QARANCHÖ TËMAPITA: MOISESPITA YACHAKÏTA PUËDINTSIKMI
¿Pitaq Moisesqa karqan?
Moises jutita wiyarirqa, ¿imanö kanqantataq yarpärinki?
Llullu wamranta canastaman churëkur Nilo mayuchö maman dejarinqanta.
Egiptochö Faraonpa wamran riqueza jananchö qeshpitsinqan jöventa, pero israelita kanqanta mana qonqanqanta.
Chusku chunka watapa Madianchö mitsikoq nunata.
Rupëkaq shiraka kashapa nöpanchö Jehoväwana parlanqan nunata.
Egiptopa reyninman ëwëkur esclavo kayanqampita israelïtakunata libranampaq mañakoqta.
Chunka plägakuna pasanampaq puëdeq faraonta willaq nunata.
Israelïtakuna Egiptopita yarquyaptin pushaq nunata.
Puka lamarta kicharinampaq Dios utilizanqan nunata.
Chunka Mandamientokunata Diospa jutinchö israelïtakunata entregaq nunata.
MOISESQA këkunatam kawëninchö pasarqan. Kë nunataqa cristiänokuna, judïokuna y musulmankunam alläpa respetayan.
Musyënam, Moisesqa alläpa precisaqkunata ruraq profëtam karqan (Deuteronomio 34:10-12). Tsënö kanampaq Dios utilizashqa kaptimpis ‘noqantsicno nunallam’ karqan. Jesus kawanqan witsan apostolkuna visionchö profeta Elïasta rikäyanqannöllam karqan (Santiagu 5:17; Mateo 17:1-9). Kanan witsan imëkapa pasanqantsiknöllam Moisesqa imëkata pasarqan, y allim tsarakurqan.
¿Musyëta munankimantsuraq imanö alli tsarakunqanta? Rikärishun imanö kanqanta y pëpita imata yachakïta puëdinqantsikta.
a Bibliaqa willakun Diospa jutin Jehová kanqantam.