Chqabʼanaʼ sibʼalaj utz che ri qachak: chujok il chke ri winaq

¿Jasche rajawaxik? Jesús qas xok il chke ri winaq pa kijujunal. Pa jun qʼij xbʼe che ukunaxik jun achi che kuta taj are kʼu, weneʼ xrilo che kuxibʼij ribʼ, xukʼam bʼi utukel, jachiʼ kilitaj taj kumal ri winaq che kkaj kkil ri kbʼan che (Mar. 7:31-35). Xuqujeʼ xok il chke ri rajtijoxelabʼ xukʼut ta kʼi jastaq chkiwach rech xekos ta che utaʼik (Juan 16:12). Jesús kok na il chke ri winaq pa neʼ kʼo chi pa ri kaj (2 Tim. 4:17). Ri qastzij cristianos kqakoj qachuqʼabʼ rech xuqujeʼ kojok il chke ri winaq junam rukʼ ri Jesús (1 Ped. 2:21; 1 Juan 3:16, 18). Rech utz kel ri qachak, rajawaxik kqachomaj ri kajwataj chke ri winaq xuqujeʼ kojchoman chrij ri kiriqom pa kikʼaslemal, ri utz kkilo xuqujeʼ ri kkibʼisoj. Kkaj kkitatabʼej ri kqabʼij chke we kkilo che xaq xiw ta kqaya kan jun wuj chke o kqabʼij kebʼ oxibʼ tzij, are che qas kojok il chke.

Ri kqabʼano:

Qas chatijoj awibʼ. Kaxibʼij ta awibʼ, chatchʼaw rukʼ utzilal xuqujeʼ chattzeʼnoq.
Chawilaʼ ri kʼo che unaqaj. ¿La kʼo jun jastaq kkʼutuwik che kʼo ralkʼwal ri winaq, che utz kril utikik kotzʼiʼj, che utz keril ri e chikop? ¿La kawilo che kbʼe pa jun kojonik? Weneʼ utz che katchoman chrij wariʼ chiʼ kamajij ri atzijonem rukʼ.
Chataʼ che ri winaq ri kuchomaj xuqujeʼ chatatabʼej ri kubʼij, kaqʼatej ta ri utzij. Chawilaʼ chiʼ tajin ktzijonik rech krilo che tajin katatabʼej ri kubʼij. Chamaltyoxij ri kubʼij chawe xuqujeʼ we kʼo jas xubʼano o xubʼij che utz xawilo, chabʼij che. Matchʼojinik.
Xa ta jun ri achomanik. Chakʼexaʼ ri katzijoj are chatzijoj ri kraj ri winaq kretaʼmaj. Qas ta kʼax ubʼanik, rumal che ri alaj taq wuj, folletos xuqujeʼ revistas rekʼam lo jalajoj taq kʼutunem. We katopanik chiʼ ri winaq kʼo tajin kubʼano, weneʼ chiʼ kʼo ta utiempo, naj taj kattzijon rukʼ.

Chabʼanaʼ waʼ pa jun ikʼ:

Chabʼanaʼ pa ri qʼijilanik pa ri familia, o chiʼ katzijoj ri utzij ri Dios, che are katzijoj ri kkaj ri winaq kketaʼmaj.
Ri qachalal che kubʼan ri riqbʼal ibʼ rech utzijoxik ri utzij ri Dios xuqujeʼ kkunik kchʼaw chrij ri kʼutunem che ri winaq kkaj kketaʼmaj, o kyaʼ jun kʼutbʼal che kukʼut wariʼ.