Ri lajuj kʼax

Moisés xutzujuj che ri faraón kril ta chi uwach. Are kʼu chi majaʼ kbʼek xubʼij che: «Pa unikʼajil ri chaqʼabʼ, ri nabʼeʼal ala chke konojel ri familias rech Egipto kkamik, ri ukʼojol ri faraón xuqujeʼ ri kech ri ajchakibʼ che tojom ta kiqʼij».

Jehová xubʼij chke ri israelitas: «Chibʼanaʼ jun rikil nim ubʼanik. Chikamisaj jun alaj chij o jun alaj kʼisikʼ che kʼo jun ujunabʼ, chikojoʼ jubʼiqʼ kikʼ che ri raqan ri uchiʼja. Chisaʼ ri tiʼj xuqujeʼ chitijaʼ rukʼ kaxlanwa che kʼo ta chʼam rukʼ. Chiyaʼ ronojel iwukʼ, chikojoʼ ri iwatzʼyaq xuqujeʼ ixajabʼ. Che wajun chaqʼabʼ riʼ kixinwesaj bʼik». ¿La kachomaj ri kikotemal kkinaʼ ri israelitas?

Chiʼ pa nikʼaj aqʼabʼ, ri ángel rech Jehová xbʼe pa ronojel ri e ja rech Egipto. Pa ri e raqan ri uchiʼja che kʼo ta etal re kikʼ, ri nabʼeʼal xkamik. Are kʼu pa ri e ja che kʼo ri etal, ri ángel kʼo ta xubʼan chke ri kalkʼwal. Konojel ri e familias rech Egipto, qʼinom o e mebʼaʼ xkam jun kalkʼwal. Are kʼu, kech ri israelitas kʼo ta nijun xkamik.

Ri unabʼeʼal ri faraón xuqujeʼ xkamik. Ri faraón xuchʼij ta chi wariʼ rumal laʼ xubʼij che ri Moisés xuqujeʼ Aarón: «¡Chixel bʼi waral! ¡Chixel bʼik xuqujeʼ chiqʼijilaj ri iDios! ¡Chikʼamaʼ bʼi ri e chikop tekʼuriʼ jix!».

Pa ri chaqʼabʼ riʼ kʼo luna llena. Ri israelitas xeʼel bʼi pa Egipto e bʼanom pa familias xuqujeʼ tribus. E kʼo 600.000 achijabʼ, xuqujeʼ jun nimalaj jupuq ixoqibʼ xuqujeʼ akʼalabʼ. E kʼi chke e israelitas taj xuqujeʼ xebʼe kukʼ rech kkiqʼijilaj ri Jehová. ¡Kimik ri israelitas e tzʼapital ta chik!

Rech kkinaʼtasaj che Jehová xeʼukolo, rajawaxik che kkibʼan ri e rikil riʼ ronojel taq junabʼ. Xkikoj Pascua che ubʼiʼ.