¿Imanötaq Yachatsikuyänan Wayichö bibliotëcata alli provechashwan?

¿Bibliapita mas yachakïta munankimantsuraq? ¿Mas musyëta munankimantsuraq juk versïculupita, Biblia parlanqan markakunapita, nunakunapita o ima pasakunqankunapita? ¿Imëllapis tapukushqankiku problëmëkikunachö Diospa Palabran yanapashunëkipaq kaqta? Tsënö kaptinqa, allichi kanman Yachatsikuyänan Wayichö bibliotëkaman ëwëkur yachakunqëki.

Bibliotëcachöqa atska yanapakïkunam kan. Quizä Jehoväpa testïgunkuna jorqayämunqan llapan publicacionkunaqa idiömëkichö kapushunkitsu, peru Yachatsikuyänan Wayipa bibliotëkanchöqa tsëraq yarqamushqa llapan publicacionkunam kan. Quizä tsëchöqa kan tukï läya Bibliakuna, diccionariukuna y mas yanapakoq librukunapis. Reunion manaraq qallaptin o ushariptinmi tsëmanqa ëwëta puëdinki. Computadora kaptinqa quizä churayashqa Watchtower Library nishqan progrämata, tsëchöqa cäsi llapan publicacionkunam këkan y fäcil-llam tëmapa, palabrakunapa o versïculukunapa ashirinki.

Cristiänunö Kawakunapaq reunionchö asignacionyoqkunatapis kë bibliotëkaqa yanapanmi. Bibliotëcachö ultimu kaq publicacionkuna y shumaq ordenädu kanampaqqa Cristiänunö Kawakunapaq reunionta dirigeqmi rikan. Pë o Bibliapita yachatsishoqnikim yanaparishunki necesitanqëki yachatsikïta imanö tarinëkipaqpis. Peru manam ni mëqan librukunata apakunantsiktsu, jina shumaqmi cuidanantsik y manam marcanantsiktsu.

Bibliam kënö nin: ‘Kikin Diospa yachëninta’ tarinapaqqa imëka “pakashqa riquëzakunatano[mi]” imëpis ashinantsik (Proverbius 2:1-5). Yachatsikuyänan Wayichö bibliotëcaqa alläpam yanapakun yachakïta munanqantsikta ashinapaq.

• ¿Ima yanapakïkunataq kan Yachatsikuyänan Wayipa bibliotëkanchöqa?

• ¿Pitaq yanaparishunkiman bibliotëcachö publicacionkunata alli provechanëkipaq?