Änikuyanqantaqa manam cumpliyarqantsu

Jehovämi Moisesta kënö nirqan: “Noqa këkanqäyaq witsämuy. Israelïtakuna yachakuyänampaqmi llapan mandakunqäkunata palta rumikunaman qellqamushaq”. Tsënam Moisesqa witsarqan, y 40 junaq y 40 paqasmi tsëchö quedakurqan. Tsëchö këkaptinmi Jehoväqa Chunka Mandamientukunata palta rumiman qellqarqan, y nïkurmi pëta entregarqan.

Peru Moises manana kutinampaq kaqta pensarmi, israelïtakunaqa Aaronta kënö niyarqan: “Pushayämänampaq diosnïkuna ruramunëkita munayä”. Tsënam Aaronqa kënö nirqan: “Örupita cösasnikikunata apayämuy”. Y juntayanqan öruta tsulluratsirnam juk becërruta rurarirqan. Tsënam israelïtakunaqa kënö niyarqan: “Këmi Diosnintsik. Pëmi Egiptupita pushamarquntsik”. Tsëpitanam fiestata rurayarqan y tsë becërruta adorar qallëkuyarqan. ¿Tsëta rurayanqanqa allitsuraq karqan? Manam, israelïtakunaqa Jehovällata adorayänampaqmi änikushqa kayarqan, y manam cumplikäyarqantsu.

Jehoväqa llapan pasakunqantam rikëkarqan, tsëmi Moisesta kënö nirqan: “Israelïtakunaman ëwë, pëkunaqa mana allikunatam rurëkäyan”. Tsënam Moisesqa ishkan palta rumikunata aparkur jirkapita urarqan.

Israelïtakunaman chëkarnam Moisesqa cantar këkäyaqta wiyarqan, y chärirnam örupita rurashqa becërruta tushur adorëkäyaqta rikarqan. Y alläpa cölerarmi apëkanqan palta rumikunata ushakaqpaq jitaskirqan. Y örupita rurashqa becërrutapis jinan höram ushakäratsirqan, y Aarontam kënö tapurqan: “¿Imata niyäshuptikitaq israelïta mayintsikkunata kë alläpa jutsaman chätsirqunki?”. Aaronnam kënö nirqan: “Ama noqawan cölerakuytsu teytallë, musyanqëkinöpis israelïta mayintsikkunaqa imëpis mana allillatam rurayan. Juk diosta munayaptinmi öruta tsulluratsir becërruta rurëkurqä”. Peru Aaron ruranqanqa mana allim karqan. Tsënam Moisesqa tsë jirkaman yapë witsarqan, y israelïtakunata perdonëkunampaqmi Jehoväman mañakurqan.

Cäsukoq kaqkunataqa Jehovä perdonarqanmi. Pëkunaqa Jehoväta y Moisestam imëpis cäsukuyänan karqan.