¿Imanötan sufrinqantsik hörakuna Job libru yanapamashwan?

1, 2. ¿Imanirtan Job libruta leyishwan?

¿IMËLLAPIS Job libruta leyirqunkiku? Tsë libruta qellqayanqampitaqa tres mil quinientus watakunanönam pasarishqa. Tsënö kaptimpis nunakunam niyan Job libruta qellqaq nunaqa, fäcil-lla entiendina y shumaq palabrakunata churashqa kanqanta. Rasunmi, tsë librutaqa Moisesmi qellqarqan, peru Jehovämi yanaparqan tsënö shumaqta qellqanampaq (2 Tim. 3:16).

² Job libruqa yanapamantsik Jehovä Diosnintsikta imanir sirwinqantsikta musyanapaqmi. Këllaman pensarishun: angelkuna y nunakunaqa, ¿Jehovä Diosta rasumpa kuyartsuraq y jutinta respetatsita munartsuraq sirwiyan? Tsëta entiendinapaqmi Job libru yanapamantsik. Tsënöllam Job libruta leyirninqa entiendintsik Jehovä Diosnintsikqa kuyakoq, yachaq, allita ruraq y alläpa poderösu kanqanta. Tsëmi Job libruchöqa mëtsika kuti nin, “Llapanta Puëdeq” Dios kanqanta. Tsënöllam Job libruta leyirqa entiendintsik sufrinantsikta Diosnintsik imanir permitinqanta, y mas tapukuynintsikpa respuestantapis tarintsikmi.

3. ¿Imakunatataq Job librupita yachakuyta puëdintsik?

³ Këllaman pensarishun: jirka puntanman chärirqa, mëtsëpa y llapan lädupam shumaq rikachakur qallëkuntsik. Tsënöllam Job libruta leyirpis jirka puntampita rikaq cuenta llapan problëmantsikkunata Jehovä rikanqannö rikar qallëkuntsik. Tsëqa, ¿sufrinqantsik hörakuna Job libru yanapamashwantsuraq? ¿Israelïtakunataqa yanaparqantsuraq? Y ¿Job libruwan wakinkunata yanapëta puëdishwantsuraq? Tsëkunatam këchö yachakurishun.

¿IMANIRTAN JEHOVÄQA PERMITIRQAN JOBTA DIABLU SUFRITSINANTA?

4. ¿Imachötan Jobqa Egiptuchö wakin israelïtakunapita jukläya karqan?

⁴ Israelïtakuna Egiptuchö esclävu kayanqan witsanmi Jobqa Uz markachö täkurqan. Uz markaqa capazchi karqan Arabia markapa norti kaq lädumpa. Jobqa manam Egiptuchö wakin israelïtakunanötsu santukunata adorarqan, tsëpa rantinqa Jehovä Diosllatam mana dejëpa sirwirqan (Jos. 24:14; Ezeq. 20:8). Tsëmi Diosnintsikqa Jobpaq kënö nirqan: “Pënöqa manam ni pï patsachö kantsu” (Job 1:8).a Jobqa rïcu nunam karqan y pïmë nunakunam alläpa respetayaq (Job 1:3). Juk rïcu nuna y respetashqa nuna Jehovä Diosnintsikta mana dejëpa sirwinqanta rikarqa, Satanasqa alläpachi cölerakurqan.

5. ¿Imanirtan Jehovä permitirqan Jobta Satanas sufritsinanta? (Job 1:20-22; 2:9, 10).

⁵ Satanasqa Jobpaq nirqan imëka sufrimientukunapa pasarqa, Jehoväta sirwita dejarinampaq kaqtam (Job 1:7-11; 2:2-5). Tsëmi Jehoväqa Jobta alläpa kuyëkarpis, Satanas sufritsinanta permitirqan. ¿Imanirtan permitirqan? Satanas ninqan mana rasumpa kanqanta rikätsikunampaqmi (Job 1:12-19; 2:6-8). Satanasqa Jobpa animalninkunatam ushakätsirqan, 10 wamrankunatam wanutsirqan y kikin Jobtanam alläpa qeshyatsirqan. Peru Satanas tsënö sufrikätsiptimpis, Jobqa manam Jehoväta dejarqantsu (leyi Job 1:20-22; 2:9, 10). Peru Jehoväqa, ¿imatataq rurarqan? Jobtam qeshyanqampita alliyätsirqan. Bendiciptinmi yapë rïcu tikrarqan, nunakuna respetayarqan, wamrankuna 10 mas yuriyarqan, 140 wata mas kawarqan y willkankunapa willkankunatapis reqirqanmi (Job 42:10-13, 16). Peru Job pasanqankunaqa, ¿Diospa unë sirweqninkunata yanaparqantsuraq? Y ¿imanötan noqantsiktaqa yanapamashwan?

6. ¿Imanöraq israelïtakunata yanaparqan Job pasanqankunata musyayanqan? (Dibüjuta rikäri).

⁶ Job pasanqankunaqa capazchi israelïtakunata yanaparqan. Israelïtakunaqa mëtsika watakunapam Egiptuchö sufrishqa kayarqan. Pensarishun Josuëman y Calebllaman. Pëkunapis wamra kayanqampitam Egiptuchö esclävu kayarqan, y tsunyaq sitiuchöpis 40 watapam kayarqan wakin israelïtakuna mana alli portakuyanqampita. Peru israelïtakunataqa, ¿imanöraq Job pasanqankunata musyayanqan yanaparqan? Job pasanqankunata musyashqa karqa entiendiyarqanchi pipa culpanrëkur nunakuna sufriyanqanta, nunakuna sufriyänanta Diosnintsik imanir permitinqanta y Diosnintsikta mana dejëpa nunakuna sirwiyanqan imanir alli kanqanta.

7, 8. ¿Imanötan sufrikaqkunata Job libru yanapan? Hazelta pasanqanta willakaramuy.

⁷ Job pasanqankunaqa noqantsiktapis yanapamashwanmi. Kanan witsampis, mëtsikaq nunakunam entiendiyantsu alli nunakuna imanir sufriyanqanta. Tsëta rikarmi wakin nunakunaqa Diosman creiyannatsu ni confiakuyannatsu. Parlarishun Ruanda nacionpita Hazelb jutiyoq warmita pasanqampaq. Pëqa, shipash kanqan witsanqa Diosman creirqanmi. Tsënö creirpis, pëqa imëka mana allikunapa pasarmi Diosmanqa creirqannatsu. ¿Imatan Hazelta pasarqan? Papäninwan mamäninmi divorciakuyarqan, tsëpitanam mamäninqa juk nunawan casakurqan, y tsë padrastrunqa alläpa mana allim trataq. Y Hazeltaqa shipashyëkaptinnam juk nuna violarqan. Tsëmi consolayänanta munar iglesiaman ëwarqan, peru manam ni pï consolarqantsu. Tsëmi alläpa llakishqa sientikurnin Diosnintsikta kënö nirqan: “Imëpis qammanmi mañakamurqö y alli kaqta ruranäpaqmi imëpis kallpachakurqö, tsëta rurëkaptïpis qamqa alläpam sufritsimarqunki. Tsëmi kanampitaqa qamman mañakamushaqnatsu y kushishqa kanäpaqmi munanqänö kawakushaq”. Hazeltaqa nunakunam creitsishqa kayarqan Dios castigashqa kaptin imëka mana allikunapa pasëkanqanta, tsëta musyarqa alläpam llakikuntsik.

⁸ Peru noqantsikqa Job librupita yachakushqa karmi alli entiendintsik, Satanaspa culpanrëkur sufrinqantsikta. Y wakin nunakuna sufriyaptimpis, manam pensantsiktsu jutsata rurayanqampita sufrikäyanqanta. Tsëpa rantinqa allim musyantsik, Biblia ninqannöpis mana pensanqantsik hörakuna mana allikunapa pasanqantsikta (Ecl. 9:11; Job 4:1, 8). Tsënöllam yachakurquntsik, imëka mana allikunapa pasarpis Jehovä Diosnintsikta mana dejarqa Satanas ulikoq o llullakoq kanqanta Diosnintsik rikätsikunampaq yanapakuykanqantsikta (Job 2:3; Prov. 27:11). Bibliapita yachakurmi entiendirquntsik Satanaspa culpanrëkur noqantsikpis y familiantsikpis sufrinqantsikta. Yapë yarpärishun Hazel jutiyoq panintsikpaq parlanqantsikta. Pëqa Testïgukunawan Bibliata estudiarmi entiendirqan Diosnintsik mana sufritsishqa kanqanta. Kënömi nin: “Llapan shonqüwanmi Jehovä Diosnintsikman mañakurqä y rasumpa kaqchöqa dejëta mana munanqätam willarqä. Jehovä Diosnintsik imanö kanqantaqa manam musyarqätsu, peru kananqa segürum këkä kuyamanqanta, y kushishqam kawakü”. Alläpam kushikuntsik imanir sufrinqantsikta musyarnin. Kananqa yachakurishun sufrinqantsik hörakuna Job libru cada ünuta imanö yanapamanqantsikta.

¿IMANÖTAN JOB LIBRU YANAPAMANTSIK JEHOVÄTA MANA DEJANAPAQ?

9. Alläpa sufrikarpis, ¿imanirtan Jobqa alli aguantarqan? (Santiägu 5:11).

⁹ Pensarishun Job alläpa sufrikanqanman. Alläpam qeshyëkan, entëru cuerpuntam qeri ushashqa, alläpa sheqshiptinmi mitu mankapa pakipinwan jichkar ushan y qaranmi shiprakëkan. Alläpa uyu kaptinmi kallpampis ni valornimpis kantsu. Entëru cuerpun nanaptinmi waqëkan, japallanmi uchpa jananchö jamarëkan y manam pillapis yanapëkunampaq kantsu. Tsëta rikarqa capazchi pensashwan, Jobqa wanuyta mana munar imëkata rurëkanqanta. Peru rasumpa kaqchöqa, Jehovä Diosnintsikta dejëta mana munarmi alli aguantëkan (leyi Santiägu 5:11). ¿Imatan yanaparqan alli aguantanampaq?

10. ¿Imanirtan Jobqa Jehovä Diosnintsikta mana mantsakuypa parlaparqan?

¹⁰ Jobqa rasumpam Jehovä Diosnintsikwan amïgu karqan, tsëmi imanö sientikunqanta willëta mantsarqantsu (Job 10:1, 2; 16:20). Kima kaq capïtuluta leyirmi entiendintsik, castiguëkanqanta pensarnin alläpa cölerashqa Jehoväta reclamanqanta. Y kiman amïgun tukoqkuna jutsata rurashqa kanqampita Jehovä castiguëkanqanta niyaptinmi, Jobqa alli kaqllata imëpis ruranqanta nirqan. Tsënö nirqa entienditsikuykarqan, Diospitapis mas alli ruraq kanqantam (Job 10:1-3; 32:1, 2; 35:1, 2). Tsënö nirpis, Jobqa cuentatam qokurqan defendikuyta munanqanchö imatapis lluta parlashqa kanqanta (Job 6:3, 26). Y 31 kaq capïtuluchönam Jehovä Diosnintsikta nirqan, parlapanqanta wiyanampaq y culpannaq kanqanta ninampaq (Job 31:35). Peru Jehoväta tsënö exiginampaqqa, ¿Jobqa derëchuyoqku karqan? Y Jehoväqa, ¿imanir sufrikanqanta Jobta willananraqku karqan? Manam. Peru tsënö parlapanqanwanmi cuentata qokuntsik Jobqa Jehovä Diosnintsikpa rasumpa amïgun kanqanta y alli juez kanqanman confiakunqanta.

11. Jobta Jehovä parlaparqa, ¿imanötan tratarqan?

¹¹ Peru Jehovä Diosnintsik fuerti vientu rurimpita Jobta parlaparqa, manam quejakunqampita ni alli ruraq kanqanta ninqampita qayaparqantsu, ni manam alläpaqa entienditsirqantsu imanir sufrikanqanta. Tsëpa rantinqa, juk kuyakoq papä wamranta correginqannömi kuyëllapa corregirqan. Tsëmi Jobqa alli entiendiskir lluta parlanqampita arrepentikurqan, y imatapis mana musyanqantam nirqan (Job 31:6; 40:4, 5; 42:1-6). Peru Job pasanqankunaqa, ¿Diospa unë sirweqninkunata yanaparqantsuraq? Y ¿noqantsiktaqa yanapamashwantsuraq?

12. Job pasanqankunaqa, ¿yanaparqantsuraq israelïtakunata?

¹² Job pasanqankunaqa capazchi israelïtakunata yanaparqan. Pensarishun Moisesman. Pëqa israelïtakunapa dirigeqnin karmi imëka mana allikunapa pasarqan y israelïtakuna Jehoväta mana cäsukuyaptinmi alläpa llakikurqan. Peru Moisesqa manam wakin israelïtakunanötsu quejakurqan, tsëpa rantinqa imanö sientikunqantam Jehoväta willarqan (Ex. 16:6-8; Nüm. 11:10-14; 14:1-4, 11; 16:41, 49; 17:5). Y manam tsëllatsu, Jehovä Diosnintsik corregiptimpis chaskikurqanmi. Këllaman pensarishun: 40 watapana tsunyaq sitiuchö israelïtakuna kayanqan witsanmi, Moisesqa Cades sitiuchö këkar, alläpa cöleratsiyaptin ‘lluta parlarirqan’ y manam Jehoväta alabarqantsu (Sal. 106:32, 33). Tsënö lluta parlanqampitam Jehovä Diosnintsikqa, Änikunqan Patsaman yëkunanta permitirqantsu (Deut. 32:50-52). Dios Änikunqan Patsaman mana yëkunampaq kaqta musyarirqa, Moisesqa alläpachi llakikurqan. Peru tsënö llakikurpis, humildim karqan y Jehovä correginqantam chaskikurqan. Rikärinqantsiknöpis capazchi Moisestaqa Job pasanqankuna yanaparqan imëka mana allikunapa pasanqan hörakuna. ¿Y Dios Änikunqan Patsaman yëkoq israelïtakunataqa yanaparqantsuraq? Capazchi yanaparqan. Job pasanqankunaman pensashqa karqa, israelïtakunaqa Diosnintsikta willayarqanchi imanö sientikuyanqanta, manachi pensayarqantsu alli ruraqlla kayanqanta y Diosnintsik corregiptimpis chaskikuyarqanchi.

13. ¿Imanötan Job libru yanapamashwan mana allikunapa pasarpis Jehovä Diosnintsikta kuyarnin alli aguantanapaq? (Hebrëus 10:36).

¹³ Job pasanqankunaqa noqantsiktapis yanapamashwanmi. Noqantsikpis mana allikunapam pasantsik, peru Jehoväta kuyarmi alli aguantanantsik (leyi Hebrëus 10:36). Capazchi qeshyapäkuntsik, yarpachakuntsik, imëka problëmakunapa pasantsik o hasta familiantsikkunapis wanukuyan. O capazchi pillapis mana pensarnin imatapis lluta parlarinman o rurarinman y masraq llakiratsimashwan (Prov. 12:18). Peru Job librupita yachakurmi entiendintsik, imanö sientikunqantsikta Jehoväta willanantsikpaq y wiyamänapaq kaqman confiakunantsikpaq (1 Juan 5:14). Diosnintsikqa manam cölerakunqatsu imanö sientikunqantsikta willanqantsikchö Jobnö imatapis lluta parlarishqa. Tsëpa rantinqa, mas kallpayoq kanapaqmi poderninwan yanapamäshun y imatapis alli pensëkur decidinapaqmi yanapamäshun (2 Crön. 16:9; Sant. 1:5). Y Jobtanöpis corregimänantsik kaptinqa Palabran Bibliawan, publicacionnintsikkunawan, anciänukunawan y amïguntsikkunawanmi corregimäshun. Y noqantsikpis Jobnömi cäsukoq kanantsik (Heb. 12:5-7). Jobtaqa yanaparqan Jehovä Diosnintsik ninqankunata cäsukunqanmi. Tsënöllam noqantsiktapis yanapamäshun humildi kanqantsik y consejamanqantsikta cäsukunqantsik (2 Cor. 13:11). Rikärinqantsiknöpis Job librupitaqa imëkatam yachakuyta puëdintsik. Peru ¿imanötan Job libruwan jukkunata yanapashwan? Yachakurishun.

JOB LIBRU NINQANKUNAWAN JUKKUNATA YANAPASHUN

14. ¿Imanötan nunakunata yanapantsik imanir sufrinqantsikta entiendiyänampaq?

¹⁴ Diosnintsikpita yachatsikushqaqa, wakin nunakunaqa tapumantsik imanir sufrinqantsiktam. Y tsënö tapumashqaqa, shumaqmi Bibliawan entienditsintsik Eden huertachö juk mana alli angel ninqanta creirnin Adanwan Ëva jutsata rurashqa kayanqanta (Gen. 3:1-6). Y pëkuna jutsata rurayanqanrëkur llapantsikpis sufrinqantsikta y wanunqantsikta (Rom. 5:12). Tsëpitaqa capazchi nirintsik, Satanas ulikoq o llullakoq kanqanta llapan nunakuna musyayänampaq Satanas gobernananta Diosnintsik permitikanqanta peru shamoq tiempuchöqa nunakuna manana sufriyänampaq ni wanuyänampaq kaqta (Apoc. 21:3, 4). Tsënö entienditsinqantsikqa alläpa allim y mëtsikaq nunakunatam yanapëta puëdintsik imanir sufrinqantsikta entiendiyänampaq.

15. Imanir sufrinqantsikta nunakuna tapumashqaqa, ¿imanötan Jobta pasanqanwan entiendiratsishwan? (Fötukunata rikäri).

¹⁵ ¿Imanö mastan entiendiratsishwan imanir sufrinqantsikta nunakuna tapumashqa? Puntataqa tapumanqantsikpitam felicitänantsik. Tsëpitanam cuentarinantsik unë witsanchö Job jutiyoq nunapis alläpa sufrirnin tsënö tapukushqa kanqanta, y hasta Dios castiguëkanqanta pensashqa kanqanta (Job 7:17-21). Unë nunakunapis tsënö tapukushqa kayanqanta musyarirqa, capazchi pëpis masllata musyarita munanqa. Tsëpitanam entiendiratsishwan Jobqa Satanaspa culpanrëkur sufrishqa kanqanta. Satanasqa nunakunapaq nishqa karqan Dios bendiciptinlla sirwiyanqantam, peru mana allikunapa pasarqa Diosta dejariyänampaq kaqtam. Tsëpitanam nirishwan Jobtaqa Diosnintsik mana sufritsishqa kanqanta, sinöqa Diablu sufritsishqa kanqanta. Y nirishwanmi Satanas ulikoq o llullakoq kanqanta rikätsikunampaq nunakunata Satanas sufritsinanta Diosnintsik permitinqanta. Peru tsëpitanam nirishwan mana dejëpa sirwinqampita Jobta Diosnintsik bendicishqa kanqanta. Rikärinqantsiknöpis, nunakunatam consolëta puëdintsik Diosnintsik mana sufritsimanqantsikta entienditsirnin.

16. ¿Imanötan sufrikaq nunakunata Job libru yanapanman? Pasakunqanwan willakaramuy.

¹⁶ Mariu jutiyoq nunata Job pasanqankuna imanö yanapanqanta rikärishun. 2021 watachömi juk pani telëfunupa yachatsikuykarnin juk nümeruman qayarirqan y Mariu jutiyoq nunam contestarirqan. Y juk textuta leyipärirmi entienditsirqan Diosnintsikqa shamoq tiempuchö kushishqa kawakunantsikpaq änimanqantsikta, y mañakunqantsiktapis wiyanqanta. Tsëpitanam Mariuta tapurqan tsë versïculu ninqampita imata pensanqanta y Mariuqa nirqan wanutsikuyta pensarnin tsë qoya familiampita despidikurnin juk cartata qellqëkanqan höra qayarishqa kanqantam. Y kënömi nirqan: “Noqaqa Diosman creïmi, peru kanan qoyaqa o kanan wärëqa noqapaq Diosnintsik ni ichikllapis mana yarpachakunqantam pensarqä”. Y panintsikqa, Mariuta yapë qayanqanchömi Job pasanqankunata leyiparqan, tsëmi Mariuqa Job libruta Bibliachö leyinampaq decidirqan. Y panintsikqa jw.org päginachö Bibliata leyinampaqmi enläcita apatsirqan. Tsëpitanam Mariuqa Bibliata estudiar qallëkurqan, y kananqa alläpa kushishqam këkan Diosnintsik kuyanqanta musyarnin.

17. ¿Imanirtan alläpa agradecikuntsik Job pasanqankunata Palabran Bibliaman Jehovä qellqatsinqampita? (Job 34:12).

¹⁷ Yachakurinqantsiknöpis Diospa Palabranqa llapan sufrikaqkunatam yanapan y consolan (Heb. 4:12). Alläpam agradecikuntsik Job pasanqankunata Palabran Bibliaman Diosnintsik qellqatsimunqampita (Job 19:23, 24). Job libruta leyirmi alli entiendintsik Diosnintsikqa mana sufritsimanqantsikta (leyi Job 34:12). Tsënöllam entiendintsik imanir sufrinqantsikta y aguantanantsikpaq imata ruranapaq kaqta. Y Job libruta yachakurninqa, sufrikaqkunatam consolëta puëdintsik. Peru ¿imanötan Job libru yanapamashwan pitapis consejanapaq? Tsëtam qateqninchö yachakurishun.