Anton Petrus/Moment via Getty Images
¡AMAQʼEL CHIXKʼASKʼATOQ!
¿La ya kmajtaj jun nimalaj chʼoj? | ¿Jas kubʼij ri Biblia chrij wariʼ?
Pa ri kʼisbʼal taq 30 junabʼ e kʼi winaq xkichomaj che kuya kkʼojiʼ utzilal chkixoʼl ri e tinamit. Are kʼu rumal ri chʼoj che tajin kkʼulmataj pa jujun taq tinamit kqilo che qastzij taj, jujun taq noticias xkibʼij wariʼ:
«Ri winaq kkixiʼj kibʼ che knimar más ri chʼoj che tajin kbʼan pa Gaza, rumal che Israel y Hizbulá tajin kechʼojin pa ri frontera re Líbano» (Reuters, 6 re enero 2024).
«Ri tinamit Irán kraj kumajij chi chʼoj chkixoʼl ri tinamit che e kʼo pa ri Occidente, Rusia y China tajin chi ketobʼan rukʼ. Ri grupos che e kʼo pa uqʼabʼ Irán tajin kkibʼan chʼoj pa jalajoj taq lugar, xuqujeʼ Irán xumaj chi kibʼanik armas nucleares» (The New York Times, 7 re enero 2024).
«Ri Rusia uyaʼom ta kan ubʼanik chʼoj rukʼ Ucrania» (UN News, 11 re enero 2024).
«Weneʼ kmajtaj jun chʼoj, rumal che kamik tajin kkʼiy más ri uqʼinomal y ri rajchʼojabʼ ri tinamit China, kʼo ta jun utz achilanik chkixoʼl rukʼ Estados Unidos xuqujeʼ ri Taiwán kraj che nim kil kumal nikʼaj chi tinamit» (The Japan Times, 9 re enero 2024).
¿Jas kubʼij ri Biblia chrij ronojel ri tajin kkʼulmataj pa ri uwach Ulew? ¿La kkʼulmataj na jun nimalaj chʼoj rumal wariʼ?
Ri Biblia kuya ubʼixik ri tajin kkʼulmataj kamik
Ri Biblia kubʼij ta ri kibʼiʼ ri taq tinamit che tajin kechʼojin kamik. Are kʼu kubʼij che kkʼulmataj na kʼi taq chʼoj che kkesaj «ri jamaril chkixoʼl ri winaq cho ri uwach ulew» (Apocalipsis 6:4).
Ri wuj che xutzʼibʼaj kan ri Daniel kubʼij che are chiʼ «kopan ri joqʼotaj kʼisbʼalil» ri nimaʼq taq tinamit che kikʼulel kibʼ «kechʼojin na», o kkikʼut na jachin más kʼo uchuqʼabʼ. Pa taq ri chʼoj ri tinamit kkikʼut na jachin kʼo más kajchʼojabʼ y kkisach na «ri [ki]qʼinomal re qʼan pwaq» pa taq ri chʼoj (Daniel 11:40, 42, 43).
Xa jubʼiqʼ chi kraj kmajtaj jun nimalaj chʼoj
Ri Biblia kubʼij che kkʼulmataj na kʼi taq kʼax tekʼuriʼ ksukʼumataj ronojel. Ri Jesús xubʼij kan wariʼ: «Kʼateʼ riʼ kpe na nimalaj kʼaxkʼolil ri man ilom ta uloq qas are taq xtikiritaj uloq ri uwach ulew kʼa kamik» (Mateo 24:21). Wajun «nimalaj kʼaxkʼolil» riʼ, kkʼisik are chiʼ kumajij ri nimalaj chʼoj ubʼiʼ Armagedón, che are «ri chʼoʼj re ri nimalaj uqʼij ri Dios ri kʼo ronojel ukuʼinem» (Apocalipsis 16:14, 16).
Ri Armagedón xa ta kusachisaj kiwach ri winaq xaneʼ kukʼam lo utzilal chke. Rukʼ wajun chʼoj riʼ, ri Dios kusachisaj na uwach konojel ri kiqʼatbʼal tzij ri winaq, che umak ke kʼo kʼi chʼoj kamik. We kawaj kawetaʼmaj ri kubʼan na ri Armagedón rech amaqʼel kʼo jororibʼal, chawilaʼ ri e kʼutunem riʼ: