Lücas

1 Rasumpa pasakunqankunata alli musyanqantsik willakuykunataqa, mëtsikaq nunakunam musyëta procurayashqa y qellqar qallayashqa.+ 2 Tsëkunataqa musyatsimarqantsik qallanampita imanö pasakunqanta rikaqkuna+ y tsë willakuykunata musyatsikur sirweqkunam.+ 3 Tsëta rikarmi, qallanampita llapampis imanö pasakunqankunata alli musyapakurir pasakunqantanölla qampaq qellqamunäpaq churapakarqö, alläpa respetashqa Teöfilu.+ 4 Tsënöpa shimillapa yachatsiyäshunqëki rasumpa kanqanta alli musyanëkipaq.+

5 Judëa provinciachö Herödis* gobernanqan witsanmi,+ Abïaspa+ grüpumpita Zacarïas jutiyoq sacerdöti karqan. Pëpa warminqa Aaronpa kastampitam karqan, y jutinqa Elisabetmi karqan. 6 Ishkampis Teyta Jehoväpa* llapan mandamientunkunata y leyninkunata cäsukurmi, Diospa rikëninchö alli ruraq kayarqan. 7 Peru Elisabet qolloq kaptin y ishkampis edäna kayaptinmi, wamrankuna karqantsu.

8 Zacarïasqa sacerdöti karmi grüpumpa turnun kaptin, Teyta Diospa rikëninchö juk kuti yanapakuykarqan.+ 9 Sacerdötikuna imëpis rurayanqannömi, Teyta Jehoväpa* templunman+ yëkurqan inciensuta+ rupatsinampaq. 10 Y inciensuta rupatsinqan höram, mëtsikaq nunakuna Diosman mañakur waqtachö këkäyarqan. 11 Tsënam inciensuta rupatsiyänan altarpa derëcha lädunchö Jehoväpa* angelnin shëkar* yuripurqan. 12 Tsëta rikëkurmi Zacarïasqa alläpa mantsakar imanö këtapis puëdirqantsu. 13 Tsënam angelqa kënö nirqan: “Zacarïas, ama mantsakëtsu. Rogakunqëkita Teyta Dios wiyashqa kaptinmi warmiki Elisabetpa ollqu wamran yurinqa, y Juan nirmi jutin churanki.+ 14 Alläpam kushikunki, y mëtsikaqmi yurikunqampita kushishqa kayanqa.+ 15 Pëqa Teyta Jehoväpa* rikëninchömi reqishqa nuna kanqa.+ Manam vïnuta ni ima machatsikoqta upunantsu,+ y manaraq yurirmi* santu espïrituyoqna kanqa.+ 16 Mëtsika israelïtakunatam Jehovä* Diosninkunaman kutiyänampaq yanapanqa.+ 17 Elïas+ chaskinqan poderninwan Diospa puntanta ëwarmi, papä kaqkunapa shonqunkunata tsurinkunapa shonqunkunatanö tikratsinqa,+ y allita ruraq nunakunanö imatapis yachëwan rurayänampaqmi mana cäsukoqkunata yanapanqa, tsënömi Teyta Jehoväta* sirwiyänampaq nunakunata alistanqa”.+

18 Tsënam Zacarïasqa angelta kënö nirqan: “¿Imanötan següru käman tsënö kanampaq kaqta? Noqaqa awkinnam kä, y warmïpis chakwannam”. 19 Angelnam nirqan: “Noqaqa Diospa puntanchö imëpis këkaq Gabrielmi kä.+ Pëmi qamwan parlaq y kë alli noticiakunata musyatsinaqpaq mandamashqa.+ 20 Peru rikë, ninqaqkunata mana creinqëkipitam tsëkuna pasakunqan junaqyaq müdu* tikranki, y manam parlëta puëdinkitsu. Tsë ninqaqkunaqa dispunishqan tiempuchömi cumplikanqa”. 21 Tsëyaqnam nunakunaqa Zacarïasta shuyar waqtachö këkäyarqan, y templupita yarqamuyta alläpa demoraptinmi yarpachakuyarqan. 22 Yarqaskamurqa manam pëkunata parlapëta puëdirqantsu, tsëmi templu rurinchö revelacionta chaskishqa kanqanta* cuentata qokuriyarqan. Müduyashqa* karmi sëñasllapana pëkunata parlaparqan. 23 Templuchö sirwinan tiempu cumpliriptinmi wayinta ëwakurqan.

24 Tsëpita juk ishkë junaqllatanam, warmin Elisabetqa qeshyaq tikrarqan, y pitsqa killapam wayinllachö kakurqan. Kënömi neq: 25 “Këtam kananqa Teyta Jehovä* noqapaq ruramushqa. Nunakuna manana penqapäyämänampaqmi yarpëkallämashqa”.+

26 Elisabet joqta killayoq këkaptinnam, Teyta Diosqa angel Gabrielta+ mandarqan Galilëa provinciachö Nazaret niyanqan markaman. 27 Davidpa kastampita Josë jutiyoq nunawan casakunampaq comprometikushqana këkaq shipashta parlapänampaqmi tsëman mandarqan.+ Pëpa jutinqa Marïam karqan.+ 28 Yëkurirmi angelqa kënö nirqan: “Yamëllaku, Diospa rikëninchö alläpa alli këkaq warmi, Jehovämi* qamwan këkan”. 29 Tsënö niptinnam pëqa mantsakar yarpachakurqan, y imanir tsënö saludanqantam entiendita munarqan. 30 Tsënam angelqa nirqan: “Ama mantsakëtsu Marïa, qamqa Diospa rikëninchömi alli këkanki. 31 Rikë, qeshyaqmi tikranki, ollqu wamrëkim yurinqa+ y Jesus nirmi jutin churanëki.+ 32 Pëqa reqishqam kanqa,+ Llapanta Gobernaq Poderösu Diospa Tsurin nirmi reqiyanqa,+ y Jehovä* Diosmi papänin Davidpa gobernar täkunanta entreganqa.+ 33 Jacobpa kastankunatam imëyaqpis gobernanqa, y Gobiernunqa manam imëpis ushakanqatsu”.+

34 Peru Marïaqa, “¿imanötan tsëqa pasanqa pï ollquwampis mana kashqa këkaptïqa?” nirmi angelta tapurqan.+ 35 Tsënam angelqa nirqan: “Santu espïritum qamman shamunqa,+ y Llapanta Gobernaq Poderösu Diospa poderninmi tsaparkushunki. Tsëmi qampita yureqtaqa Diospa limpiu Tsurin nir reqiyanqa.+ 36 Rikë, qolloq niyanqan kastëki Elisabetpis chakwanna këkarmi ollqu wamrata qeshyaq këkan, y joqta killayoqnam. 37 Awmi, Teyta Diospaqqa manam ima ninqampis mana cumplikaqqa kantsu”.*+ 38 Tsënö niptinnam Marïaqa, “¡këchömi Teyta Jehoväpa* sirweqnin këkan! Qam ninqëkinölla noqawan pasatsun” nirqan. Tsënam angelqa dejëkur ëwakurqan.

39 Tsëpita ichik tiempullatanam Marïaqa alistapakurkur jirkachö këkaq Judäpa juk markanman ras o sas ëwarqan, 40 y Zacarïaspa wayinman chärirmi Elisabet-ta saludarqan. 41 Marïa saludanqanta Elisabet wiyariptinllam, pachanchö këkaq wamraqa kuyuskirqan, y santu espïritu yanapaptinmi Elisabetqa 42 fuertipa kënö nirqan: “¡Qamqa llapan warmikunapitapis mas bendicishqam kanki, y qampita yureqpis bendicishqam kanqa! 43 ¿Pitan noqallä kä Señornïpa mamänin noqaman shamunampaq? 44 Rikë, saludamanqëkita wiyanqä höram pachächö llullu kushikur fuertipa kuyurishqa. 45 Tsënölla kushikutsun tsëta creishqa kaqpis, Teyta Jehovä* pëta willatsinqanqa llapanmi cumplikanqa”.

46 Marïanam kënö nirqan: “Teyta Jehovätam* alabä,+ 47 salvamaqnï Diosrëkurmi shonqü alläpa kushikun.+ 48 Pëqa sirweqnin humildi kanqantam rikashqa.+ ¡Kanampitaqa llapan nunakunam kushishqa kanqäta parlayanqa!+ 49 Alläpa Puëdeq Diosqa imëka allikunatam noqapaq ruramushqa, y jutinqa respetëpaqmi.+ 50 Kanan witsan y shamoq witsanchöpis, pëta respetaqkunataqa llakipanqam.*+ 51 Poderninwanmi imëka espantëpaqkunata rurashqa; shonqunkunachö allish tukoqkunatam wakpa këpa qarqushqa.+ 52 Puëdeq nunakunatam cargunkunapita qarqushqa,+ y humildi nunakunatam väleqpaq churashqa;+ 53 imëka allikunawanmi mallaqëkaqkunapa pachanta juntatsishqa,+ y rïcu kaqkunatam jinëllata qarqushqa. 54 Llakipäkoq* kanqanta yarparmi, sirweqnin Israelpa kastankunata* yanapaq shamushqa,+ 55 Abrahanta y kastankunata imëpis llakipänampaq*+ unë kastantsikkunata äninqannölla”. 56 Elisabetwan kima killanö juntu karirmi Marïaqa wayinta kutikurqan.

57 Tsëpitanam, Elisabetpa höran chäriptin ollqu wamran yurirqan. 58 Teyta Jehovä* alläpa llakipashqa* kanqanta musyarmi vecïnunkuna y kastankuna pëwan juntu alläpa kushikuyarqan.+ 59 Puwaq junaq pasariptinnam ishpakunampa puntanchö wamrankunata señalatseq ëwayarqan,+ y papänin Zacarïaspa jutintam churayänan karqan. 60 Peru mamäninqa, “¡ama! Jutinqa Juanmi kanqa” nirqanmi. 61 Tsënam pëkunaqa, “peru manataq mëqan kastëkipis tsënö jutiyoq kantsu” niyarqan. 62 Tsënam papäninta sëñasllapa tapuyarqan jutin ima kanampaq kaqta. 63 Pëqa ichikllan tablata mañakurirmi, “jutinqa Juanmi kanqa”+ nir qellqarqan. Tsënam llapankuna espantakuyarqan. 64 Tsë höram Zacarïasqa yapë parlarnin+ Teyta Diosta alabar qallëkurqan. 65 Llapan vecïnunkunam alläpa mantsakäyarqan,* y entëru Judëa provinciachömi tsë llapan pasanqampaq parlar qallëkuyarqan. 66 Tsëta llapan wiyaqkunam, “¿imaraq kë wamra kanqa?” nir shonqunkunachö pensayarqan. Awmi, pëtaqa Teyta Jehovämi* poderninwan yanapëkarqan.

67 Tsënam papänin Zacarïasqa santu espïritu yanapaptin kënö nir willakurqan: 68 “Israelpa Diosnin+ Jehovä* alabashqa katsun. Pëqa llakiparmi* sirweqninkunata salvashqa.+ 69 Y noqantsikrëkurmi sirweqnin Davidpa familiampita+ puëdeq salvakoq* yurinanta permitishqa,+ 70 unë witsan confiakuypaq willakoqninkunawan willakuyanqannölla.+ 71 Tsëtaqa rurashqa contrantsik këkaqkunapita y llapan chikimaqnintsikkunapita salvamänapaq,+ 72 y unë kastantsikkunata äninqannölla noqantsikta llakipämänapaq* y pëkunawan ruranqan acuerduta yarpänampaqmi.+ 73 Tsëtam unë kastantsik Abrahanta jurar änirqan,+ 74 chikimaqnintsikkunapita salvamashqa mana mantsashpa pëta sirwinapaq, 75 y llapan kawanqantsik junaq alli kaqta rurar mana dejëpa sirwinapaq. 76 Peru qamtaqa tsurillä, Llapanta Gobernaq Poderösu Diospa willakoqnin nirmi reqiyäshunki. Qamqa näninkunata alistarmi Teyta Jehoväpa* puntanta ëwanki,+ 77 jutsankunata* perdonar salvanampaq kaqta sirweqninkunata musyatsinëkipaq,+ 78 tsëtaqa alläpa llakipäkoq* karmi Teyta Diosnintsik ruranqa. Tsënö llakipäkoq kaptinmi patsa waraqnö ciëlupita atsikyämunqanta rikäshun. 79 Awmi, ampichö o tsakëchö* y wanuy wäniranqan o llanturanqan markakunachö nunakunamanmi aktsikyanqa,+ y yamë këta imanö tarinapaqmi musyatsimäshun”.

80 Wamraqa jatunyarmi Diospa kaqchö mas alli tikrarqan, y Israel nunakunata willar qallanqan junaqyaqmi tsunyaq sitiuchö kakurqan.