Tratädokunawan alli willakïta më tsëman chätsishun
1. ¿Imanötaq Diospa markanchö tratädokunata utilizäyashqa?
1 Mëtsika watakunapanam Jehoväpa markanqa tratädokunata utilizashqa alli willakïkunata më tsëman chätsinampaq. 1880 watachömi C. T. Russellwan yanaqinkuna tratädokunata jorqar qallayarqan Watch Tower nishqan revistata leeqkuna tsë tratädokunata pï mëta qoyänampaq. Awmi, tsë tratädokunaqa alläpa precisaqmi kayaq, tsëmi 1884 watachö wawqi Russell Diospa markan imatapis mana ganarlla më tsëchö yachatsikunanrëkur Zion’s Watch Tower Tract Society nishqan legal jutita inscribitsinqanchö, tract (“tratado”) nishqan palabrata utilizarqan (tsëtam kananqa Watch Tower Bible and Tract Society of Pennsylvania nir reqintsik). 1918 watapaqqa Bibliata Estudiaqkuna 300 millönespitapis mastanam tratädokunata qoyashqa kayarqan nunakunata. Kanan witsampis tratädokunaqa alläpam yanapakun Diospita yachatsikïchö.
2. ¿Imanirtaq tratädokunaqa alläpa yanapakun?
2 Imanir alläpa yanapakunqan. Tratädokunaqa leita munëpaqnö yachatsikïyoqmi y tukï coloryoqmi. Wallka palabrakunallawanmi mëtsikata y shumaq yachatsikun. Nunakunaqa revistapita o libropitapis masmi tratädokunataqa chaskikuyan. Jina mushoq publicadorkuna y wamrakunapis tsëwan yachatsikïta puëdiyanmi. Y takshalla kaptinmi mëpa ëwarpis puritsita puëdintsik.
3. Willakaramï tratädopa yanapakïninwan pipis Testigo tikranqanta wiyanqëkita o publicacionkunachö leinqëkita.
3 Mëtsikaq nunakunam rasumpa kaqta reqiyashqa tratädopa yanapakïninwan. Haití nacionchöshi juk warmi tratädota cällechö tarinaq, y leirirshi “¡këmi rasumpa kaqqa!” ninaq. Tsëpitanash Yachatsikuyänan Wayiman ëwanaq, Bibliapita yachakur qallanaq y kananqa bautizakushqana. ¡Tratädom yanapakurqan tsënö kanampaq!
4. ¿Imarëkurtaq wakin killakunachö tratädokunawan yachatsikushun?
4 Wayin wayin yachatsikurnin. Tratädokunaqa alläpam yanapakun wayin wayin yachatsikïchö, tsëmi noviembrepita patsë, wakin killakunachö tsëwan yachatsikunantsikpaq ninqa willakïkunachö. Claro, wayikunachö tratädota dejëllatatsu manam munantsik, sinöqa tsëpa yanapakïninwan piwampis parlakuritam. Punta visïtachö o kutinqantsikchö pipis maslla yachakïta munaptinqa, Bibliapita imanö yachakuna kanqantam rikäratsishwan Yachatsikun librowan kar o estudiota qonapaq mëqan publicacionwampis. ¿Imanöraq tratädokunawan yachatsikushwan? Tukïpita yachatsikoq tratädokuna kaptinmi, puntataqa alliraq musyanantsik utilizänantsikpaq kaq imapita parlanqanta.
5. ¿Imanötaq tratädokunata utilizashwan wayin wayin yachatsikurnin?
5 Juk tratädowan imanöpis yachatsikunapaqqa precisan imapita yachatsikunqanta y pipaqnö kanqanta alli musyanantsikran. Qallananchö tïtulota y dibüjota rikärir leita munayänampaqmi, puntataqa aptatsinantsikraq. O manaqa, atska tratädokunata rikäratsirmi mëqantapis akranampaq nirishwan. Punkuta mana kichapukuyanqan wayiman charqa, wayiyoq rikänampaqnömi tratädota tsarashwan, o tratädopita imata pensanqanta niramänantsikpaqmi punkun jawanllapa makyarishwan. Tratädopa tïtulon juk tapukï kaptinqa, tsë tapukïpaq ima ninqantam tapurishwan, o manaqa, yachakïta y parlakurinata munanampaqnömi juk tapukïta rurarishwan. Tsëpitanam juk pärrafota leirapushwan y tsëchö yureq tapukïkunata contestamunampaq nirishwan. Más alliqa kanqa pärrafochö yureq textokunata Bibliapita leirapunqantsikmi. Yachatsir usharirqa, niri imë junaq y imë hora watukaq kutita pensëkanqëkita. Wayikunachö pitapis mana tarir juk publicacionta imëpis dejarqa, allim kanman pasaqkuna mana rikäyänanchö juk tratädota dejarishqa.
6. ¿Imanötaq cällekunachö yachatsikurnin tratädokunata utilizashwan?
6 Cällekunachö yachatsikurnin. ¿Tratädokunata utilizarqunkiku cällekunachö yachatsikurnin? Wakin nunakunaqa apurädo purirmi juk rato parlapärinata munayantsu, tsëmi alliqa musyantsiktsu yachakïta munayanqanta o mana munayanqantapis. Leiyänampaq kaqta o mana leiyänampaq kaqtapis mana musyëkar juk revistata qonantsikpa rantinqa o trukanqa, tratädotam qoshwan. Qallananchö shumaq tïtulotawan dibüjota y wallkalla yachatsikïninta rikar capaz tiempon kanqan hora leirinman. Musyanqantsiknöpis, parlapärinantsikpaq tiempon kaptinqa, tratado imapita parlanqantam yacharatsinantsik.
7. ¿Imanötaq wakinkunaqa mëchö këkarpis tratädokunawan yachatsikuyan? Willakaramï.
7 Mëchö këkarpis yachatsikurnin. Mëchö këkarpis tratädokunawan yachatsikïqa fäcil-llam. Juk wawqim imëpis juk ishkë tratädokuna bolsikakurkur-raq wayimpita yarqun. Tsëmi tiendachö atiendeqwan o piwampis tinkurqa, “¿munankimantsuraq leita?” nirir, tratädota qorin. Juk wawqiwan paninam, Nueva York markaman paseaq ëwarnin Naciones nishqan follëtota y tukï idiömachö tratädokunata apayarqan, tsëchö tukï nacionkunapita nunakunawan tinkuyänampaq kaqta musyar. Cällekunachö qatukïkaqta, parquechö jamëkaqta, restaurantechö mikïkaqta o pitapis juk idiömata parlaqta wiyarqa, kikimpa idiömanchö tratädota dejapuyaq.
8. ¿Imanirtaq nintsik tratädokunaqa muru cuenta kayanqanta?
8 “Murïkita murï.” Tratädokunaqa muru cuentam. Murukoqkunaqa, mëchö jeqanampaq kaqta mana musyarmi entero chakraman muruta maqtsiyan. Tsëmi Eclesiastés 11:6 textochö kënö nin: “Qoyapa [wäraypa] murïkita murï, y tardeyanqanyaq makikita jamatsitsu; manam musyankitsu mëchö wayunanta, këchö o wakchö, o ishkan lädochö wayunampaq kaqtapis”. Tsëmi alläpa precisan tratädokunachö këkaq precisaq ‘musyatsikïkunata imëpis maqtsikänantsik’ (Prov. 15:7).
[3 kaq päginachö ninqan]
Tratädokunaqa alläpam yanapakun wayin wayin yachatsikïchö, tsëmi noviembrepita patsë, wakin killakunachö tsëwan yachatsikunantsikpaq ninqa willakïkunachö.