¿Jawiʼ kekʼam wi ri pwaq che kkoj che ri qachak?

RI TESTIGOS rech Jehová qayaʼom ubʼixik ri utzij ri Dios pa ronojel «ri tinamit ri sibʼalaj naj e kʼo wi cho ronojel ri uwach ulew». Rukʼ wajun chak riʼ tzʼaqatinaq ri xubʼij kan ri Jesús che kbʼantaj pa ri kʼisbʼal taq qʼij (Hech. 1:8; Mat. 24:14). Kqakoj ri qatiempo y ri qachuqʼabʼ che ubʼanik wajun chak riʼ y kqaya pa nabʼe lugar ri uQʼatbʼal tzij ri Dios, rumal che kqakubʼsaj qakʼuʼx che ri Jehová kuya na ronojel ri kajwataj chqe (Mat. 6:25-34; 1 Cor. 3:5-9). Ri Jehová tajin kutewchij wajun chak riʼ rumal che sibʼalaj utz elenaq.

¿JAWIʼ KEKʼAM WI RI PWAQ CHE KKOJ CHE RI QACHAK PA RONOJEL RI UWACH ULEW?

² Are chiʼ ri winaq kkilo che kqakʼayij ta ri biblias y ri e qawuj, kkichomaj jawiʼ kekʼam wi ri pwaq. Kajwataj pwaq che kibʼanik biblias y nikʼaj chi wuj, xuqujeʼ che kiyakik y kisukʼumaxik ri e ja re Betel, jawiʼ e kʼo wi qachalal che kechakun pa ri imprentas, ri keʼilow ri chak re utzijoxik ri utzij ri Dios xuqujeʼ nikʼaj chi chak. Xuqujeʼ, ri e solinel re circuito, ri misioneros che e kʼo pa taq ri territorios, ri precursores especiales y e nikʼaj chik qachalal che tajin kepatanin pa ri servicio especial re tiempo completo kyaʼ jubʼiqʼ pwaq chke rech kekunik kkibʼan ri keqeleʼn. Qastzij wi che kajwataj nim pwaq rech ktzijox ri utz taq jastaq re ri uQʼatbʼal tzij ri Dios pa ronojel ri uwach Ulew. ¿Jawiʼ kekʼam wi ri pwaq?

³ E kʼi winaq che e Testigos taj nim kkil wi wajun chak riʼ, rumal laʼ kkiya kikuchuj pa ri obra mundial. Are kʼu ri más keyaʼow ri kuchuj are ri testigos rech Jehová, jujun chke are ketaqow bʼi pa ri sucursal. Konojel kejunamataj kukʼ ri e upatanelabʼ ri Dios ojer che xkiya rukʼ ronojel kanimaʼ ri rajawaxik che uyakik ri e kʼolbʼal jawiʼ kyaʼ wi uqʼij ri Dios (Éx. 35:20-29; 1 Crón. 29:9). E kʼo jujun kkiya kan pa jun testamento e jujun jastaq pa ubʼiʼ ri utinamit ri Jehová, are kʼu ri kuchuj más na kyaʼ kumal ri winaq, ri e qachalal o ri circuitos che kkiya ri kekunik. Ronojel waʼ taq kuchuj riʼ qas kajwataj che ubʼanik ri chak che tajin kubʼan ri utinamit ri Jehová.

⁴ Ri Biblia kubʼij che ri Jesús y ri utijoxelabʼ kʼo jun kaxon kukʼ rech kkikʼol wi pwaq, wariʼ kraj kubʼij che kyaʼ tobʼanik chke rukʼ pwaq rech kʼo ri kajwataj chke (Juan 13:29). E kʼo ixoqibʼ che xkikoj ri jastaq ke rech xkipatanij ri Jesús y ri utijoxelabʼ (Mar. 15:40, 41; Luc. 8:3). Ri apóstol Pablo sibʼalaj xumaltyoxij ri tobʼanik che xyaʼ che kumal ri e qachalal che nim xkil ri utzijoxik ri utzalaj taq jastaq re ri uQʼatbʼal tzij ri Dios y che xkaj xkitoʼ rukʼ pwaq pa ri chak che tajin kubʼano (Filip. 4:14-16; 1 Tes. 2:9). Ri kikʼutbʼal waʼ taq qachalal riʼ che sibʼalaj xesipanik kojutoʼ oj kimik. Chqawach oj are jun nim eqeleʼn ri ukojik ri qarajil y ri jastaq qe rech ktzijox más ri utzij ri Dios. Rumal wariʼ konojel ri e winaq kekunik kkiriq «ri jaʼ rech kʼaslemal» y kʼo ta pwaq ktaʼ chke (Apoc. 22:17).

¿JAWIʼ KEKIKʼAMA WI RI PWAQ RI CONGREGACIONES RECH KʼO RI KAJWATAJ CHKE?

⁵ Ri pwaq che kkikoj ri congregaciones, pa ri kuchuj kesax wi. Kbʼix taj jampaʼ pwaq rajawaxik kkiya pa kijujunal ri e kʼo pa ri congregación. Xaneʼ, konojel ri keʼopan pa ri e kʼolbʼal jawiʼ kqaya wi uqʼij ri Dios kkiya kan pa taq ri kaxon ri kikuchuj jas ri «kpe pa [k]animaʼ» (2 Cor. 9:7).

⁶ ¿Jas kkoj wi ri pwaq? Nabʼe, rech ktoj ronojel ri kajwataj pa ri Ja rech Ajawbʼal. Xuqujeʼ, ri jupuq kʼamal bʼe re ri congregación kuya kkichomaj jampaʼ kkitaq bʼi pa ri sucursal re ri obra mundial. We jeriʼ, ri e kʼamal bʼe y ri e qachalal re ri congregación kkichomaj jampaʼ kekunik kkitaq bʼik. Kʼi chke ri congregaciones jewaʼ kkibʼan che uyaʼik ri kikuchuj pa ri obra mundial. We qonojel kqachʼobʼo che kʼo kajwataj che ri Ja rech Ajawbʼal, rajawaxik ta riʼ che amaqʼel knaʼtasax chqe che kqaya ri qakuchuj.

¿JAS KBʼAN CHE UKOJIK RI KUCHUJ?

⁷ Are chiʼ kkʼis ri riqbʼal ibʼ, kebʼ qachalal kkesaj ri pwaq pa ri kaxon re kuchuj y kkitzʼibʼaj jampaʼ xyaʼik (2 Rey. 12:9, 10; 2 Cor. 8:20). Ri jupuq kʼamal bʼe re ri congregación kuchomaj jas kbʼan che uchajixik ri pwaq kʼa are chiʼ ktaq bʼi pa ri sucursal o are chiʼ ktoj ri kajwataj che ri Ja rech Ajawbʼal. Ri qachalal che kilowik jampaʼ pwaq xyaʼ pa jun ikʼ y jampaʼ xsachik, kubʼan jun informe ronojel taq ikʼ rech kqʼalajisax chkiwach ri e qachalal re ri congregación. Ri jachal kichak ri kʼamal bʼe krilo che chu ox ox ikʼ qas kilik jas bʼanom che ukojik ri pwaq.

¿JAWIʼ KEKʼAM WI RI PWAQ CHE KKOJ PA RI CIRCUITOS?

⁸ Ri e qachalal che e kʼo pa ri circuito are keyaʼow ri pwaq che kajwatajik are chiʼ kbʼan ri nim riqbʼal ibʼ y nikʼaj chi jastaq che kajwataj pa ri circuito. Kkiya ri kuchuj pa ri kaxon che keya pa taq ri lugar jawiʼ kebʼan wi ri nim riqbʼal ibʼ. Xuqujeʼ, weneʼ jujun taq mul rajawaxik ri congregaciones kkiya kikuchuj rech amaqʼel kʼo ri kajwatajik y kʼo ta kʼasaj pa ri circuito.

⁹ Ri rajawaxik are che are ri circuitos keyaʼow ri pwaq che kajwataj chke y we kʼo kkanaj kanoq kkitaq bʼi pa ri obra mundial. We kʼo ta más pwaq pa ri ucuenta ri circuito che utojik ri rajawaxik are chiʼ kbʼan ri nim riqbʼal ibʼ o ri pwaq che rajawaxik che utojik ri kʼolbʼal jawiʼ kbʼan wi ri jun chi nim riqbʼal ibʼ, ri solinel re circuito kutaq unaʼtajisaxik chke ri congregaciones che kajwataj ri kitobʼanik rukʼ ri kikuchuj. Chkijujunal ri e jupuq kʼamal bʼe re ri congregaciones kkilo jampaʼ kkun ri congregación kutaq bʼik tekʼuriʼ kkiya ubʼixik chke ri e qachalal.

¹⁰ Are chiʼ ri circuito rajawaxik pwaq che, kkimulij kibʼ ri e kʼamal bʼe rech kechʼaw chrij wariʼ pa ri qʼij re ri nim riqbʼal ibʼ. Are chiʼ kʼo pwaq re ri circuito xkoj pa jastaq che chomam ta ubʼanik, ri e kʼamal bʼe kkichomaj jampaʼ kkunik kuya ri kicongregación. Rajawaxik che tzʼaqat rajilabʼal ri pwaq kkitaq bʼik.

¹¹ Ri solinel re circuito krilo che amaqʼel knikʼox ri pwaq che kʼo pa ri circuito.

KETOʼ RI E QACHALAL CHE KAJWATAJ TOBʼANIK CHKE

¹² Junam rukʼ ri xqil kanoq, ri Jesús y ri utijoxelabʼ kʼo jun kaxon jawiʼ kkikʼol wi pwaq. Kkikoj jubʼiqʼ che ri pwaq riʼ rech kekitoʼ ri e mebʼayibʼ (Mar. 14:3-5; Juan 13:29). Ri oj cristianos rajawaxik amaqʼel keqatoʼ ri kʼo kajwataj chke, rumal che ri Jesús xubʼij: «Ronojel qʼij e kʼo mebʼayibʼ iwukʼ» (Mar. 14:7). ¿Jas kqabʼan che kitoʼik?

¹³ Jujun taq mul, ri e qachalal weneʼ kʼo ta kirajil rumal che nim chi kijunabʼ, e yawabʼ o rumal jun chi jastaq. Weneʼ jun rachalaxik o jun qachalal re ri congregación kretaʼmaj wariʼ y kuyaʼ tobʼanik che, junam rukʼ ri kubʼij ri pixabʼ riʼ: «Apachin kʼu ri kʼo jastaq rech, we krilo chi ri rachalal kʼo urajawaxik, man kel ta kʼu ukʼuʼx che, ¿jas ta ri kubʼano kkʼojiʼ ri uloqʼoqʼebʼal ukʼuʼx ri Dios pa ri ranimaʼ? Loqʼalaj taq walkʼwal, ri qaloqʼoqʼebʼal kʼuxaj muxik xaq xuwi ta e tzij, xaneʼ kʼutunoq kumal taq bʼanoj» (1 Juan 3:17, 18; 2 Tes. 3:6-12). Uyaʼik tobʼanik chke ri sukʼ taq upatanelabʼ ri Dios che kʼo kajwataj chke kʼo ubʼanik rukʼ ri qaqʼijilanik che ri Dios (Sant. 1:27; 2:14-17).

¹⁴ ¿Jas kqabʼan che ubʼanik wariʼ? Ri apóstol Pablo xuya kan ubʼixik pa 1 Timoteo 5:3-21. Konojel ri cristianos rajawaxik kkil ri kajwataj chke ri kifamilia. Rumal laʼ, ri e qachalal che nim chi kijunabʼ o e yawabʼ rajawaxik ketoʼ kumal ri kalkʼwal, ri uwiʼ kimam, o nikʼaj chi kachalaxik. Pa jujun taq tinamit ri e qʼatbʼal tzij o jujun taq instituciones kkiya tobʼanik chke ri winaq che kʼo ta más kirajil, rumal laʼ ri e kachalaxik o jun qachalal re ri congregación kekitoʼ che uriqik waʼ taq tobʼanik riʼ. Are kʼu weneʼ e kʼo qachalal che kipatanim chi ri Jehová pa kʼi junabʼ y kʼo ta jun kachalaxik che kuya tobʼanik chke y kʼo ta instituciones re ri qʼatbʼal tzij ketowik. We jeriʼ, ri congregación rajawaxik keʼutoʼo, y ri e kʼamal bʼe kkiya pixabʼ rech kilik jas más utz kbʼan che kitoʼik. Masach chqe che are jun nimalaj eqeleʼn kitoʼik ri e nikʼaj chik rukʼ ri jastaq qe.

¹⁵ Jujun taq mul, ri e qachalal kʼo ta kkitijo, kkikojo y nikʼaj chi jastaq ke, rumal che kbʼan kʼax chke kumal ri e qʼatbʼal tzij, rumal ri e chʼoj, kabʼraqan, kaqiqʼ jabʼ, wiʼjal o nikʼaj chi kʼaxkʼolil rumal che oj kʼo chi pa ri kʼisbʼal taq qʼij (Mat. 24:7-9). Weneʼ ni ri kicongregación kekunik kkiya tobʼanik chke. We jeriʼ, ri Jupuq Ajkʼamal bʼe cho ronojel uwach Ulew kubʼan jun cholajil rech kutaq bʼi ri tobʼanik che kkiya ri e qachalal re nikʼaj chi tinamit. Je wariʼ xkibʼan ri cristianos re Asia Menor are chiʼ xkitaq bʼi jastaq ktijowik chke ri cristianos che e kʼo pa Judea rumal che tajin kkiriq kʼax rumal jun nimalaj wiʼjal (1 Cor. 16:1-4; 2 Cor. 9:1-5). Are chiʼ kqabʼan qe ri xkibʼan waʼ taq qachalal riʼ, kqakʼutu che keqaloqʼoqʼej ri e qachalal y che qastzij oj cristianos (Juan 13:35).

RI KBʼAN CHE UJACHIK RI E WUJ

¹⁶ Rech kqatzijoj ri e jastaq re ri uQʼatbʼal tzij ri Dios, kajwataj biblias y nikʼaj chi e wuj. Ri jupuq kʼamal bʼe re ri congregación kukoj jun tobʼanel che rilik ronojel ri e wuj che kkikoj ri e qachalal. Wajun qachalal riʼ nim kril ri eqeleʼn che yaʼom che. Utz kubʼan che rilik y rajilaxik rech amaqʼel kʼo ri e wuj che kajwatajik.

¹⁷ Ronojel ri kʼo qukʼ, ri qatiempo, ri kojnaw che ubʼanik, ri jastaq qe xuqujeʼ ri qakʼaslemal, are jun sipanik che uyaʼom ri Dios chqe. Ri Jesús xubʼij wariʼ: «Man kʼo ta xiya che ri xikʼamo; chiyaʼ kʼu chke ri winaq, man kʼo ta jas kitoqʼij chke» (Mat. 10:8). Rumal che qajachom chi ri qakʼaslemal che ri Jehová, qetaʼm che ronojel ri uyaʼom chqe kqakoj che upatanexik (Luc. 17:10; 1 Cor. 4:7). Ri areʼ kkikotik are chiʼ krilo che kqakoj ronojel ri kʼo qukʼ che uyaʼik uqʼij, y ri oj kqaj kqabʼan rukʼ ronojel qanimaʼ. Rukʼ wariʼ kqakʼutu che sibʼalaj kqaloqʼoqʼej y che kqaya uqʼij (Prov. 3:9; Mar. 14:3-9; Luc. 21:1-4; Col. 3:23, 24). Sibʼalaj kuya kikotemal chqe we kqakoj ri qakʼaslemal y ri jastaq qe che upatanexik ri Dios (Hech. 20:35).