Kë rurënöqa manam imapis más precisaq kantsu
1. ¿Imakunatataq rurashun Diospita yachatsikïnintsikta kuyarninqa?
1 ¿Imanirtaq llapan tiempontsikwan, llapan kallpantsikwan y llapan kapamanqantsikwan yachatsikunapaq imëpis yarpëkätsimantsik? ¡Kë mundochö imëka rurëpitapis más precisaq kaptinmi! Imanir ruranqantsikman pensëmi yanapamäshun, kanan witsanlla ruranantsikchö más yanapakunapaq (Hech. 20:24).
2. ¿Imanötaq yachatsikur purinqantsik Diospa shutin alabashqa kanampaq yanapakun?
2 Diospa shutin alabashqa kanampaqmi yanapakun. Yachatsikurmi musyatsikuntsik llapan gobiernokunapa rantin, Jehoväpa Gobiernonchö Cristullana mandakamunampaq kaqta y nunakunapa tukï problëmakunata ushakätsimunampaq kaqta (Mat. 6:9, 10). Tsëmi claro rikätsikun qeshyapitawan wanïpita Jehovälla salvamënintsikta puëdenqanta (Isa. 25:8; 33:24). Hinamampis Diospa shutintam apantsik, tsëmi kushishqa yachatsikunqantsikta y alli portakunqantsikta rikar nunakuna Jehoväta alabayan (1 Ped. 2:12). ¡Imanö kushikïpaqmi llapan puëdeq Diosnintsikpa shutinta hinantin patsachö musyatsikïqa! (Sal. 83:18.)
3. ¿Diospita yachatsikunqantsikta shumaq chaskikoqkunaqa imatataq tariyan?
3 Nunakunatam salvan. Jehoväqa “manam munantsu pipis condenacunanta; antis shuyarëcan nunacuna jutsancunata jaqiriyänantam” (2 Ped. 3:9). Pero pipis mana yachatsiptinqa, ¿imanöraq musyayanqa Diospaq ima alli kanqanta y ima mana alli kanqanta? (Jon. 4:11; Rom. 10:13-15.) Huk nuna Diospa alli yachatsikïninkunata wiyakur mana alli rurëninkunata haqirqa, shamoq tiempochö imëyaqpis kushishqa kawakunampaq kaqllatatsu manam yachakun, sinöqa kanan witsampis yamë kawakïtam tarin (Miq. 4:1-4). Rikanqantsiknöpis, Diospita imëpis yachatsikunqantsikqa noqantsikta y wiyamaqnintsikkunatam salvan (1 Tim. 4:16). ¡Imanö shumaqmi kë alläpa precisaq rurëchö yanapakïqa!
4. ¿Imanirtaq Diospa gobiernompita yachatsikunantsik y pëta serviyänampaq nunakunata yanapanantsik alläpa precisan?
4 Ichik tiempollachönam hatun hipakï llapan mana alli kaqkunata ushakätsimunqa, pero Jehoväpaq kaqkunaqa manam ushakäyanqatsu. Tsëmi wayin wayin yachatsikunantsik, y Diosta serviyänampaq nunakunata yanapanantsik alläpa precisan. ¡Tsë rurëta puntaman churashun! (Mat. 6:33.)