Julio

Ri Jesús xresaj uwach ri kuchomaj y ri kunaʼ ri uTat, y xukʼut rukʼ ri xubʼano, ri xubʼij y are chiʼ xubʼan milagros (Juan 14:9). ¿Jas kqetaʼmaj chrij? Ri Jesús y ri uTat sibʼalaj kojkaj. Rumal laʼ, are chiʼ ri Jesús xpe cho ri uwach Ulew xukoj ri chuqʼabʼ che yaʼom che rumal ri uTat che kitoʼik ri winaq. Jumul e kebʼ winaq che kekaʼy taj xkitaʼ tobʼanik che (Mat. 20:30-34). Y ri Jesús xeʼukunaj rumal che «xel ukʼuʼx chke». Ri tzij «kel ukʼuʼx» pa griego kraj kubʼij ri kunaʼ jun pa ranimaʼ. Are waʼ ri xunaʼ ri Jesús, rumal laʼ xuya kiwa ri kenumik y xeʼukunaj ri e yawabʼibʼ (Mat. 15:32; Mar. 1:41). Rumal laʼ, qas qetaʼm che ri Dios ri «kel ukʼuʼx» y ri uKʼojol sibʼalaj kojkaj, y kʼax kkinaʼo are chiʼ kqariq kʼax (Luc. 1:78; 1 Ped. 5:7). Sibʼalaj kkirayij resaxik uwach ri kʼaxkʼolil che kqariqo. w23.04 3 párrs. 4, 5

Rajawaxik kqachajij qibʼ oj rech kojqaj ta pa mak y rech kqabʼan ta qe jas ri kkibʼan ri winaq. Y rech kqachajij ri qachomanik rajawaxik kqasikʼij ri Biblia, kojbʼe pa ri e riqbʼal ibʼ y kqatzijoj ri utzij ri Dios. Ri Jehová kuya ta bʼe che kqariq jun kʼax che mat neʼ kqachʼijo (1 Cor. 10:12, 13). Rech kqaya ta kan upatanexik ri Jehová pa we kʼaxalaj tiempo riʼ, rajawaxik amaqʼel kqabʼan qachʼawem che y «[koj]chʼaw rukʼ, rukʼ ronojel jikibʼam kʼuxaj» o qanimaʼ (Sal. 62:8). Chqayaʼ nim uqʼij y chqamaltyoxij che ronojel ri uyaʼom chqe. Chqataʼ che che kuya qachuqʼabʼ rech kqaxibʼij ta qibʼ kqatzijoj ri utzij, rech kqachʼij ri e kʼax y rech kojqaj ta pa mak. Kqaya ta bʼe che jun jastaq kojuqʼatej che ubʼanik qachʼawem che ri Jehová. w23.05 7 párrs. 17, 18

¿Jasche kojbʼe pa ri e riqbʼal ibʼ? Rumal che kqaj kqaya uqʼij ri Jehová (Sal. 26:12; 111:1). Y rech kqayalaʼ qachuqʼabʼ pa we kʼaxalaj tiempo che oj kʼo wi (1 Tes. 5:11). Rumal laʼ, are chiʼ kqabʼan qacomentarios tajin kqabʼan we e kebʼ jastaq riʼ. Are kʼu, kʼo jujun jastaq kojuqʼatej che ubʼanik: weneʼ kqaxibʼij qibʼ kqaya qacomentarios, o weneʼ kʼi mul kqayak qaqʼabʼ y kyaʼ ta chqe. Ri apóstol Pablo xubʼij: «Qas kʼu chujok na il». We kqachʼobʼo che rajawaxik kqaya kichuqʼabʼ ri e qachalal, kojutoʼ rech kqaxeʼj ta qibʼ kqaya qacomentarios. Y we kojkun taj kqabʼano, kojkikot kukʼ ri kekunik (1 Ped. 3:8). w23.04 20 párrs. 1-3

Ri qʼatal tzij re Babilonia xuya bʼe chke ri israelitas che ketzalij bʼi pa ri kitinamit paneʼ 70 junabʼ chik e kʼo chilaʼ (Esd. 1:2-4). Are ri Jehová xbʼanow wariʼ. Rumal che ri babilonios kekitzoqopij ta bʼi ri winaq che kekikʼam bʼik (Is. 14:4, 17). Are kʼu xchʼak ri Babilonia, y ri kʼakʼ qʼatal tzij che xok kanoq are ri xyoʼw bʼi bʼe chke ri judíos rech ketzalij bʼi pa ri kitinamit. Ri e tat nan rajawaxik kkilo we kekanaj kan pa Babilonia o keʼel bʼik. Weneʼ e jujun kʼax xkibʼan che uchaʼik ri xkibʼano. E kʼi kkichʼij ta ri bʼe rumal che nim chi kijunabʼ. Y, nikʼaj chik pa Babilonia xekʼiy wi, rumal laʼ e bʼenaq ta chi pa jun chi lugar, xaq xiw kitom chrij riʼ ri tinamit che xekʼiy wi ri katiʼt kimam. Xuqujeʼ e kʼo chi nikʼaj judíos che xeqʼinomar pa Babilonia, rumal laʼ weneʼ kkaj taj kkiya kan ri kachoch o ri kikʼay. w23.05 14 párrs. 1, 2

Ri uTzij ri Dios kubʼij che rajawaxik kqakʼut kochʼonik, toqʼobʼisal wachaj y loqʼoqʼenik. Pa Lucas 21:19 kubʼij: «We ko kixtakʼiʼk, kixkolotaj na». Colosenses 3:12 kubʼij: «Chkʼol toqʼobʼisan wachaj pa ri iwanimaʼ». Y 1 Tesalonicenses 4:9, 10 kubʼij: «Ix tijom kʼu rumal ri Dios jas kibʼano kiloqʼoqʼelaʼ iwibʼ. […] Kixqabʼochiʼj kʼut, qachalal, chiʼ kitaqej na telechinik». Ri kubʼij ri e texto riʼ kchʼaw chkij ri winaq che tajin kkikʼut chi kochʼonik, toqʼobʼisal wachaj y loqʼoqʼebʼal. Are kʼu rajawaxik kkiya ta kan ukʼutik. Rajawaxik je kqabʼan oj. Ri kikʼutbʼal ri nabʼe taq cristianos kojutoʼ rech kqetaʼmaj ri kqabʼan pa ri nimalaj kʼaxkʼolil. w23.07 3 párrs. 4, 8

Ri e chaʼom kebʼe pa ri kaj y ri e nikʼaj chik che kbʼix nikʼaj chij chke, rajawaxik keʼel ta kan pa ri bʼe riʼ (Juan 10:16). Xumaj lo pa 1919 sibʼalaj e kʼi winaq e elenaq lo pa ri Nimalaj Babilonia, kraj kubʼij ri e kojonem che qastzij taj. Y e kʼo chi pa «ri bʼe ri tastalik». Ri Jehová xupak kibʼe ri israelitas che xeʼel lo pa Babilonia rech kkiriq ta kʼax (Is. 57:14). ¿La jeʼ tajin kubʼan kimik pa «ri bʼe ri tastalik»? Jeʼ. Nabʼe kan chuwach ri junabʼ 1919, ri Jehová xeʼukoj achijabʼ rech xkipak ri tastalikalaj bʼe (chajunamisaj rukʼ Isaías 40:3). Rumal laʼ, e kʼi winaq e elenaq lo pa ri qastzij taj kojonem y e okinaq pa ri qastzij kojonem jawiʼ kʼo wi utz achilanik y pa junamam kqʼijilax ri Jehová. w23.05 15, 16 párrs. 8, 9

Ri Jehová kraj che kqapatanij rukʼ kikotemal y rukʼ ronojel qanimaʼ (2 Cor. 9:7). Are kʼu, ¿jasche kqaj kqabʼan jun qameta we qas ta kqaj kqabʼano? Chojchoman chrij ri ukʼutbʼal ri apóstol Pablo. Ri areʼ xubʼij: «Kinbʼan kʼax che ri nucuerpo, kintaqan puwiʼ» (1 Cor. 9:25-27). Ri Pablo xukoj uchuqʼabʼ rech xubʼan ri kqaj chuwach ri Jehová paneʼ jujun taq mul qas ta kraj kubʼano. ¿La xkikot ri Jehová rukʼ ri xubʼan ri Pablo? Xkikotik, rumal che xutewchij ri chak xubʼano (2 Tim. 4:7, 8). Ri Jehová sibʼalaj kkikotik are chiʼ kril ri chuqʼabʼ che kqakojo rech kqabʼan jun meta paneʼ kqaj taj kqabʼano. ¿Jasche? Rumal che retaʼm che kqabʼan ri meta rumal che kqaloqʼoqʼej. Ri Jehová xutewchij ri apóstol Pablo y je kubʼan che qatewchixik oj we kqakoj qachuqʼabʼ (Sal. 126:5). Are chiʼ kqilo che ri Jehová tajin kutewchij ri chuqʼabʼ che kqakojo weneʼ más kqaj kqabʼan ri xqachomaj ubʼanik. w23.05 29 párrs. 9, 10

Ri Pablo xeʼujunamaj ri winaq che ksachisax kiwach rukʼ jun winaq che kwarik. Are chiʼ jun winaq kwarik kunaʼ ta ri kkʼulmatajik y kuchʼobʼ taj jas kubʼano, are laʼ ri kkikʼulmaj ri winaq che kʼo ta kikojonik (Rom. 11:8). Kkikoj taj che oj kʼo chi pa ri kʼisbʼal taq qʼij, paneʼ kʼi jastaq kkʼutuwik y che naqaj chik kʼo wi ri nimalaj kʼaxkʼolil (2 Ped. 3:3, 4). Are kʼu oj qetaʼm che rajawaxik amaqʼel kojkʼaskʼatik (1 Tes. 5:6). ¿Jasche rajawaxik kʼo ri qachomanik pa saq? Rumal che kʼo jastaq kbʼanowik che weneʼ kubʼano che kqanim qibʼ pa política. Más na are chiʼ knaqajin ri uqʼij ri Jehová weneʼ kojtaqchiʼx más rech kqaya ri qatobʼanik pa política, pa manifestaciones, pa ri chʼoj y pa nikʼaj chi kʼax che kbʼan pa ri tinamit. Kqabʼisoj ta más jas kqabʼan chuwach ri e jastaq riʼ, rumal che ri ruxlabʼixel ri Dios kojutoʼ rech utz ri kqachaʼ ubʼanik (Luc. 12:11, 12). w23.06 10 párrs. 6, 7

¿Jas chrij katchoman wi are chiʼ kata chrij ri Sansón? Weneʼ are katchoman chrij ri uchuqʼabʼ che xkʼojik. Qastzij che ri Sansón xkʼojiʼ nimalaj uchuqʼabʼ. Are kʼu, kʼo jun xsach wi rumal laʼ xuriq kʼax. Paneʼ je wariʼ, are kʼu ri Jehová xril ri nimalaj ukojonik che xkʼojik y xuyaʼo che xtzʼibʼax kan ri ubʼiʼ pa ri Biblia rech kʼo kqetaʼmaj chrij. Ri Jehová xukoj ri Sansón rech kutoʼ ri utinamit Israel. Are chiʼ kʼi junabʼ chik kaminaq ri Sansón, ri Jehová xukoj ri apóstol Pablo rech xutzʼibʼaj kan ri ubʼiʼ ri Sansón chkixoʼl ri kibʼiʼ ri winaq che xkʼojiʼ kikojonik (Heb. 11:32-34). Ri Sansón xukubʼsaj ukʼuʼx chrij ri Jehová are chiʼ xuriq nimaʼq taq kʼax. Ri ukʼutbʼal nim kojutoʼ wi y kʼi kqetaʼmaj chrij. w23.09 2 párrs. 1, 2

Jun che kojtoʼwik rech kqachʼij ri kʼax are che kqabʼij che ri Jehová ronojel ri kqanaʼo (1 Tes. 5:17). Weneʼ chanim riʼ tajin ta kariq jun kʼax, are kʼu, ¿jas kabʼano are chiʼ katbʼisonik o kachʼobʼ taj jas kabʼan chuwach jun kʼax? ¿La are kataʼ ri utobʼanik ri Jehová? We amaqʼel kataʼ ri utobʼanik kimik, je kabʼan na riʼ pa ri petinaq are chiʼ knimataj ri kʼaxkʼolil. Rumal che qas awetaʼm che ri areʼ katutoʼo are chiʼ kajwataj chawe (Sal. 27:1, 3). We kqachʼij ri kʼax kimik kojutoʼo rech kqachʼij ri kpe na (Rom. 5:3). ¿Jasche kqabʼij wariʼ? Rumal che e kʼi qachalal kkibʼij che are chiʼ kkichʼij ri kʼax, más kkichʼij chi ri nikʼaj ri kpe chkiwach. Xuqujeʼ más knimar ri kikojonik chrij ri Jehová are chiʼ kkilo che amaqʼel ketoʼ che uchʼijik jun kʼax (Sant. 1:2-4). w23.07 3 párrs. 7, 8

Ri Jehová utz kchomanik rumal che kmachʼachʼik y kutoqʼobʼisaj wachaj. Jun kʼutbʼal, ri Jehová xukʼut machʼachʼem are chiʼ xusachisaj uwach Sodoma. Are chiʼ ri Jehová xeʼutaq bʼi ángeles che ubʼixik che ri Lot che kbʼe pa ri juyubʼ. Ri Lot xubʼij che kraj taj kbʼek rumal che kuxibʼij ribʼ. Rumal laʼ xubʼij che ri Jehová che kraj kbʼe pa ri tinamit Zóar, jun tinamit che xuqujeʼ uchomam usachisaxik uwach ri Jehová. Are kʼu ri Jehová xuya bʼe che ri Lot kbʼe pa Zóar, paneʼ wariʼ kraj kubʼij che kusachisaj ta uwach (Gén. 19:18-22). Are kʼu are chiʼ qʼaxinaq chi ri tiempo xutoqʼobʼisaj uwach Nínive. Are chiʼ xutaq bʼi ri Jonás che ubʼixik chke ri winaq che ksachisax kiwach rumal ri itzelal kkibʼano. Are chiʼ ri winaq xkikʼex ri kikʼaslemal, ri Jehová xutoqʼobʼisaj kiwach y xusach kimak (Jon. 3:1, 10; 4:10, 11). w23.07 21 párr. 5

Junam rukʼ jun cheʼ che okinaq ta bʼi ri raʼ pa ri ulew y rech ktzaq taj rajawaxik jun toqʼabʼal re. Je xukʼulmaj ri Jehoás are chiʼ xkam ri Jehoiadá, xutaʼ ri molom taq tzij y xuya kan upatanexik ri Jehová. Kʼo kqetaʼmaj chrij ri xkʼulmatajik, are wariʼ: kqapatanij ta ri Jehová xa rumal che je kkibʼan ri e qachalal o ri e qafamilias. Rech kʼo jun ko qakojonik, nim kqil wi ri Jehová y kqaloqʼoqʼej, rajawaxik kqanikʼoj uwach ri Biblia, kojchoman chrij y kqabʼan qachʼawem che ri Jehová (Jer. 17:7, 8; Col. 2:6, 7). Ri Jehová kutaʼ ta kʼaxalaj taq jastaq chqe che kojkun ta che ubʼanik. Xaneʼ kubʼij wariʼ chqe pa Eclesiastés 12:13: «Nim bʼaʼ chawilaʼ wi ri Dios cheʼatzʼaqatisaj taq kibʼanik ri e utaqomal, are kʼu waʼ ri rajawaxik ubʼanik rumal ronojel winaq». We kqaxej qibʼ chuwach ri Jehová kojkunik kqachʼij apachike uwach kʼax y amaqʼel kojux sukʼ chuwach ri Jehová, junam rukʼ ri xkibʼan ri Abdías y Jehoiadá. Kʼo ta jun riʼ ksachow uwach ri qachilanik rukʼ ri Jehová. w23.06 19 párrs. 17, 19

Ri eyebʼal che kutzujuj ri Dios kumajij rukʼ wa taq tzij riʼ: «Xubʼij ri tʼuyul puwiʼ ri tem re ajawibʼal» (Apoc. 21:5a). Waʼ taq tzij riʼ sibʼalaj nim ubʼanik rumal che are jun chke ri oxibʼ visiones che kubʼij pa Apocalipsis. Wajun profecía riʼ are ri Jehová kbʼinik are ta ri Jesús ni ri ángeles. Wariʼ qas kuya kubʼsal kʼuʼx chqe rumal che ri Jehová «man bʼanal ta tzij» (Tito 1:2). Qastzij che ri kubʼij Apocalipsis 21:5, 6 kubʼano che qas kqakubʼsaj qakʼuʼx chrij. Chqilaʼ ri tzij «chawilampeʼ». Ri tzij «chawilampeʼ» pa griego, kʼi mul kriqitaj pa ri wuj Apocalipsis. Ri Dios kubʼij: «Kinbʼan kʼakʼ chke konojel ri jastaq». Paneʼ ri Jehová kchʼaw chrij ri kukʼex na pa ri petinaq, are kʼu rumal che qas kebʼantaj na, kchʼaw chrij che jetaneʼ tajin kubʼan chik (Is. 46:10). w23.11 3, 4 párrs. 7, 8

Ri apóstol Pedro xuya ta kan ukojik uchuqʼabʼ chrij ri itzel taq uchomanik rech kchʼakan puwiʼ. Chqilampeʼ, are chiʼ ri Jesús xubʼij che kuriq na kʼax y che kkamisax na rech ketzʼaqat ri profecías re ri Biblia, are kʼu ri Pedro xuyajo (Mar. 8:31-33). Xa ta jumul che ri Pedro y ri nikʼaj chi tijoxelabʼ xechʼojinik rech kketaʼmaj jachin ri más nim uqʼij chke (Mar. 9:33, 34). Are chiʼ xa jubʼiqʼ chi kraj che kkamisax ri Jesús, ri Pedro petinaq royowal y xresaj ri uxikin jun achiʼ (Juan 18:10). Pa wajun chaqʼabʼ riʼ sibʼalaj xuxiʼj ribʼ, rumal laʼ oxibʼ mul xubʼij che kuchʼobʼ ta uwach ri Jesús (Mar. 14:66-72). Rumal ri xubʼano xoqʼ rukʼ kʼayil. Ri Jesús xuchomaj taj che ri Pedro kʼo ta chi kkun che ubʼanik. Are chiʼ ri Jesús kʼastajinaq chik, xubʼij che ri Pedro che kloqʼoqʼex rumal. Xubʼij che che keʼuchajij ri alaj taq uchij (Juan 21:15-17). Ri Pedro sibʼalaj xkikotik. Rumal laʼ kʼo pa Jerusalén pa ri Pentecostés y are jun chke ri nabʼe che xchaʼ rukʼ ri uxlabʼixel rech kbʼe pa ri kaj. w23.09 22 párrs. 6, 7

Ri apóstol Pedro xubʼij wariʼ chke nikʼaj chi kʼamal taq bʼe: «Cheʼiyuqʼuj ri jumulaj chij re ri Dios» (1 Ped. 5:1-4). Qas qetaʼm che ri kʼamal taq bʼe kekiloqʼoqʼej ri qachalal y kkaj kekitoʼo. Are kʼu weneʼ jujun taq mul kkinaʼo che kekun ta che ubʼanik wariʼ, rumal che kʼo kʼi kkibʼano y kekosik. We je tajin kakʼulmaj, ¿jas katkunik kabʼano? Chabʼij che ri Jehová ri kanaʼo. Ri Pedro xutzʼibʼaj wariʼ: «We kʼo jun kpataninik, chpataninoq je jas rukʼ ri kuʼinem ri kuyaʼ ri Dios» (1 Ped. 4:11). Weneʼ ri qachalal kajwataj tobʼanik chke rumal che tajin keqʼax pa jun kʼaxkʼolil. Are kʼu chnaʼtaj chawe che ri Jesús are, «ri Kinimal ri ajyuqʼabʼ», ri areʼ kkunik kuya ri tobʼanik che kajwataj chawe kimik y pa ri kʼakʼ uwach Ulew. Ri Jehová kraj che ri kʼamal taq bʼe kekiloqʼoqʼej ri qachalal, kekichajij y keʼux «jun kʼutbʼal chkiwach». w23.09 29, 30 párrs. 13, 14

We xaq junam ri qachomanik kukʼ ri winaq, kqaxutuj kan riʼ ri Jehová y kqanimaj ta chi riʼ ri utaqanik (1 Cor. 3:19). «Ri kinoʼj kʼut ri winaq cho ri uwach ulew» kojutaqchiʼj rech are kqabʼan ri qarayibʼal. Chqilampeʼ ri xkʼulmataj pa ri congregaciones re Pérgamo y Tiatira. E jujun cristianos xekiqʼijilaj tyox y xemakun kukʼ achijabʼ ixoqibʼ. Rumal laʼ ri Jesús ko xeʼuchʼabʼej ri kebʼ congregaciones riʼ (Apoc. 2:14, 20). Kimik xuqujeʼ ri winaq kojkitaqchiʼj rech junam kojchoman kukʼ. Weneʼ ri qafamiliares kkibʼij chqe che kqabʼan ri kqaj y are ta kqanimaj ri Jehová. O weneʼ kkibʼij chqe che kʼo ta kubʼano kqabʼan ri kqarayij oj y kʼo ta chi upatan ri kubʼij ri Biblia. Weneʼ jujun taq mul kqachomaj che ri taqanik che kuya ri Jehová qas ta qʼalaj. O weneʼ kqachomaj «jastaq ri kʼo na chuwach ri tzʼibʼatalik» (1 Cor. 4:6). w23.07 16 párrs. 10, 11

Ri María, ri unan ri Jesús, xajwataj tobʼanik che rech xubʼan ri urayibʼal ri Jehová. Qastzij riʼ che xuxiʼj ribʼ are chiʼ ri ángel Gabriel xubʼij che che kyaʼ na jun nimalaj eqeleʼn che. Kux na yawabʼ ixoq che kʼulan taj. Retaʼm taj jas kubʼan che ukʼiysaxik jun akʼal, are kʼu ri ral kux na ri Mesías. Kʼo ta jumul qʼoyolinaq rukʼ jun achi y rumal laʼ retaʼm taj jas kubʼan che ubʼixik che ri José che yawabʼ ixoq chik (Luc. 1:26-33). ¿Jas xubʼan ri María rech xkunik xubʼan wajun eqeleʼn riʼ che xyaʼ che? Xutzukuj ri kitobʼanik ri nikʼaj chik. Jun kʼutbʼal, xubʼij che ri ángel Gabriel che kuqʼalajisaj che jas ubʼanik riʼ ri eqeleʼn che xyaʼ che rumal ri Dios (Luc. 1:34). Tekʼuriʼ, «aninaq xbʼe pa jun tinamit re Judá ri kʼo pa taq juyubʼ» rech kerilaʼ ri Elisabet. Ri Elisabet xubʼij utz taq tzij che ri María y rukʼ ri ruxlabʼixel ri Dios xubʼij ri ubʼim kan jun profecía chrij ri ral ri María (Luc. 1:39-45). Y ri María xubʼij, che ri Jehová «ubʼanom nimaʼq taq jastaq» (Luc. 1:46-51). Ri Jehová xukoj ri ángel Gabriel y ri Elisabet rech xkiya uchuqʼabʼ ri María. w23.10 14, 15 párrs. 10-12

E kʼo 144,000 winaq che xechaʼ rumal ri Dios rukʼ ri uxlabʼixel y che kʼo jun utz achilanik chkixoʼl rukʼ ri Jehová. Ri e areʼ keʼux na e kojol tabʼal toqʼobʼ rukʼ ri Jesús pa ri kaj (Apoc. 14:1). Are chiʼ kʼa e kʼo na cho ri uwach Ulew, ri Dios kuya ri ruxlabʼixel pa kiwiʼ y keʼux na ralkʼwal. Ri Santo re ri tabernáculo kukʼutunisaj ri achilanik che kʼo chkixoʼl ri Jehová kukʼ ri 144,000 (Rom. 8:15-17). Ri Santísimo re ri tabernáculo kukʼutunisaj ri kaj che kʼo wi ri Jehová. Ri cortina che kʼo chkixoʼl ri Santo y ri Santísimo are kukʼutunisaj ri ucuerpo ri Jesús. Rukʼ ri ucuerpo kkun taj kok pa ri kaj rech kux kinimal ri kojol tabʼal toqʼobʼ pa ri templo espiritual. Are chiʼ ri Jesús xuya ri ukʼaslemal rumal kech ri winaq, wariʼ xuya bʼe che ri 144,000 cristianos kekunik kebʼe pa ri kaj. Ri e chaʼom rech kebʼe pa ri kaj, rajawaxik kkiya kan ri kicuerpo rech kekunik keʼok pa ri kaj (Heb. 10:19, 20; 1 Cor. 15:50). w23.10 28 párr. 13

Are chiʼ xyoqʼ ri Gedeón kumal ri achijabʼ re Efraín aninaq taj xpe royowal (Juec. 8:1-3). Xaneʼ xeʼutatabʼej ri achijabʼ riʼ, rukʼ machʼachʼem y utzalaj taq tzij xkunik xuqasaj ri koyowal. Are je kkibʼan ri kʼamal taq bʼe ri kʼo kinoʼj, aninaq taj kpe koyowal rukʼ ri kbʼix chke xaneʼ kkitatabʼej ri winaq y rukʼ utz taq tzij ketzijon rukʼ (Sant. 3:13). Ri kkibʼan ri e kʼamal bʼe riʼ sibʼalaj ktobʼanik rech kʼo jamaril pa ri congregación. Are chiʼ ri Gedeón xekichʼak ri madianitas, xraj che are xyaʼ uqʼij ri Jehová are ta ri areʼ (Juec. 8:22, 23). ¿Jas kkibʼan ri kʼamal taq bʼe che resaxik uwach ri Gedeón? Kkiya uqʼij ri Jehová rukʼ ri kekun che ubʼanik (1 Cor. 4:6, 7). Jun kʼutbʼal, are chiʼ kbʼix che jun kʼamal bʼe che sibʼalaj utz kubʼan che uyaʼik jun tijonik o jun chʼabʼal. Utz che kubʼij che pa ri uTzij ri Dios xresaj wi y che are ri utinamit ri Jehová yaʼowinaq ri tijonik che. Utz che ri kʼamal taq bʼe kkitaʼ chbʼil kibʼ che we ri kkikʼutu kuya uqʼij ri Jehová o xa are kyaʼ kiqʼij. w23.06 4 párrs. 7, 8

We ri Jehová uyaʼom ta ri qatom che, kojkunik kojchoman chrij wariʼ: «¿La qas utz ri tajin kintaʼ che ri Dios?». Kʼi taq mul kqachomaj che qetaʼm ri kajwataj chqe. Are kʼu weneʼ ri kqatoʼ are ta ri qas kajwataj chqe. Weneʼ tajin kqataʼ che ri Dios ri kqaj che kubʼan che resaxik ri kʼax che tajin kqakʼulmaj, are kʼu weneʼ ri areʼ jalan ri kubʼan che usukʼumaxik. Y weneʼ jujun chke ri kqataʼ che ri Dios kʼo ta ubʼanik rukʼ ri urayibʼal (1 Juan 5:14). Jun kʼutbʼal, chojchoman chkij ri nan tat che xkitaʼ che ri Jehová che kutoʼ ri kalkʼwal rech kuya ta kan upatanexik. Weneʼ kqachomaj che utz ri xkitoʼ. Are kʼu ri Jehová kutaqchiʼj ta jun winaq rech kpatanin che. Ri Jehová kraj che qonojel y ri e qalkʼwal kojpatanin che rumal che are laʼ ri qas kqaj (Deut. 10:12, 13; 30:19, 20). Rumal laʼ, ¿jas rajawaxik kkitaʼ ri nan tat riʼ che ri Jehová? Che ketoʼ rumal rech ri kkibʼano y ri kkibʼij kopan pa ranimaʼ ri kalkʼwal je wariʼ kraj kux rachiʼl ri Jehová xuqujeʼ kuloqʼoqʼej (Prov. 22:6; Efes. 6:4). w23.11 21 párr. 5; 23 párr. 12

¿Jasche kqabʼij che ukubʼsaxik kikʼuʼx nikʼaj chik are jun ukʼutik che keqaloqʼoqʼej? Jun wuj kubʼij che ri tzij «kubʼsal ukʼuʼx» pa griego che xukoj ri Pablo kraj kubʼij «che kojkʼojiʼ rukʼ jun winaq che kbʼisonik y kqakubʼsaj ukʼuʼx». Rumal laʼ, are chiʼ kqakubʼsaj ukʼuʼx jun qachalal che tajin kuriq jun kʼax, kqatoʼo rech kuya ta kan upatanexik ri Jehová. Are chiʼ jun qachalal kajwataj tobʼanik che rumal jun kʼax che tajin kuriqo, we kqaya tobʼanik che tajin kqakʼut riʼ che kqaloqʼoqʼej (2 Cor. 7:6, 7, 13). Unaʼik toqʼobʼisal wachaj y ukubʼsaxik ukʼuʼx jun winaq nim ubʼanik. ¿Jasche kqabʼij wariʼ? Are chiʼ kel qakʼuʼx che jun winaq che tajin kuriq kʼax, kqaj kqaya tobʼanik che. Nabʼe kel qakʼuʼx che ri winaq tekʼuriʼ kqaya kubʼsal kʼuʼx che. Are jeʼ kubʼan ri Jehová qukʼ. Ri Pablo xubʼij che ri toqʼobʼisal wachaj che kunaʼ ri Dios chke ri winaq wariʼ kubʼano che kraj kukubʼsaj kikʼuʼx. Y xubʼij che ri Jehová «are Tataxel waʼ ri kutoqʼobʼisaj qawach, are Dios waʼ ri kukubʼsaj qakʼuʼx pa ronojel» (2 Cor. 1:3). w23.11 9, 10 párrs. 8-10

Qonojel ri oj cristianos qetaʼm che kojqʼax pa kʼi taq kʼax. Chojchoman chrij ri xubʼij ri apóstol Pablo pa Tesalónica: «Are taq kʼa oj kʼo iwukʼ, qabʼim uloq chiwe chi kqariq na kʼaxkʼolil; jas ri xkʼulmaxik, jas ri iwetaʼm» (1 Tes. 3:4). Y xubʼij wariʼ chke ri corintios: «Kqaj kʼut, wachalal, chi kiwetaʼmaj jas ri kʼax ri xqariq pa Asia [...] kʼo ta chi kulbʼal qakʼuʼx chrij chi kojkʼasiʼk» (2 Cor. 1:8; 11:23-27). Y qetaʼm che ri oj cristianos kojqʼax na pa kʼi taq kʼax kimik (2 Tim. 3:12). Weneʼ ri awachiʼl y ri afamilia ketzeʼn chawij o weneʼ kibʼanom kʼax chawe. ¿La ariqom kʼax pa ri achak rumal che kakoj achuqʼabʼ che ubʼanik ri utzilal? (Heb. 13:18). ¿La kibʼanom kʼax ri qʼatal taq tzij chawe rumal che katzijoj ri utzij ri Dios chke ri nikʼaj? Apastaneʼ ri kʼax che kqakʼulmaj, ri Pablo xubʼij che rajawaxik kojkikotik. w23.12 10, 11 párrs. 9, 10

Ri Jacob xuriq kʼi kʼax. E kebʼ chi ukʼojol, Simeón y Leví xkesaj ukʼixbʼal ri kifamilia y ri Jehová. Y xaq uwiʼ chik xkam ri Raquel are chiʼ xkʼojiʼ ri ukabʼ ral. Xuqujeʼ rumal ri wiʼjal che xkʼulmataj pa ri utinamit xbʼe pa Egipto paneʼ riʼj chik (Gén. 35:16-19; 37:28; 45:9-11, 28). Paneʼ ri Jacob sibʼalaj xuriq kʼax, are kʼu xuya ta kan ukubʼsaxik ukʼuʼx chrij ri Jehová y chrij ri utzujunik. Ri Jehová xukʼut chuwach che kkikot rukʼ, rumal che xutewchij rukʼ kʼi rawaj. Y are chiʼ xril chi na uwach ri José qastzij riʼ che sibʼalaj xumaltyoxij che ri Jehová. Ri Jacob xuchʼij ronojel ri e kʼax riʼ rumal che sibʼalaj nim ri rachilanik rukʼ ri Jehová (Gén. 30:43; 32:9, 10; 46:28-30). Xuqujeʼ ri oj kojkunik kqachʼij ri kʼax we kʼo jun nim qachilanik rukʼ ri Jehová. w23.04 15 párrs. 6, 7

Pa Salmo 23, ri qʼatal tzij David xuya ubʼixik che qas kloqʼoqʼexik y kchajix rumal ri Jehová. Xubʼij che ri Jehová are ri Rajyuqʼ y xchʼaw chrij ri achilanik che kʼo chkixoʼl. Ri David qas xukoj wariʼ rumal che retaʼm che are ri Jehová ri tajin kkʼamow ubʼe. Y xukubʼaʼ ukʼuʼx chrij. Qas retaʼm che amaqʼel kloqʼoqʼex rumal ri Jehová. Chqilampeʼ jasche rukʼ ronojel ranimaʼ xubʼij wariʼ. Ri qʼatal tzij David qas xrilo che ri Jehová qas xuchajij rumal che xuya ronojel ri kajwataj che. Xuqujeʼ retaʼm che kʼo jun utz achilanik chkixoʼl rukʼ. Rumal laʼ ri qʼatal tzij David qas xukubʼaʼ ukʼuʼx che ri Jehová kuya ri tobʼanik che are chiʼ kukʼulmaj jujun taq kʼax. Retaʼm che ri uloqʼoqʼenik ri Jehová más nim na ubʼanik chuwach ri kʼax che kuriqo y wariʼ xuya kulbʼal kʼuʼx y kikotemal che (Sal. 16:11). w24.01 29 párrs. 12, 13

Are chiʼ xkʼis ri Segunda Guerra Mundial, ri upatanelabʼ ri Jehová xekunik xkitzijoj ri utzij ri Dios pa jalajoj taq tinamit. E kʼi winaq xketaʼmaj uwach ri Jehová y kimik tajin ktzijox ri utzij ri Dios pa ronojel ri uwach Ulew. Kimik, ri Jupuq Ajkʼamal bʼe cho ronojel uwach Ulew amaqʼel kkitzukuj ri utobʼanik ri Cristo. Kkaj che rojonel ri kkiya ubʼixik chke ri qachalal qas kqaj chuwach ri Jehová y ri Jesús. Xuqujeʼ kekikoj ri solinelabʼ re circuito y ri kʼamal taq bʼe rech kkibʼij chke ri qachalal ri rajawaxik kkibʼano. Ri e kʼamal taq bʼe che kebʼe pa ri kaj —xuqujeʼ ri kʼamal taq bʼe pa ri congregaciones— e kʼo «pa uqʼabʼ re uwikiʼaqʼabʼ» ri Cristo (Apoc. 2:1). Rumal che ri kʼamal taq bʼe e ajmakibʼ, weneʼ jujun taq mul kesachik junam rukʼ ri xubʼan ri Moisés, ri Josué y ri apóstoles (Núm. 20:12; Jos. 9:14, 15; Rom. 3:23). Are kʼu qas qetaʼm che are ri Jesús kkʼamow kibʼe ri Jupuq Ajkʼamal bʼe cho ronojel uwach Ulew y ri kʼamal taq bʼe pa ri congregación y kuya ta kan ubʼanik wariʼ. Rumal laʼ, qas chqakubʼaʼ qakʼuʼx chkij ri qachalal che ukojom ri Jehová che ukʼamik qabʼe. w24.02 23, 24 párrs. 13, 14

Oj xuqujeʼ kojkunik kqaya uqʼij ri Jehová are chiʼ rukʼ utz taq tzij kqaya ubʼixik ri utz taq jastaq chrij ri areʼ chke ri winaq. Ri kqaj are chiʼ kqatzijoj ri utzij ri Dios chke ri winaq are che kketaʼmaj uwach y kkiloqʼoqʼej junam qukʼ oj (Sant. 4:8). Rukʼ kikotemal kqakʼut chkiwach ri winaq rukʼ ri Biblia ri utz taq ubʼantajik ri Jehová, junam rukʼ ri uloqʼoqʼebʼal, ri usukʼilal, ri unojibʼal y ri uchuqʼabʼ. Jun chik che kojkunik kqabʼano rech kqaqʼijilaj ri Jehová y kqakikotemaj ri ranimaʼ are che kqesaj uwach ri utz taq ubʼantajik. Are chiʼ kqakʼut ri utz taq bʼantajik riʼ, ri winaq kkilo che oj junam ta kukʼ ri nikʼaj chik y weneʼ kechoman chrij jasche oj junam taj (Mat. 5:14-16). Qastzij riʼ che kʼo qʼij che kqabʼij chke ri rumal che kqabʼan wariʼ. Y ri winaq che kʼo jun utz kanimaʼ kkaj kketaʼmaj uwach ri Dios. Are chiʼ kqabʼan wariʼ tajin kqaya uqʼij ri Jehová y kqakikotemaj ri ranimaʼ (1 Tim. 2:3, 4). w24.02 10 párr. 7

Rech katux jun cristiano che kʼo nim ukojonik, rajawaxik kawetaʼmaj ubʼanik jujun taq chak. Ri e chak riʼ katutoʼo rech kabʼan ri eqeleʼn che kyaʼ chawe pa ri congregación, rech kariq ri kajwataj chawe pa ri akʼaslemal, ri kajwataj che ri afamilia y at utz kukʼ ri nikʼaj chik. Jun kʼutbʼal qas chawetaʼmaj kattzʼibʼanik y katsikʼinik. Ri Biblia kubʼij che ri achi che kusikʼij ri Biblia y che amaqʼel kchoman chrij, are riʼ ri kkikotik y ronojel utz kel ri kubʼano (Sal. 1:1-3). Wariʼ ktobʼan che rech kretaʼmaj ri kuchomaj ri Jehová y kubʼano che qas utz ri kuchaʼ ubʼanik (Prov. 1:3, 4). Ri e qachalal kajwatajik chi ketoʼik y kyaʼ utz taq pixabʼ chke. We awetaʼm katsikʼinik y kattzʼibʼanik, qas katkun riʼ katijoj awibʼ che jun discurso o kaya acomentario che kuya kichuqʼabʼ ri e qachalal. Xuqujeʼ utz che katzʼibʼaj ri pixabʼ che kukowirisaj ri akojonik y keʼutoʼ e nikʼaj chi qachalal. w23.12 26, 27 párrs. 9-11

Are chiʼ kanaʼ xibʼin ibʼ, chatchoman chrij ri kubʼan na ri Jehová pa ri petinaq. Chatchoman chrij are chiʼ ksachisax uwach ri Satanás. Pa ri nim riqbʼal re oxibʼ qʼij che xbʼan pa ri junabʼ 2014 xyaʼ jun kʼutbʼal chrij ri qeyebʼal. Pa ri kʼutbʼal xilitaj jun qachalal che tajin kubʼij chke ri ufamilia ri kbʼan che usikʼixik ri profecía che kʼo pa 2 Timoteo 3:1-5 wet chrij ri kʼakʼ uwach Ulew kchʼaw wiʼ: «Pa ri kʼakʼ uwach Ulew kkʼojiʼ na utzilal. Rumal che ri winaq kkiloqʼoqʼej na kibʼ; kkiloqʼoqʼej na ri uTzij ri Dios, kkimachʼ na kibʼ, kkiqʼijilaj ri Dios, keniman na chke ri kitat kinan, kemaltyoxinik, chʼajchʼoj ri kikʼaslemal, kekiloqʼoqʼej na ri kifamilia, e kuyunelabʼ, kkibʼij ri qastzij, kkijikʼ kibʼ, kpe ta chi koyowal, kkiloqʼoqʼej ri utzilal, kuya kkubʼsax kʼuʼx chkij, kkibʼan ta nimal, are kkiloqʼoqʼej ri Dios y are ta kkibʼan ri kirayibʼal y qas kkinimaj ri Dios. Amaqʼel chatkʼol kukʼ ri winaq riʼ». ¿La amaqʼel kojchʼaw chrij ri kʼakʼ uwach Ulew kukʼ ri qafamilia o kukʼ ri qachalal? w24.01 6 párrs. 13, 14

¡Sibʼalaj kuya kikotemal chqe are chiʼ kqetaʼmaj che Jehová kkikot rukʼ ri utinamit! (Sal. 149:4). Are kʼu, weneʼ jujun kubʼan kebʼ kikʼuʼx y kkichomaj: «Qastzij che ri Jehová kkikot rukʼ ri utinamit, are kʼu ¿la kkikot wukʼ in?». E kʼi chke ri upatanelabʼ ri Dios re ojer kanoq kʼax xkibʼan che ukojik che ri Jehová kkikot kukʼ (1 Sam. 1:6-10; Job 29:2, 4; Sal. 51:11). Ri Biblia kubʼij che paneʼ oj ajmakibʼ taq winaq kojkunik kqabʼano che ri Jehová kkikot qukʼ. ¿Jas rajawaxik kqabʼano? Rajawaxik kqakʼutu che kojkojon chrij ri Jesús y kqabʼan qasanjaʼ (Juan 3:16). Je wariʼ kqakʼut chkiwach konojel che xqakʼex ri qakʼaslemal y che xqabʼij che ri Jehová che kqabʼan ri urayibʼal (Hech. 2:38; 3:19). Ri Jehová sibʼalaj kkikotik are chiʼ krilo che kqabʼan wariʼ rech kojkunik kojux rachiʼl. We kqakoj qachuqʼabʼ che ubʼanik ri xqatzujuj che ri Jehová are chiʼ xqajach ri qakʼaslemal che, wariʼ kubʼano che ri areʼ kojuchajij y kuyaʼo che kojux rachiʼl (Sal. 25:14). w24.03 26 párrs. 1, 2

Chqesaj kiwach ri utijoxelabʼ ri Jesús we ri qʼatal taq tzij kkiqʼatej qawach che utzijoxik ri utzij ri Dios. Chqataʼ che ri Jehová che kojutoʼ chuwach ri kʼax. Kʼi chqe tajin kqariq kʼax rumal che xkam jun qachalaxik o jun qachiʼl, kbʼan kʼax chqe rumal ri qakojonik, qariqom jun yabʼil o kʼo kʼax pa ri qafamilia. Ri pandemias y ri e chʼoj más uchʼitom ri e kʼax riʼ. Rumal laʼ, chabʼij ronojel che ri Jehová junam ri kabʼan rukʼ jun awachiʼl. Ri areʼ qas katutoʼ na (Sal. 37:3, 5). Ubʼanik qachʼawem amaqʼel kojutoʼ che uchʼijik ri kʼax (Rom. 12:12). Ri Jehová retaʼm ronojel ri kkikʼulmaj ri upatanelabʼ y keʼutatabʼej «are taq kkitzʼonoj ri utobʼanik» (Sal. 145:18, 19). w23.05 5, 6 párrs. 12-15

Are chiʼ kqachaʼ ubʼanik jun jastaq pa ri qakʼaslemal che nim ubʼanik, rajawaxik kojchoman chrij «jas ri urayibʼal» ri Jehová y kqabʼano (Efes. 5:17). Are chiʼ kqatzukuj pixabʼ chrij ri kqaj kqabʼan pa ri qakʼaslemal, rukʼ wariʼ tajin kqakʼutu che kqaj kqetaʼmaj ri kuchomaj ri Jehová chrij ri kqachaʼ ubʼanik. Y are chiʼ kqabʼano, qas utz riʼ ri kqachaʼ ubʼanik pa ri qakʼaslemal. Ri Satanás kraj che are kbʼe qakʼuʼx chrij ri jastaq pa ri uwach Ulew y kqaya ta chi qatiempo che upatanixik ri Dios (1 Juan 5:19). Weneʼ kʼax taj che kbʼe qakʼuʼx chrij ri pwaq, ri e tijobʼal re wajun uwach Ulew riʼ o ri chak y are ta chi kqapatanij ri Jehová. We tajin kqakʼulmaj wariʼ, kukʼutu che tajin kqabʼan chi qe ri kkibʼan ri winaq che kkipatanij ta ri Dios. Qastzij che awas ta ri jastaq riʼ, are kʼu kqaj taj che are ri más nim ubʼanik pa ri qakʼaslemal. w24.03 24 párrs. 16, 17