Riqbʼal ibʼ che kojkitoʼ che uloqʼoqʼexik qibʼ y che kibʼanik utz chak

OJER kanoq, ri upatanelabʼ ri Dios kkimulij kibʼ rech kkiya uqʼij. Ri israelitas oxibʼ mul pa jun junabʼ kebʼe pa ri e nimaqʼij pa Jerusalén (Deut. 16:16). Xuqujeʼ ri nabʼe taq cristianos kkimulij kibʼ, weneʼ pa rachoch jun chi cristiano (Filem. 1, 2). Y kimik kqamulij qibʼ pa e nim riqbʼal ibʼ y pa ri e riqbʼal ibʼ re congregación. ¿Jasche kqamulij qibʼ ri oj upatanelabʼ ri Dios? Rumal che are jun jastaq che nim ubʼanik pa ri qaqʼijilanik che ri Jehová (Sal. 95:6; Col. 3:16).

² Jun chi rumal are che ri Jehová kojutijoj pa ri e riqbʼal ibʼ (Is. 54:13). Are jewaʼ kbʼan pa ri Nimaqʼij re Kabʼal ronojel taq siete junabʼ. Chrij wajun nimaqʼij riʼ ri Moisés xubʼij chke ri israelitas: «Rajawaxik chi konojel ri tinamit kkimulij na kibʼ, chi achijabʼ chi ixoqibʼ, ri akʼalabʼ xuqujeʼ ri man e iwinaqil ta ri e jeqel pa ri e itinamit taq, rech kkitaʼ ri usikʼixik ri pixabʼ xuqujeʼ kketaʼmaj unimaxik ri Ajawaxel ri iDios, kkitaqej kʼu ubʼanik ri kubʼij ri pixabʼ» (Deut. 31:12). Xuqujeʼ, ri e riqbʼal ibʼ kojkitoʼ rech kqetaʼmaj más kiwach ri e qachalal, che kkiya qachuqʼabʼ y kojkitoʼ pa ri qakojonik.

RI E RIQBʼAL IBʼ RE RI CONGREGACIÓN

³ Junam rukʼ ri xqabʼij, ri e nabʼe taq cristianos amaqʼel xkimulij kibʼ. Are chiʼ qʼaxinaq chi ri nimaqʼij re ri Pentecostés re ri junabʼ 33, ri tijoxelabʼ xkikoj kichuqʼabʼ rech qas xketaʼmaj ri xkikʼut ri apóstoles, y «ronojel taq qʼij xkimulij kibʼ pa ri rachoch ri Dios» rech kkiya uqʼij (Hech. 2:42, 46). Are chiʼ xqʼax ri tiempo, pa ri e riqbʼal ibʼ ri cristianos kkisikʼij uwach ri e wuj che xetzʼibʼax kan kumal ri upatanelabʼ ri Dios xuqujeʼ ri cartas kech ri apóstoles y e nikʼaj chi tijoxelabʼ re ri Cristo (1 Cor. 1:1, 2; Col. 4:16; 1 Tes. 1:1; Sant. 1:1). Xuqujeʼ, junam kkibʼan kichʼawem y jujun taq mul kechʼaw chrij ri xkikʼulmaj are chiʼ kkitzijoj ri utzij ri Dios (Hech. 4:24-29; 11:5-18; 14:27, 28; 20:36). Xkinikʼoj ri e kʼutunem re ri Biblia y ri bʼanom che utzʼaqatisaxik ri profecías, xkʼut chkiwach jas rajawaxik kkibʼan pa ri kikʼaslemal y ri kkibʼan che uyaʼik uqʼij ri Dios, y xyaʼ kichuqʼabʼ rech amaqʼel kebʼe che utzijoxik ri utzij ri Dios rukʼ kikotemal (Rom. 10:9, 10; 1 Cor. 11:23-26; 15:58; Efes. 5:1-33).

⁴ Ri e riqbʼal ibʼ che kebʼan kimik xa junam rukʼ ri xebʼan ojer. Qas kojchoman chrij ri pixabʼ che xuya kan ri Pablo: «Qas chqililaʼ qibʼ [...]. Maqayaʼ kan ri umulixik qibʼ, jas ri kinaqʼatisabʼal jujun, xaneʼ chqapixbʼelaʼ qibʼ. Qas kʼu chujok na il rumal rech chi kqilo chi knaqajin ri qʼij re ri Ajawaxel» (Heb. 10:24, 25). Oj kʼo chkixoʼl e «itzel taq winaq». Ri oj cristianos qaxutum ubʼanik ri itzelal y ri e itzel taq rayibʼal re ri uwach Ulew riʼ (Filip. 2:15, 16; Tito 2:12-14). Are kʼu, rech ko kojtakʼiʼ pa ri qakojonik pa waʼ kʼisbʼal taq qʼij riʼ, rajawaxik kqakʼut loqʼoqʼebʼal y kqaya qachuqʼabʼ chbʼil taq qibʼ. ¿La mat qastzij che xaq xuwi pa ri e riqbʼal ibʼ más kojkunik kqabʼan wariʼ? (Sal. 84:10; Rom. 1:11, 12). Xuqujeʼ rajawaxik kqanikʼoj ri uTzij ri Dios, y pa ri e riqbʼal ibʼ kojkunik kqabʼan wariʼ. Chqilaʼ ri kebʼan pa ri jalajoj taq qariqbʼal ibʼ.

RI RIQBʼAL IBʼ RE FIN DE SEMANA

⁵ Are chiʼ kmaj ubʼanik ri riqbʼal ibʼ, kyaʼ jun chʼabʼal che ktobʼan chke konojel ri keʼopanik. E jujun winaq weneʼ kʼateʼ nabʼe mul keʼopanik, rumal laʼ ri taq chʼabʼal riʼ sibʼalaj ktobʼan pa ri kikojonik, xuqujeʼ chke ri e qachalal (Hech. 18:4; 19:9, 10).

⁶ Ri Jesús, ri rapóstoles y e nikʼaj chi cristianos xuqujeʼ xkibʼan riqbʼal ibʼ junam rukʼ ri kqabʼan oj kimik. Qas qetaʼm che man kʼo ta jun kjunamataj rukʼ ri Jesús che uyaʼik chʼabʼal. Rumal laʼ, xbʼixik che man kʼo ta jun tzijonaq junam rukʼ areʼ (Juan 7:46). Ri e winaq qas xkimayo are chiʼ xkita ri chʼabʼal che xuya ri Jesús rumal che xeʼutijoj je jas jun che kʼo utaqanik (Mat. 7:28, 29). Ri winaq che qas xkibʼan ri xubʼij, xkiriq nimaʼq taq tewchibʼal (Mat. 13:16, 17). Ri apóstoles xkesaj uwach ri Jesús, ri kajtij. Qetaʼm wariʼ rumal ri kubʼij pa Hechos 2:14-36. Chilaʼ kqil ri utzalaj chʼabʼal che xuya ri Pedro pa ri qʼij re ri Pentecostés re ri junabʼ 33, wariʼ xeʼutoʼ kʼiʼalaj winaq rech xkikʼex ri kikʼaslemal. Are chiʼ qʼaxinaq chi ri junabʼ, ri Pablo xuya jun chʼabʼal pa Atenas, wariʼ xeʼutoʼ jujun rech xeʼux cristianos (Hech. 17:22-34).

⁷ Kimik, kʼiʼalaj winaq keʼopan pa ri e riqbʼal ibʼ rech kekita ri chʼabʼal che keya pa taq ri congregaciones ronojel taq semanas y ri keya pa taq ri e nim riqbʼal ibʼ. Waʼ taq chʼabʼal riʼ ktobʼanik rech amaqʼel knaʼtaj chqe ri kukʼut ri Biblia y rech kqaya ta kan upatanexik ri Dios. Cheqasikʼij ri e winaq che kkaj kketaʼmaj más y konojel ri kkaj keʼopanik, je wariʼ kkichʼobʼ más chrij ri nabʼe taq etaʼmanik re ri Biblia.

⁸ ¿Jas kyaʼ ubʼixik pa waʼ taq chʼabʼal riʼ? Kyaʼ ubʼixik chrij ri e kʼutunem re ri qakojonem o ri e profecías, ri pixabʼ che kuyaʼ ri Biblia chrij ri kʼulanem o ri familia, jas kkibʼan ri alabʼom alitomabʼ are chiʼ kkiriq kʼax y ri rajawaxik kqabʼan pa ri qakʼaslemal. E jujun taq chʼabʼal kchʼaw chrij ri jeʼlalaj taq jastaq che ubʼanom ri Jehová. Y e nikʼaj chi chʼabʼal kchʼaw chrij ri kqetaʼmaj chrij ri kikojonik, ri ukowil kikʼuʼx y ri kisukʼilal ri upatanelabʼ ri Dios re ojer kanoq.

⁹ Rech kʼo kqetaʼmaj chrij waʼ taq chʼabʼal riʼ, rajawaxik qas kqatatabʼej, kqatzukuj y kqasikʼij uwach ri textos che kubʼij ri yaʼol chʼabʼal (Luc. 8:18). Jeriʼ kojkunik kqilo che qastzij ri tajin kkʼut chqawach y kojutoʼ che ubʼanik pa qakʼaslemal ri kqetaʼmaj (1 Tes. 5:21).

¹⁰ Pa ri congregaciones kyaʼ chʼabʼal ronojel taq semana. Are ri e qachalal re ri congregación keyaʼow waʼ taq chʼabʼal riʼ y e nikʼaj chi qachalal re taq ri congregaciones che e kʼo naqaj. We e kʼo ta qachalal re nikʼaj chi congregaciones, weneʼ amaqʼel are ri e kʼo pa ri congregación keyaʼowik.

¹¹ Pa ri ukabʼ chʼaqapil re ri riqbʼal ibʼ re fin de semana kbʼan ri Etaʼmanik re Ri Chajinel. Chilaʼ kenikʼox ri e kʼutunem re Ri Chajinel re etaʼmanik rukʼ preguntas y ktzalix kiwach. Rukʼ wajun wuj riʼ, ri Jehová qas kuya ri kajwataj chqe pa ri qakojonik pa ri tiempo che rajawaxik.

¹² Waʼ taq kʼutunem riʼ ktobʼanik rech kqetaʼmaj jas kqabʼan che ukojik ri e pixabʼ re ri Biblia pa ri qakʼaslemal. Kukowirisaj ri qakojonik rech ko kojtakʼiʼ chuwach «ri uxlabʼal aj uwach ulew» y man kqabʼan ta itzel taq jastaq (1 Cor. 2:12). Kuqʼalajisaj ri e kʼutunem re ri qakojonem y ri profecías re ri Biblia, wariʼ ktobʼanik rech kqetaʼmaj ri qas kukʼut ri Biblia y rech kojkʼojiʼ pa «ri kibʼe ri sukʼalaj taq winaq» (Prov. 4:18; Sal. 97:11). Are chiʼ kojbʼe pa wajun riqbʼal ibʼ riʼ y kqaya qacomentarios kojutoʼo rech rukʼ kikotemal kqeyej ri kʼakʼ uwach Ulew che utzujum ri Jehová (Rom. 12:12; 2 Ped. 3:13). Xuqujeʼ kojutoʼo rech kqaj kqapatanij más ri Jehová rukʼ kikotemal y kkʼojiʼ utz taq qabʼantajik (Gál. 5:22, 23). Kojutoʼ rech kqachʼij ri kʼax y rech kojchakun chrij «jun utzalaj takʼalibʼal chke ri qʼij ri kepe na» rech kqariq «ri qastzij kʼaslemal» (1 Tim. 6:19; 1 Ped. 1:6, 7).

¹³ Rech kʼo kqetaʼmaj pa ri e riqbʼal ibʼ ronojel taq semanas, rajawaxik che kqatijoj qibʼ pa qatukel o kukʼ ri qafamilia, kqatzukuj ronojel ri textos y kqabʼij pa qatzij ri qacometarios. We jewaʼ kqabʼano, xaq xiw ta keqatoʼ e nikʼaj chik pa ri kikojonik xaneʼ xuqujeʼ ri kicomentarios e areʼ kuya tobʼanik chqe. Ubʼanik wariʼ kojutoʼ rech kkanaj kan pa ri qanimaʼ ri kqetaʼmaj pa ri e riqbʼal ibʼ.

RI RIQBʼAL IBʼ CHE KBʼAN CHUXOʼL SEMANA

¹⁴ Ri qachalal re ri congregación kkimulij kibʼ ronojel taq semanas pa ri Ja rech Ajawbʼal rech kkibʼan jun riqbʼal ibʼ che oxibʼ chʼaqap bʼanom che, Qachak xuqujeʼ Qakʼaslemal ri oj Cristianos ubʼiʼ. Ri rumal che kbʼan wajun riqbʼal ibʼ riʼ are che kojutoʼ rech más utz kqabʼan che upatanexik ri Dios (2 Cor. 3:5, 6). Ronojel taq ikʼ kyaʼ chqe ri wuj Qachak xuqujeʼ Qakʼaslemal ri oj Cristianos: Wuj re chak, chupam e kʼo wi ri e kʼutunem che keʼil pa ri riqbʼal ibʼ xuqujeʼ ri e kʼutbʼal re tzijonem che kkoj che utzijoxik ri utzij ri Dios.

¹⁵ Ri nabʼe uchʼaqapil ri riqbʼal ibʼ kbʼix «Qʼinomal re ri uTzij ri Dios» che. Kojutoʼ che uchʼobʼik ri xkʼulmataj ojer, ri xeriqitaj wi y ri xkikʼulmaj ri e kʼo pa taq ri kʼutbʼal re ri Biblia, y ri kqetaʼmaj chrij. Pa wajun uchʼaqapil ri riqbʼal ibʼ riʼ kyaʼ jun chʼabʼal, ksikʼix uwach ri Biblia y ri e qachalal kkibʼij ri xketaʼmaj chrij ri xkisikʼij pa ri Biblia. Pa ri Wuj re chak kqariq wachbʼal, gráficos y tareas. Rumal wariʼ, kojux utz taq ajtijabʼ, utz taq cristianos y jeriʼ kojkunik kqabʼan «ronojel uwach utzalaj taq chak» (2 Tim. 3:16, 17).

¹⁶ Ri ukabʼ uchʼaqapil ri riqbʼal ibʼ kbʼix «Chojux más utz ajtijabʼ» che. Chupam kojtijox wi rech qonojel más utz kqabʼan che utzijoxik ri utzij ri Dios y rech keqatijoj ri winaq rukʼ ri Biblia. Kebʼan taq asignaciones xuqujeʼ keʼil videos rech ri e kʼutbʼal re tzijonem. Wajun uchʼaqapil ri riqbʼal ibʼ riʼ kojutoʼ rech kkʼojiʼ qanoʼj xuqujeʼ rech kqakubʼsaj «kikʼuʼx ri e kosinaq kukʼ taq tzij re chajin animaʼaj» (Is. 50:4).

¹⁷ Ri urox uchʼaqapil ri riqbʼal ibʼ kbʼix «Qakʼaslemal ri oj Cristianos» che y kojutoʼ rech kqabʼan pa ri qakʼaslemal ri e pixabʼ re ri Biblia (Sal. 119:105). Chupam wariʼ kil ri Etaʼmabʼal chrij ri Biblia rech ri congregación. Y junam rukʼ ri kbʼan che ri Etaʼmanik re Ri Chajinel, knikʼox rukʼ preguntas y ktzalix kiwach.

¹⁸ Are chiʼ kel lo ri kʼakʼ Wuj re chak, ri jachal kichak ri jupuq kʼamal bʼe re ri congregación o jun chi kʼamal bʼe, kunikʼoj uwach y krilo jachin kqʼaxen ri jalajoj taq chak. Ronojel semana, jun kʼamal bʼe che jun utz ajtij y che chaʼom kumal ri jupuq kʼamal bʼe re ri congregación kukʼam ubʼe ri riqbʼal ibʼ. Rajawaxik krilo che qas pa ri hora kumajij y kkʼis ri riqbʼal ibʼ, kuya kichuqʼabʼ rukʼ utz taq tzij y kuya pixabʼ chke ri keqʼaxen ri asignaciones.

¹⁹ Are chiʼ kqatijoj qibʼ chrij ri kqil pa wajun riqbʼal ibʼ riʼ, amaqʼel kojbʼek, kqaya ri qacomentario y kqabʼan ri chak che yaʼom chqe, kojutoʼ rech más kqetaʼmaj chrij ri kubʼij ri Biblia y ri e pixabʼ che kʼo chupam. Xuqujeʼ, kojutoʼ rech kqaxej ta chi qibʼ che utzijoxik ri utzij ri Dios y kojux más utz ajtijabʼ. Wajun riqbʼal ibʼ riʼ xuqujeʼ kuya tobʼanik chke ri e winaq che e Testigos taj, rumal che kkiriq utz taq kachiʼl y kketaʼmaj kʼi taq jastaq chrij ri Biblia. Rech kojkunik kqatijoj qibʼ chrij wajun riqbʼal ibʼ riʼ y ri e nikʼaj chik kojkunik kqakoj ri Watchtower Library, ri aplicación JW Library^®, ri UKʼOLBʼAL WUJ PA INTERNET Watchtower^™ (we e kʼo pa ri qachʼabʼal), ri wuj Tobʼanik chike ri testigos rech Jehová rech kketaʼmaj más y ri biblioteca che kʼo pa ri Ja rech Ajawbʼal. Wajun biblioteca riʼ kʼo jalajoj taq wuj chupam che bʼanom kumal ri testigos rech Jehová, ri Índice de las publicaciones Watch Tower, jalajoj taq Biblias, jun concordancia, jun diccionario y nikʼaj chi wuj. Konojel kekunik kkikoj wajun biblioteca riʼ are chiʼ majaʼ kumajij o are chiʼ kʼisnaq chi ri riqbʼal ibʼ.

RIQBʼAL IBʼ RE RI UTZIJOXIK RI UTZIJ RI DIOS

²⁰ Kebʼan riqbʼal ibʼ re ri utzijoxik ri utzij ri Dios pa jalajoj taq horas y jalajoj taq qʼij re ri semana. Ri alaj taq riqbʼal ibʼ riʼ kuya kbʼan pa ri kachoch ri e qachalal o pa jun chik lugar, junam rukʼ ri Ja rech Ajawbʼal. Are más utz we kʼi ta qachalal e kʼo chupam ri grupos y pa jalajoj lugar kkimulij wi kibʼ. Wariʼ keʼutoʼ rech aninaq keʼopan pa ri lugar che kbʼan wi ri riqbʼal ibʼ y ri ktzijox wi ri utzij ri Dios y rech ri kʼamal bʼe re grupo kʼax ta kuriq che kitaqik bʼi pa kakabʼ ri e qachalal rech chanim kkimajij utzijoxik ri utzij ri Dios. Xuqujeʼ ri kʼamal bʼe re grupo kkunik kretaʼmaj más kiwach ri e qachalal. Jujun taq mul, más utz na we xa jun riqbʼal ibʼ kbʼanik paneʼ e kʼo kʼi grupos. Jun kʼutbʼal, we chuxoʼl semana e kʼi ta qachalal keʼelik, kuya kkimulij kibʼ konojel pa ri Ja rech Ajawbʼal o jun chi lugar. Je wariʼ, konojel ri qachalal kʼo kachiʼl are chiʼ keʼel che utzijoxik ri utzij ri Dios. Xuqujeʼ are utz we xa jun riqbʼal ibʼ kbʼanik are chiʼ kʼo nimaqʼij pa ri tinamit o are chiʼ kʼateʼ xkʼis ri Etaʼmanik re Ri Chajinel.  

²¹ Are chiʼ ri grupos kkimulij kibʼ pa jalajoj lugar, are ri kʼamal bʼe re grupo kbʼanow ri riqbʼal ibʼ re utzijoxik ri utzij ri Dios. We kkun taj kubʼan ri riqbʼal ibʼ, kkunik kuta toqʼobʼ che ri tobʼanel re o che jun chi qachalal che ko pa ri ukojonik. Kunikʼoj kʼutunem che kuya tobʼanik che utzijoxik ri utzij ri Dios. Xuqujeʼ, kuya kichuqʼabʼ y kukʼam kibʼe ri e qachalal. Tekʼuriʼ kubʼij che ri grupo jas kkibʼano. Utz che keʼuya ri más kenaw chi che utzijoxik ri utzij ri Dios kukʼ ri e qachalal che kʼateʼ kkimajij o ri kajwataj na tobʼanik chke. Are chiʼ kkʼis ri riqbʼal ibʼ, jun chke ri qachalal kubʼan ri chʼawem. Are chiʼ kbʼantaj wariʼ, chanim kel bʼi ri grupo rech kkimajilaʼ utzijoxik ri utzij ri Dios. Wajun riqbʼal ibʼ riʼ cinco o siete minutos kuchʼijo, y kuchʼij ta cinco o siete minutos we kʼateʼ xkʼis jun riqbʼal ibʼ re congregación.

RI E RIQBʼAL IBʼ KE RI KʼAKʼ O RI NITZʼAQ TAQ CONGREGACIONES

²² Kebʼan kʼakʼ taq congregaciones are chiʼ kekʼiyar ri tijoxelabʼ. Are ri solinel re circuito ktow che ri sucursal che kbʼan chi jun kʼakʼ congregación. We e kʼi ta e kʼo chupam ri grupo, ri más utz are che kumulij ribʼ rukʼ jun congregación che kʼo chunaqaj.

²³ Pa ri e nitzʼaq taq congregaciones weneʼ xaq xiw qachalal ixoqibʼ e kʼolik. We je wariʼ, junam che kubʼij ri uTzij ri Dios, rajawaxik kuchʼuq ri ujolom ri qachalal ixoq are chiʼ kubʼan jun chʼawem o kukʼam ubʼe ri riqbʼal ibʼ (1 Cor. 11:3-16). Tʼuyulik kubʼan wariʼ. Ri qachalal ixoqibʼ kkiya ta chʼabʼal; xaneʼ, kkisikʼij uwach o ketzijon chrij ri e wuj che uyaʼom ri utinamit ri Dios o, rech kkikʼex jubʼiqʼ ri kkibʼano, kkinikʼoj kukʼ ri e kʼo pa ri riqbʼal ibʼ o kkibʼan jun demostración. Ri sucursal kutaʼ toqʼobʼ che jun qachalal ixoq che kril ri wuj (correspondencia) re ri congregación y che kukʼam ubʼe ri e riqbʼal ibʼ. Are chiʼ kʼo chi jun tobʼanel o jun kʼamal bʼe re ri congregación, are chi kbʼanow waʼ taq chak riʼ.

RI NIM RIQBʼAL IBʼ RE CIRCUITO

²⁴ Kamul pa jun junabʼ ri congregaciones re ri circuito kkimulij kibʼ pa jun nim riqbʼal ibʼ re jun qʼij. Waʼ taq riqbʼal ibʼ riʼ sibʼalaj kuya kikotemal chqe rumal che kojkunik kqetaʼmaj más kiwach ri e qachalal y kqakʼut loqʼoqʼebʼal chke (2 Cor. 6:11-13). Are ri utinamit ri Jehová kchaʼow ri kyaʼ ubʼixik chupam ri nim riqbʼal ibʼ, are kchoman chrij ri kajwataj chke ri qachalal re ri circuito are chiʼ kuchaʼ jun kʼutunem re ri Biblia. Keya taq chʼabʼal, e kʼutbʼal re tzijonem, escenificaciones, kʼutbʼal re jun qachalal che kchoman chrij ri rajawaxik kubʼano y ktaʼ chke jujun qachalal ri kikʼulmam pa ri kikʼaslemal. Ronojel wariʼ sibʼalaj kuya tobʼanik y kuya kichuqʼabʼ konojel ri keʼopanik. Xuqujeʼ, ri e kʼakʼ taq tijoxelabʼ che kijachom chi ri kikʼaslemal che ri Jehová, kuya kkibʼan kiqasanjaʼ.

RI NIM RIQBʼAL IBʼ RE OXIBʼ QʼIJ

²⁵ Jun mul pa jun junabʼ kbʼan jun nim riqbʼal ibʼ che kuchʼij oxibʼ qʼij. Chupam, kkimulij kibʼ kʼi congregaciones re jalajoj taq circuitos. Ri sucursales che e nitzʼaq weneʼ kkilo che más utz che konojel ri congregaciones kkimulij kibʼ pa jun lugar. Pa nikʼaj chi países weneʼ jalan kbʼan che ubʼanik ri nim riqbʼal ibʼ re oxibʼ qʼij, rumal ri keriqitaj wi ri e qachalal o rumal ri kuya ubʼixik ri utinamit ri Jehová. Xuqujeʼ kebʼan nim riqbʼal ibʼ re jalajoj taq países re ri uwach Ulew y nim riqbʼal ibʼ nimaʼq kibʼanik. Chupam wariʼ, kkimulij kibʼ e kʼi Testigos re jalajoj países. Pa kʼi taq junabʼ, e kʼi winaq ketaʼmam chrij ri utz taq jastaq re ri uQʼatbʼal tzij ri Dios, rumal ri sikʼinik che kyaʼik re ri nim riqbʼal ibʼ.

²⁶ Pa ri e nim riqbʼal ibʼ sibʼalaj kojkikot che uqʼijilaxik ri Jehová pa junamam. Pa waʼ taq nim riqbʼal ibʼ e qʼalajisam kʼakʼ etaʼmanik chrij ri Biblia y yaʼom kʼakʼ taq wuj che kqakoj che utzijoxik ri utzij ri Dios o kqanikʼoj pa qatukel y rukʼ ri congregación. Pa ronojel ri nim riqbʼal ibʼ kebʼan qasanjaʼ. Sibʼalaj nim kipatan rumal che kojkitoʼ rech kojkʼiy pa ri qakojonik. Kkikʼutu che ri utinamit ri Jehová are jun nimalaj familia re jalajoj taq tinamit che kkiloqʼoqʼej kibʼ (Juan 13:35).

²⁷ ¿Jasche nim ubʼanik che kojbʼe pa ronojel ri e riqbʼal ibʼ re ri congregación y pa ri e nim riqbʼal ibʼ? Rumal che kkiya qachuqʼabʼ rech kqaya ta kan upatanixik ri Jehová y kojkichajij chuwach ri itzel taq jastaq che kuqasaj uchuqʼabʼ ri qakojonik. Xuqujeʼ, rumal ri riqbʼal ibʼ knimarisax uqʼij ri Jehová (Sal. 35:18; Prov. 14:28). Ri oj upatanelabʼ ri Dios sibʼalaj kqamaltyoxij che e kʼo waʼ taq riqbʼal ibʼ riʼ, rumal che kkiya qachuqʼabʼ pa ri kʼisbʼal taq qʼij che oj kʼo wi.

RI UWAʼIM RI QAJAW JESÚS

²⁸ Ri testigos rech Jehová cho ronojel ri uwach Ulew kqamulij qibʼ jun mul pa jun junabʼ rech kqabʼan ri nimaqʼij re ri uWaʼim ri qAjaw Jesús, ri Unaʼtabʼalil ri ukamikal ri Cristo (1 Cor. 11:20, 23, 24). Areʼ xyaʼow kan ri taqanik che rajawaxik kqanatajisaj wajun qʼij riʼ, y are waʼ ri qʼij re ri junabʼ che más nim ubʼanik chqawach (Luc. 22:19).

²⁹ Ri Unaʼtabʼalil ri ukamikal ri Jesús kbʼan pa ri qʼij che xbʼan ri Pascua judía ojer, junam rukʼ ri kubʼij ri uTzij ri Dios (Éx. 12:2, 6; Mat. 26:17, 20, 26). Pa ri qʼij riʼ, ri israelitas kkinaʼtajisaj ri qʼij che xeʼel lo pa Egipto, pa ri junabʼ 1513 nabʼe chuwach ri qaqʼij. Ri Jehová xubʼij chke che pa ri qʼij 14 re ri nabʼe ikʼ lunar rajawaxik kkitij ri alaj chij re Pascua y keʼel bʼi pa Egipto (Éx. 12:1-51). Kuriqaʼ wajun qʼij riʼ are chiʼ qʼaxinaq chi 13 qʼij re ri kʼakʼ Ikʼ che kqʼalajin pa Jerusalén chunaqaj ri equinoccio re primavera. Ri Unaʼtabʼalil ri ukamikal ri Jesús kbʼanik are chiʼ setesik chi ri Ikʼ chiʼ qʼaxinaq chi ri equinoccio re primavera.

³⁰ Pa Mateo 26:26-28 kqariq ri xubʼij kan ri Jesús chrij ri rajawaxik kbʼan pa ri qʼij re ri Unaʼtabʼalil ri ukamikal. Are ta jun naqʼatisabʼal che ri kaxlanwa y ri vino kʼuʼx ucuerpo y ukikʼel ri Cristo. Are jun etal che kkitij ri cristianos che kkiqʼat na tzij rukʼ ri Jesús pa ri kaj (Luc. 22:28-30). Xuqujeʼ e sikʼim chi nikʼaj cristianos y e winaq rech kkil ri kbʼan pa wajun riqbʼal ibʼ riʼ. Are chiʼ kojkʼojiʼ pa wajun riqbʼal ibʼ riʼ, kqakʼutu che sibʼalaj kqamaltyoxij che ri Jehová che xuya ri uKʼojol pa kamikal rumal qech. Are chiʼ majaʼ kbʼan wariʼ, kyaʼ jun chʼabʼal che nim ubʼanik rech ri winaq kkaj kekʼojiʼ pa ri Unaʼtabʼalil ri ukamikal ri Jesús y rech kkaj kketaʼmaj más chrij ri Biblia.

³¹ Ri oj testigos rech Jehová sibʼalaj utz kqanaʼo kojkʼojiʼ kukʼ ri e qachalal pa taq ri e riqbʼal ibʼ. Wariʼ kojutoʼ rech kqakʼut «loqʼoqʼebʼal qakʼuʼx xuqujeʼ [kqabʼan] ri utzalaj taq chak» (Heb. 10:24). Ri jikalaj pataninel utz uchomanik kukoj ri e riqbʼal ibʼ che uyaʼik ri kajwataj chqe pa ri qakojonik. Qonojel ri oj testigos rech Jehová o ri kʼateʼ kkimaj bʼenam rajawaxik kqaya ta kan umulixik qibʼ. We nim kqil wi ronojel ri kuya ri Dios chqe pa ri utinamit, junam riʼ kojchakunik y, ri más nim ubʼanik are che kqaya uqʼij ri Jehová (Sal. 111:1).