

Ri Sansón xa ajmak junam qukʼ oj, rumal laʼ jujun taq mul utz ta ri xuchaʼ ubʼanik. Jun chke ri xuchaʼ ubʼanik sibʼalaj xuriq kʼax rumal, xchoman ta chrij ri eqeleʼn che uyaʼom ri Jehová che. Are chiʼ kʼi chi junabʼ tajin kuqʼat tzij, «xbʼe kʼu ranimaʼ ri Sansón che jun ixoq Dalila ubʼiʼ, ri kʼo rachoch pa ri bʼeyaʼ ri kʼo pa Sorec». Are chiʼ majaʼ kuchʼobʼ uwach ri Dalila, xraj xkʼuliʼ rukʼ jun ixoq filistea. Are kʼu ri Biblia kubʼij che wariʼ «uchomanik ri Ajawaxel waʼ, chi je kkʼulmataj na, katajin kʼu kutzukuj jas kubʼan che kichʼakik ri filisteos». Y are chiʼ ri Sansón xbʼe pa ri tinamit filistea re Gaza xkanaj kan pa ri rachoch jun prostituta. Je wariʼ ri Jehová xuya uchuqʼabʼ ri Sansón rech xkunik xujaqʼapuj bʼi ri uchiʼ ri tinamit rech kʼax ta xkibʼan ri kikʼulel xeʼok bʼik (Juec. 14:1-4; 16:1-3). Ri Jehová xeʼukoj ri ixoqibʼ riʼ rech ri Sansón xchʼakan pa kiwiʼ ri ukʼulel. Are kʼu junam ta xkʼulmataj rukʼ ri Dalila rumal che israelita y ktobʼan ta che ri Sansón rech kchʼakan pa kiwiʼ ri ukʼulel. w23.09 5 párrs. 12, 13

Ri nojinik xuqujeʼ kojutoʼo. Ri winaq che kʼo unoʼj aninaq taj kpe royowal are chiʼ ri winaq kechʼojin rukʼ chrij ri ukojonik. Ri uchomanik jun winaq kjunamataj rukʼ ri jaʼ che naj qajinaq uxeʼ. Weneʼ jun winaq kubʼan jun pregunta chqe, are kʼu qetaʼm taj jasche tajin kubʼano. Rumal laʼ, aninaq taj kqatzalij uwach ri kutaʼ ri winaq chqe, rajawaxik knaʼtaj chqe che weneʼ qetaʼm taj jasche kubʼan ri pregunta ri winaq (Prov. 16:23). Chojchoman chrij ri xukʼulmaj ri Gedeón. Jumul, ri achijabʼ re Efraín rukʼ oyowal xkichʼa che ri Gedeón jasche xeʼukʼam ta bʼi pa ri chʼoj rech kechʼojin kukʼ ri kikʼulel ri israelitas. ¿Jas xkaj xkibʼij ri achijabʼ che ri Gedeón? ¿La xa kʼax xkinaʼo che xekʼam ta bʼik? Apastaneʼ ri rumal, ri Gedeón nim xeril wi y xpe ta royowal kukʼ. ¿Jas xkʼulmatajik? «Are taq ri aj Efraín xkitaʼ ri tzij ri xubʼij ri Gedeón chke, xokʼow ri koyowal chrij» (Juec. 8:1-3). w23.09 16 párrs. 8, 9

Ri Jehová y ri Jesús kʼo jun utzalaj achilanik chkixoʼl. Qastzij riʼ che ri Jehová sibʼalaj xbʼisonik are chiʼ xrilo che xbʼan kʼax che ri uKʼojol y che xxutuxik. Ri kaminaq jun kalkʼwal qas kinaʼom riʼ ri bʼis che kkinaʼ jujun tat nan are chiʼ kkam jun kalkʼwal. Paneʼ qetaʼm che kekʼastaj na ri kaminaqibʼ, are kʼu wariʼ kubʼan taj che mat kojbʼisonik are chiʼ kkam jun qafamiliar che sibʼalaj kqaloqʼoqʼej. Wariʼ kukʼut chqawach che ri Jehová sibʼalaj xbʼisonik are chiʼ xkam ri uKʼojol pa ri junabʼ 33 (Mat. 3:17). Utz riʼ we kakoj atiempo rech kabʼan investigar más pa ri awestudio personal o pa ri qʼijilanik re ri familia chrij ri tojbʼal mak are chiʼ majaʼ kopan ri qʼij re ri Unaʼtabʼalil ri ukamikal ri Jesús. Y masach pa ajalom rilik ri adoración matutina che nim ubʼanik re ri Unaʼtabʼalil ri ukamikal ri Jesús. We kqatijoj apan qibʼ y kojchoman chrij, kojkun riʼ keqatoʼ ri nikʼaj chik (Esd. 7:10). w24.01 11 párrs. 10-12

Ri kojkunik kqabʼano rech kojutoʼ ri Jehová are ubʼanik chʼawem. Ri are kutzalij uwach ri qachʼawem are chiʼ kuya «ri nimalaj kuʼinem» chqe (2 Cor. 4:7). Xuqujeʼ utz che kqasikʼij ri Biblia y kojchoman chrij ri kqasikʼij (Sal. 86:11). Ri kubʼij ri Jehová chqe pa ri Biblia «kʼo ukuʼinem» (Heb. 4:12). Rumal laʼ, rech ri Jehová kojutoʼo rajawaxik kqabʼan qachʼawem che, kqasikʼij ri Biblia, kqapatanij rukʼ kikotemal y kqabʼan ri eqeleʼn che yaʼom chqe paneʼ kʼax ubʼanik. Chqilampeʼ jas xubʼan ri Jehová che utoʼik ri Jonás. Ri Jonás xyaʼ jun eqeleʼn che, are kʼu rumal che xuxiʼj ribʼ, xbʼe pa jun barco pa jun chi lugar. Rumal wariʼ ri areʼ y ri e rachiʼl pa ri barco xa jubʼiqʼ xraj che xekam pa jun kaqiqʼ jabʼ. Are chiʼ ri winaq che e kʼo pa ri barco xkikʼaq bʼi pa ri jaʼ, xbʼiqʼ bʼi rumal jun nimalaj kar. ¿Jas xubʼan ri Jonás rech xtoʼ rumal ri Dios are chiʼ kʼo chupam ri nimalaj kar? Xubʼan uchʼawem che ri Jehová (Jon. 2:1, 2, 7). w23.10 13 párrs. 4-6

Paneʼ ri apóstol Pedro xutzʼibʼaj ri cartas riʼ chke ri cristianos re ri nabʼe siglo, are kʼu ri Jehová xraj che xtzʼibʼax kan pa ri Biblia rech kʼo kqetaʼmaj chrij (Rom. 15:4). Ri winaq kkikoj ta ri kubʼij ri Biblia chrij ri petinaq. Rumal che pa kʼi taq junabʼ tajin kqaya ubʼixik che ksachisax na uwach ri itzelal, are kʼu weneʼ e kʼo jujun winaq ketzeʼn chqij y kkibʼij che ri kʼisbʼal re wajun uwach Ulew kpe ta wi (2 Ped. 3:3, 4). Weneʼ kʼo jun winaq kqariqo are chiʼ tajin kqatzijoj ri utzij ri Dios, jun qachiʼl pa ri chak o jun familiar che kubʼij che ri kʼisbʼal kpe ta wi, wariʼ kuqasaj uchuqʼabʼ ri qakojonik. ¿Jas kojtoʼw chuwach? Chqilampeʼ ri xubʼij ri Pedro. Weneʼ e kʼo jujun kkichomaj che ri Jehová kbʼeytajik rech kusachisaj uwach ri itzelal. Are kʼu ri Pedro xuya ubʼixik jujun taq tzij che kubʼan chqe che kojchoman chrij. Xubʼij che ri Jehová junam ta kubʼan che rilik ri tiempo junam rukʼ ri kkibʼan ri winaq (2 Ped. 3:8, 9). Chuwach ri Jehová, ri mil junabʼ jetaneʼ xa jun qʼij. Ri Jehová kʼo upaciencia y kraj taj che nijun ksach uwach. Are kʼu ri kʼisbʼalil kpe na..., y ri itzelal cho ri uwach Ulew ksach na uwach. w23.09 26, 27 párrs. 2-5

¿Jasche xutaq bʼi cartas ri apóstol Pablo chke ri cristianos hebreos che e kʼo pa Judea? Weneʼ rumal kebʼ jastaq che nim kibʼanik. Nabʼe, rech xuya kichuqʼabʼ. Kʼi chke xekʼiy pa ri kojonem judía y ri kʼamal taq bʼe re ri e kojonem riʼ xetzeʼn chkij are chiʼ xeʼux cristianos. ¿Jasche? Rumal che ri cristianos e junam ta kukʼ ri judíos, rumal che kʼo ta jun templo jawiʼ kkiqʼijilaj wi ri Dios, kʼo ta jun altar jawiʼ kkiya wi ri tabʼal toqʼobʼ y e kʼo ta kojol tabʼal toqʼobʼ. Wariʼ weneʼ xubʼano che xubʼan kebʼ kikʼuʼx ri cristianos y xuqasaj uchuqʼabʼ ri kikojonik (Heb. 3:12, 14). Weneʼ jujun chke xkaj xetzalij pa ri kojonem judía. Ukabʼ, ri Pablo xubʼij chke ri cristianos hebreos che tajin ta kkikoj kichuqʼabʼ che retaʼmaxik ri kʼutunem che kʼax uchʼobʼik, ri wa «kech ri tzʼaqatinaq chik kijunabʼ» che kʼo pa ri uTzij ri Dios (Heb. 5:11-14). Rumal laʼ, e kʼi tajin kkibʼan na ri Taqanik che xyaʼ che ri Moisés. w23.10 24, 25 párrs. 3, 4

Jujun ixoqibʼ kekʼuliʼ taj paneʼ pa ri kitinamit ketaqchixik rech kekʼuliʼk (Mat. 19:10-12). We at kʼulan taj, ri Jehová y ri Jesús nim katkil wi. Cho ronojel uwach Ulew, ri qachalal ixoqibʼ che e kʼulan taj sibʼalaj nim keʼil wi pa taq ri congregaciones. Ri loqʼoqʼebʼal y ri bʼantajik che kkikʼutu kubʼano che nikʼaj chik kekilo che e jetaneʼ e kachalal o e kinan pa ri kikojonik (Mar. 10:29, 30). E jujun tajin kkipatanij ri Jehová pa tiempo completo. Más e kʼi ri qachalal ixoqibʼ che kkitzijoj ri utzij ri Dios cho ronojel ri uwach Ulew (Sal. 68:11). Katkunik kachomaj upatanixik ri Jehová kimik pa tiempo completo. Weneʼ katkunik katux precursora, katbʼe pa construcción o katux betelita. ¿Jas kattoʼw che ubʼanik wariʼ? Ubʼanik achʼawem che ri Jehová, chatchʼaw kukʼ ri kepatanin pa tiempo completo y chataʼ chke jas rajawaxik kabʼano. Tekʼuriʼ chatzʼibʼaj ri rajawaxik kabʼano rech katkunik kapatanij ri Jehová pa tiempo completo. Kʼi ri katkun che ubʼanik pa ri utinamit ri Jehová. w23.12 22 párrs. 16, 17

Qetaʼm che ri nimalaj kʼaxkʼolil naqaj chi kʼo wi. Rumal laʼ, rajawaxik kojniman che ri taqanik che yaʼom chqe che kqatzijoj ri utzij ri Dios chke ri winaq. Are kʼu, weneʼ kʼax kqabʼan che ubʼanik wariʼ are chiʼ kʼo ta qapwaq o are chiʼ ri qʼatal taq tzij kojkiqʼatej che ubʼanik. ¿Jas kojkunik kqabʼano rech kqaya nabʼe pa ri qakʼaslemal upatanixik ri Jehová? Utz che kqakubʼsaj qakʼuʼx chrij ri Jehová «ri kʼo ronojel ukuʼinem» amaqʼel kʼo qukʼ. Ri areʼ kojutoʼo are chiʼ kqakoj qachuqʼabʼ che upatanixik y are kqabʼan ri kqaj chuwach. Rumal laʼ kqaxiʼj ta qibʼ (Ageo 2:4). Ri Jehová kraj che are más kqaya qatiempo che utzijoxik ri utzij, rumal che ktobʼan chke ri winaq. Ri Ageo xubʼij che ri tinamit che kkimaj chi ubʼanik ri templo. Jetaneʼ xubʼij chke che kkimajij rukʼ ri cimientos y che ksach pa kijolom ronojel ri junabʼ che nabʼe kanoq kʼo ta xkibʼano. We kenimanik, ri Jehová keʼutewchij na (Ageo 2:18, 19). Qas qetaʼm che je kubʼan ri Jehová qukʼ, kojutewchij na we are más kqaya qatiempo che upatanexik. w23.11 16 párr. 8; 17 párr. 11

Pa ri wuj re Romanos che xutzʼibʼaj ri apóstol Pablo, xubʼij che qonojel xa oj ajmakibʼ. ¿Jas kraj kubʼij che ri Dios kkikot qukʼ y kubʼij chqe che oj sukʼ? Ri Pablo xukoj ri ukʼutbʼal ri Abrahán rech ri cristianos kketaʼmaj ri urespuesta wajun pregunta riʼ. Sukʼ xil wi ri Abrahán rumal ri Jehová are chiʼ kʼo pa Canaán. ¿Jasche sukʼ xril wi? Are ta rumal che ri Abrahán qas xunimaj ronojel ri taqanik che xyaʼ che ri Moisés (Rom. 4:13). ¿Jasche qetaʼm wariʼ? Rumal che qʼaxinaq chi 400 junabʼ che xyaʼ wajun taqanik riʼ chke ri israelitas. Are kʼu, ¿jasche ri Jehová sukʼ xril wi ri Abrahán? Rumal ri ukojonik xloqʼoqʼex rumal ri Jehová y xbʼix sukʼ che (Rom. 4:2-4). w23.12 3 párrs. 4, 5

Are kʼu pa riʼ ri chaqʼabʼ che ri qʼaxal tzij Natán xchʼaw rukʼ ri qʼatal tzij David xchʼabʼex ri qʼaxal tzij rumal ri Jehová, xbʼix che che are ta ri David kyakow ri rachoch. Rumal laʼ xbʼe chi ri qʼaxal tzij che ubʼixik che ri David ri xbʼix lo che (1 Crón. 17:3, 4, 11, 12). ¿Jas xubʼan ri David are chiʼ xbʼix wariʼ che? Xumulij ri pwaq y ri e chakubʼal che kukoj ri Salomón che ri rachoch ri Jehová (1 Crón. 29:1-5). Ri Jehová xubʼan jun pacto rukʼ ri David are chiʼ kʼateʼ xubʼij che che are ta kyakow ri rachoch, xubʼij che che jun chke ri rachalaxik kuqʼat na tzij chbʼe qʼij saq (2 Sam. 7:16). Rumal laʼ, sibʼalaj kkikot riʼ ri David are chiʼ kretaʼmaj che ri kuqʼat na tzij pa Mil Junabʼ are jun rachalaxik. Wariʼ kukʼut chqawach che weneʼ jujun mul kojkun taj kqabʼan ri xqachomaj kqabʼan che upatanexik ri Jehová, are kʼu ri areʼ kojutewchij na. w23.04 16 párrs. 8-10

Kʼo textos re ri Biblia che kojutoʼo are chiʼ kojbʼisonik, junam rukʼ ri textos re ri wuj re Job, ri Salmos y Proverbios xuqujeʼ ri utzij ri Jesús che kʼo pa ri capítulo 6 re Mateo. We kabʼan achʼawem che ri Jehová y kasikʼij ri Biblia, qas kawil na che ri areʼ kukubʼsaj akʼuʼx. Amaqʼel chnaʼtaj wariʼ chqe: paneʼ sibʼalaj kʼax ri tajin kqakʼulmaj pa ri qakʼaslemal, ri Jehová amaqʼel kojutoʼo. Kojuwonobʼa ta kan qatukel (Sal. 23:4). Chnaʼtaj chqe che ri areʼ ubʼim che kojuchajij, kojutoʼo, kukubʼsaj qakʼuʼx y kuya qachuqʼabʼ. Ri Isaías xubʼij che ri Jehová: «Ri lal keʼechajij la pa jamaril ri ko e kʼolik, rumal rech chi kikubʼam kikʼuʼx chij la» (Is. 26:3). Rumal laʼ, chakubʼsaj akʼuʼx chrij ri Jehová y chayaʼ che che katutoʼo. We kabʼan wariʼ, kawil na che kachʼij ri kʼax che kariq pa ri akʼaslemal. w24.01 25 párrs. 16, 17

Wajun versículo riʼ tajin ktzʼaqat pa ri qaqʼij. Xuqujeʼ tajin ketzʼaqat ri e tzij riʼ: «In keʼentijoj na ri awal, konojel kakiriq na nimalaj utzil. Ri sukʼil katukowirisaj na. [...] man kʼo ta chi kʼax kariqo mawi kaxeʼj chi awibʼ, ri xibʼrikil man katresaj ta chi chʼuʼj» (Is. 54:13, 14). Ri Satanás «ri dios kech we qʼij junabʼ riʼ», kkun ta che uqʼatexik utzijoxik ri utzij ri Dios che tajin kbʼan cho ronojel ri uwach Ulew (2 Cor. 4:4). Ri qastzij qʼijilanik xsukʼumax chi jumul. ¡Kʼo ta chi jumul ktzʼilobʼexik! Kʼo ta jun chʼojibʼal che kkibʼan ri winaq kkunik kusach qawach. w24.02 4 párr. 10

Ri oj cristianos qas kqabʼan ri xqabʼij che ri Jehová. Che kqapatanij pa ronojel ri qakʼaslemal. Wariʼ kilitaj rukʼ ri kqachaʼ ubʼanik pa ri qakʼaslemal y ri kqabʼan chuwach ri kʼax che weneʼ kkʼulmataj pa ri qafamilia. Kqakoj qachuqʼabʼ rech kqaya ri kajwataj chke ri qafamilia are kʼu kqabʼan ta nijun jastaq che utz ta kril ri Jehová (Mat. 10:35, 36; 1 Tim. 5:8). Weneʼ jujun taq mul utz ta kojkil ri qafamilia rumal che are kqabʼan ri kubʼij ri Jehová. Ri Jehová xeʼubʼan ri familias y kraj che kkiriq kikotemal (Efes. 3:14, 15). We kqaj kojkikotik, rajawaxik kqabʼan ri ktaqan wi ri Jehová. Ri areʼ nim kril wi ri kqabʼan che upatanexik y ri kqabʼan che kilik ri qafamilia (Rom. 12:10). w24.02 18 párrs. 11, 13