Utz chqabʼanaʼ che ukojik ri tiempo chiʼ kqaya ubʼixik ri utzij ri Dios
Ri oj testigos rech Jehová xqakoj 1.945.487.604 horas che utzijoxik ri utzij ri Dios pa ri junabʼ re ri qachak 2014, wariʼ kukʼutu che kqaj kqakoj más qatiempo che uqʼijilaxik ri Jehová (Sal. 110:3; 1 Cor. 15:58). Rumal che «ri qʼij xaq qʼatatal chik», ¡rajawaxik qas cheqatzijobʼej kʼi winaq pa ri tiempo che kqakoj che utzijoxik ri utzij ri Dios! (1 Cor. 7:29.)
Rech qas utz ukojik ri qatiempo kqabʼano chiʼ kqaya utzijoxik ri utzij ri Dios, rajawaxik kqakʼex ri hora che kqabʼan wajun chak riʼ. Jun kʼutbʼal, we amaqʼel kqaqʼaxej jun hora o más pa ri qachak che ri Dios are kʼu kojkun taj kojchʼaw rukʼ jun winaq, ¿jas rajawaxik kqabʼano rech kqariq ri winaq? Pa neʼ jalajoj ri kbʼanik rumal che jalajoj ri lugar oj kʼo wi, ri pixabʼ che kkʼut pa wajun kʼutunem riʼ weneʼ kojutoʼ rech qas utz ukojik ri tiempo kqabʼano xuqujeʼ rech xaq ta kqasach ri qatiempo (1 Cor. 9:26).
Utzijoxik ri utzij ri Dios chuchiʼ taq ja. Pa kʼi taq junabʼ, kʼamanaq chke ri e qachalal che kkimajij utzijoxik ri utzij ri Dios chuchiʼ taq ja. Are kʼu, rumal che kʼi winaq ronojel ri qʼij kechakunik, weneʼ are utz che kojel che utzijoxik ri utzij ri Dios chuchiʼ taq ja pa bʼenaqʼij o chiʼ kok ri aqʼabʼ. Pa taq ri hora riʼ, e kʼi winaq e kʼo chi pa kachoch xuqujeʼ weneʼ kʼo más kitiempo. Xuqujeʼ, weneʼ are utz che aqʼabʼil keqatzijobʼej ri winaq pa taq bʼe o pa taq kʼaybʼal.
Utzijoxik ri utzij ri Dios rukʼ jun mesa. Rajawaxik che ri mesa o ri carreta kyaʼ jachiʼ keqʼax wi kʼi winaq, rajawaxik che kbʼan we jastaq riʼ pa ri territorio che kril ri congregación (chawilaʼ pa Nuestro Ministerio del Reino rech julio 2013, pág. 5). We pa ri lugar riʼ keqʼax ta chi más winaq, ri e ajkʼamal bʼe rech ri congregación kkilo weneʼ rajawaxik kkʼex ri lugar rukʼ jun lugar chik che keqʼax wi más winaq.
Kisolixik chi jumul ri winaq xuqujeʼ kitijoxik chrij ri Biblia. Kʼo jujun horas che ri qʼij che weneʼ kuya taj kqatzijoj ri utzij ri Dios chuchiʼ taq ja, pa ri bʼe o pa nikʼaj chi lugar. Weneʼ pa taq ri horas riʼ are utz che keqasolij chi jumul ri winaq o keqatijoj chrij ri Biblia. Jun kʼutbʼal, we aqʼabʼil sábado más keqariq ri winaq chuchiʼ taq ja, weneʼ are utz kojbʼe che kisolixik chi jumul ri winaq xuqujeʼ keqatijoj chrij ri Biblia bʼenaqʼij o chi kok ri aqʼabʼ. We kojbʼe pa chʼichʼ che kisolixik ri winaq weneʼ are utz xa kebʼ oxibʼ kebʼe pa jun chʼichʼ rech kekunik ketzijon más kukʼ winaq.
Pa neʼ kojkunik kqatzʼibʼaj ri tiempo che kqakoj che ubʼixik ri utzij ri Dios, are kʼu kqariq más kikotemal we kojkunik kojtzijon kukʼ kʼi winaq. We kqilo che pa jun hora kuya taj kqabʼan jun che ri qachak che ri Dios, chqilaʼ we kuya kqabʼan chi jun chik. Chqabʼanaʼ qachʼawem che ri Jehová, ri «Rajaw ri qʼatoj», rech kojutoʼ che utz kqabʼan che ukojik ri qatiempo che utzijoxik ri utzij ri Dios (Mat. 9:38).