Cristiänunö Kawakunapaq y Yachatsikunapaq Reunionchö Yachakunapaq këkunata leyishun
© 2024 Watch Tower Bible and Tract Society of Pennsylvania
6 A 12 DE ENËRU
BIBLIAPITA ALLI YACHAKUNAPAQ SALMUS 127 A 134
Teytakuna, Jehovä qarayäshunqëki herenciata cuidayë
Yanapakunapaq Jehovä permitimanqantsikta valorashun
9 Jehoväqa nunakunata kamashqa wamrayoq kayänampaq, Diosta kuyayänampaq y sirwiyänampaq yachatsiyänampaqmi. Wamrayoq karqa, ¿Diosta agradecikunkiku? Angelkunata imëkata rurayänampaq kamashqa karpis, manam wamrayoq kayänampaqtsu Jehoväqa kamashqa. Tsëmi teytakunaqa wamrayoq këta puëdiyanqampita Diosta agradecikuyanman. Wamrankunata shumaq watayänampaq, y “Jehovä munanqannö” alli portakuyta yachatsiyänampaqmi churashqa (Efes. 6:4; Deut. 6:5-7; Sal. 127:3). Y tsë rurëchö yanapayänampaqmi, Diosta sirweqkunata pushaqkunaqa Biblia ninqampita, publicacionkunata, videukunata, cancionkunata y jw.org päginachö këkaqta rurayämushqa. Clärum këkan, Teytantsik Jehovä y wamran Jesucristuqa alläpam wamrantsikkunata kuyayan (Lüc. 18:15-17). Jehoväqa teytakuna pëman markäkuyanqanta rikar y wamrankunata shumaq cuidayänampaq kallpachakuyanqanta rikarmi, alläpa kushikun. Tsëta ruraq teytakunaqa, wamrankunatam yanapayan Jehoväpa familian imëpis kayänampaq.
Teytakuna, Jehoväta kuyayänampaq wamrëkikunata yachatsiyë
20 Wamrëkikuna imanö kayanqanta alli reqiyë. Salmus 127 textuchömi, flëchakunanö kayanqanta nin (leyi Salmus 127:4). Imanömi flëchakunaqa tukï tamäñu y tukïpita rurashqa kayan, tsënöllam wamrakunapis cada ünu jukläya kayan. Tsëmi teytakunaqa cada ünuta imanö yachatsiyänampaq kaqta rikäyänan. Jehoväta wamrankuna sirwiyänampaq imanö yanapayashqa kayanqantam, Israel nacionchö täraq juk teyta y warmin kënö willakuyan: “Cada wamräkunatam Bibliapita separädupa yachatsiyaq kayä”. Itsa cada wamrata separädupa yachatsinanqa precisanqatsu y tiempupis mana kanqatsu, peru tsëtaqa teyta kaqmi decidinan.
Bibliata leyir yachakunqantsik
Rurëta puëdinqantsikpita kushikushun
6 Salmus 131:1 y 2 (leyi) textuchö këkaq consëjupitaqa, imëkatam teytakuna yachakuyta puëdiyan. Rey Davidmi kënö nirqan: “Manam alabashqa këta munätsu. Mana puëdishqä kaqkunamanqa manam mëtikütsu”. Humildi karmi, mamampa mellqanchö wamra kushishqa kanqannö, kushishqa karqan. Këpitaqa teytakuna yachakuyanman, kikinkunapita y wamrankunapita puëdiyanqampita mastaqa mana shuyaräyänampaqmi. Teytakunaqa wamrankuna imata rurayänampaq kaqta nirqa, imachö alli y imachö pishipäyanqantam cuentaman churayänan. Tsënöpam wamrankunaqa rurëta puëdiyanqanwan kushishqa kayanqa. Marïna panim këta yarpan: “Mamänïqa manam kiman turïkunawan ni juk wamrakunawampis igualatsimarqantsu. Llapantsikpis imëkata rurëta puëdinqantsikta, y Jehoväpaq alläpa välinqantsiktam nimarqan. Tsënö yachatsimanqampitam, wakinkunawanqa igualatsikütsu”.
13 A 19 DE ENËRU
BIBLIAPITA ALLI YACHAKUNAPAQ SALMUS 135 A 137
“Diosnintsikqa wakin dioskunapitapis mas poderösum”
Jesucristuqa Diospa poderninmi
15 Jehovämi Jesusta podernin qorqan tsënö ruranampaq. Tsëmi següru këkantsik Jehoväpis tsënö rurëta puëdinqanta. Manaraq Apakï Tamya kaptinmi kënö nirqan: “Qanchis junaqllatanam chusku chunka junaq y chusku chunka paqas tamyatsimushaq” (Genesis 7:4). Y Exodu 14:21 textupis willakun Inti yarqamunan kaq lädupita Diosnintsik fuertipa vientutsinqantam, y tsënöpa lamar ishkëman rakikärinqanta. Y Jonas 1:4 textupis ninmi lamarchö mantsakëpaq vientuta vientutsinqanta. Alläpam kushikuntsik mushoq Patsachöqa imëka desgraciakuna manana kanampaq kaqta, porqui tsëkunataqa Jehovämi ushakätsinqa.
¿Imanirtan Jehoväqa alläpa kuyamantsik?
16 Jehoväta tsapämänapaq mañakurqa, segürum kantsik. Tsënö kaptimpis, itsa höraqa kallpannaq kashun y llakikushun. Tsëkunapa pasashqaqa, ¿imanötan Jehovä yanapamäshun? (Leyi Salmus 136:23, TNM). Makinwanmi kuyëpa pallarkamäshun y tsarakur sïguinapaqmi yanapamäshun (Sal. 28:9; 94:18). ¿Imanötan tsëqa yanapamantsik? Diosnintsik imëpis yanapamänapaq kaqta musyanqantsikqa, ishkë bendicionkunatam yarpätsimantsik. Punta kaqqa, mëchö këkashqapis Jehovä cuidëkämanqantsikmi. Y ishkë kaqqa, Teytantsik Jehoväqa noqantsikpaq alläpam yarpachakun.
Bibliata leyir yachakunqantsik
¿Imanirtan Jehoväqa alläpa kuyamantsik?
10 Dios alläpa kuyakoq kanqanqa, manam imëpis ushakanqatsu. Salmus librupa 136 kaq capïtulunchömi, alläpa kuyakuypaq parlar 26 kuti yurimun. Punta kaq versïculum kënö nin: “Teyta Jehoväqa alläpa allim, agradecikuyë. Alläpa kuyakoq kanqanqa manam imëpis ushakantsu” (Sal. 136:1, TNM). Y 2 a 26 kaq versïculukunachömi, “alläpa kuyakoq kanqanqa manam imëpis ushakantsu” nir kutin kutin yurimun. Tsë salmuta leyirqa, imëkanöpa y imëpis Jehovä alläpa kuyamanqantsikta rikarmi alläpa kushikuntsik. “Alläpa kuyakoq kanqanqa manam imëpis ushakantsu” ninqanqa, sirweqninkunata imëpis kuyanampaq kaqtam rikätsimantsik. Sirweqninkunata raslla mana jaqirinqanta musyanqantsikmi, alläpa kushitsimantsik. Pëqa lädunkunachömi imëpis këkan, y masran mana allikunapa pasayaptinqa. ¿Imanötan tsëqa yanapamantsik? Jehovä läduntsikchö imëpis kanqanta musyanqantsikqa kushitsimantsikmi, y imapa pasarpis alli tsarakunapaq y Pëta sirwir sïguinapaqmi kallpayoqta tikratsimantsik (leyi Salmus 31:7, TNM).
20 A 26 DE ENËRU
BIBLIAPITA ALLI YACHAKUNAPAQ SALMUS 138 Y 139
¡Ama mantsakuytsu reunionkunachö comentëta!
Congregacionchö Jehoväta alabashun
10 Reunionchö parlëta munanqëki höra itsa alläpa mantsakunki. Peru manam qamllatsu tsënö mantsakunki, llapantsikmi parlakurita munanqantsik höraqa tsënö sientikuntsik. Itsa tsënö sientikunki preparakunqëkita parlakunqëki höra qonqarinëkipaq kaqta o wakinkunanö alli parlakurita mana puëdinëkipaq kaqta pensarnin. Peru ama yarpachakïtsu, porqui tsënö sientikurqa humildi kanqëkita y wakinkuna qampita mas alli kayanqantam rikätsikïkanki. Y Jehoväqa alläpam kuyan humildi kaqkunata (Sal. 138:6; Filip. 2:3). Peru Jehoväqa munan reunionkunachö pëta alabanantsikta y wawqikunata y panikunata animanantsiktam (1 Tes. 5:11). Pëqa alläpam kuyashunki y reunionkunachö parlakunëkipaqmi yanapashunki.
Reunionkunachö animanakushun
7 Tsë yanapakuykunataqa tarinki puntatana yarqamushqa Täpakoq revistakunachömi. Tsë revistakunachömi alli preparakunqantsik yanapamanqantsikta nimantsik (Prov. 21:5). Yachakuykanqëkikunata alli entiendirqa, manam parlakunëkipaq makikita pallarita mantsapakunkitsu. Tsënöllam yanapashunki wallkallata parlakunqëki (Prov. 15:23; 17:27). Wallkallata parlakurqa, manam mantsapakunkitsu. Tsënöllam wallkallata parlakuptikiqa, wiyayäshoqnikikunapis mas fäcil-lla entiendiyäshunki y parlanqëkitapis manam qonqayanqatsu. Y entiendinqëkimannö parlakuptikiqa, cuentatam qokuyanqa alli preparakushqa kanqëkita y alli entiendinqëkita.
Bibliata leyir yachakunqantsik
Mana rikanqantsik qarëta valurashun
12 Mana alli pensëkanqantsikta y mana allita shonquntsik munëkanqanta musyanapaqmi, Jehoväman mañakunantsik. Tsënömi Jehovä Dios yanapamanqantsiktaqa agradecikuntsik (leyi Salmus 139:23, 24). Jehovä Dios yanapamashqam, imachö pantanqantsiktaqa rikäshun. Mana allikunata pensarnin o mana allikunata munarninqa, Jehovä yanapamänapaqmi mañakunantsik. Tsënömi Jehovä chikinqankunata mana ruranapaq kallpachakushqaqa, kikin yanapamäshun (Efes. 4:30).
27 DE ENËRUPITA 2 DE FEBRËRUYAQ
BIBLIAPITA ALLI YACHAKUNAPAQ SALMUS 140 A 143
Jehoväman mañakunqëkichö ninqëkinö rurë
“Yachëyuq nunakuna käyitsiyäshushqëkita shumaq wiyakï”
13 Consëjukunaqa Dios kuyamanqantsiktam rikätsimantsik. Jehoväqa alli kawakunatam munan (Prov. 4:20-22). Palabran Bibliachö ninqanwan, publicacionkunawan y Pëta unëna sirweq juk wawqiwan o paniwan consejamarnintsikmi, kuyamanqantsikta rikätsimantsik. Y Hebrëus 12:9 y 10 ninqannömi, ‘pëqa biennintsikpaqmi tsëta ruran’.
14 Imata nimanqantsikman pensashun, y ama imanö nimanqantsikmanqa. Itsa höraqa, consejamaqnintsik shumaq mana parlapämashqantsik kanqanta pensashwan. Peru consejakoqpis, wiyakunampaqnömi shumaq parlapëta procuranman (Gäl. 6:1). Y noqantsikta consejamashqaqa, imanö nimashqapis, imata consejamanqantsikmanmi yarpänantsik. Kënömi pensashwan: “Imanö consejamanqanta mana gustamaptimpis, ¿rasun kaqllataku nimashqa? ¿Imachöpis pantaq kanqanta qonqëkurku nimanqanta wiyaküman?”. Biennintsikpaq imatapis consejamashqaqa, wiyakunapaqmi kallpachakunantsik (Prov. 15:31).
w10-S 15/3 päg. 32 pärr. 4
Mana alli tiempuchöpis “limpiu shonquyoq” kanapaq kallpachakushun
Mëtsikaq wawqi panikunam familiankuna Diosta mana sirwiyaptin, qellëninkuna faltaptin y qeshyapäkur alläpa llakikuyan. Gobernanti Davidpis tsëkunapa pasarmi kënö nirqan: “Manam ima rurëtapis puëdïnatsu, kallpäpis ushakärishqanam” (Sal. 143:4). Tsënö mana allikunapa pasaptin, ¿imatan Davidta yanaparqan? Pëta y sirweqninkunata Teyta Dios yanapanqanman yarpanqanmi. Davidqa Jehovä ruranqankunaman y jutin alabashqa kanampaq imëkata ruranqanmanmi pensarqan (Sal. 143:5). Noqantsikpis Teyta Dios yanapamanqantsikman y yanapamänapaq imëkata rurar sïguinqanman pensarqa, mana allikunapa pasarpis kushishqam kashun.
Jehoväta sirweqllawan casakïqa puëdikëkanllam
Itsa Davidnö sientikunkiman. Höraqa alläpa llakishqam pëqa sientikoq, tsëmi raslla yanapëkunampaq Jehoväta mañakurqan (Salmu 143:5-7, 10). Mana yanapashunëkipaq kaqmanqa ama pensëtsu, tsëpa rantinqa, pacienciawan shuyarë mañakïnikita contestamunanta. Bibliata leyi y leyinqëkiman yarpachakï. Tsënöpam musyanki qampita Jehovä imata shuyaranqanta y unë sirweqninkunata imanö yanapanqanta. ¡Tsëmi yanapashunki pëman mas markäkunëkipaq y ninqanta wiyakunëkipaq!
Bibliata leyir yachakunqantsik
Diosta rasumpa adorarllam mas kushishqaqa kashun
7 Jehovätaqa, mañakurninmi adorantsik. Bibliachöqa, Diospa carpa wayinchö y tsëpita templuchö rupatsiyänampaq shumaq alistayanqan inciensutawanmi mañakunqantsikta igualatsin (Sal. 141:2). Tsë inciensuqa alläpa shumaqmi Diospaq pukutaq o mushkoq. Tsë cuentallam parlëta alli mana yachashqapis, llapan shonquntsikwan mañakunqantsikpita Diosqa kushikun (Prov. 15:8; Deut. 33:10). Mañakunqantsikchö kuyanqantsikta ninqantsikpita y agradecikunqantsikpita Jehovä kushikunqantaqa imëkam rikätsimantsik. Y pëqa imakunata munanqantsikpita, imakunapaq yarpachakunqantsikpita y shamoq tiempupaq imakunata shuyaranqantsikpita parlapänatam munan. Tsëqa, ¿imanirtan manaraq mañakurnin imata ninëkipaq kaqta shumaq pensarinkitsu? Tsëta ruraptikiqa, alläpa shumaq mushkoq inciensunömi mañakunqëki kanqa.
3 A 9 DE FEBRËRU
BIBLIAPITA ALLI YACHAKUNAPAQ SALMUS 144 A 146
‘Diosninkuna Jehovä kaptinmi, nunakunaqa kushishqa kawakuyan’
Leyeqkuna tapukuyanqan
2. Salmus 144 textuchö wakin kaq versïculukuna ninqanwanmi alleq igualan. 12 kaq versïculupa qallanan kaq “tsënam” palabraqa yanapakun 12 a 14 kaq versïculukunata entiendinapaqmi. Tsë bendicionkunataqa Diospa sirweqninkunallam chaskiyan, y pëkunam 11 kaq versïculuchö mañakuyan mana alli nunakunapita salvëkunampaq. “Tsënam” neq palabrawanqa 15 kaq versïculupis mas clärunam wiyakärin. Porqui tsëchöqa ishkë kutim “kushishqa” nin. Tsë kushishqa markaqa, “Jehovä Diosta sirweq” nunakunam kayan. Jinamampis, hebreuchö qellqayanqanchöqa manam comïllankuna ni wakin signunkunapis kantsu. Tsëmi tsë textu ima nita munëkanqanta entiendiyänampaqqa, traductorkunaqa cuentaman churayänan hebreu idiömachö imanö wiyakanqanta, qepan kaq y puntan kaq versïculukunata y tsëpaq parlaq wakin textukunatapis.
3. Sirweqninkunata Dios bendicinampaq kaqta wakin textukuna ninqanwanmi igualan. Salmus 144 textuchö Ascher nishqan palabrata traducir cambiakanqanwanqa clärunam entiendikan, chikeqninkunapita Israel markata librarirnin, kushikïwan y imëkawan Dios bendicinampaq kaqman David alläpa confiakunqan (Lev. 26:9, 10; Deut. 7:13; Sal. 128:1-6). Këman pensarishun, Deuteronomiu 28:4 textuqa kënömi nin: “Bendecishqam kayanqa wamrëkikuna, murukunqëkikuna, wäkëkikuna y üshëkikuna y wakin animalnikikunapis”. Awmi, Davidpa tsurin Salomon gobernanqan witsanqa israelïtakunaqa imëpitapis masmi imëkayoq y yamë kawakuyarqan. Jinamampis pë gobernanqanqa rikätsikïkarqan Jesus gobernanqan witsan kawakï imanö kanampaq kaqtam (1 Rey. 4:20, 21; Sal. 72:1-20).
Diosnintsik änimanqantsikta imëpis shuyarëkäshun
16 Mana wanuypa imëyaqpis kawakunapaq Diosnintsik änimanqantsikqa, shumaq qarëmi. Tsënö kawakunantsik tiempu chäramunantaqa alläpam shuyarëkantsik, y Diosnintsikqa cumplimunqam. Änikunqankunata shuyaranqantsikqa, barcuta tsaraq anclanömi. Tsëmi yanapamantsik mana allikunapa pasanqantsik höra y nunakuna chikimashqa alli tsarakunapaq, y wanuytapis mana mantsanapaq. Tsënöllam shuyaranqantsikqa peqantsikta o umantsikta tsapaq cascu cuenta. Tsëmi yanapamantsik Jehoväta cäsukur alli kaqllata ruranapaq, mana allikunaman mana pensanapaq y mana ruranapaq. Änikunqankunata Bibliachö leyirmi musyantsik Diosnintsik kuyamanqantsikta, y tsëmi yanapamantsik pëta kuyanapaq. Awmi, Diosnintsik änikunqankunata shuyarëkanqantsikqa alläpam yanapamantsik.
17 Römachö cristiänukunatam apostol Pablu nirqan: “Shuyarëkäyanqëkiman yarpar kushikuyë” (Rom. 12:12). Pabluqa, Diosnintsikta mana dejëpa sirwirqa ciëluchö imëyaqpis kawakunampaq kaqta yarparmi imëpis kushishqa karqan. Noqantsikpis segürum këkantsik änikunqankunata Diosnintsik cumplimunampaq kaqta, tsëmi kushishqa këta puëdintsik. Salmus qellqaq ninqannöpis, “Jehovä yanapananta shuyaraq nunaqa kushishqam kanqa”. “Pëqa parlanqanta cumpleq Diosmi” (Sal. 146:5, 6).
¿Pita kuyarllataq rasumpa kushishqaqa kashun?
19 Satanasqa 6 mil watakunapitapis masnam nunakunata sufritsishqa. Kanan ushanan tiempukunachöqa kikinkunallata kuyakoq, qellëta alläpa kuyaq y kushikï rurëkunallata precisaqpaq churaq nunakunatam masqa rikantsik. Munëninkunallatam löcuyëpa rurakuyan. Tsënö nunakunaqa manam imëpis kushishqatsu kayan. Peru Bibliaqa clärum nimantsik Diospa kaqta mas precisaqpaq churaq nunakunaqa kushishqa kayänampaq kaqta y bendicionkunata chaskiyänampaq kaqta (Sal. 146:5).
20 Noqantsikqa cada junaqmi Jehoväta mas kuyantsik. Y cada watam mëtsikaq nunakuna Jehoväta reqirnin y kuyarnin markanman yëkayämun. Këmi rikätsimantsik Diospa Gobiernun mandakïkämunqantana y ichik tiempullachöna mëtsika bendicionkunata chaskinapaq kaqta. Jehoväta munanqannö sirwirninqa, kanan y shamoq tiempuchöpis kushishqa kawakïtam puëdishun. Qateqnin kaq yachatsikïchömi rikärishun, kikintsikllapaq imatapis munëman imakuna chätsikunqanta, y Jehoväta kuyanapaq imakuna yanapamanqantsikta.
Bibliata leyir yachakunqantsik
Qarakoq karninqa mas kushishqam kashun
6 Jehoväqa cuidamantsik kuyamarnintsikmi. Yachakurishun Mateu 6:25 y 26 (leyi) textuchö Jesus parlanqampita. Tsë versïculukunachömi Jesus parlarqan pishqukunapaq y kënömi nirqan: “Manam murukuyantsu ni cosechayantsu, y manam gränukunata guardayantsu, tsënö kaptimpis, ciëluchö Teytankunaqa pacha juntatam katsin”. Tsëpitanam kënö nirqan: “¿Manaku qamkunaqa pishqukunapitapis mas väliyanki?”. Tsënö nirqa Jesus entiendikätsimantsik, animalkunapitapis masqa sirweqninkunata Jehovä valoranqantam. Animalkunatapis cuidëkarqa, ¿manatsuraq Jehoväqa masraq noqantsikta cuidamäshun? Jehoväqa Teytantsikmi y kuyamantsikmi; manam wananqantsikkunata faltatsimuntsu (Sal. 145:16; Mat. 6:32).
10 A 16 DE FEBRËRU
BIBLIAPITA ALLI YACHAKUNAPAQ SALMUS 147 A 150
¡Imëkata ruramunqampita Jehoväta alabashun!
¿Imanirtaq Jehoväta alabayë nishwan?
5 Jehoväqa israelïtakunata cada ünutam shoqarqan. Y tsënöllam kanampis ruran. Salmus 147 textuta qellqaqqa Diospaq kënömi nin: “Pëqa shonqunkunachö nanatsikoqkunatam kachakätsin, y herïdankunatam vendan” (Sal. 147:3). Qeshyëkarnin o alläpa llakishqa këkarnimpis, Jehovä shoqamänapaq kaqman y llakikïnintsikkunachö yanapamänapaq kaqmanqa confiakïta puëdintsikmi (Sal. 34:18; Is. 57:15). Ima problëmakunapa pasashqapis kallpata y yachëtam qomantsik alleq tsarakunapaq (Sant. 1:5).
6 Kë Salmusta qellqaqqa ciëluta rikärirmi Jehoväpaq kënö nirqan: “Qoyllurkunatapis yupanmi, y cada ünutam jutinkunapa qayan” (Sal. 147:4). ¿Imanirtaq qoyllurkunapitaqa parlarqan? Këman pensarishun: qoyllurkunata rikëta puëdirnimpis, ëka kayanqantaqa manam musyarqantsu. Kanan witsan cientïficukunaqa mastam rikëta puëdiyan. Ciëluchöqa millonllëpayan millon qoyllurkuna kanqantam niyan, peru yupëtaqa manam puëdiyantsu. Peru Jehoväqa, qoyllurkunata yupëta puëdinmi y hasta cada ünutam jutipa reqin. Juk parlakïchöqa cada qoyllur imanö kanqantam reqin (1 Cor. 15:41). ¿Imatataq tsëqa yachatsimantsik? Cada qoyllur mëchö këkanqanta musyanqannöllam Jehoväqa musyan mëchö këkanqantsikta, imanö sientikunqantsikta y cada ünu imata wananqantsikta.
¿Imanirtaq Jehoväta alabayë nishwan?
7 Jehoväqa cada ünu ima problëmakunapa pasëkanqantsiktam musyan y yanapamänapaqqa podernin kanmi (leyi Salmus 147:5). Hörataqa itsa pensashwan problëmantsikkuna alläpa jatun kanqanta y tsërëkur imata rurëtapis mana puëdinqantsikta. Peru Jehoväqa musyanmi mëyaqlla rurëta puëdinqantsikta, y yarpanmi “allpapita rurashqa kanqantsikta” (Sal. 103:14). Jutsasapa karninmi imallachöpis kutin kutin pantarintsik. Itsa llapantsikpis pësakuntsik imata parlanqantsikpita, höra höra mana alli munëyoq kanqantsikpita y wakinkunapa imankunatapis munanqantsikpita. Jehovä tsënö mana karnimpis, entiendimantsikmi imanö sientikunqantsikta (Is. 40:28).
¿Imanirtaq Jehoväta alabayë nishwan?
18 Salmus 147 textuta qellqaqqa, musyarqanmi israelïtakunata kushikïpaq jatun carguta Jehovä qonqanta. Porqui pëkunallatam akrarqan “palabranta”, “mandakïninkunata y decidinqankunata qonampaq” (leyi Salmus 147:19, 20). Tsënöllam noqantsikpis kushikïpaq jatun carguta chaskirquntsik. Awmi, noqantsikllatam Jehoväqa akramarquntsik jutimpa reqishqa kanapaq. Jehovätam reqintsik y Palabranwanmi pushamantsik. Tsërëkurmi pëpa amïgun këta puëdintsik, tsëtaqa ¡alläpam agradecikuntsik! Salmus 147 textuta qellqaq ninqannöpis, imëkam kan ‘Jehoväta alabayë’ ninapaq y wakinkunatapis tsënölla rurayänampaq invitanapaq.
Bibliata leyir yachakunqantsik
Jehoväta maslla reqishun kamanqankunata rikarnin
6 Jehoväqa imatapis tiempunchömi ruran. Israelïtakunaqa cada watam febrëru killapita qallëkur pullan mäyu killayaq rikäyaq, cigüëñakuna norti kaq lädupa volayanqanta. Jehovämi israelïtakunata kënö nirqan: “Cigüëñapis musyanmi ima tiempuchö juk sitiuman ëwanampaq kaqta” (Jer. 8:7). Imanömi Jehoväqa pishqukunata kamashqa ima tiempuchö juk sitiukunata ëwayänampaq, tsënöllam mana alli nunakunata ushakätsinampaqpis tiemputa patsätsishqana, y tsëtaqa cumplinqam (Hab. 2:3).
17 A 23 DE FEBRËRU
BIBLIAPITA ALLI YACHAKUNAPAQ PROVERBIUS 1
Jövin, ¿pï nishunqëkitaraq ruranki?
Premiuntsikta ama oqrashuntsu
16 Jövin, cristiänu teytayoq o mamayoq karninqa, itsa pensëkanki mana entiendiyäshunqëkita y alläpa controlëkäyäshunqëkita. Tsëqa itsa pensëkanki Jehoväta mana sirwirnin mas alli kanëkipaq kaqta. Peru Jehoväta sirwita jaqirirninqa cuentatam qokurinki cristiänu mayikikunanö y teytëkikunanöqa pipis mana kuyashunqëkita.
17 Pensari, ¿teytëkikunaqa chikiyäshurnikitsuraq corregïkäyäshunki? Manam, kuyayäshurnikim (Heb. 12:8). Itsa imanö corregiyäshunqëkiqa gustashunkitsu. Peru tsëman yarparäkunëkipa rantinqa, ¿imanirtaq yarpachakurinkitsu precisaptin corregïkäyäshunqëkiman? Pacienciawanmi wiyanëki, y rasllaqa manam piñakunëkitsu. Bibliaqa nin, yachaq y tantiaq nunaqa raslla mana piñakunqantam (Prov. 17:27). Poqu nuna këta procurë, tsënöpam humildäwan consëjukunata chaskikunki, y imanö yanapashunëkipaq kaqmampis pensanki (Prov. 1:8). Jehoväta kuyaq Teytayoq këqa alläpam yanapashunki. Porqui pëkunaqa premiuta chaskinëkipaqmi yanapashïnikita munayan.
w05-S 15/2 pägk. 19, 20 pärrk. 11, 12
Cristiänu kanqantsikta rikätsikushun
11 Nunakunata kushitsinapa rantin Teyta Diosta kushitsishun. Piwampis amïgu kanqantsikpitam imanö kanqantsikta nimäshun. Amïguyoq këtaqa llapantsikmi munantsik y pëkunata kushitsita munarmi imatapis rurantsik. Jövin kar o mayorna karpis, jukkuna rurayanqantam rurëta munantsik y kushitsita munarmi imatapis rurantsik. Tsënö karpis, manam llapan amïguntsikkunatsu alli kanantsikta munayan. Höraqa mana allikunata ruranallapaqmi inkitamantsik (Proverbius 1:11-19). Pipis mana allikunata rurarqa, manam cristiänu kanqanta willakuntsu (Salmus 26:4). Apostol Pablum kënö nirqan: “Amana kë munduchö nunakunanöqa kayëtsu” (Romänus 12:2). Jehovämi yanapamäshun mana alli amïgukuna nimanqantsikta mana ruranapaq (Hebrëus 13:6).
12 Cristiänu kanqantsikta imapis ushakätsita munaptinqa, yarpänantsikmi jukkuna niyanqampita o reqishqa këpitaqa Jehoväwan amïgu kanqantsik mas alli kanqanta. Tsëpaqqa yanapamäshun Exodu 23:2 textuchö kënö ninqanmi “Ama atskaq nunakuna rurayanqanta qatirllaqa, ima mana allitapis rurayankitsu”. Juk kutim israelïtakunaqa äninqanta Jehovä cumplinampaq kaqman confiakuyarqantsu, peru Calebqa manam pëkunanötsu karqan. Pëqa segürum karqan Dios äninqanta cumplinampaq kaqta, tsëmi Jehoväqa bendicirqan (Nümerus 13:30; Josuë 14:6-11). Noqantsikpis Jehoväwan amïgu kanqantsikta cuidashun y ama wakinkuna rurayanqanta rurashuntsu.
Bibliata leyir yachakunqantsik
‘Teyta Diospa yachaq këninmi cällikunachö qayëkachëkan’
7 “Juiciunnaq” kaqkunaqa, pensëta mana yachayaptin imatapis raslla creiratsina kaqkuna o fäcil-lla engañarina kaq nunakunam kayan (Prov. 14:15). Atska kutim tsënö nunakunata Diospita yachatsikurnin purinqantsikchö tarintsik. Awmi, mëtsika millon nunakunatam religionninchö dirigeqkuna o polïticukuna engañayashqa. Engañayashqa kayanqanta musyarirqa, wakinkunaqa alläpam llakikuyan. Peru Proverbius 1:22 ninqanchö nunakunaqa, kikinkuna munarmi juiciunnaq sïguiyan (Jer. 5:31). Munayanqanta rurakuytam gustayan y manam Bibliachö ima ninqanta yachakuyta ni tsëchö këkaq leykunata wiyakuyta munayantsu. Canadä nacionchö Quebec-chö täraq alläpa religiösa warminömi wakinqa pensayan. Pëmi juk Testïgu watukaptin kënö nirqan: “Sacerdötïkuna engañayämashqa kaptinqa, pëpa culpanmi, manam noqakunapatsu”. Clärum këkan, kikinkuna munar juiciunnaq nunakunanöqa manam këta munantsiktsu (Prov. 1:32; 27:12).
24 DE FEBRËRUPITA 2 DE MARZUYAQ
BIBLIAPITA ALLI YACHAKUNAPAQ PROVERBIUS 2
¿Imanirtan Bibliata gänas gänaslla estudiashwan?
Bibliapita rasumpa kaqta yachakunqantsikmannö kawarnin sïguishun
16 Leyi y estudiëqa manam llapantsiktatsu gustamantsik. Tsënö kaptimpis, Bibliapita rasumpa kaqta yachakur sïguinapaqmi Jehoväqa nimantsik (leyi Proverbius 2:4-6). Tsëta gänas gänaslla rurashqaqa, kikintsikpaqmi alli kanqa. Bibliata leyirqa, Corey jutiyoq wawqiqa cada versïculupaq ima ninqantash ashin. Pëmi kënö nin: “Päginapa ura kuchunchö nötakunata y chowpi columnachö këkaq textukunatam leyï. Tsëpitanam tsë versïculupaq masllata entienditsikoq publicacionkunata ashï. […] Tsënömi Bibliata leyinqätaqa alli provechä”. Tsë wawqinö Bibliata leyir o juknöpa leyirpis, Bibliata estudianapaq tiempuntsikta patsätsishqa y kallpachakushqaqa, Bibliapita rasumpa kaqta yachakunqantsikta kuyanqantsiktam rikätsikushun (Sal. 1:1-3).
‘Teyta Diospa yachaq këninmi cällikunachö qayëkachëkan’
3 Alli entiendeq këqa, musyanqantsikmannö imatapis decidi ninanmi. Peru alli entiendeqqa kashun, manam imatapis musyanqantsikllapitatsu. Bibliachömi kënö nin: “Teyta Dios yachaq kanqanta entienditaqa qallëkuntsik Teyta Jehoväta respetarmi. Alli entiendeqqa tikrantsik Teyta Dios limpiu kanqanta musyarmi” (Prov. 9:10). Tsëmi kawënintsikchö precisaqkunata decidinantsik kaptinqa, ‘Teyta Dios limpiu kanqanta musyanqantsikta’ cuentaman churanantsik, juk parlakuychöqa, Jehovä pensanqantam cuentaman churanantsik. Tsëtaqa, Bibliapita yachakur o publicacionnintsikkunapita yachakurninmi tarishun. Y tsëta rurarqa, alli entiendeq kanqantsiktam rikätsikushun (Prov. 2:5-7).
4 Jehovällam imatapis rasumpa alli entiendeqqa (Rom. 16:27). ¿Imanirtan tsëta nintsik? Puntataqa, Kamamaqnintsik kaptin y kamanqankunata chipyëpa reqiptinmi (Sal. 104:24). Ishkë, llapan ruranqankunachömi alli entiendeq kanqanta rikätsikun (Rom. 11:33). Y kima, consejakunqankunata wiyakoqkuna kushishqa kawakuyaptinmi (Prov. 2:10-12). Rasumpa alli entiendeq këta munarqa, tsë kimantam yarpänantsik y imata decidinqantsikchö o ruranqantsikchömi cuentaman churanantsik.
Jövin, markäkïnikita sinchiyätsi
2 Kanan witsan mëtsikaq nunakunam Dios kamamanqantsikta creiyantsu. Jehoväta sirweq jövin kar o tsëraq yachakïkarqa itsa kënö tapukunki: “¿Imanöraq rikätsiküman Diosnintsik kamamanqantsikta?”. Diospa Palabranmi yanapamantsik imata leyinqantsikman y wiyanqantsikman alleq pensanapaq y kikintsik cuentata qokunapaq. Kënömi nimantsik: “Pensëta yachanqëkim cuidashunki”. ¿Imanö? Mana alli yachatsikïkunata mana chaskinëkipaq y Jehoväman markäkïniki sinchi kanampaq (leyi Proverbius 2:10-12).
3 Jehoväman sinchi markäkunapaqqa, puntataqa alleqran reqinantsik (1 Timoteu 2:4). Tsëmi Bibliata y wakin publicacionkunata leyirninqa, alläpa precisan leyïkanqëkiman pensarinëkipaq pärarinëki, y entiendita procuranëki (Mateu 13:23). Tsënö estudië imanö kanqanta kë yachatsikïchö rikärishun, tsënöpam Jehovä kamakoq kanqanta y Bibliata qellqatseq kanqanta atska pruëbakunata tarinki (Hebrëus 11:1).
Bibliata leyir yachakunqantsik
Bibliapita rasumpa kaqta yachakunqantsikmannö kawarnin sïguishun
16 Leyi y estudiëqa manam llapantsiktatsu gustamantsik. Tsënö kaptimpis, Bibliapita rasumpa kaqta yachakur sïguinapaqmi Jehoväqa nimantsik (leyi Proverbius 2:4-6). Tsëta gänas gänaslla rurashqaqa, kikintsikpaqmi alli kanqa. Bibliata leyirqa, Corey jutiyoq wawqiqa cada versïculupaq ima ninqantash ashin. Pëmi kënö nin: “Päginapa ura kuchunchö nötakunata y chowpi columnachö këkaq textukunatam leyï. Tsëpitanam tsë versïculupaq masllata entienditsikoq publicacionkunata ashï. […] Tsënömi Bibliata leyinqätaqa alli provechä”. Tsë wawqinö Bibliata leyir o juknöpa leyirpis, Bibliata estudianapaq tiempuntsikta patsätsishqa y kallpachakushqaqa, Bibliapita rasumpa kaqta yachakunqantsikta kuyanqantsiktam rikätsikushun (Sal. 1:1-3).