Bibliata alli manejashun
1. ¿Imanirtaq Bibliata alli manejëta yachakunantsik?
1 Diospa Palabranta alli manejëta yachanqantsikqa, shumaq willakunapaq y rasun kaqta claro yachatsikunapaqmi yanapamantsik, hina mëqan creenciakuna y costumbrekuna mana alli kanqanta rikätsikunapaqpis yanapamantsikmi (2 Tim. 2:15; 1 Ped. 3:15).
2. ¿Imaraq yanapamäshun textokunata raslla tarinapaq?
2 Cada hunaq más alli manejëta yachakï: Imëka máquina cuentam Bibliaqa, imanö manejana kanqantapis más yachakorqa, más allim manejanki. Qallanampita ushananyaq Bibliata leirqa, manam imapita parlanqanllatatsu yachakunki, hina textokunata yarpänëkipaq y raslla tarinëkipaqpis yanapashunkim. Bibliapita alli yachakorqa, wayin wayin yarqurnin y mëchö tsëchö këkarpis kushishqa y más allim yachatsikunki (1 Tes. 1:5).
3, 4. a) ¿Imataraq rurashwan Bibliata más alli manejanapaq? b) ¿Imakunatataq ruranki Bibliata más alli manejanëkipaq?
3 Reunionkunachö textokunata leiyämuptin Bibliëkita kichëkur qatinëkipaq churakë. Hapallëki yachakonqëki höra y reunionkunapaq preparakunqëki hörachö, mana qellqaraq textokunata ashirir, imata yachatsikonqanta o imanö yanapashunqëkita tapukï. Yachatsikurnin textokunata raslla tariyänampaqqa wakinkunata yanapashqa, preparakurnin computadörachö o papel-llachö leiyänampa rantin, kikin Bibliata kichëkur leiyanqanmi (Juan 14:26).
4 Wakin familiakunaqa textokunata alli yachakuyänampaqmi tiemponkuna horquyan. ¿Imanötaq yachakuyan? Huk textotam qellqayan huk papelman y waqtanmannam churayan tsë texto ima nenqantapis. Tsëpitanam trokanakur huknin lädollata rikäyan y tapunakuyan ima texto kanqanta o ima nenqantapis yarpäyänampaq. Hina yachatsikoq ëwayanqanchö tapuyaptin, o mana wiyakïta munar tukïta niyaptin Bibliawan imanö contestayänampaqpis wayinkunachömi yachakuyan.
5. ¿Imanirtaq alläpa precisan Bibliapita alli yachakunantsik?
5 Bibliallam pitapis ‘cäyitsin salbacunampaq’, tsëmi wakin librokunapitaqa más alli (2 Tim. 3:15). Pero Bibliachö alli yachatsikïkuna kanqantaqa casi llapan nunakunam musyayantsu, tsëmi Bibliapita alli yachakunantsik alläpa precisan, tsënöpa imata yachatsikonqantapis musyatsikunapaq (Pro. 2:1-5).