Xeʼesax lo pa ri utzalaj kʼolbʼal

CHIʼ majaʼ kebʼan ri winaq, ri Dios xeʼubʼan ri ángeles, e uxlabʼal che keʼilitaj taj. Jun chike —xbʼix Satanás o Itzel che— xniman taj xuqujeʼ xutaqchiʼj ri Eva rech kutij uwach ri xa jun cheʼ ubʼim ri Dios che kkitij ta uwach.

Ri Satanás xubʼano che jun kumatz xchʼaw rukʼ ri Eva rukʼ ri utzij xuya ubʼixik che ri Eva xuqujeʼ ri rachajil che rumal ri Dios tajin ta kkiriq utz jastaq. Xuqujeʼ xubʼij chike we kkitij uwach ri cheʼ che bʼim chike che kkitij taj kekam taj; rukʼ wariʼ xubʼano che xchomaxik che ri Dios ajmolom tzij. Ri Itzel chiʼ xutzijoj ri kkikʼulmaj xubʼano che kkilo che utz, xubʼij we kkinimaj ta ri Dios kkʼojiʼ ketaʼmabʼal xuqujeʼ kekunik kkibʼan ri kkaj. Tekʼuriʼ ronojel wariʼ xa jun molom tzij: are ri nabʼe che xbʼan pa ri kikʼaslemal ri winaq. Wajun ajmolom tzij riʼ tajin kubʼano che kchomax wariʼ: ¿La taqal che ri Dios kuqʼat tzij puwiʼ ri kajulew? ¿La e utz ri utaqanik? ¿La utz kojelik we kqanimaj?

Ri Eva xukoj ri xubʼij ri Itzel. Xumajij urayixik uwach ri cheʼ, kʼisbʼal re xutijo. Tekʼuriʼ xuya che ri rachajil, ri achi xuqujeʼ xutijo. Pa neʼ qʼalaj che nim ta ubʼanik ri xkibʼano, e areʼ xeniman taj, xemakunik. E areʼ ketaʼm ri tajin kkibʼano: tajin kkixutuj ri Ajbʼanol ke che are ri ajqʼatol tzij pa kiwiʼ, ri uyaʼom ronojel chike, xuqujeʼ ri tzʼaqatalaj kikʼaslemal.

Ri Dios xubʼij che kuqʼat tzij pa kiwiʼ ri xeniman taj. Ri nabʼe xubʼij che kutaq na lo jun utaqon —ri Ijaʼlil, o alkʼwalaxel che tzujum che kpe na— kusachisaj na uwach ri kumatz, ri Satanás. Xuqujeʼ xubʼij che ri Adán rukʼ ri Eva che kekam na, tekʼuriʼ xutoqʼobʼisaj kiwach ri kalkʼwal che kekʼojiʼ na rumal laʼ xubʼeyetajisaj ri kikamikal. ¿Jas kkiriq na ri kalkʼwal? Ri Jehová xubʼij che ri kutaq na loq kkunik kusachisaj na ronojel ri kʼax che xuya chiʼ ri winaq xeniman ta pa ri Edén. Tekʼuriʼ ¿jachin kusachisaj na uwach ri kʼax, xuqujeʼ jas kubʼan che ubʼanik ri kraj ri Dios? Xqʼalajinik chiʼ xeqʼax ri junabʼ xuqujeʼ chiʼ xetzʼibʼax ri wuj rech ri Utzij ri Dios.

Kʼisbʼal re, ri Dios xeresaj lo ri Adán xuqujeʼ ri Eva pa ri utzalaj ulew. Rumal che e kʼo ta chi pa ri utzalaj kʼolbʼal, rajawaxik kkichʼak ri kkitijo rukʼ uchakuxik rukʼ chuqʼabʼ ri ulew. Tekʼuriʼ Eva xkʼojiʼ ri nabʼe ral, Caín. Ri Adán xuqujeʼ ri Eva xkʼojiʼ nikʼaj chik kalkʼwal alabʼom alitomabʼ, jun chike are Abel, jun chik are Set, ri umam ri Noé.

(Esam chupam ri capítulo 3 kopan 5 rech Génesis xuqujeʼ Apocalipsis 12:9.)