¿Imanötan Job libru yanapamantsik consejakuyta yachanapaq?

1, 2. ¿Imanirtan fäciltsu karqan tsë kiman nunakunapaq y Elihüpaqpis Jobta consolayänan?

JOBQA rïcu y reqishqa nunam karqan, tsënö këkarmi illaqpita imëkanta perdirirqan. Tsëta musyaskirmi Elifaz, Bildad y Zofar jutiyoq nunakuna Jobta consolëta munarnin Uz markaman viajayarqan. Peru Jobta rikëkurqa, alläpam mantsakäyarqan.

² Job pasëkanqanman pensarishun. Pëqa imannaq y pïninnaqmi quedarishqa. Camëllunkuna, üshankuna, wäkankuna y ashnunkunapis wanurmi ushakashqa y wakintanam ladron apakushqa. Sirweqninkunatapis cäsi llapantam wanutsir ushayashqa, y wamrankunapis janankunaman wayi ishkiptinmi llapan wanukuyashqa. Kikin Jobnam alläpa qeshyëkan y entëru cuerpuntam qeri ushashqa. Visitaq nunakuna chärirqa, uchpa jananchö alläpa llakishqa jamarëkaqtam Jobta rikäriyan. ¿Imatataq rurayan? Lädunman jamëkurmi siëti junaqkunapa upälla jamaräkuyan (Job 2:12, 13). Tsënö këkäyaptinmi Elihüpis chärin y lädunkunamampam jamakurin. Y llapampis upälla jamarëkäyaptinmi, Jobqa parlar qallëkun y wanukuytam munan, hasta yurikunqan junaqtapis maldicinmi (Job 3:1-3, 11). Jobqa rasumpam wanarqan visitaq nunakuna yanapayänanta y consolayänanta. Peru visitaq nunakunaqa, ¿rasumpatsuraq amïgunkuna kayarqan y consolayarqantsuraq? Rikärishun.

3. ¿Imatataq këchö yachakushun?

³ Jehovä Diosnintsikmi Moisesta nirqan Elifaz, Bildad, Zofar y Elihü niyanqankunata qellqanampaq. Elihütaqa Jehovä Diosnintsikmi yanaparqan Jobta parlapänampaq, peru Elifaztaqa capazchi juk demoniu yanaparqan (Job 4:12-16; 33:24, 25). Tsëchi Job libruta leyirqa, alli consëjukunata y mana alli consëjukunatapis tarintsik. Tsëmi këchöqa alli consejakoq kanantsikpaq Job librupita yachakushun. Peru puntatam yachakurishun Jobta visitaq kiman nunakuna rurayanqannö mana ruranantsikpaq, y tsëpitanam yachakushun Elihünö alli consejakoq kanantsikpaq. Tsënöllam yachakushun Job libruchö tarinqantsik alli y mana alli consëjukuna, israelïtakunata imanö yanapashqa kanqanta y noqantsiktapis imanö yanapamanqantsikta.

JOBTA ELIFAZ, BILDAD Y ZOFAR CONSEJAYANQAN

4. ¿Imanirtan kiman nunakunaqa Jobta consolayarqantsu? (Dibüjuta rikäri).

⁴ Bibliachöqa willakun, alläpa mana allikunapa Job pasëkanqanta musyarirnin “llakikunqanchö yanapayänampaq y shoqayänampaq” kima nunakuna ëwayanqantam (Job 2:11). Peru ¿imanirtan yanapayarqantsu y consolayarqantsu? Juk, pëkunaqa manam Job ninqankunata shumaq wiyayarqantsu. Tsëmi jutsata rurashqa kanqanta pensar Dios castiguëkanqanta niyarqan (Job 4:7; 11:14).a Ishkë, consejayanqanqa manam imachöpis yanaparqantsu. Manam Job pasëkanqankunaman pensayarqantsu, tsëmi mas llakitsiyarqan (Job 13:12). Tsëtam Bildad rurarqan. Job pasëkanqankunaman pensanampa rantinmi, Jobta nirqan alläpana parlëkanqanta (Job 8:2). Y Zofarnam ‘upa nuna’ kanqanta nirqan (Job 11:12). Kima, qayapëpa mana parlaparpis yachaq tukuyarqanmi, burlakuyarqanmi y juzgayarqanmi (Job 15:7-11). Rasumpa kaqchöqa, manam munayarqantsu ni consolëta ni Diosnintsikta sirwir sïguinampaq yanapëta. Tsëpa rantinqa, jutsata rurashqa kanqanta pensarmi juzguëkäyarqan.

5. Elifaz, Bildad y Zofar consejayanqanqa, ¿Jobta yanaparqanku?

⁵ Tsë kiman nunakunaqa manam Jobta consolayarqantsu, tsëpa rantinqa masmi llakitsiyarqan (Job 19:2). Tsëchi Jobqa defendikuyta munar imëkata nirqan y mana conviëneqkunatapis parlarqan (Job 6:3, 26). Elifaz, Bildad y Zofarqa manam Jobta llakipäyarqantsu, y niyanqankunapis manam Diosnintsik munanqannötsu karqan. Tsëta rurarmi pëkunaqa cuentata mana qokushpa Satanas munanqantana rurëkäyarqan (Job 2:4, 6). Peru ¿imanöraq israelïtakunata Job libru yanaparqan? Y ¿noqantsiktaqa imanöraq yanapamashwan?

6. ¿Imanö mana kayänampaqraq Israelchö anciänukunaqa Elifazpita, Bildadpita y Zofarpita yachakuyarqan?

⁶ ¿Imanöraq israelïtakunata Job libru yanaparqan? Israelïtakuna juk nacionna tikraskiyaptinqa, Jehovä Diosnintsikqa confiakuypaq nunakunatam akrarqan Pë munanqannö sirweqninkunata juzgayänampaq (Deut. 1:15-18; 27:1). Tsë juezkunaqa o anciänukunaqa manaraq consejar o manaraq juzgarmi pitapis alliraq wiyayänan karqan (2 Crön. 19:6). Tsënöllam ima asuntutapis alliraq averiguayänan karqan y tsë asuntupaq Testïgukuna kaptinqa, rasumpa o mana rasumpa kaqta parlëkanqanta alli musyayänampaqmi tapupäyänan karqan (Deut. 19:18). Y pillapis yanapayänampaq mañakuptinqa, kuyëpam parlapäyänan karqan y manam nanaq shiminkunapaqa parlapäyänantsu karqan. Nanaq shiminkunapa parlapäyaptinqa, capazchi imanö sientikuyanqanta willayanmantsu karqan (Ex. 22:22-24). Yachakunqantsiknöpis, Job libruqa alläpachi Israelchö anciänukunata yanaparqan.

7. ¿Israelchöqa anciänukunallaku pitapis consejëta puëdiyaq? Y ¿imanöraq Job libru yanaparqan? (Proverbius 27:9).

⁷ Israelchöqa manam anciänukunallatsu pitapis consejëta puëdiyaq. Rasumpa kaqchöqa jövinkuna, mayorkuna, ollqu kaqkuna y warmi kaqkunapis jukkunatam consejarita puëdiyaq imatapis corregikuyänampaq o Diosnintsikta sirwir sïguiyänampaq (Sal. 141:5). Y rasumpa amïgukunaqa tsëtam rurayan (leyi Proverbius 27:9). Jobta visitaq kiman nunakuna rurayanqankunaman pensayanqanchi israelïtakunataqa yanaparqan, pitapis consejarnin pëkunanö lluta mana parlayänampaq o imatapis llakitsinqankunata mana rurayänampaq.

8. Pitapis consejarqa, ¿imakunatataq cuentachö katsinantsik? (Fötukunata rikäri).

⁸ ¿Imanötan noqantsiktaqa Job libru yanapamashwan? Mana allikunapa pasëkaqkunata yanaparninqa, manam Jobta visitaq kiman nunakuna rurayanqantaqa ruranantsiktsu. ¿Imakunatataq cuentachö katsinantsik? Juk, pitapis manaraq consejarmi puntataqa alliraq musyapakunantsik imakunapa pasëkanqanta y manam rasllaqa o sasllaqa juzganantsiktsu. Ishkë, manam Elifaznöqa pensanqantsikllata o yachanqantsikllataqa ninantsiktsu, tsëpa rantinqa Diospa Palabranwanmi yanapanantsik (Job 4:8; 5:3, 27). Y kima, manam nanaq shimipaqa parlapänantsiktsu ni juzganantsiktsu. Alli yarpashqaqa, Elifazwan ishkan amïgunkuna niyanqankunaqa wakin wakinqa rasumpam karqan. Tsëmi apostol Pablupis tsë niyanqankunata wakin wakinta parlarqan (igualaratsi Job 5:13 textuta 1 Corintius 3:19 textutawan). Peru masqa ulikuyarqanmi o llullakuyarqanmi, tsëmi Diosnintsikpaq rasumpa kaqta parlayarqantsu. Tsënö parlarmi Jobta llakitsiyarqan y kikin Jehoväpis mana rasumpa kaqta parlashqa kayanqantam nirqan (Job 42:7, 8). Tsëmi pitapis consejarninqa, ninqantsikkunawan o ruranqantsikkunawan pensatsinantsiktsu Jehovä mana kuyanqanta o pasëkanqankunata mana entiendinqantaqa. Peru ¿imatataq Elihüpitaqa yachakushwan? Rikärishun.

JOBTA ELIHÜ CONSEJANQAN

9. ¿Imanirtan Jobqa yanapayänanta masraq wanarqan, y imanötan Jehovä yanaparqan?

⁹ Jobpis y visitaqnin kiman nunakunapis mëtsika tiempupam parlarlla kayarqan, tsëmi parlayanqankunataqa 28 capïtulukunamanraq rakiyashqa. Y tsënö parlakurmi llapankunapis alläpa cölerashqa këkäyarqan. Y Jobqa rasumpam animayänanta, consolayänanta y corregiyänanta wanarqan. Peru ¿imanötan Jehoväqa yanaparqan? Elihüwanmi yanaparqan. Peru ¿imanirtan Elihüqa rastsu o sastsu parlakurqan? Kikinmi kënö nirqan: “Noqaqa jövinllaran kä, peru qamkunaqa mayor nunanam kayanki. Tsëmi qamkunata respetar musyanqäta parlakamurqöraqtsu” (Job 32:6, 7). Y rasumpam Elihüqa, mayor y yachaq kayaptin respetarnin upälla kakurqan. Peru Jobta y kiman visitaqnin nunakunata pacienciawan wiyaskirmi parlakunampaq decidirqan. Y kënömi nirqan: “Manam mayor kartsu pï nunapis yachaq tikran, ni manam mayor nunakunallatsu ima alli kanqanta musyayan” (Job 32:9). Y tsëpitaqa, ¿ima nirqantan?

10. ¿Imatataq Elihü rurarqan Jobta manaraq consejarnin? (Job 33:6, 7).

¹⁰ Elihüqa Jobta manaraq consejarmi, tranquïlu sientikunantaraq shuyararqan y kikimpis cöleran pasanantaraqmi shuyararqan (Job 32:2-5). Y Jobta parlapar qallarninqa, manam nanaq shimimpa parlaparqantsu, tsëpa rantinqa respëtuwan y kuyëpam parlaparqan. Kënömi nirqan: “Teyta Diospa rikënimpaqqa, noqapis qamnöllam allpapita rurashqa kä” (leyi Job 33:6, 7). Tsëpitanam Job parlanqankunata wakin wakinta yarpätsirqan. Tsëwanmi entiendikätsirqan parlanqankunata respëtuwan wiyashqa kanqanta (Job 32:11; 33:8-11). Y maslla consejarnimpis parlanqankunataqa yapëmi yarpätsirqan (Job 34:5, 6, 9; 35:1-4).

11. ¿Imanötan Elihüqa Jobta consejarqan? (Job 33:1).

¹¹ Jobta Elihü consejarninqa, respëtuwanmi consejarqan y manam penqakatsirqantsu. Tsënö respetarmi hasta jutimpapis qayarqan, peru kiman nunakunaqa manam tsëta rurayarqantsu (leyi Job 33:1). Tsënöllam consejaskirqa, parlakunanta permitirqan. Capazchi yarparqan Jobwan kiman visitaqninkuna parlakuyanqan höra, parlakunanta mana permitishqa kayanqanta (Job 32:4; 33:32). Tsënöllam Jobta consejarqan alli pensëkur parlakunampaq y yarpätsirqanmi Jehovälla yachaq, poderösu, allita ruraq, mana dejakoq y kuyakoq kanqanta (Job 36:18, 21-26; 37:23, 24). Elihü respetëpa y kuyëpa parlapaptinmi, Jobqa correginqanta chaskikurqan. Tsënö parlapanqanmi yanaparqan Jehovä corregiptimpis chaskikunampaq (Job 38:1-3). Peru ¿imanöraq israelïtakunata Elihü alli consejakoq kanqan yanaparqan y imanötan noqantsikta yanapamashwan?

12. ¿Imanötan Jehoväqa willakoqninkunawan sirweqninkunata yanaparqan, y israelïtakunaqa imataraq yachakuyarqan Elihüpita?

¹² ¿Imanöraq israelïtakunata Job libru yanaparqan? Atska tiempupam Jehoväqa willakoqninkunawan israelïtakunata yachatsirqan y corregirqan. Këkunallaman pensarishun: juezkuna kayanqan tiempuchömi Dëborata churarqan sirweqninkunata diriginampaq y Samueltanam jövinllaraq këkaptimpis churarqan, llapan israelïtakunata yachatsinampaq (Juëc. 4:4-7; 5:7; 1 Sam. 3:19, 20). Y gobernantikuna kayanqan tiempuchöpis, willakoqninkunawanmi sirweqninkunata animarqan y mana cäsukoqkunata corregirqan (2 Sam. 12:1-4; Hëch. 3:24). Elihü alli consejakoq kanqanman alli pensayanqanchi israelïtakunata y Diospa willakoqninkunatapis yanaparqan Jehovä munanqannö pitapis shumaq consejayänampaq y corregiyänampaq.

13. ¿Imanötan wawqintsikkunata y panintsikkunata Elihünö shumaq parlaparnin animashwan?

¹³ ¿Imanötan Elihü alli consejakoq kanqan yanapamashwan? Noqantsikpis unë Israelchö Diospa willakoqninkunanö y Elihünömi nunakunata Bibliawan yachatsintsik. Tsënöllam wawqikunata y panikunatapis kuyëllapa shumaq parlaparnin animantsik (1 Cor. 14:3). Y anciänukunapis, wawqikunata y panikunatam kuyëllapa parlapäyanman, hasta mana allikunapa pasarnin cölerashqa këkaqkunata o mana pensarnin lluta parlaqkunatapis kuyëllapam parlapäyanman (Job 6:3; 1 Tes. 5:14).

14, 15. ¿Imatataq juk anciänu ruranman Elihünö alli consejakoq kanampaq?

¹⁴ Këllaman pensarishun: juk congregacionchömi juk anciänu musyarin juk panintsik alläpa llakishqa këkanqanta, tsëmi anciänu mayinwan visitaqnin ëwayan. Chäriyaptinqa kë paniqa cuentar qallëkun imanö sientikunqantam. Kënömi nin: “Alläpa llakishqam këkä. Y reunionkunaman y yachatsikoq yarqurpis manam kushishqatsu kä”. ¿Imataraq kë anciänu ruranman?

¹⁵ Puntataqa, tsë pani imakunapa pasëkanqanta y imanir tsënö sientikunqantam entiendinan. Tsëta musyanampaqmi tapupänan y cuentanqankunatam atentu wiyanan. Tsëpitanam kënö pensanan: “Kë paniqa, ¿Diosnintsik mana kuyanqantatsuraq pensan? ¿Faltapakurtsuraq alläpa yarpachakuykan?” (Lüc. 21:34). Tsëpitanam anciänuqa pensanan, llakishqa këkarpis imakunata rurëkanqanman. Tsëmi reunionkunaman ëwanqampita y yachatsikoq yarqunqampita felicitänan. Tsë pani imanö këkanqanta alli entiendiskirnam, kë anciänuqa Diosnintsik alläpa kuyanqanta següru kanampaq Bibliawan yanapanan y animanan (Gäl. 2:20).

JOB LIBRUPITA YACHAKUR SÏGUISHUN

16. ¿Imatataq rurashwan Job librupita yachakurnin sïguinapaq?

¹⁶ Job librupitaqa imëkatam yachakurquntsik. Punta kaq yachatsikuychömi rikarqantsik sufrinantsikta Diosnintsik imanir permitinqanta y aguantanantsikpaq imanö yanapamanqantsikta. Këchönam yachakurquntsik alli consejakoq kanantsikpaq. Manam Jobta visitaq kiman nunakuna rurayanqanta ruranantsiktsu, tsëpa rantinqa Elihüpitam yachakunantsik alli consejakoq këta. Tsëqa, pitapis consejanantsik kaptinqa, allichi kanman Job librupita yachakunqantsikkunata yarpärinqantsik. Peru unëpana Job libruta mana leyishqa karqa, allim kanman yapë leyinqantsik. Tsënöpam Job librupitaqa maskunata yachakuyta puëdishun.