7 Respetakoq kayänampaq yachatsiyë

¿IMA NINANTAN?

Respetakoq këqa kawë vïdantsikchö alli kawakunapaqmi yanapamantsik. ¿Allikunata ruranëkipaqku kallpachakunki? Tsëqa wamrëkikunapis, tsënö kayänantachi munanki.

Respetakoq nunaqa trabajadormi, llapankunatam igualpa rikan y wakinkunamanmi yarpachakun. Y wamra këkarmi tsëkunataqa yachakunan.

BIBLIACHÖ YACHAKUNQANTSIK: “Wamrataqa llullullaraq këkaptin shumaq yachatsi. Awkisyashqapis yachakushqanta manam qonqanqatsu” (Proverbius 22:6).

¿IMANÖTAN YANAPAMANTSIK?

Kanan witsanqa allita rurëqa manam fäciltsu. Kären jutiyoq maman nin: “Wamrantsikkunaqa, imëka mana allikunatam celularchö yachakayämun. Pëkunaqa noqantsikwan juntu këkarnimpis, celularninchöqa mana allikunata rurarmi këkäyanman”.

BIBLIACHÖ YACHAKUNQANTSIK: “Tantiyakoq këninkunata [...] yachatsishqata katsirnin, alli kaqta y mana alli kaqtapis cuentata qokïta yachaqkunapaq” (Hebrëus 5:14).

Respetakoq kanqantsikqa yanapakunmi. Kanan witsan nunakunaqa celularninkunata y tabletninkunata rikaräkurmi wakinkunamanqa yarpachakuyantsu. Tsëmi imatapis shumaq mañakuyta y “gracias” nikuyta yachayantsu. Y manam wakinkunamampis yarpachakuyantsu.

BIBLIACHÖ YACHAKUNQANTSIK: “Imanömi nunakuna tratayäshunëkita munayanki, tsënölla qamkunapis pëkunata tratayë” (Lücas 6:31).

¿IMATATAN RURANKIMAN?

Imata rurayänampaq kaqta cläru nï. Teytakuna wamrankunata piwampis manaraq casakur oqllanakuy mana alli kanqanta yachatsiyaptinqa, wamrakunaqa manam tsë mana alli rurëman ishkiyanqatsu.

KËMI YANAPASHUNKI: Mana allikuna pasakunqanta willakayämunqanwan wamrëkita yachatsi. Radiuchö o televisionchö juk noticiata wiyarir kënö ni: “¡Achachï, imatanachi rikantsikpis! ¿Imanirtan nunakuna mana allikunata rurayan?”.

Brandonmi nin: “Wamrëkikuna imatapis alli rurayänampaqqa, puntataqa ima alli y ima mana alli kanqantam musyayänan”.

Wamrëkita yachatsi. Wakinkunaman yarpachakuyänampaq, imatapis shumaq mañakuyänampaq y gracias nikuyänampaqmi wamrëkikunataqa pishi kayanqampita yachatsiyänëki. Teytakunapaq parlaq juk librum nin: “Wakinkunaman yarpachakoq y respetakoq wamrakunaqa, manam kikinkunallamanqa yarpachakuyantsu”.

KËMI YANAPASHUNKI: Wamrëkikunata imallachöpis yanapakuyänampaq yachatsi. Tsënöpam wakinkunapaq yarpachakuyanqa.

Täram kënö nin: “Wamrakunataqa wayichö rurapakuykunatam yachatsinantsik. Tsënö rurashqaqa, wayipita yarqurirpis manam ankupëpaq o llakipëpaptsu kayanqa y allim kawakuyanqa”.