Jehoväpa angelninmi Ezequïasta salvarqan

Asiria nacionpa soldädunkunam Israelchö chunka kastakunata ushakätsishqa kayarqan. Y Asiria nacionchö gobernaq Senaqueribqa Judächö ishkë kastakunatapis ushakätsitam munarqan. Tsëmi Judächö markakunata ichikllapa ichikllapa duëñutsakur qallëkurqan. Masqa Jerusalen markatam ushakätsita munarqan. Peru tsë markata Jehovä cuidëkanqantaqa manam musyarqantsu.

Judäpa gobernantin Ezequïasqa mëtsika qellëtam Senaqueribta entregarqan Jerusalenta mana ushakätsinampaq. Tsënö paguëkaptimpis gobernanti Senaqueribqa soldädunkunatam Jerusalenman mandarqan. Tsëta musyarirmi Jerusalenchö nunakunaqa alläpa mantsakäyarqan. Peru Ezequïasqa kënömi nirqan: “Ama mantsakäyëtsu. Asiria nunakuna puëdeq kayaptimpis, Senaqueribtaqa nunakunallam yanapëkäyan, peru noqantsiktaqa Jehovä Diosnintsikmi yanapëkämantsik”.

Senaqueribqa willakoqnin rabsaquëtam mandarqan Jerusalenchö täraq nunakunapita burlakunampaq. Tsëmi Jerusalenpa punkunman chärir kënö nirqan: “Jehoväqa manam yanapayäshunkitsu. Ama dejayëtsu Ezequïas tsëta creitsiyäshunëkita. Noqakunapitaqa manam ni mëqan diospis tsapäyäshunkitsu”.

Ezequïasqa Jehovätam tapurqan “¿imatataq rurashaq?” nirnin. Tsënam Jehoväqa kënö nirqan: “Ama mantsëtsu rabsaquë nishunqëkita. Senaqueribqa manam Jerusalenta ushakätsinqatsu”. Tsëpitam Ezequïasqa Senaqueribpa cartanta chaskirqan, y tsë cartachöqa kënömi nirqan: “Jehovä Diosnïkunamanmi confiakuyä niyämaptikipis, pëqa manam yanapayäshunkitsu”. Tsënam Ezequïasqa kënö mañakurqan: “Jehovä Dioslläkuna Asiriachö gobernaqpa makimpita salvëkayämë. Tsënöpa entëru patsachö mëtsë nacionpita nunakuna, qamlla Teyta Dios kanqëkita musyayänampaq”. Jehovänam kënö nirqan: “Asiriachö gobernantiqa manam kë markaman yëkamunqatsu, noqam markäta tsapäshaq”.

Senaqueribqa Jerusalenta raslla ushakäratsinampaq kaqtam pensarqan. Peru tsë paqasllam Teyta Jehoväpa angelnin, asiriukunapa campamentunchö 185.000 soldädukunata wanutsirqan. Tsënam Asiriapa gobernaqnin Senaqueribqa, Nïniviman kutir tsëchö quedakurqan. Änikunqannöllam Jehoväqa Ezequïasta y Jerusalen markata salvarqan. Tsë witsan Jerusalenchö kawashqa karqa, ¿Jehoväman confiakunkimantsuraq karqan?