Ri e ajqʼaxal utzij ri Dios

CHIʼ xekʼojiʼ ajawinelabʼ pa Israel xuqujeʼ pa Judá xuqujeʼ xekʼojiʼ jupuq achijabʼ: ri e ajqʼaxal tzij. Konojel rajawaxik che xkixibʼij ta kibʼ xuqujeʼ nim ri kikojonik rech xekunik xkibʼij chike ri winaq ri xubʼij ri Dios chike. Kʼi chike ri xbʼix lo chike xchʼaw chirij waʼ nikʼaj chomanik riʼ:

1. Ri usachisaxik uwach ri Jerusalén. Ri e ajqʼaxal utzij ri Dios —ri Isaías xuqujeʼ ri Jeremías— xkiqʼaxaj ubʼixik che ksachisax na uwach ri Jerusalén xuqujeʼ che keʼel na bʼi ri winaq chuwach, xkibʼij wariʼ chiʼ kʼi junabʼ na kraj. Xuqujeʼ xkiqʼalajisaj ri rumal che wajun tinamit riʼ xuyak royowal ri Dios. Pa neʼ xkibʼij che e rajpatanelabʼ ri Jehová, ri tzʼilalaj kiqʼijilanik, ri kitzelal xuqujeʼ ri kichʼoj xuqʼalajisaj ri qas kkibʼano (2 Reyes 21:10-15; Isaías 3:1-8, 16-26; Jeremías 2:1–3:13).

2. Ri ubʼanik chi jumul ri qas qʼijilanik. Chiʼ xtzʼaqat 70 junabʼ che e kʼo pa Babilonia, ri utinamit ri Dios xetzalij pa kitinamit, xkibʼan ubʼanik ri loqʼalaj ja pa Jerusalén xuqujeʼ xkimajij chi ri qastzij qʼijilanik (Jeremías 46:27; Amós 9:13-15). Chiʼ weneʼ kraj na 200 junabʼ che ketzalijik, ri Isaías xubʼij che jun achi ubʼiʼ Ciro kuchʼak ri Babilonia xuqujeʼ kuya chike ri israelitas ketzalij pa kitinamit. Xuqujeʼ xubʼij ri kubʼan che uchʼakik (Isaías 44:24–45:3).

3. Ri upetik ri Mesías xuqujeʼ ri xubʼan pa ri ukʼaslemal. Ri Mesías kalax pa jun tinamit ubʼiʼ Belén (Miqueas 5:2). Are jun winaq che kubʼan ta nim che ribʼ, chiʼ kok bʼi pa Jerusalén xa chirij jun alaj bʼur (Zacarías 9:9). Pa neʼ sibʼalaj kuloqʼoqʼej ri winaq xuqujeʼ keraj, kʼi chike kkixutuj (Isaías 42:1-3; 53:1, 3). Xuqujeʼ, sibʼalaj kʼax riʼ ri ukamikal. ¿La are riʼ ri kʼisbʼal re ri ukʼaslemal ri Mesías? Are taj, rumal che kwalajisax chkixoʼl ri kaminaqibʼ rech kuya ri tojbʼal mak chuwach ri Dios xuqujeʼ kuriq ri sachbʼal kimak konojel ri e winaq (Isaías 53:4, 5, 9-12).

4. Ri uqʼatbʼal tzij ri Mesías. Ri winaq che ajmakibʼ kekun taj kkiqʼat tzij pa kiwiʼ nikʼaj chik, are kʼu ri Mesías kkunik. Xuqujeʼ, kbʼix Ajawinel ajyaʼl Jamaril che (Isaías 9:6, 7; Jeremías 10:23). Chiʼ kuqʼat lo tzij puwiʼ ri uwach Ulew, kkʼojiʼ jororibʼal pa ri uwach Ulew, xuqujeʼ kkʼojiʼ jororibʼal chkixoʼl ri winaq kukʼ ri chikop (Isaías 11:3-7). Kkʼis ri yabʼil (Isaías 33:24). Xuqujeʼ kʼo ta chi kamikal (Isaías 25:8). Kʼi chike ri kaminaqibʼ kekʼastaj loq (Daniel 12:13).

(Esam chupam ri wuj Isaías, Jeremías, Daniel, Amós, Miqueas xuqujeʼ Zacarías.)