Öropita wishi

¡MANACHI alliqa këkunmantsu! ¿Imatanataq kananqa rurarëkäyan nunakuna? ¡Huk wishimanmi mañakïkäyan! ¿Imanir-raq këtaqa rurëkäyan?

‘¿Imaraq Moisestaqa pasashqa?, manam musyantsiktsu, mejorqa huk diosnintsik rurashun këpita horqamänantsikpaq,’ nishpash niyänaq israelïtakuna, hirkapita kutimurnin Moisés demorëkamuptin.

Moisespa wawqin Aaronpis: ‘Tsëpenqa tsë öropita arëtikikunata qoturïkur apayämi,’ ninaqshi. Ëllupakurir aparayäpuptinnash, Aarón tsullüratsirnin rurarinaq öropita wishita. ‘¡Këmi Egiptopita horqamaqnintsik Teyta Dios!,’ nishpash nunakuna niyänaq. Tsënash öropeq wishita adorëkuyan fiestata rurarnin.

Tsënash, ‘kananqa öropeq rurashqa wishimanmi qonqurikïkäyan, leynïkunatapis qonqariyashqanam, alläpa mana allim portakïkäyan, raslla yarpï,’ nishpash ninaq Jehová Moisesta. Y kë llapanta rikëkurshi Jehová alläpa piñëkunaq.

Tsë hörash hirkapita yarparamunaq Moisés. Y yëkurëkarnash: ¡Wishi nöpanchö tushullapa cantakïkäyaqta rikëkunaq! Tsënash, limpu ushakaqpaq tsë ishkë palta rumikunachö leykunatapis tsampilinaq alläpa piñarnin. Y tsullütsirshi tsë öropeq wishitapis limpu ushakäratsinaq.

Alläpa mana allitash tsë nunakuna rurëkuyashqa. Tsënash, ‘espädëkikunata tsaräyë,’ ninaq Moisés wakin nunakunata. ‘Wanuyänanmi tsë öropeq wishi adoraq mana alli nunakunaqa,’ ninshi Moisés. ¡Tsënash, 3.000 nunakunata wanïkatsiyänaq! ¿Manaku kë yachatsimantsik uli dioskunata mana adorashpa Jehovällata adoranapaq?