Bʼantajik 3

Ri nabʼe achi rukʼ ri nabʼe ixoq

¿SULAʼ jun wi kkaʼy pa wajun wachbʼäl? Jeʼ, are ri täq winaq tijan kawilo. Are ri nabʼe achi xuqujeʼ ri nabʼe ixoq. ¿Chin xeʼubʼano? Ri Ajawaxel. ¿La awetaʼm su ubʼiʼ ri Ajawaxel? Are Jehová. Ri achi xuqujeʼ ri ixoq xbʼix Adán rukʼ Eva chike.

Ri Ajawaxel Jehová jewaʼ xubʼano rech xubʼan ri nabʼe achi: xukʼam jubʼiqʼ (jbʼe) ulew tekʼuriʼ xubʼan jun achi tzʼaqat ubʼaqil. Tekʼuriʼ xuxutʼuj pa utzaʼm ri achi, tekʼuriʼ ri Adán xmajtaj ri ukʼaslemal.

Ri Ajawaxel xuya jun uchak ri Adán. Xutaq che ukojik kibʼiʼ konojel ri jalajoj täq chiköp. Ri Adán xraj xretaʼmaj na kiwäch ri chiköp tekʼuriʼ xukoj utzalaj täq bʼiʼaj chike konojel. Chiʼ tijan kubʼan wariʼ ri Adán, kʼo su xok che urilik. ¿La awetaʼm sulaʼ?

Ri täq chiköp e jokʼlaj. E kʼo jokʼlaj elefantes, xuqujeʼ kʼo jokʼlaj köj. Ri Adán kʼot rachiʼl. Rumal laʼ, ri Jehová xubʼano che ri Adán xwarik, tekʼuriʼ xresaj jun bʼaq che ukʼalkʼaʼx. Rukʼ wajun kʼalkʼaʼx, ri Jehová xubʼan jun ixoq rech kubʼana rixoqil ri Adán.

¡Sibʼalaj kkikotik ri Adán! ¡Xuqujeʼ sibʼalaj kkikotik ri Eva che kʼo chupam jun utz kotzʼiʼjalaj uwäch Ulew! Tekʼuriʼ kekunik kkʼejeʼ kalkʼwal rech kekʼaseʼ konojel pa kikotemal.

Ri Jehová xraj che ri Adán rukʼ ri Eva kʼo jun kikʼaslemal che kʼot ukʼisik. Xraj che kkebʼan utz che ronojel ruwäch Ulew junam che ri kotzʼiʼjalaj Edén. ¡Sibʼalaj kekitotik ri Adán rukʼ ri Eva che kkebʼan wariʼ! ¿La xawaj che xattobʼon che ubʼanik jun utzalaj kotzʼiʼjalaj uwäch che ri Ulew? Tekʼuriʼ ri kikikotemal ri Adán rukʼ ri Eva naj täj xuchʼijo. Kqil na suche.

Salmo 83:18, NM; Génesis 1:26-31; 2:7-25.