Warë warätin alli kawakuyta munarmi nunakunaqa imëkata rurayan
Warë warätin, ¿imanö kawakuytatan munanki? Kushishqa kawakuyta, mana qeshyar, y imëkëkipis mana faltanantachi munanki. Tsënömi pï mëpis kawakuyta munan.
Peru mëtsikaqmi niyan tsënö kawakuyqa mana puëdikanqanta. Tsënöqa niyan imëkapis illaqpita pasakuptinmi. COVID-19 qeshya kaptinmi nunakuna mas mana alli kawakuykäyan, qellëninkuna ushakashqa y mëtsikaqnam wanuyashqapis. Tsëmi warë warätin alli kawakuyänampaq kaqtaqa creiyannatsu.
Imëka mana allikuna pasakuptinmi, nunakuna imëkata rurayan alli kawakuyta munarnin. Tsëmi wakinkunaqa suertita qateqkunaman ëwayan. Wakinnam estudiarninraq o qellëyoq karninraq kushiqa kawayänampaq kaqta pensayan. Y wakinnam pensayan alli nuna karlla alli kawakuyänampaq kaqta.
¿Rasumpatsuraq tsëkunaqa warë warätin alli kawakunëkipaq yanapashunki? Tsëta musyanëkipaqqa këkunaman pensë:
¿Warë warätin alli kawakunëkipaqqa suertiyoqraqku kanëki?
¿Estudiar y qellëyoq karninraqku kushishqa y alli kawakunki?
¿Alli nuna karllaku kushishqa y alli kawakunki?
Warë warätin alli kawakunëkipaqqa, ¿imaraq yanapashunki?
Kë Täpakoqta leyirmi tsëkunata yachakunki.