¿La ksach na uwach ri xibʼin ibʼ y ri itzelal?

Cho ri uwach Ulew kʼo kʼi itzelal, y jujun taq mul kbʼan kʼax chke ri winaq rech kexibʼixik, rech kkʼex jun qʼatal tzij, jun kojonem o jun chik. Are chiʼ kbʼan kʼax chke ri winaq, weneʼ kkichomaj wariʼ: «¿La kel ukʼuʼx ri Dios chqe? ¿Jasche kqakʼulmaj wariʼ? ¿La ksachisax na uwach ri xibʼin ibʼ che kuya ri itzelal? ¿Jas kojkunik kqabʼano rech kqaxeʼj ta qibʼ chuwach ri itzelal?». Ri Biblia kutzalij kiwach ri preguntas riʼ.

¿Jas kuchomaj ri Dios chrij ri itzelal?

Ri Dios itzel kril ri chʼoj y ri itzelal (Salmo 11:5; Proverbios 6:16, 17). Ri Jesús, ri uKʼojol ri Dios utz ta xrilo are chiʼ ri utijoxelabʼ xechʼojinik (Mateo 26:50-52). E jujun winaq kkibʼan kʼax chke nikʼaj chik y kkibʼij che are waʼ ri kraj ri Dios. Are kʼu ri Dios utz ta kril wariʼ y kuta ta ri kichʼawem (Isaías 1:15).

Ri Dios kel ukʼuʼx chke konojel ri winaq che kkiriq kʼax xuqujeʼ ri kkiriq kʼax rumal ri itzelal (Salmo 31:7; 1 Pedro 5:7). Xuqujeʼ, ri Biblia kubʼij che ri Dios kusachisaj na uwach ri itzelal (Isaías 60:18).

¿Jasche kʼo itzelal?

Ri Biblia kuya ubʼixik jasche kʼo itzelal: «Ri kuʼinem ri kʼo rukʼ ri winaq che ubʼanik kʼax che ri rajil utzʼaqat» (Eclesiastés 8:9). Pa kʼi taq junabʼ ri winaq che kʼo nim kitaqanik kikojom ri xibʼin ibʼ rech kkibʼan kʼax chke nikʼaj chik. Rumal ri kʼax che bʼanom chke, jujun winaq kkibʼan kʼax chke e nikʼaj chik (Eclesiastés 7:7).

Ksachisax na uwach ri itzelal

Ri Dios kubʼij che kusachisaj na uwach ri itzelal xuqujeʼ ri xibʼin ibʼ y kukʼam na lo jamaril cho ri uwach Ulew (Isaías 32:18; Miqueas 4:3, 4). Ri Dios kubʼan na wariʼ:

Kusachisaj na ri rumal che kʼo itzelal. Ri Dios kukoj na ri uQʼatbʼal tzij che ukʼexwach ri kiqʼatbʼal tzij ri winaq, jun Qʼatbʼal tzij pa ronojel ri uwach Ulew. Ri Jesucristo, ri kqʼatow tzij pa ri uQʼatbʼal tzij ri Dios, kuqʼat na tzij rukʼ sukʼilal y kusachisaj uwach ri kʼax y ri itzelal (Salmo 72:2, 14). Are chiʼ kkʼulmataj wariʼ kʼo ta chi itzelal y xibʼin ibʼ. Konojel ri winaq «kejeqiʼ na pa tzʼaqatalaj jamaril» (Salmo 37:10, 11).
Kusukʼumaj na ri kʼax che uyaʼom ri itzelal. Ri Dios keʼukunaj na ri winaq che kiriqom kʼax rumal ri itzelal y kresaj na ri xibʼin ibʼ (Isaías 65:17; Apocalipsis 21:3, 4). Xaq xiw ta wariʼ. Ri Dios kubʼij che keʼukʼastajisaj na ri e kaminaq chik: keʼukʼastajisaj pa jun jeʼlalaj uwach Ulew che kʼo wi jamaril (Juan 5:28, 29).

Ri Biblia kukʼut chqawach ri rumal che kqakojo che naj ta chi kraj che ri Dios kusukʼumaj ri kʼax. Are kʼu weneʼ kachomaj jasche ri Dios usachisam ta uwach ri itzelal. We kawaj kawetaʼmaj ri respuesta, chawilaʼ ri video ¿Jasche uyaʼom ri Dios che kʼo kʼaxkʼolil?

Ri Biblia keʼutoʼ ri winaq che kkiriq kʼax rumal ri itzelal

Ri Biblia kchʼaw chrij kebʼ jastaq che kkunik kojutoʼo:

● Kqabʼan qachʼawem che ri Dios (Filipenses 4:6, 7).

● Uchomaxik ri eyebʼal che kuya ri Biblia chqe (Hebreos 6:19).

We kawaj kawetaʼmaj más chrij ri pixabʼ che kuya ri Biblia, chawilaʼ ri kʼutunem «¿Jas kinbʼano rech kinchoman ta más chrij ri kkʼulmatajik?».
Ri testigos rech Jehová che kiriqom kʼax rumal ri itzelal e toʼom kumal ri e kachiʼl re ri kikojonem. Chqilaʼ kebʼ kʼutbʼal:

Natalia y ri ral che kʼo nueve ujunabʼ, Aslán, e kʼo pa ri escuela re Beslán (Rusia) are chiʼ xeʼok bʼi jun jupuq terrorista xekichap más che 1,000 winaq y kekaj taj kekitzoqopij. Sibʼalaj bʼisobʼal, rumal che e kʼi xekamik más na ri akʼalabʼ. Paneʼ Natalia y Aslán xekam taj, are kʼu xuya kan xibʼin ibʼ chke. Chawilaʼ ri xetowik.
Pablo y Sophie xkam ri kalkʼwal are chiʼ xtukix ri Torres Gemelas pa Nueva York. Pa wajun video riʼ, kawil ri uyaʼom tobʼanik chke y chke nikʼaj chik che kiriqom kʼax rumal ri itzelal.