¿Macedoniaman yachatsikoq ëwankimantsuraq?
1. ¿Imanöpataq Pabluwan yanaqinkuna Macedonia nacionman chäyarqan?
1 49 watakuna witsanmi, apóstol Pablu Antioquía de Siria nishqa markapita yarqurqan misionëronö ishkë kaq viäjenta ruranampaq, y Efeso markatawan Asia Menorchö huk markakunatam visitanan karqan. Pero santo espïritum, “Macedoniaman shamicur yanapecalläyämë” nir invitarqan. Pabluwan yanaqinkunaqa kushishqam chaskikuyarqan tsë invitacionta, y tsënöpam tsë markachö punta congregacionta patsätsiyarqan (Hech. 16:9, 10; 17:1, 2, 4). Kanan witsampis hinantin Patsachömi imëka cosecha ëllupaki cuenta Diospita yachatsikïchö más yanapakoqkunata wanayan (Mat. 9:37, 38). ¿Listoku këkanki yanapakunëkipaq?
2. ¿Imanirtaq wakinkunaqa pensayan huk nacionkunaman yachatsikoq ëwëta mana puëdeyänampaq kaqta?
2 Itsa qampis apóstol Pablunö misionero këta munanki, pero mana ni imëpis pensashqankitsu huk nacionman yanapakoq ëwëtaqa. Itsa edänikirëkur, soltera kar o wambrëkikunataraq qeshpitsinëki kaptin, puëdenkitsu Galaad Escuëlaman ëwëta. O itsa huk idioma yachakïta mana puëdenëkipaq kaqta creir, o trabäjorëkur këkanqëki nacionman ëwakushqa karnin, kananqa huk nacionkunaman yanapakoq ëwëta pensarqunkitsu. Pero alli pensëkur y Jehoväman mañakurirqa, itsa cuentata qokurinkiman yachatsikoqkunata wanayanqan nacionkunaman ëwëta puëdenqëkita.
3. ¿Imanirtaq huk nacionkunapa yanapakoq ëwanëkipaqqa misionërokunapaq escuëlaman ëwanëkiraqtsu precisan?
3 ¿Precisanku misionërokunapaq escuëlaman ëwanëki? Apóstol Pablutawan yanaqinkunataqa Jehoväman y santo espïritunman markäkuyanqanmi yanaparqan rurayanqankuna alli yarqunampaq (2 Cor. 3:1-5). Tsëmi, misionërokunapaq escuëlaman mana ëwashqa kaptikipis, huk nacionchö yanapakunqëkiqa alläpa allipaq kanman. Hina yarpänëkim mëchö këkaptikipis, Yachatsikunapaq Diospa Escuëlan y Diospa Gobiernompita Yachatsikunapaq reunionkunaqa alläpa yanapashunëkipaq kaqta. Y Galaad Escuëlaman o huk escuëlakunaman ëwëta munaptikipis, huk nacionkunachö misionero cuenta yanapakunqëkiqa, tsë escuëlakunaman chaptikim yanapashunki.
4. ¿Imanirtaq edäyashqakunapis puëdeyan huk nacionkunachö yanapakïta?
4 Edäyashqana publicadorkuna. Edäyashqana y Diospa kaqchö alli poquna wawqikunaqa paqwëmi yanapakïta puëdeyan publicadorkuna pishinqan nacionkunachö. ¿Jubilädoku qamqa kanki? Wakin jubilakushqakunaqa wallkalla chaskiyanqan qellëwanmi hampi o imëkapis más barätolla cuestaq nacionkunachö yanapakïkäyan.
5. Willakaramï huk jubilakushqa wawqi huk nacionman yanapakoq ëwanqanta.
5 Huk ingles parlaq anciano y precursor wawqim jubilakushqana karnin, Asia nacionchö turistakuna visitayänan sitioman ëwakurqan isqon ingles parlaq publicadorkunata yanapanampaq, y tsëchömi 30 mil ingles parlaq nunakuna kayarqan. Ishkë watallachömi reunionman asisteqkuna pitsqa chunkaman chäyarqan. Tsë wawqin kënö nin: “Kë markaman ëwakamunqäpitaqa imëpitapis masmi tukï bendicionkunata chaskirqö. Tiempopis manam tinkumanmantsu tsë llapan bendicionkunapita parlaptïqa”.
6. ¿Imataq pasarqan más publicadorkunata wanayanqan nacionchö yanapakïta munaq shipash panita?
6 Soltera panikuna. Jehoväqa alläpam utilicëkan panikunata publicadorkuna pishinqan nacionkunachö alli willakïkunata willakuyänampaq (Sal. 68:11). Huk shipash panim más yachatsikunanrëkur huk nacionpa ëwakïta munarqan, pero teytankunam imapis pasëkunanta yarpachakuyaq, y rasunchömi yarpachakuyaq. Tsëmi qellë y política asuntochö mana alläpa problëmayoq nacionta akrarqan y sucursalman qellqarqan, y sucursalnam huk cartawan tsë nacionpita más precisaq kaqkunata musyatsirqan. Tsë nacionchöshi hoqta wata yanapakunaq y tukï bendicionkunatash chaskinaq. Kënö nirmi willakun: “Markächöqa manachi puëdëmantsu karqan mëtsika estudio biblicokunata dirigita. Pero publicadorkunata wanayanqan nacionman chärirqa, mëtsika estudio biblicotam tarirqä y masmi yachakurqä Bibliapita yachatsikïtapis”.
7. Willakaramï huk nacionman yanapakoq ëwaq familiata imata pasanqanta.
7 Familiakuna. ¿Wambrayoq karnin Diospa Gobiernompita willakoq huk nacionpa ëwëta mana puëdenëkipaq kaqtaku pensanki? Puwaq y chunka watayoq wambrakunayoq familiam tsëta rurëta tïrayarqan. Mama kaqmi kënö nin: “Alläpam kushikuyä wambräkuna këchö winayanqanta, tsënöpam precursor especialkunawan y misionërokunawan amigo tikrayashqa. Publicadorkunata más wanayanqan markakunachö yanapakïqa, rasumpam kawënïkunaman más kushikïta chätsimushqa”.
8. ¿Huk idiömata mana yachakurlla puëdentsikku huk nacionchö yanapakïta? Willakaramï.
8 Idiömaqa manam tsapäkuntsu. ¿Huk idiömata yachakïta mantsarku qelananki? Itsa más yachatsikoqkunata wanayanqan nacionkunachö idiömëkita parlayan. Huk wawqiwan warminmi, inglesta parlëta yacharnin ëwakuyarqan castellänota parlayanqan nacionman, tsëchö ingles parlaqkunata yachatsiyänampaq. Sucursalshi apatsinaq mëqan congregacionkunachö ingles parlaqkunata wanayanqan listata. Tsëmi huk congregacionta akrarir, ishkë kuti visitayarqan. Nïkurnam, wayinkunaman kutïkur cada killachö mënosllatana gastayarqan, y tsënömi huk wata qellëninkunata churakuyarqan. Y ëwakuyänampaq listo këkäyaptinnam, tsë ëwayänan nacionchö wawqikuna taripushqana kayänaq huk shumaq wayita.
9, 10. ¿Ima rurëtataq puëdeyan yurikuyanqan nacionta haqishqa wawqikuna y panikuna, y imanir?
9 Nacionninkunata haqishqakuna. Itsa Bibliapita manaraq yachakunqëki witsan kanan këkanqëki nacionman ëwakurqëki. Tsënö karqa, itsa cosëchachönöpis Diospita más yachatsikoqkunata wanëkäyan nacionnikichö. ¿Imëllapis nacionnikiman yanapakoq kutita pensashqankiku? Tsëqa itsa huk nación wawqikunapitapis más fácil trabäjota y posädata tarita puëdenkiman, hinamampis mëraq yachankina tsë nacionchö parlayanqan idiömata. Y itsa nunakunaqa huk nacionpita shamoq wawqikunapita o panikunapitapis más qamta wiyariyäshunkiman.
10 Huk nunam Albaniapita safakur o qeshpikur Italiaman ëwakurqan. Tsëchömi alli trabäjota tarirqan y familiampaqpis qellëta apatseq. Tiempo pasariptinnam, Testigo tikrarirqan, tsënam Italiapita Albaniaman ewaqpaq huk grupo precursor especialkunata albanés idiömata yachatsir qallëkurqan. Tsë wawqim kënö nir qellqarqan: “Pëkunaqa haqinqä nacionmanmi ëwayänan karqan, y Albaniachö parlayanqan idiömata mana yacharpis, kushishqam tsë nacionman ëwëta munayarqan. Y noqapa idiömä y costumbrëqa Albania nacionpitam karqan, tsëqa, ¿imatataq ashikarqä Italiachö?”. Tsë wawqiqa nacionninman kutikïtam decidirqan, tsëchö alli willakïkunata willakïchö yanapakunanrëkur. Y kënömi nin: “Manam imëpis pësakurqötsu Italiachö trabäjöta y alli qellëta haqinqäpita. Y más alli kaq trabäjotaqa Albaniachömi tarirqö, noqapaqqa, más precisaq kaq y imëyaqpis kushitsikoq rurëqa, llapan kapamanqanwan Jehoväta servïmi”.
11, 12. ¿Imatataq rurayänan huk nacionchö yanapakïta munaqkuna?
11 ¿Imanötaq rurashwan? Manaraq santo espíritu Macedoniapa ëwayänampaq dirigiptinqa, Inti o Rupay heqanan lädopam ëwayänan karqan Pabluwan yanaqinkunaqa. Pero santo espíritu michashqa kaptinmi, norte lädopa ëwayarqan (Hech. 16:6). Bitiniaman chëkäyaptinnam, Jesus yëkuyänanta micharqan (Hech. 16:7). Tsënöllam kanan witsampis Jehoväqa Jesusta dirigikätsin hinantin Patsachö yachatsikïta (Mat. 28:20). Tsëmi huk nacionman ëwakïta munarqa, Jehoväta mañakunëki yanapashunëkipaq (Luc. 14:28-30; Sant. 1:5; rikäri “¿Imanötaq musyäman ëwëta pensëkanqä nacionchö yanapakoqkunata wanayanqanta?” neq recuadrota).
12 Pensëkanqëkita willë congregacionchö anciänokunata o poqu cristiänokunata, y mañari shumaq willapäriyäshunëkipaq o yätsiriyäshunaykipaq (Pro. 11:14; 15:22). Huk nacionchö yachatsikïpaq parlaq publicacionkunata lei, y alli musyapakuri ëwëta munëkanqëki nacionpita. ¿Puëdenkimantsuraq musyapakoqllaraq tsë nacionman ëwarita? Ëwanëkipaq churakarqa, tsë nacionchö sucursalmanmi qellqanëki llapan precisaq kaqkunata willayäshunëkipaq. Kë wata kaq Anuariochö sucursalpa direccionninta ashi. Pero kikin sucursalman cartata apatsinëkipa rantinqa, congregacionnikichö anciänokunataraq puntata qoy, pëkunanam masta qellqarkur sucursalman apatsiyanqa (rikäri Organizados para hacer la voluntad de Jehová libropa 111 y 112 päginankunata).
13. ¿Imachötaq sucursal yanapashïnikita puëden, y imakunatataq kikiki rikänëki?
13 Sucursalmi ëwëta munanqëki nación imanö kanqantapis musyatsishunki huk cartawan. Tsënö kaptimpis, manam vïsata o pasaporteta horqanëkipaq documentokunataqa qoshunkitsu, ni invitación o amparo cartëki ruramunqatsu. Hina posädëkipis manam ashimunqatsu. Manaraq viajarmi kë llapankunata kikiki rikänëki. Hina huk nacionman yëkunëkipaq o trabajanëkipaq permisota imanö solicitänëkipaqpis, kikikim embajädakunaman o consulädokunaman qayakunëki. Huk nacionman ëwëta munaqkunaqa, kikinkunam llapan documentonkunata solicitäyänan y llapan wanayanqanta procurayänan (Gal. 6:5).
14. ¿Imatataq ruranëki Testïgokuna yachatsikuyänanta michäyanqan nacionman viajëta o yanapakoq ëwëta pensarqa?
14 Yachatsikuyänanta michäyanqan nacionkunachö. Wakin nacionkunachöqa, yachëllapam cristiano mayintsikkuna Diospita yachatsikuyan (Mat. 10:16). Tsëmi huk nacionkunapita o markakunapita ëwaqkunaqa, mana musyar chikikoq nunakunata cuentata qokaratsiyanman Diospita yachatsikïkäyanqanta, y tsënöpam patsan cristiänokunata problëmaman chäratsiyanman. Tsënö nacionman ëwëta pensarqa, congregacionnikita rikaq anciänokunawan nacionnikichö sucursalman cartata apatsi.
15. Huk nacionman yanapakoq ëwëta mana puëderpis, ¿imanötaq yachatsikïchö más yanapakunkiman?
15 Y, ¿huk nacionman ëwëta mana puëderqa? Huk nacionman yanapakoq ëwëta mana puëderqa ama llakinëtsu. Itsa hatun “puncu quicha[ca]q cuenta” mëtsika rurëkuna shuyarëkäshunki (1 Cor. 16:8, 9). Itsa congregacionkunata watukaq wawqi musyan më congregacionkunachö más yanapakoqkunata wanayanqanta. Itsa huk idioma parlaq congregacionchö o grüpochö yanapakïta puëdenkiman. O patsan congregacionnikichöpis más yanapakïta puëdenkiman. Yarpë, imanö kaptimpis, Jehoväta llapan shonquntsikwan servinqantsikmi masqa precisan (Col. 3:23).
16. ¿Imatataq rurashwan pipis huk nacionman yanapakoq ëwëta pensëkanqanta willamashqaqa?
16 ¿Reqinkiku huk poqu cristiano huk nacionchö yachatsikï munaqta? Tsëqa, animë y puëdenqëkimannö yanapë. Antioquía de Siria nishqan markapita Pablu ëwakunqan witsampaqqa, Roma nacionchö llapan markakunapita kima kaq más hatun markam Antioquïaqa karqan (puntachöqa këkarqan Roma markam, y nïkurnam, Alejandría marka). Tsë congregacionchö mëtsika territorioyoq këkarqa, mëraq Pablupa yanapakïninta wanayarqan. Tsënö kaptimpis, tsë markapita cristiänokunaqa manam michäyarqantsu Pablu ëwakunanta. Manam kikinkunallamantsu pensayarqan, antis, ëllupakïpaq chakraqa hinantin Patsachö “nunacuna cayan[qantam]” cuentata qokuyarqan (Mat. 13:38).
17. ¿Imanirtaq alli kanman “Macedoniaman” yachatsikoq ëwanëki?
17 Pabluwan yanaqinkunaqa tukï bendicionkunatam chaskiyarqan Macedoniaman ëwayänampaq santo espíritu ninqanta wiyakuyanqampita. Filipos markachömi Lidiata reqiyarqan, y “Diosmi shonqunta yatecorqan Pablu willapäcushqanta cäyiquicunanpaq” (Hech. 16:14). Pensari, imanöraq Pabluwan yanaqinkunaqa kushikïkuyarqan Lidiawan llapan familian bautizakuriyaptin. Mëtsika nacionkunachömi Lidianö alli shonquyoq nunakuna täräyan, y manaran Diospa yachatsikïninta wiyayashqaraqtsu. Qampis “Macedoniaman shamicur yanapecalläyämë” nir invitayäshunqëkita chaskikurqa, mëtsika nunakunata yanaparmi alläpa kushikïta tarinki.
[5 kaq päginachö recuadru]
“¿Imanötaq musyäman ëwëta pensëkanqä nacionchö yanapakoqkunata wanayanqanta?”
• Tsëllaraq yarqamushqa Anuariochö rikë tsë nacionchö ëkaq nunakuna kayanqanta, y cada publicador ëkaq nunakunata yachatsinan kanqanta.
• Indicechö ashi tsë nacionchö ima experienciakuna pasanqanta y tsë nación imanö kanqanta willakoq publicacionkunata.
• Tsë nacionman chashqa o tsëchö tärashqa publicadorkunawan parlari.
• Kikikipa idiömëkichö yachatsikïta munarqa, ëwëta pensëkanqëki markachö idiömëkita parlaq nunakuna ëkaqnö kayanqanta musyapäkï librokunachö o Internetchö.