¿Imanötaq gastunkunata pagakuyan?

Cada watam mëtsika Bibliakunata y publicacionkunata imprimiyä y qarakuyä. Entëru Patsachömi sucursalnïkuna rurayarqö y wakinchöqa imprimiyämi. Y waranqëpayanmi më tsëpa alli patsätsishqa këkäyä, humildi y shumaq wayikunachömi juntakäyä, tsëtaqa Diospita Yachatsikuyänä Wayikuna nirmi reqiyä. ¿Pitaq tsë llapanta pagakun?

Llapan gastükunataqa shonqupita patsë qoyanqäkunawanmi pagakuyä (2 Corintius 9:7, NM). 1879 watapaqqa, Zion’s Watch Tower nishpam kë revistapa jutinqa karqan, y tsëchömi kënö nirqan: “Creiyä [kë revista] JEHOVÄPA yanapakïninta katsinqantam, tsënö kanqanyaqqa manam limosnata ni nunakunapa yanapakïninta ni imë wananqatsu”. Kananyaqpis tsënöllam pensayä.

Donaciontaqa mëqan sucursalmampis apatsita puëdiyanmi o Diospita Yachatsikuyänä Wayikunachö cäjakunamanmi winëta puëdiyan. Yachatsikuyanqärëkur ni publicacionnïkunarëkurqa manam diezmuta ni cötakunata mañakuyätsu. Nunakunata yachatsiyanqärëkur, iglësiäkunachö yachatsikuyanqärëkur y Diospita Yachatsikuyänäpaq Wayikunata rurayanqärëkurqa manam ni pï pagayämantsu. Porqui Jesusqa nirqan: “Debaldillam chaskiyarqunki y debaldilla qarakuyë” (Mateu 10:8, NM). Principal oficïnäkunachö y sucursalnïkunachö trabajaq cristiänukuna, ni Jehoväpa Testïgunkunata Pushaqkunapis manam suelduta chaskiyantsu.

Donacionkunataqa utilizäyä desgraciakuna pasakuptin yanapanakuyänäpaqmi. Apostolkuna kawayanqan witsan cristiänukunapis sasa (aja) tiempukunachö yanapanakuyarqanmi (Romänus 15:26). Kanan witsampis desgraciakuna pasakuptinqa yanapanakuyämi, cristiänukunapa wayinkunata altsarnin, mikïninkuna, röpankuna y jampinkuna qornin. Jina tsë markakunachö malograshqa Diospita Yachatsikuyänä Wayikunatam altsayä.