Chqakojoʼ ri jw.org che utzijoxik ri utzij ri Dios: «Chatux rachiʼl ri Jehová»

Pa «Enseñanzas bíblicas» rech jw.org kʼo jun sección kech akʼalabʼ ubʼiʼ «Chatux rachiʼl ri Jehová». (Pa español, xaq xiw ta kʼo videos xuqujeʼ e kʼo bʼixonem xuqujeʼ wuj re chak chupam.) ¿La tajin kqakoj wajun sección riʼ che utzijoxik ri utzij ri Dios? We kʼo jun winaq che tajin kqakʼut chrij ri Biblia chuwach che kʼo ralkʼwal, utz che kqakʼut chuwach. Weneʼ kubʼan che, che kraj kretaʼmaj más chrij ri kʼo pa qakʼolbʼal pa Internet.

Are chiʼ jun qachalal achi xuya jun chke ri wuj Ri kuya ubʼixik ri Ajawbʼal número 38 che jun ixoq che e kʼo ral che e nitzʼ na, chanim xuchaplej usikʼixik. Ri akʼalabʼ xuqujeʼ xkaj xketaʼmaj jas laʼ ri wuj riʼ. Tekʼuriʼ, ri qachalal rukʼ kebʼ oxibʼ tzij xubʼij ri kʼo pa ri wuj xuqujeʼ xukʼut ri dirección che kʼo pa ri qakʼolbʼal pa Internet, che kʼo pa ri ukʼisbʼal ri wuj. Rumal che ri ixoq utz xrilo, ri qachalal xukʼut chkiwach konojel jun chke ri videos rech Caleb pa ri uteléfono.

Jun qachalal ixoq xchʼaw chrij ri jw.org rukʼ jun rachiʼl pa chak che e kʼo ral che e nitzʼ na. Xubʼij che, che pa ri página riʼ kuriq utz taq kʼutunem chke ri familias. Ri ixoq xuqujeʼ ri e ral xkil ri página rech Internet. Tekʼuriʼ, ri ixoq xubʼij che ri qachalal che ri e ral kkibʼixoj ri bʼixonem «Predica la palabra», kʼo pa español, pa ri kachoch, rech ri sección «Chatux rachiʼl ri Jehová».

Rumal laʼ sibʼalaj utz che kqil ri kʼakʼ taq jastaq che kyaʼ pa ri sección rech jw.org xuqujeʼ kqakʼol pa ri qacelular o computadora videos, bʼixonem o wuj rech chak. We kqabʼano, kojkun riʼ kqakoj ri sección riʼ che utzijoxik ri utzij ri Dios chiʼ kqapatanij ri Qajaw junam rukʼ jun loqʼom pataninel (Hech. 20:19).