Puka lamarchömi Jehovä milagruta rurarqan

Israelïtakuna Egiptupita ëwakushqa kayanqanta wiyarirqa, faraonqa alläpam cölerëkurqan y soldädunkunatam kënö nirqan: “Guërrapaq rurashqa carrëtäkunata alistayë, y qepankunata ëwashun, ardëmi libri dejarquntsik”. Tsënam soldädunkunata pusharkur israelïtakunata qatipar ëwarqan.

Junaqpaqa juk pukutëwanmi Jehoväqa sirweqninkunata pusharqan, y paqaspanam rawrëkaq o lunyëkaq ninawan. Puka lamar kuchunmanmi chäratsirqan, y tsëchö quedakuyänampaqmi nirqan.

Tsëpitanam israelïtakunaqa faraonwan soldädunkuna qepankunachöna këkaqta rikäriyarqan, y lamar kuchunchö karmi ni mëpa ëwëta puëdiyarqantsu. Tsëmi Moisesta cölerar kënö niyarqan: “¡Kananqa llapantsikmi ushakäshun! ¿Imanirtaq Egiptupita këman apayämarqunki?”. Peru Moisesqa kënömi nirqan: “¡Ama mantsakäyëtsu, valienti kayë! Kananmi rikäshun Teyta Jehovä imanö salvamanqantsikta”. Moisesqa llapan shonqunwanmi Jehoväman confiakurqan.

Israelïtakunatam Jehovä nirqan carpankunata ëllupakuyänampaq o qoripakuyänampaq. Y puntankunata ëwëkaq pukutëmi qepankunaman churakarqan y tsënömi egipciukunapa puntankunaman churakärirqan. Egipciukuna këkäyanqan lädupaqa pasëpam ampirqan o tsakarqan, peru israelïtakuna këkäyanqampaqa shumaqmi atsikyarqan.

Tsëpitanam Jehoväqa Moisesta nirqan tukrunta lamarman kamanampaq. Tsënam Jehoväqa entëru paqas vientutsirqan, y lamarqa ishkëmanmi rakikarqan y llapan israelïtakunam tsaki patsapa tsimpayarqan.

Faraonwan soldädunkunaqa israelïtakunapa qepankunatam yëkuyarqan. Peru Jehovä ruranqankunata rikëkurmi mantsakäyarqan, y carrëtankunapa ruëdankunapis yarqukarmi usharqan. Tsënam soldädukunaqa kënö nir qayaräyarqan: “¡Jehovämi israelïtakunata yanapar noqantsikwan pelyëkan! ¡Ama qatipar ëwashunnatsu!”.

Tsënam Jehoväqa Moisesta kënö nirqan: “Tukruykita lamarman kamë”. Tsënam lamarqa rakikashqa këkanqampita juntakärirqan, y faraontawan llapan soldädunkunatam ushakätsirqan. Manam ni jukpis salvakurqantsu.

Tsënam israelïtakunaqa lamarpa wak tsimpanchö Diosta alabar kënö cantayarqan: “Alläpa puëdeq kanqanta rikätsikushqa kaptinmi Teyta Jehoväpaq cantashaq. Pëqa cawallukunatawan soldädukunatam lamarchö ushakätsishqa”. Y warmi kaqkunanam tushur y panderëtakunata tocar kayarqan. Rasumpa librina karmi alläpa kushikuyarqan.