Jehoväpa Testïgonkunata Pushaqkunapa cartan
Kuyashqa wawqikuna y panikuna:
¡Imanö kushikïpaqmi Jehoväpa testïgonkuna kanqantsikqa! Imëkata Kamaqpa mana ushakaq y ni imawan igualaq shutintam apantsik. Kikin Jehovämi tsë shutita churamashqantsik, tsëmi 1931 watapita patsa tsë shutiwan reqishqa kantsik (Isa. 43:10). Tsënöpam shutintsik Jehoväpa Testïgonkuna kanqanta alläpa kushikuntsik.
Diabluqa imëkanöpam Diospa shutinta ushakätsita ashin. Y makinchö këkaq llapan nacionkunam Diospa shutimpita imata musyëtapis munayantsu, hina Hatun Babilonia o llapan mana alli religionkunapis, tsë shutita chikirmi atska Bibliakunaman churayashqatsu. Pero Jesusqa manam tsënötsu karqan. Antis alläpam precisatsirqan Teytampa shutinta, tsëmi imanö mañakuyänampaq qateqninkunata yachatsirpis tsëtaraq puntaman churarqan. Kënömi nirqan: “Qamcunaqa queno[mi] mañacuyänequi: Sielucho quecaq Dios Yayalläcuna, jutillequi allapa respetuwan alabashqa catsun” (Mat. 6:9). Huk kutinam llapan shonqunwan Diosman mañakurnin kënö nirqan: “Mundupita qomashqeyki nunakunata musyatserqömi jutikita” (Juan 17:6, QKW). Jesus ruranqanta qatirmi, imëpitapis más Diospa shutinta hinantin Patsapa alli yachatsikunantsik.
2009 watachö ‘llapanmanmi alli willakïta chätsinantsik’ neq textoqa, më tsëchöpis alli yachatsikunapaqmi yarpätsimarqantsik (Hech. 20:24, NM). Pasaq watachö ruranqantsikkunata Jehová alläpam bendecimushqa, tsëmi pëta alabayänampaq y shutin reqishqa kanampaq hinantin Patsachö alli yanapakurquntsik. 7.313.173 publicadorkunam llapan nunakunata willarnin y alli shonquyoq kaqkunata problëmankuna imanö altsakänampaq kaqta yachatsirnin yanapakayämurqunki. Y 18.168.323 nunakunam Jesuspa Wanïnin Yarpëman shayämurqan, tsëmi rikätsikun manaraq kë mundo ushakaptin atska millón nunakunaraq Diospa shutinta alabayänampaq kaqta.
Alli noticiakunataqa, markantsikchö llapan nunakunaman chätsita tïrarmi Jehová këyaqlla nimanqantsikyaq kushishqa willakïkänantsik (Mat. 24:14; Mar. 13:10). Wayin wayin kar, cällekunachö kar, telëfonopa kar o mëchö tsëchö këkarpis llapan puëdenqantsik nunakunatam Jehoväpa shutinta y shamoq tiempopaq awnikunqankunata willëkänantsik.
Wallka tiempollachöna pï kanqantapis Jehová musyatsikunampaq kaqta allim musyantsik (Eze. 36:23). Diospa shutimpaq mana allita parlaqkuna chulluk quedariyänampaq tiempoqa këllachönam. ¡Imanö kushikïpaqraq këkunqa Shutinta y Pëlla gobernaq kanqanta musyatsikur Jehovällata sirveqkunapaq!
Pasaq wataqa casi llapan patsachömi ‘¡Mäkoq mäkoqlla këkäyë!’ neq tëmayoq atska nacionpaq y hatun kaq asambleakuna kashqa, y tsëchömi markanta Jehová alläpa kuyanqan paqwë rikakushqa. Kë asambleakunaqa alläpa precisaqmi kashqa Diospa markampaq, hinamampis, Jehoväpa hunaqnin këllachöna këkanqanta imëpitapis más cuentata qokunapaqmi yanapamashqantsik (Mar. 13:37; 1 Tes. 5:1, 2, 4).
Jehoväqa alläpa allim noqantsikwan: Shonquntsiktam alläpa kushitsin, mëtsika pasto kanqankunachömi mitsimantsik y atska yaku kanqankunamanmi pushamantsik (Sal. 23:1, 2; 100:2, 5).
Kuyashqa wawqikuna y panikuna, shamoq killakunachö Diospa Gobiernompita yachatsikïta mana haqirqa, Jehoväpa atska bendicionninkunata chaskiyänëkipaq kaqta ama qonqayëtsu.
Alläpam kuyayaq.
Jehoväpa Testïgonkunata Pushaq
Wawqikikuna turikikuna