¿La xa kkijach kiwach ri familias ri testigos rech Jehová o xa ketobʼanik rech kkiriq utzilal?

Ri oj testigos rech Jehová kqakoj qachuqʼabʼ rech kkʼojiʼ utzilal pa ri qafamilia xuqujeʼ ri kifamilias ri qakʼulja. Sibʼalaj nim kqil wi ri qafamilia rumal che qetaʼm che are ri Dios xyaʼowik (Génesis 2:21-24; Efesios 3:14, 15). Ri Dios uyaʼom kan pa ri Biblia jujun taq pixabʼ che kojutoʼ qonojel ri oj winaq rech kqariq kikotemal pa ri kʼulanem xuqujeʼ utzilal.

¿Jas kkibʼan ri testigos rech Jehová rech kkʼojiʼ jun utz achilanik kukʼ ri kifamiliares?

Kqakoj qachuqʼabʼ che ubʼanik ri pixabʼ che kʼo pa ri Biblia, che kojutoʼo rech kojux utzalaj taq achajil ixoqil y tat nan (Proverbios 31:10-31; Efesios 5:22–6:4; 1 Timoteo 5:8). Xuqujeʼ ri Biblia kuya jujun tobʼanik chke ri familias che junam ta kikojonik (1 Pedro 3:1, 2). Chqilampeʼ ri kibʼim jujun taq kʼulaj, are chiʼ xkilo che jun chke xux testigo rech Jehová.

• «Pa ri nabʼe taq seis junabʼ sibʼalaj kojchʼojinik y kubʼan kebʼ qakʼuʼx. Are kʼu, chiʼ Ivete xux testigo rech Jehová, ri areʼ más kukʼut chi loqʼoqʼenik y kʼo chi más upaciencia. Wariʼ xubʼano che xqajach ta qibʼ» (Clauir, che kel pa Brasil).

• «Are chiʼ ri wachajil, Chansa, xumajij retaʼmaxik ri Biblia kukʼ ri testigos rech Jehová, utz ta xwilo rumal che xinchomaj che ri e areʼ xa kkijach kiwach ri familias. Are kʼu xwilo che ri Biblia oj utoʼm pa ri qakʼulanem» (Agness, che kel pa Zambia).

Xuqujeʼ kqakʼut chkiwach ri qakʼulja ri kubʼij ri Biblia chrij ri e jastaq riʼ:

• Utzukuxik jun utz kʼulaj

• Ri kbʼan che uchʼijik ri kʼax pa ri nabʼe taq junabʼ pa ri kʼulanem

• Utzilal kukʼ ri kitat kinan ri kʼulaj

• Utz kbʼan che ukojik ri pwaq

• Kbʼan ta chʼoj

• Ukuyik makaj

• Kipixbʼexik ri alkʼwalabʼ

¿La kuya chʼoj we jun chke ri kʼulaj kux testigo rech Jehová?

Jujun taq mul kkʼulmataj wariʼ. Jun informe che xyaʼ ubʼixik pa ri junabʼ 1998 rumal ri empresa Sofres, che jun chke 20 kʼulaj che xux testigo rech Jehová xkiriq kʼi taq kʼax pa ri kikʼulanem.

Ri Jesús xubʼij che ri utijoxelabʼ kkiriq jujun taq chʼoj pa ri kifamilia (Mateo 10:32-36). Jun achi ubʼiʼ Will Durant xubʼij che pa taq uqʼij ri Imperio romano xbʼixik «che ri cristianismo kekijach ri familias».a Kimik xuqujeʼ kbʼix ri e tzij riʼ chkij ri testigos rech Jehová. Are kʼu, ¿la qas are ri testigos rech Jehová kebʼanow wariʼ?

Are chiʼ xbʼixik che ri testigos rech Jehová kkijach kiwach ri familias, ri Tribunal Europeo de Derechos Humanos xubʼij che are ri familiares che e testigos taj «nim ta kekil ri kifamilia che xukʼex ri ukojonik». Xuqujeʼ xubʼij: «Konojel ri familias che kʼo jun kifamiliar che junam ta kikojonik kkiriq ri e kʼax riʼ; man xaq xiw ta ri testigos rech Jehová».b Paneʼ kkʼulmataj wariʼ ri oj testigos rech Jehová kqabʼan wajun pixabʼ riʼ: «We kabʼan etzelal chiwe, mitoj ukʼexel rukʼ etzelal. [...] We kuyaʼ, chibʼanaʼ ronojel ri kixkuʼin che ubʼanik rech kakʼojiʼ jamaril chixoʼl kukʼ konojel ri winaq» (Romanos 12:17, 18).

¿Jasche ri testigos rech Jehová xaq xiw kukʼ ri testigos kekʼuliʼ wi?

Ri oj testigos kqanimaj wajun pixabʼ riʼ che kubʼij, che xaq xiw kojkunik kojkʼuliʼ rukʼ jun winaq «we kojonel che ri Ajawaxel»; kraj kubʼij che xa junam ri ukojonik qukʼ (1 Corintios 7:39). Wajun taqanik riʼ kuya utzilal chqe. Jun kʼutbʼal, ri xuya ubʼixik ri jun wuj Journal of Marriage and Family pa ri 2010 kubʼij che «ri e kʼulaj che xa junam kikojonem más kkiriq utzil pa ri kikʼulanem».c

Are kʼu, ri oj testigos rech Jehová kqabʼij ta che jun chi testigo che kuya kan ri ukʼulaj we man testigo taj. Ri Biblia kubʼij: «We kʼo jun qachalal ri kʼo rixoqil ri man kojonel taj, we karaj ri rixoqil kakʼojiʼ rukʼ, mujach bʼik.<u202F>We jun ixoq kʼo rachajil ri man kojonel taj, we karaj ri rachajil kakʼojiʼ rukʼ, mujach bʼik» (1 Corintios 7:12, 13). Ri oj xuqujeʼ kqanimaj wajun taqanik riʼ.