Ri xekʼaseʼ kanoq chiʼ xpe jun nimalaj jabʼ

CHIʼ xekʼiʼar ri winaq, ri mak xuqujeʼ ri itzelal xkinojisaj ri uwach Ulew. Ri Enoc, weneʼ xaq xiw ri areʼ kupatanej ri Dios, xuqʼaxej ubʼixik che ri Jehová kusachisaj na kiwach ri itzel winaq. Ri xubʼij ri Enoc xaq xkitota pan ri winaq, rumal laʼ ri itzelal xkʼiʼarik. Xuqujeʼ, e kʼo jujun ángeles che xeniman ta che ri Jehová, xkiya kan ri kikʼolbʼal pa ri kaj, xkibʼan winaq che kibʼ xuqujeʼ xekʼuleʼ kukʼ konojel ri ixoqibʼ che xkaj. Ri Jehová xeʼubʼan ta ri ángeles che kekʼuleʼ kukʼ winaq rumal laʼ ri e kalkʼwal che xekʼojiʼik e nimaʼq xuqujeʼ kʼo kichuqʼabʼ che kokʼow chkiwach ri ke ri winaq kbʼix nefilim chike, ri winaq riʼ xkinojisaj ri uwach Ulew che itzelal. ¿La kojkun che uchomaxik ri kʼax xunaʼ ri Dios chiʼ xrilo che ri xubʼano kʼo pa itzelal?

Chiʼ kaminaq chi ri Enoc xkʼojiʼ chi jun utzalaj achi: ri Noé. Ri areʼ xuqujeʼ ri ufamilia xkikoj kichuqʼabʼ che upatanexik ri Dios. Xopan jun qʼij, ri Jehová xukʼam lo jun nimalaj jabʼ rech kusachisaj kiwach ri e itzel. Tekʼuriʼ, kraj taj kekam ri chikop xuqujeʼ ri sukʼ Noé. Rumal laʼ xubʼij che, che kuyak jun nimalaj jukubʼ, wariʼ kraj kubʼij, jun nimalaj kaxon che rabʼarik. Rajawaxik che ri Noé, ri ufamilia xuqujeʼ ri chikop kkikʼol kibʼ chupam. Noé xunimaj ri Dios rumal laʼ weneʼ xuqʼaxej 40 o 50 junabʼ che ubʼanik ri nimalaj jukubʼ. Xuqujeʼ pa ri e junabʼ riʼ, areʼ xuya ubʼixik chike ri winaq ri «tzijol re ri sukʼil» (2 Pedro 2:5). Xubʼij chike che kpe na jun nimalaj jabʼ, tekʼuriʼ kʼot nijun xukoj ri xubʼij. Xopan kʼu ri qʼij che ri Noé, ri ufamilia xuqujeʼ ri e chikop xeʼok pa ri nimalaj jukubʼ. Ri Dios xutzʼapij uchiʼ ri nimalaj jukubʼ, xpe kʼu ri jabʼ.

Ri Nimalaj Jabʼ, che xuchʼij 40 qʼij xuqujeʼ 40 aqʼabʼ, xunojisaj ri uwach Ulew che jaʼ. Kʼot nijun chike ri e itzel xkʼaseʼ kanoq. Chiʼ xeqʼax ri ikʼ, xchaqij ri uwach Ulew ri jukubʼ xchaki puwiʼ jun juyubʼ. Qʼaxinaq chi jun junabʼ ri Noé xuqujeʼ ri ufamilia xeʼel loq. Ri Noé xumaltyoxij che ri Jehová rumal laʼ xuya jun sipanik che. Ri Dios xubʼij chike che kusach ta chi ri uwach Ulew rukʼ jabʼ. Xukʼut rukʼ ri arco iris, che qastzij ri xubʼij. Chiʼ kqilo, knaʼtaj riʼ ri xubʼij ri Jehová.

Chiʼ qʼaxinaq chi ri Nimalaj Jabʼ, ri Dios xuya e kʼakʼ taqonik. Xubʼij che utz ktij ri kitijal ri chikop, tekʼuriʼ xubʼij che utz taj ktij ri kikʼ. Xuqujeʼ xubʼij che ri winaq kekʼojiʼ pa ronojel ri uwach Ulew. Ri winaq, xkinimaj ta wajun taqonik riʼ, e kʼi xkimulij kibʼ pa jun tinamit xuqujeʼ ri Nemrod xeʼutaq che ubʼanik jun nimalaj ja. Ri Dios xutukij ri kkaj kkibʼano. ¿Jas xubʼan che utukixik? Xubʼano che ri winaq rech wajun tinamit riʼ —che xbʼix Babel che, xuqujeʼ chiʼ xeqʼax ri junabʼ xbʼix Babilonia che— xaq kʼateʼ xechʼaw pa jalajoj chʼabʼal. Rumal che kkichʼobʼ taj ri kkibʼij, xkijach kibʼ.

(Esam chupam ri capítulo 6 kopan 11 rech Génesis xuqujeʼ Judas 14, 15.)