Bautizakunëkipaqqa, ¿imakunatataq ruranëki?

1. Kë librupita yachakurirqa, ¿imataraq itsapis tapukïkanki?

KË LIBRUQA, Bibliapita imëkata yachakunëkipaqmi yanapashurqunki. Por ejemplu, kananqa musyankinam mana wanushpana kawakunapaq Diosnintsik änimanqantsikta, wanurishqa ima pasamanqantsikta y wanushqakuna kawariyämunampaq kaqta (Eclesiastes 9:5; Lücas 23:43; Juan 5:28, 29; Revelacion [Apocalipsis] 21:3, 4). Y kananqa itsa ëwëkankina Jehoväpa testïgunkunapa reunionninkunaman, y itsachi cuentata qokurqunkina pëkunaqa alli kaq religion kayanqanta (Juan 13:35). Jina itsa masna kallpachakïkanki Jehoväwan mas amïgu kanëkipaq, y itsapis decidirqunkina pëllatana sirwinëkipaq. Tsëqa itsa kënö nishpa tapukïkanki: “¿Ima mastataq ruräman Jehoväpa sirweqnin kanäpaq?”.

2. ¿Imanirtaq Etiopïa nacionpita nunaqa bautizakïta munarqan?

² Unë witsampis, juk nunam Jesuspa qateqnin Felïpita tapurqan bautizakunampaq imata ruranan faltanqanta. Tsëqa pasakurqan ciëluman Jesus kutikunqampita pöcu tiempu pasarishqanllachömi. Tsë nunaqa Etiopïa nacionpitam karqan. Diospa Akrashqanqa Jesus kanqantam Felïpiqa tsë nunata yacharatsirqan. Y tsëta yachakurirmi tsë nunaqa kënö nirqan: “¡Rikë! Këchömi yaku kan; ¿imataq michäkun bautizashqa kanäta?” nishpa (Hëchus 8:26-36).

3. (1) ¿Imata rurayänampaqtaq qateqninkunata Jesus mandarqan? (2) ¿Imanötaq bautizayanman Jehoväpa sirweqnin këta munaqkunataqa?

³ Jehoväpa sirweqnin kanëkipaqqa bautizakunëkiran, porqui Bibliaqa tsëtam yachatsikun. Bibliachöqa nin, qateqninkunata Jesus kënö mandanqantam: “Qatimaqnïkuna tikrayänampaq [...] yachatsiyë, Teytapa, Tsuripa y santu espïritupa jutinchö bautizatsirnin” nishpa (Mateu 28:19). Y juk ejempluta churarmi kikin Jesuspis bautizakurqan. Peru ¿imanötaq pëtaqa bautizayarqan? Bautizakoq Juanqa yakuman tullpurmi bautizarqan, manam peqanman (umanman) yakuta jichaparllatsu bautizarqan (Mateu 3:16). Kanan witsampis, Jehoväpa sirweqnin këta munaqkunataqa yakuman tullpurmi bautizayänan.

4. Bautizakurninqa, ¿imatataq rikätsikuntsik?

⁴ Bautizakurninqa, Diospa amïgun këta munanqantsikta y Diosllatana sirwinapaq decidinqantsiktam rikätsikuntsik (Salmus 40:7, 8). Itsachi qampis tsërëkur bautizakïta munëkanki, y itsa kënö nishpa tapukïkanki: “¿Imatataq ruranä bautizakunäpaq?”.

BIBLIAPITAM ALLEQ YACHAKUNËKI Y MARKÄKUNËKIM

5. (1) Bautizakunëkipaqqa, ¿imakunata ruranëkitaq precisan? (2) ¿Imanirtaq alläpa precisan reunionkunaman ëwanëki?

⁵ Bautizakunëkipaqqa, Jehovätawan Tsurin Jesustam alleq reqinëki. Y Bibliapita yachakur qallanqëkipitanam tsëtaqa rurëkanki (leyi Juan 17:3). Peru tsënö kaptimpis, mastaran ruranëki. Bibliachöqa nin, Diospa ‘munëninta alli musyanëki’ precisanqantam (Colosensis 1:9). Jinamampis, Jehoväwanmi mas amïgu kanëki, y tsëpaqqa Jehoväpa testïgunkunapa reunionninkunaman ëwanqëkim yanapashunki. Tsëmi tsë reunionkunamanqa mana faltashpa ëwanëki (Hebrëus 10:24, 25).

6. Bautizakunëkipaqqa, ¿llapantaraqku Bibliapita yachanëki?

⁶ Tsënö kaptimpis, bautizakunëkipaqqa Bibliapita llapanta yachanëkitaraqtsu manam Jehoväqa shuyaran. Etiopïa nacionpita nunatapis manam llapantaraq yachakunampaqtsu nirqan (Hëchus 8:30, 31). Rasumpa kaqchöqa, Jehoväpita yachakïtaqa manam ni imëpis ushashuntsu (Eclesiastes 3:11). Tsënö kaptimpis, bautizakunëkipaqqa Bibliapa mas precisaq kaq yachatsikïninkunataran yachakunëki, y yachakunqëkimannömi kawanëki (Hebrëus 5:12).

7. Bibliapita yachakunqëkiqa, ¿imachötaq yanapashurqunki?

⁷ Bibliachöqa kënömi nin: “Mana markäkïyoq karqa manam ni imanöpapis Diospa shonqumpaqnö pipis këta puëdintsu” (Hebrëus 11:6). Tsëmi bautizakunëkipaqqa, Biblia yachatsikunqankunaman markäkunëki o creinëki. Tsënömi unë witsampis Corintu markachö pasakurqan. Tsë markachö täraq nunakunaqa Jesusman creikoq nunakuna yachatsikuyanqanta wiyakurirmi, “creikur qallëkuyarqan y bautizakuyarqan” (Hëchus 18:8). Y tsënöllam qamwampis pasakushqa. Bibliapita yachakunqëkim yanapashurqunki Diosnintsik ruramunampaq kaqkunaman y jutsapitawan wanïpita Jesus salvamanqantsikman markäkunëkipaq (Josuë 23:14; Hëchus 4:12; 2 Timoteu 3:16, 17).

BIBLIAPITA YACHAKUNQËKIKUNATA YACHATSIKÏ

8. ¿Imataq yanapashunki Bibliapita yachatsikïta munanëkipaq?

⁸ Bibliapita yachakur sïguirmi y yachakunqëkikuna imanö yanapashunqëkita rikarmi, Biblia yachatsikunqankunaman mas markäkunki, y tsënöpam jukkunatapis Bibliapita yacharatsita munanki (Jeremïas 20:9; 2 Corintius 4:13). Tsëmi kananqa yachakushun pikunata yachatsita puëdinqëkita.

9, 10. (1) Bibliapita yachakunqëkikunataqa, ¿pikunatataq yacharëkätsinkiman? (2) Jehoväpa testïgunkunawan yachatsikoq yarqïta munarqa, ¿imatataq ruranëki?

⁹ Bibliapita yachakunqëkikunataqa, ¿pikunatataq yacharëkätsinkiman? Allichi kanman familiëkikunata, reqinakushqëkikunata, vecïnïkikunata, trabajaq mayikikunata o estudiaq mayikikunata yacharëkätsiptikiqa. Peru respëtuwanmi shumaqlla yachatsinëki. Tiempu pasariptinqa, precisanqam Jehoväpa testïgunkunawanna yachatsikoq yarqunëki. Peru pëkunawan yachatsikoq yarqïta munarqa, Bibliapita yachëkätsishoqnikitam willanëki. Sitsun yachëkätsishoqniki rikanqa yachatsikoq yarqunëkipaq listuna këkanqëkita y Biblia mandakunqannö kawëkanqëkita, tsëqa ishkaq anciänukunawanmi qam y pë juntakäriyanki.

¹⁰ Tsë juntakäyanqëkichöqa, ¿imatataq anciänukunaqa musyëta munayanqa? Bibliapa precisaq yachatsikïninkunata alleq entiendinqëkita, Diosnintsik mandakunqankunata cäsukunqëkita y Jehoväpa testïgun këta rasumpa munanqëkitam. Anciänukunawan parlëtaqa manam mantsakunëkitsu, porqui anciänukunaqa Jehoväpa llapan sirweqninkunatam cuidayan, y qamtapis cuidayäshunkim (Hëchus 20:28; 1 Pëdru 5:2, 3). Pëkunaqa juntakäriyanqëkillachömi willariyäshunki yachatsikoq yarqïta puëdinqëkitana o masraq yachakurinëki precisanqanta.

11. Yachatsikoq yarqunapaqqa, ¿imanirtaq vïdantsikchö cambianantsik precisan?

¹¹ Anciänukunaqa itsachi niyäshunki Jehoväpa testïgunkunawan yachatsikoq yarqunëkipaqqa imallachöpis cambianëkiraq precisanqanta. Y, ¿imanirtaq cambianëki precisan? Porqui yachatsikoq yarqurqa, Jehovä Diospa sirweqnin kanqantsiktam rikätsikuntsik. Tsëmi alläpa precisan pë munanqannö kawanqantsikta rikätsikunantsik (1 Corintius 6:9, 10; Gälatas 5:19-21).

ARREPENTIKÏ Y DIOSMAN KUTI

12. ¿Imanirtaq bautizakunapaqqa arrepentikunantsikraq?

¹² Bautizakunëkipaqqa, ¿ima mastataq rurankiman? Apostol Pëdrum kënö nirqan: “Arrepentikuyë, y jutsëkikunapita perdonashqa kayänëkipaq Diosman kutiyë” (Hëchus 3:19). ¿Imataq arrepentikïqa? Kawë vïdantsikchö imëka mana allikunata ruranqantsikpita shonquntsikpita patsë llakikur pësakïmi. Por ejemplu, sitsun soltëru o casädu këkar jukwan jukwan kakushqanki, tsëqa arrepentikunëkim. Peru imëpis alli kaqllata ruranëkipaq kallpachakushqa karqa, ¿precisanku arrepentikunëki? Awmi, porqui llapantsikmi imanöllapapis jutsataqa rurarintsik, tsëmi Diosnintsik perdonamänantsiktaraq wanantsik (Romänus 3:23; 5:12).

13. Diosman kutinëkipaqqa, ¿imatataq ruranëki?

¹³ Mana allikunata ruranqantsikpitaqa, ¿pësakunantsikllaku? Manam, porqui apostol Pëdruqa “Diosman kutiyë” nirqanmi. Y Diosman kutinapaqqa, ¿imatataq rurashwan? Mana alli rurëkunatam chipyëpa dejanantsik, y alli kaqllatanam ruranantsik. Këman pensarishun: juk nänipa ëwarëkarnin llutampa ëwashqa kanqëkita cuentata qokurinkiman. Tsëqa, ¿imataraq rurankiman? Kutirirchi alli kaq nänipana ëwankiman. Tsaq tsënöllam Bibliapita yachakurqa cuentata qokurinki imakunachö mana alli këkanqëkita y imakunachö cambianëki precisanqanta. Tsënö cuentata qokurirqa, Diosman kutinëkipaqmi vïdëkichö cambianëki, y alli kaqtanam rurar qallëkunëki.

DIOSNINTSIKTAM ÄNINËKI SIRWEQNIN KANËKIPAQ

14. Jehovä Diospa sirweqnin kanëkipaqqa, ¿imatataq ruranëki?

¹⁴ Jina bautizakunëkipaqqa, Diosnintsiktam äninëki (awninayki) sirweqnin kanëkipaq. Y ¿imanötaq tsëtaqa rurankiman? Diosnintsikman mañakurninmi äninëki pëllatana adoranëkipaq y kawënikichöqa pëta puntaman churanëkipaq (Deuteronomiu 6:15).

15, 16. Sirweqnin kanëkipaq Diosta äninëkipaqqa, ¿imataq yanapashunki?

¹⁵ Jehoväta sirwinantsikpaq änikïqa, casakoqkuna imëpis kuyanakuyänampaq äninakuyanqannömi. Pensarishun casakïta pensëkaq noviukunaman. Musyanqantsiknöpis, noviu kaqqa novianta mas reqinqanmannömi mas kuyanqa y pëwan casakïta munanqa. Casädu vïda mana fäcil kaptimpis, novianta alläpa kuyarninmi casakunampaq decidinqa.

¹⁶ Qampis Jehoväta mas reqirqa, masmi kuyanki, y sirweqnin kanëkipaqmi llapan puëdinqëkita ruranki. Tsëmi yanapashunki sirweqnin kanëkipaq Jehoväta äninëkipaq. Jinamampis Jesusqa kënömi nirqan: “Pipis qepäta shamïta munaq kaqqa, amana kikimpaqqa kawatsunnatsu” (Marcus 8:34). Y, ¿imanötaq rikätsikuntsik kikintsikpaq manana kawanqantsikta? Imëkachöpis Jehovällatana cäsukurmi. Tsëmi kikintsikpa munënintsikta rurëpitapis Jehoväpa munëninta rurë mas precisanan (leyi 1 Pëdru 4:2).

AMA MANTSËTSU SIRWEQNIN KANËKIPAQ DIOSNINTSIKTA ÄNITA

17. ¿Imanirtaq wakinkunaqa sirweqnin kayänampaq Jehoväta äniyantsu?

¹⁷ Wakinkunaqa mantsayanmi sirweqnin kayänampaq Jehoväta änita, porqui äniyanqanta cumplita mana puëdiyänampaq kaqtam pensayan. Itsachi mantsayan mana allita rurarnin Jehoväta llakitsita. O itsa pensayan, sirweqnin kayänampaq Jehoväta mana äniyaptinqa, vïdankunachö imata rurayaptimpis pëkunataqa Jehovä cuentata mana mañanampaq kaqta.

18. Sirweqnin kanëkipaq Jehoväta änita mana mantsanëkipaqqa, ¿imataq yanapashunkiman?

¹⁸ Sirweqnin kanëkipaq Jehoväta änita mana mantsanëkipaqqa, ¿imataq yanapashunkiman? Shonqupita patsë Jehoväta kuyanqëkim. Jina tsënö kuyanqëkim yanapashunki pëta äninqëkita llapan puëdinqëkimannö cumplinëkipaq (Eclesiastes 5:4; Colosensis 1:10). Jinamampis Jehovä mandakunqankunata rurëqa manam alläpa sasatsu (ajatsu). Tsëmi apostol Juanqa kënö nirqan: “Këmi Diosta kuyëqa: mandakïninkunata wiyakï; y tsënö kaptimpis, mandakïninkunata wiyakïqa manam alläpa sasatsu” (1 Juan 5:3).

19. ¿Imanirtaq mantsankimantsu sirweqnin kanëkipaq Jehoväta änita?

¹⁹ Sirweqnin kanëkipaq Jehoväta äninëkipaqqa, ¿pasëpa jutsannaqraqku kanëki? Manam. Jinamampis Jehoväqa manam mandamantsiktsu rurëta mana puëdinqantsiktaqa (Salmus 103:14). Y alli kaqta ruranëkipaqqa kikin Jehovämi yanapashunki (Isaïas 41:10). Bibliachö ninqannöpis, “pëmi imëkachöpis alli yarqupukunëkipaq yanapashunki”. Tsëmi alläpa precisan llapan shonqïkiwan Jehoväman confiakunëki (Proverbius 3:5, 6).

JEHOVÄTA ÄNINQËKITAM ‘NUNAKUNA JANANCHÖ MUSYATSIKUNËKI’

20. Sirweqnin kanëkipaq Jehoväta änirirqa, ¿imatataq rurëta puëdinkina?

²⁰ ¿Listunaku sientikunki sirweqnin kanëkipaq Jehoväta äninëkipaq? Listuna sientikurqa, Jehoväman mañakurmi sirweqnin kanëkipaq äninëki, y tsëta rurarirqa puëdinkinam bautizakïta.

21, 22. ¿Imanötaq “nunakuna jananchö” rikätsikunki salvamänantsikpaq Jesus wanunqanman markäkunqëkita y sirweqnin kanëkipaq Jehovä Diosta äninqëkita?

²¹ Sirweqnin kanëkipaq Jehoväta änishqana karqa y bautizakïta munarqa, anciänupura rurayänanta rikaq anciänutam willarinëki. Pëqa wakin anciänukunatam nirinqa Bibliapa mas precisaq kaq yachatsikïninkunapita tapupäriyäshunëkipaq. Bautizakunëkipaq listuna kanqëkita rikarqa, Jehoväpa testïgunkunapa shamoq kaq asamblëankunachö bautizakunëkipaqmi niriyäshunki. Tsë asamblëachöqa, Jehoväta äninqantsikta imanö cumplinapaq kaqtam juk discursuchö yarpätsikayämun. Tsë discursuta ruramoq anciänuqa, llapan bautizakoq kaqkunatam ishkë precisaq tapukïkunata tapun. Tsë ishkan tapukïkunata “awmi” nishpa contestarmi, “nunakuna jananchö” rikätsikunki salvamänantsikpaq Jesus wanunqanman markäkunqëkita y sirweqnin kanëkipaq Jehovä Diosta äninqëkita (Romänus 10:10).

²² Tsëpitaqa bautizakurinkim. Y, ¿imanötaq bautizayäshunki? Yakuman chipyëpa tullpuriyäshurnikim jorqarayämushunki. Y llapankunapa rikëninchö bautizakunqëkim rikätsikunqa sirweqnin kanëkipaq Jehoväta änishqëkita y Jehoväpa testïgunna kanqëkita.

YAKUCHÖ BAUTIZAKUNQANTSIKQA, ¿IMATATAQ RIKÄTSIKUN?

23. ¿Imanirtaq “Teytapa, Tsuripa y santu espïritupa jutinchö” bautizakunantsik?

²³ Jesusman creikoqkunaqa “Teytapa, Tsuripa y santu espïritupa jutinchö” bautizakuyänampaqmi Jesusqa nirqan (leyi Mateu 28:19). Y, ¿imanirtaq “Teytapa, Tsuripa y santu espïritupa jutinchö” bautizakunantsik? Teytapa jutinchö bautizakurqa Jehoväpa puëdeq kënintam cuentachö katsintsik. Y Tsuripa jutinchö bautizakurqa, Jehoväpa munënin cumplikänampaq Jesus yanapakunqantam cuentachö katsintsik. Y santu espïritupa jutinchö bautizakurqa, santu espïritunwan imëkata Jehovä ruranqantam cuentachö katsintsik (Salmus 83:18; Mateu 28:18; Gälatas 5:22, 23; 2 Pëdru 1:21).

24, 25. (1) Yakuchö bautizakunqantsikqa, ¿imatataq rikätsikun? (2) ¿Imatataq yachakushun qateqnin kaq capïtuluchö?

²⁴ Yakuchö bautizakunqantsikqa, ¿imatataq rikätsikun? Yakuman tullpushqa kanqantsikqa rikätsikun, tsë höra wanureq cuenta llapan mana alli rurënintsikkunata dejarinqantsiktam. Y yakupita yarqaramunqantsikqa rikätsikun, yapë yurikureq cuenta Jehovällapaqna kawar qallëkunqantsiktam. Tsë llapanmi rikätsikun, tsë junaqpita patsëqa Jehoväpa sirweqninna kanqantsikta. Tsëmi këta yarpänëki: qamqa manam juk nunata o juk religionta sirwinëkipaqtsu änikurqunki, sinöqa Jehovä Diostam änirqunki sirweqnin kanëkipaq.

²⁵ Sirwinëkipaq Jehoväta äninqëkim yanapashunki pëwan mas amïgu tikranëkipaq (Salmus 25:14). Peru tsënö kaptimpis, bautizakunqëkiqa manam salvacionniki següruna kanqantatsu rikätsikun. Tsëmi apostol Pabluqa kënö nirqan: “Llapëkikuna trabajar sïguiyë salvacionta lograyänëkipaq” nishpa (Filipensis 2:12). Tsëmi bautizakunqëkiqa Jehoväta sirwir qallanqëkillata rikätsikun. Tsëqa, ¿imatataq ruranëki Jehoväwan imëpis amïgu kanëkipaq? Kë librupa ushanan kaq capïtulunchömi tsëta yachakurinki.