¿Imatataq rurankiman Jehoväwan yapë amïgu kanëkipaq?

CADA WATAM, mëtsikaq nunakuna Jehoväpa testïgun këman kutiyan. Llapampis alläpa väleq üsha cuenta kayaptinmi, ciëluchöqa “alläpa kushikuyan” (Lüc. 15:7, 10). Testïgu këman qam kutishqa karqa, yarpë Jesus, angelkuna y Jehoväpis alläpam kushikuyan. Peru, Jehoväwan yapë amïgu kanëkipaq kallpachakuykanqëkichöqa, itsa imallapis michäshunkiman. ¿Imatan wakinkunaqa kayanman y imatataq rurankiman mana michäshunëkipaq?

¿IMAKUNATAN MICHÄSHUNKIMAN?

Testïgu këman kuteq mëtsikaq wawqi panikunam, kikinkunapaq mana allita pensayan. Tsënö pensarqa, itsa rey David imanö pensanqanta entiendinki. Jehovä perdonashqana kaptimpis, alläpa jutsata rurashqa karmi “waqëllawanna nawïtapis oqrëkä” nirqan (Sal. 40:12; 65:3). Testïgu këman mëtsikaq kuteqkunam, mëtsika watakunapa penqakur, o Dios mana perdonashqa kanqanta pensar kayan. Congregacionpita qarquyanqampita 20 watapitapis maschö Testïgu këman kuteq Isabellea panim kënö nin: “Jehovä perdonamashqa kanqantaqa, manam creita puëdeqtsu kä”. Llakikurlla kaptikiqa, Jehoväwan amïgu kanqëkim yapë ushakar qallëkunqa (Prov. 24:10). Tsënö pasashunëkitaqa ama permititsu.

Wakinnam, Jehoväwan amïgu këman kutiyänampaq, imëkata rurayänampaq kaqman pensarnin alläpa yarpachakuyan. Testïgu këman kutirirmi Antoine wawqi kënö nirqan: “Testïgukuna imata ruranqantsiktam, llapanta qonqarishqa karqä”. Tsënö kaptinmi, wakinkunaqa Diosta sirwiyanqanchö alläpa yanapakuyantsu.

Këllaman pensarishun: shukukuy vientu juk wayita ushakäratsishqa kaptinqa, tsë wayiyoq nunaqa yapë sharkatsinampaq tiemputa patsätsinanman y alläpa kallpachakunampaq kaqman pensarmi, yarpachakur qallëkunman. Tsë cuentallam, jutsallakurnin Jehoväta llakitsishqa karnin, pëwan yapë amïgu kayänëkipaq kallpachakunëki. Peru ¿japallëkiku tsëta ruranki?

Jehovämi këta nimantsik: “Jutsata rurayashqëkipita perdonayänaqpaq kaqta kanan parlashun” (Is. 1:18). Jehoväwan alli kanëkipaqqa, kallpachakurqunkinam y tsëta ruranqëkipitam pëqa kuyashunki. Këman pensari: Jehoväqa, qam ruranqëkiwanmi Satanas ulikoq o llullakoq kanqanta rikätsikuyta puëdin (Prov. 27:11).

Testïgu këman kutirqa, Jehoväwan yapë amïgu kanëkipaqmi kallpachakurqunki. Y Jehoväqa qamwan yapë amïgu kanampaqmi änishunki (Sant. 4:8). Testïgu këman kutinqëkita musyayanqanqa allim, peru mastaran ruranëki. Teytëki y amïguyki Jehoväta kuyanëkipaqmi, mas kallpachakunëki. ¿Imanötan tsëta ruranki?

PUËDINQËKIKUNATA RURANËKIPAQ CHURAPAKË

Imakunata rurëta puëdinqëkiman pensë. Itsa Jehoväpita y shamoq tiempupaq änikunqankunataqa yarparëkankiraq. Peru alli cimientuyoq këkaq wayita yapë sharkatseqnöpis, Diospitam yachatsikoq yarqunëki, reunionkunamanmi ëwanëki y wawqi panikunawanmi imallatapis juntu ruranëki. Imakunata ruranëkipaq kaqpita wakinllata rikärishun.

Jehoväman imëpis mañakuy. Pëqa musyanmi, jutsallakunqëkiman yarpar pëman mañakunëki fäcil mana kanqanta (Rom. 8:26). Tsënö kaptimpis, Jehoväman mañakurnin sïgui y amïgun këta yapë munanqëkita nï (Rom. 12:12). Andrej wawqim kënö nin: “Dios mana perdonamänampaqnö kanqätam pensaq kä y penqakoqmi kä, peru pëman mañakurirqa mas ankash y yamëmi kaq kä”. Imanö mañakuyta mana musyarqa, Salmus 51 y 65 kaq capïtulukunachö, jutsampita arrepentikurnin rey David mañakunqannölla mañakuy.

Bibliata estudiëta ama dejëtsu. Tsëta ruranqëkim, mas markäkunëkipaq o yärakunëkipaq y Jehoväta kuyanëkipaq yanapashunki (Sal. 19:7-11). Felïpi wawqim kënö nirqan: “Jutsallakuymanqa charqä, Bibliata estudianäpaq y leyinäpaq mana patsätsishqa kanqäpitam. Yapë jutsallakuyta mana munarmi, Bibliata alli estudianäpaq tiempüta alli patsätsirqä”. Tsëtam qampis rurankiman. Imata estudiëta mana musyarqa, Diosta alli sirwikaq amïguykita tapuy.

Wawqi panikunawan yapë amïgu kë. Testïgu këman wakin kuteqkunaqa, wawqi panikuna jukläya rikäyänantam yarpachakuyan. Larïssa jutiyoq panim kënö nin: “Alläpam penqakoq kä, turi nanakunata traicionashqa kanqätam pensaq kä, tsënö pensarmi atska tiempupa llakikurqä”. Këta yarpë, creikoqkunata rikaqkuna y Diosta alli sirwikaq wawqi panikunaqa, Jehoväwan yapë amïgu kanëkipaqmi yanapayäshuynikita munayan. (Rikäri “Creikoqkunata rikaqkuna rurayänampaq kaqkuna” neqta). Testïgu këman kutinqëkipitam, alläpa kushikuyan y qampis kushishqa kanëkitam munayan (Prov. 17:17).

¿Imatataq rurankiman congregacionchö wawqi panikunawan mas juntu kanëkipaq? Llapan reunionkunaman ëwë y wawqi panikunawan yachatsikoq yarquy. ¿Imanötan tsëkunata ruranqëki yanapashunki? Wawqi Fëlixmi kënö nirqan: “Congregacionchö wawqi panikunaqa, kutinätam shuyarëkäyarqan, alläpa kuyayämanqantam rikarqä. Llapankunam yanapayämarqan, familiächö cuenta kanäpaq, Jehovä perdonamashqa kanqanta yarpänäpaq y kallpachakurnin sïguinäpaq” (Rikäri “Imata ruranëkipaq kaqkuna” neqta).

AMA QELANÄKURITSU

Jehoväwan amïgu kanëkipaq kallpachakuykaptikim, Satanasqa imëka wayita ushakätseq shukukuy vientunöraq tsëta mana ruranëkipaq michäshunki (Lüc. 4:13). Jehoväwan amïgu kanqëki mana ushakänampaq, mas markäkoq kanëkipaq kallpachakuy.

Üshankuna cuenta sirweqninkunapaq parlarmi, Jehovä kënö nin: “Oqrakaqkunatapis ashi ashïkurmi kanchanman ëllumushaq. Chakinkuna pakishqa kaptinpis jampirmi watäpushaq. Uyuyaqkunatapis kachinman jampita takurkurmi qarashaq” (Ezeq. 34:16). Jehoväqa, mëtsika sirweqninkunatam pëwan yapë amïgu kayänampaq yanapashqa. Tsëqa ama qonqëtsu, pëwan alli amïgu kayänëkipaqmi pëqa yanapashuynikita munan.