¿Imanötaq pagakuyä entëru Patsachö yachatsikuyänäpaq?

Wata watam Jehoväpa testïgunkunaqa atska millon Bibliakunata y tukïläya publicacionkunata jorqayämö y munaqkunapaq jaqiyä, Yachatsikuyänan Wayikunata, sucursalkunata rurayä y altsayä, atska waranqa betelïtakunapa y misionërukunapa gastunkunata pagakuyä, y desgraciakuna kanqan sitiukunata tukïwan yanapayä. ¿Mëpitataq kë llapampaq qellëta jorqayä?

Cuötakunata ni diezmukunata manam mañakuyätsu. Diospita yachatsikuyänäpaq atska qellëta necesitarpis, manam nunakunata (runakunata) qellëta mañayätsu. Juk pachak watapitapis masnam Täpakoq revistaqa cläru willakurqan Jehovä llapanchö yanapayämänampaq kaqta. Tsëpitam nirqan: “[Diospa markanqa] manam ni imë limosnata ni nunakunapa yanapakïninta ashir purinqatsu”. Y tsënömi kashqa (Mateu 10:8).

Shonqupita ëkallatapis qoyanqäwanmi pagakuyä. Atskaqmi alläpa kushikuyan Bibliapita yachatsikuyanqäta rikar y tsëmi shonqunkunapita ëkallawampis yanapakayämun. Kikï Testïgukunapis entëru Patsaman Diospa yachatsikïnin chänampaqmi tiempökunawan, kallpäkunawan y kayäpamanqanwan yanapakuyä (1 Crónicas 29:9). Yachatsikuyänan Wayichö y asamblëakunata rurayanqä localchömi cäjakuna kan munaq kaq ëkallatapis winariyänampaq. Jina Internetchö jw.org. päginäkunapapis yanapakïta puëdiyanmi. Ëkallatapis winayanqanqa waktsakunapitam höraqa shamun, tsëmi rikätsikun Jesus alabanqan waktsa viuda llapan kapunqanta winaqnö kayanqanta (Lücas 21:1-4). Pipis “shonqun[chö] sientenqanmanno” ëkallawampis yanapakïta munarqa puëdinqantam rakirinman (1 Corintios 16:2; 2 Corintios 9:7).

Alleqmi musyayä kayäpunqankunawan yanapakoqkunata Jehovä mas munatsinanta, tsënöpa Diospa Gobiernumpita yachatsikïta y Diospa munënin rurakänampaq yanapakur sïguiyänampaq (Proverbius 3:9).

• ¿Imachötaq Jehoväpa markan jukläya wakin religionkunapita?

• ¿Imakunachötaq gastayan qoyanqan qellëkunata?