Chqetaʼmaj chkij ri qachalal che más utz kkibʼan che utzijoxik ri utzij ri Dios

Ri e qachalal che más utz kkibʼan che utzijoxik ri utzij ri Dios sibʼalaj nim kibʼanik. Jujun chke kipatanim ri Jehová kʼi taq junabʼ. Jujun chke kʼateʼ majaʼ naj xeʼux utz taq ajyaʼol ri utzij ri Dios. Konojel kilom che are ri Jesucristo ri tajin kkʼamow ubʼe ri congregación che wa taq kʼisbʼal taq qʼij riʼ xuqujeʼ tajin kutewchij utzijoxik ri utzij ri Dios xuqujeʼ ri etaʼmanik (Mat. 28:19, 20). Rumal che qʼaxinaq chi kʼi junabʼ che tajin kkitzijoj ri utzij ri Dios, kiriqom «ri nimalaj kuʼinem» che kpe rukʼ ri Dios, wariʼ keʼutoʼ rech kkichʼij ri kʼax kkiriqo (2 Cor. 4:7). E areʼ sibʼalaj kkaj kkikʼut chkiwach nikʼaj chik ri ketaʼmam xuqujeʼ oj kojkunik kqetaʼmaj kʼi jastaq chrij ri ketaʼmam e areʼ (Sal. 71:18). ¿Jas kqabʼan che retaʼmaxik?

Chiʼ kqatzijoj ri utzij ri Dios. Rech qas kekunik kkiya ubʼixik ri utzalaj taq tzij, ri kʼateʼ kkimajij wajun chak riʼ rajawaxik che ketoʼ kumal ri qachalal che más utz kkibʼan che wajun chak riʼ. Kuya ketaʼmax kʼi jastaq chiʼ kil ri kkibʼan ri e qachalal riʼ. (Chawilaʼ ri urox párrafo che kʼo chuxeʼ ri subtítulo che kubʼij «Ayude a los nuevos», rech ri kʼutunem «Cómo mantener el entusiasmo en la predicación» che kʼo pa ri wuj La Atalaya 15 rech febrero 2015.) ¿Jas utzilal ariqom at are chiʼ atzijom ri utzij ri Dios kukʼ ri qachalal che más utz kkibʼan che wajun chak riʼ?

Chabʼij che jun chke ri qachalal riʼ che kbʼe awukʼ chiʼ katzijoj ri utzij ri Dios. We ri qachalal yawabʼ, jujun taq mul kuya kakʼam bʼi ri winaq che tajin kakʼut chrij ri Biblia chuwach pa rachoch rech chilaʼ kaya ri etaʼmanik che. Chiʼ kʼisnaq chi ri etaʼmanik, chataʼ che ri qachalal che más utz kubʼan che wajun chak riʼ che kubʼij chawe jas kuchomaj xuqujeʼ chataʼ jujun pixabʼ che.

Chatkʼol kukʼ. Chakojoʼ achuqʼabʼ rech kawetaʼmaj kiwach ri e qachalal riʼ. Chabʼij che, che kkʼojiʼ awukʼ pa ri aqʼijilanik pa ri familia xuqujeʼ chataʼ che ri ukʼulmam. Chataʼ che jas xubʼan che retaʼmaxik ri qastzij xuqujeʼ jas tewchibʼal uyaʼom ri Jehová che, jas kʼextajnaq pa ri congregación umajim lo are chiʼ areʼ xux Testigo xuqujeʼ jas utz taq jastaq uriqom che upatanim ri Dios. We ri qachalal yawabʼ, weneʼ kuya che at katbʼe pa rachoch rech chilaʼ kibʼan wi ri iqʼijilanik pa ri familia.

Masach chawe che kʼo kʼi jastaq che kekun ta chi che ubʼanik. Junam qukʼ oj, ri e qachalal che kʼi chi junabʼ che tajin kkibʼan wajun chak riʼ kekunik kkibʼan jalajoj ubʼanik ri utzijoxik ri utzij ri Dios (Rom. 12:6-8). Jujun chke nim chi ri kijunabʼ weneʼ kekun ta chik más kojkitoʼ. Kojkunik kqetaʼmaj chrij ri ketaʼmam xuqujeʼ chrij ri sukʼalaj kichak che ri Jehová.